ಬೆಂಗಳೂರು: ತಮಿಳುನಾಡು ಸರ್ಕಾರ ಬೆಂಗಳೂರು ಸಮೀಪದ ಹೊಸೂರಿನಲ್ಲಿ ವಿಮಾನ ನಿಲ್ದಾಣದ ಘೋಷಣೆ ಮಾಡಿರಬಹುದು. ಆದರೆ ನಾವು ಯಾವುದೇ ಹಿತಾಸಕ್ತಿ ಇಲ್ಲದೆ, ಕೇವಲ ರಾಜ್ಯ ಹಾಗು ಬೆಂಗಳೂರು ಹಿತದ ದೃಷ್ಟಿಯನ್ವಯ ಕಾರ್ಯಸಾಧು ಆಧಾರದಲ್ಲಿಯೇ ಸ್ಥಳ ಗುರುತಿಸಿ ಎರಡನೇ ವಿಮಾನ ನಿಲ್ದಾಣವನ್ನು ಬೆಂಗಳೂರಿನಲ್ಲಿಯೇ ನಿರ್ಮಿಸುತ್ತೇವೆ. ತಜ್ಞರ ವರದಿ ಆಧಾರದಲ್ಲಿಯೇ ಸ್ಥಳವನ್ನು ಅಂತಿಮಗೊಳಿಸಲಾಗುತ್ತದೆ ಎಂದು ಕೈಗಾರಿಕಾ ಸಚಿವ ಎಂ.ಬಿ ಪಾಟೀಲ್ ಸ್ಪಷ್ಟಪಡಿಸಿದ್ದಾರೆ.
ವಿಧಾನ ಪರಿಷತ್ ಕಲಾಪದ ಶೂನ್ಯವೇಳೆಯಲ್ಲಿ ಜೆಡಿಎಸ್ ಸದಸ್ಯ ಜವರಾಯಿಗೌಡ ಪ್ರಸ್ತಾಪಕ್ಕೆ ಉತ್ತರಿಸಿದ ಸಚಿವರು, 2033ರ ವೇಳೆಗೆ ಈಗಿರುವ ವಿಮಾನ ನಿಲ್ದಾಣದ ಮೇಲಿನ ಕಾರ್ಯಭಾರ ಹೆಚ್ಚಾಗಲಿದೆ. ಪ್ರಯಾಣಿಕರು ಮತ್ತು ಕಾರ್ಗೋ ಒತ್ತಡ ದೊಡ್ಡ ಪ್ರಮಾಣದಲ್ಲಿ ಹೆಚ್ಚಾಗಲಿದೆ. ಹಾಗಾಗಿ ಮತ್ತೊಂದು ವಿಮಾನ ನಿಲ್ದಾಣಕ್ಕೆ ನಾವು ಮುಂದಾಗಿದ್ದೇವೆ. ನಮ್ಮ ನಿರ್ಧಾರದ ನಂತರವೇ ತಮಿಳುನಾಡು ಸರ್ಕಾರ ಹೊಸೂರಿನಲ್ಲಿ ವಿಮಾನ ನಿಲ್ದಾಣ ನಿರ್ಮಾಣಕ್ಕೆ ಮುಂದಾಗಿದೆ. ಆದರೆ ನಾವು ಅವರ ರೀತಿ ಸ್ಥಳದ ಹೆಸರು ಪ್ರಕಟಿಸುತ್ತಿಲ್ಲ. ನಾವು ಈಗಾಗಲೇ ಚರ್ಚೆ ಮಾಡಿ ತಜ್ಞರ ಜೊತೆ ಎರಡು ಸಭೆ ನಡೆಸಿ ಅಭಿಪ್ರಾಯ ಪಡೆದು ಆನ್ ಮೆರಿಟ್ ಮೇಲೆ ಯಾವುದೇ ವೈಯಕ್ತಿಕ ಹಿತಾಸಕ್ತಿ ಇಲ್ಲದೆ ಯಾವ ಸ್ಥಳ ಎಂದು ನಿರ್ಧಾರ ಮಾಡಲಿದ್ದೇವೆ ಎಂದರು.
2035 ರ ವೇಳೆಗೆ 100 ಮಿಲಿಯನ್ ಪ್ರಯಾಣಿಕರ ಸಂಖ್ಯೆ ಆಗಲಿದ್ದು, ಅವರೆಲ್ಲರಿಗೂ ಅನುಕೂಲವಾಗಬೇಕು ಎಂದು ಹೊಸ ವಿಮಾನ ನಿಲ್ದಾಣ ನಿರ್ಮಾಣ ಮಾಡಲಿದ್ದೇವೆ. ಸಂಚಾರ ದಟ್ಟಣೆ, ಅಗತ್ಯತೆ, ಫಿಸಿಬಿಲಿಟಿ, ರಾಜ್ಯದ ಹಿತಾಸಕ್ತಿ ನೋಡಿಯೇ ನಿರ್ಮಾಣ ಮಾಡಲಾಗುತ್ತದೆ. ಎಲ್ಲಿ ಎಂದು ಇನ್ನು ಅಂತಿಮವಾಗಿಲ್ಲ. ಕಾರ್ಯಸಾಧು ನೋಡಿಕೊಂಡೇ ಸ್ಥಳವನ್ನು ಅಂತಿಮಗೊಳಿಸಲಾಗುತ್ತದೆ ಎಂದರು.
ರಾಜ್ಯದಲ್ಲಿ ಸೆಮಿ ಕಂಡಕ್ಟರ್ ಘಟಕ ಸ್ಥಾಪನೆಗೆ ಕೇಂದ್ರದ ನೆರವು ಬೇಕು: ರಾಜ್ಯದಲ್ಲಿ ಯಾವುದೇ ಸೆಮಿ ಕಂಡಕ್ಟರ್ ತಯಾರಿಕಾ ಘಟಕಗಳನ್ನು ಸ್ಥಾಪಿಸಿಲ್ಲ. ಸ್ಥಾಪನೆ ಕುರಿತ ಚರ್ಚೆಗಳು ಆರಂಭಿಕ ಹಂತದಲ್ಲಿದ್ದು, ಘಟಕಗಳು ಬರಲು ಕೇಂದ್ರದ ಸಹಕಾರ ಮುಖ್ಯ, ನಾವು ಅಗತ್ಯ ಸಹಕಾರಕ್ಕೆ ಸಿದ್ಧ ಎಂದು ಐಟಿ ಬಿಟಿ ಸಚಿವ ಪ್ರಿಯಾಂಕ್ ಖರ್ಗೆ ತಿಳಿಸಿದರು.
ವಿಧಾನ ಪರಿಷತ್ ಪ್ರಶ್ನೋತ್ತರ ಕಲಾಪದಲ್ಲಿ ಜೆಡಿಎಸ್ ಸದಸ್ಯ ತಿಪ್ಪೇಸ್ವಾಮಿ ಪ್ರಶ್ನೆಗೆ ಉತ್ತರಿಸಿದ ಸಚಿವರು, ಭಾರತವು ಚಿಪ್ ತಯಾರಿಕೆ ಬಗ್ಗೆ ಇಂಡಿಯನ್ ಸೆಮಿ ಕಂಡಕ್ಟರ್ ಮಿಷನ್ ಅಡಿಯಲ್ಲಿ 4 ಯೋಜನೆಗಳನ್ನ ಹೊರ ತಂದಿದೆ. ನಮ್ಮ ರಾಜ್ಯಕ್ಕೆ ಇದು ಪ್ರಮುಖ ಯೋಜನೆ. ಕೇಂದ್ರದ ಯೋಜನೆ ಜೊತೆ ರಾಜ್ಯವೂ ಇನ್ಸೆಟೀವ್ಗಳನ್ನ ಕೊಡ್ತಿದೆ. ಕರ್ನಾಟಕದಲ್ಲಿ ವಿಶೇಷ ನೀತಿ 2025 ಅಂತ ಜಾರಿ ಮಾಡಲಾಗಿದೆ. ಪ್ರಸ್ತುತ ಯಾವುದೇ ಸೆಮಿ ಕಂಡಕ್ಟರ್ ತಯಾರಿಕೆ ಘಟಕ ಸ್ಥಾಪನೆ ಆಗಿಲ್ಲ. ಆದರೆ ರಾಜ್ಯದಲ್ಲಿ ಸೆಮಿ ಕಂಡಕ್ಟರ್ ಘಟಕಗಳನ್ನು ಸ್ಥಾಪಿಸುವ ಚರ್ಚೆ ಆರಂಭಿಕ ಹಂತದಲ್ಲಿದೆ. ರಾಜ್ಯದಲ್ಲಿ ಸೆಮಿ ಕಂಡಕ್ಟರ್ ತರಲು ವಿಶೇಷ ಪಾಲಿಸಿ ಮಾಡಲಾಗಿದೆ ಎಂದರು.
ಹುಬ್ಬಳ್ಳಿ-ಧಾರವಾಡದಲ್ಲಿ 224.5 ಎಕರೆಗಳಲ್ಲಿ ಹರಡಿರುವ EMC 2.0 179.14 ಕೋಟಿಗಳ ಒಟ್ಟಾರೆ ವೆಚ್ಚದೊಂದಿಗೆ EMC 2.0 ಯೋಜನೆಯ ಭಾಗವಾಗಿ ಎಂಇಐಟಿವೈ ನಿಗಮದ ಅನುಮೋದನೆ ಮಾಡಲಾಗಿದೆ. ಮೈಸೂರಿನಲ್ಲಿ 245.67 ಎಕರೆಯಲ್ಲಿ EMC 2.0 ಪ್ರಸ್ತಾಪನೆಯನ್ನ ಸಲ್ಲಿಸಲಾಗಿದೆ. ಸೆಮಿ ಕಂಡಕ್ಟರ್ ಹೆಚ್ಚು ಗುಜರಾತ್ಗೆ ಹೋಗುತ್ತವೆ. ದಕ್ಷಿಣ ಭಾರತಕ್ಕೆ ಸೆಮಿ ಕಂಡಕ್ಟರ್ಗಳನ್ನ ತರೋದು ತುಂಬಾ ಕಷ್ಟ. ಆದರೂ ಕರ್ನಾಟಕ ಹಲವು ವಿಶೇಷ ಸವಲತ್ತುಗಳನ್ನು ನೀಡಲು ಸಿದ್ಧವಿದೆ. ತಮಿಳುನಾಡಿಗಿಂತ ಹೆಚ್ಚು ಸೌಲಭ್ಯಗಳನ್ನ ಕರ್ನಾಟಕ ನೀಡಲಿದೆ ಎಂದು ಭರವಸೆ ನೀಡಿದರು.
ಪ್ರಿಯಾಂಕ್ ಖರ್ಗೆಗೆ ಪೂರಕವಾಗಿ ಉತ್ತರ ನೀಡಿದ ಸಚಿವ ಎಂ ಬಿ ಪಾಟೀಲ್, ಸೆಮಿ ಕಂಡಕ್ಟರ್ಗಳು ರಾಜ್ಯಕ್ಕೆ ಬರಬೇಕಾದ್ರೆ ಕೇಂದ್ರ ಸರ್ಕಾರದ ಸಹಕಾರ ಬೇಕು. ಕೇಂದ್ರ ಸರ್ಕಾರದವರು ಎಲ್ಲಿಗೆ ಹೋಗಿ ಅಂತ ಸೂಚನೆ ಕೊಡ್ತಾರೋ ಅಲ್ಲಿಗೆ ಸೆಮಿ ಕಂಡಕ್ಟರ್ಗಳು ಹೋಗುತ್ತವೆ. ಹೀಗಾಗಿ ಕೇಂದ್ರ ಸರ್ಕಾರ ನಮ್ಮ ರಾಜ್ಯಕ್ಕೂ ಹೋಗಲಿ ಅಂತ ಸೂಚನೆ ಕೊಡಲಿ. ಕೇಂದ್ರದಲ್ಲಿ ಕುಮಾರಸ್ವಾಮಿ ಮಂತ್ರಿಯಾಗಿದ್ದಾರೆ. ಈ ಬಗ್ಗೆ ಸ್ವಲ್ಪ ಸಹಕಾರ ನೀಡಲಿ ಅಂತ ಜೆಡಿಎಸ್ ಸದಸ್ಯ ತಿಪ್ಪೇಸ್ವಾಮಿಗೆ ತಿಳಿಸಿದರು.
ಓದಿ: ಬೆಂಗಳೂರಿನಲ್ಲಿ ಕೆರೆ ಒತ್ತುವರಿ ಯಾವುದೇ ಮುಲಾಜಿಲ್ಲದೆ ತೆರವು : ಡಿ ಕೆ ಶಿವಕುಮಾರ್ - Lake encroachment
