ಅನಿಲ್ ಲಾಡ್ ಪ್ರಕರಣ: ಗಾಢ ನಿದ್ರೆಯಿಂದ ಎದ್ದು ಬರುವವರಿಗೆ ಕೋರ್ಟ್ ಬಾಗಿಲು ಮುಚ್ಚಿರುತ್ತದೆ-ಹೈಕೋರ್ಟ್

ಮಾಜಿ ಶಾಸಕ ಅನಿಲ್ ಲಾಡ್ ಅವರು ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಿದ ಹೈಕೋರ್ಟ್​ ಪೀಠ, ನ್ಯಾಯಾಲಯವನ್ನು ತಪ್ಪು ದಾರಿಗೆಳೆಯುವವರಿಗೆ ಕೋರ್ಟ್ ಬಾಗಿಲುಗಳು ಮುಚ್ಚಿರುತ್ತವೆ ಎಂದು ಚಾಟಿ ಬೀಸಿದೆ.

ಬೆಂಗಳೂರು: ಅಮೆರಿಕದ ಲೇಖಕ ವಾಷಿಂಗ್ಟನ್ ಇರ್ವಿನ್ ಅವರ ಪುಸ್ತಕ ರಿಪ್ ವ್ಯಾನ್ ವಿಂಕಲ್ಸ್ (ಗಾಢ ನಿದ್ರೆಗೆ ಜಾರುವ ಕುರಿತಾದದ್ದು) ಬಗ್ಗೆ ಉಲ್ಲೇಖಿಸಿರುವ ಹೈಕೋರ್ಟ್, ಸುಮಾರು ಒಂಬತ್ತು ವರ್ಷಗಳ ಕಾಲ ವಿಳಂಬವಾಗಿ ನ್ಯಾಯಾಲಯದ ಮೆಟ್ಟಿಲೇರಿದ್ದಲ್ಲದೇ, ನ್ಯಾಯಾಲಯವನ್ನು ತಪ್ಪು ದಾರಿಗೆಳೆಯುವ ಹೇಳಿಕೆಗಳನ್ನು ನೀಡಿದ ಮಾಜಿ ಕಾಂಗ್ರೆಸ್ ಶಾಸಕ ಅನಿಲ್ ಹೆಚ್.ಲಾಡ್ ಅವರಂಥವರಿಗೆ ನ್ಯಾಯಾಲಯದ ಬಾಗಿಲುಗಳು ಮುಚ್ಚಿರುತ್ತವೆ ಎಂದು ತಿಳಿಸಿತು.

ಸಾಲ ವಸೂಲಾತಿ ನ್ಯಾಯಮಂಡಳಿ (ಡಿಆರ್‌ಟಿ) 2015ರಲ್ಲಿ ಹೊರಡಿಸಿದ್ದ ಆದೇಶದ ಕಾನೂನು ಬದ್ಧತೆಯನ್ನು ಪ್ರಶ್ನಿಸಿ ಅನಿಲ್ ಲಾಡ್ ಸಲ್ಲಿಸಿರುವ ಅರ್ಜಿ ವಿಚಾರಣೆಯನ್ನು ನ್ಯಾಯಮೂರ್ತಿ ಎಂ.ನಾಗಪ್ರಸನ್ನ ಅವರಿದ್ದ ಪೀಠ ನಡೆಸಿತು. ಪ್ರಕರಣದಲ್ಲಿ 2014-15ರಲ್ಲಿ ಡಿಆರ್‌ಟಿ ಮುಂದೆ ಲಾಡ್ ಅವರು ಹರಾಜನ್ನು ಪ್ರಶ್ನಿಸಿಲ್ಲ. ಅಲ್ಲದೆ, ಬ್ಯಾಂಕ್ ಅವರಿಗೆ ಎರಡು ಬಾರಿ ಇಮೇಲ್ ಮೂಲಕ ಮಾರಾಟ ಪ್ರಮಾಣ ಪತ್ರವನ್ನು ಕಳುಹಿಸಿರುವ ಅಂಶ ದಾಖಲೆಗಳಿಂದ ತಿಳಿದು ಬಂದಿದೆ. ಆದರೆ, ಈ ಬಗ್ಗೆ ತಮ್ಮ ಗಮನಕ್ಕೆ ಬಂದಿಲ್ಲ ಎಂದು ಹೇಳುವ ಮೂಲಕ ನ್ಯಾಯಾಲಯವನ್ನು ತಪ್ಪು ದಾರಿಗೆಳೆಯಲು ಮುಂದಾಗಿದ್ದಾರೆ ಎಂದು ಪೀಠ ಹೇಳಿದೆ.

ಪ್ರಕರಣದ ಹಿನ್ನೆಲೆ: 2008ರಲ್ಲಿ ತಮ್ಮ ಕಂಪನಿಗಳಲ್ಲೊಂದಾದ ವಿ.ಎಸ್.ಲಾಡ್ ಆ್ಯಂಡ್ ಸನ್ಸ್‌ಗೆ ನೀಡಿದ 12.67 ಕೋಟಿ ರೂ.ಗಳ ಸಾಲ ಸೌಲಭ್ಯಕ್ಕೆ ಖಾತರಿದಾರರಾಗಿ ಜಮೀನನ್ನು ಬ್ಯಾಂಕ್‌ಗೆ ಗ್ಯಾರಂಟಿ ನೀಡಿದ್ದರು. ಬ್ಯಾಂಕ್‌ಗೆ ಹಣ ಪಾವತಿ ಮಾಡದ ಹಿನ್ನೆಲೆಯಲ್ಲಿ ಖಾತರಿ ಜಮೀನನ್ನು ಬ್ಯಾಂಕ್ ಹರಾಜು ಮೂಲಕ ಮಾರಾಟ ಮಾಡಿತ್ತು. ಹರಾಜಿನಲ್ಲಿ ಲಾಡ್ ಅವರ ಅಡಮಾನ ಆಸ್ತಿ ಖರೀದಿಸಿದ ಸಂಸ್ಥೆಗೆ ಪಂಜಾಬ್ ನ್ಯಾಷನಲ್ ಬ್ಯಾಂಕ್ 2014ರಲ್ಲಿ ಮಾರಾಟ ಪ್ರಮಾಣ ಪತ್ರ ವಿತರಿಸಿತ್ತು. ಈ ಕ್ರಮವನ್ನು ಡಿಆರ್‌ಟಿ ಎತ್ತಿ ಹಿಡಿದಿದೆ. ಇದನ್ನು ಪ್ರಶ್ನಿಸಿ ಲಾಡ್ ಹೈಕೋರ್ಟ್ ಮೆಟ್ಟಿಲೇರಿದ್ದರು.

ವಿಚಾರಣೆಯಲ್ಲಿ ಅರ್ಜಿದಾರರ ಪರ ವಕೀಲರು, ಆಸ್ತಿ ಮಾರಾಟದ ಕುರಿತು ಬ್ಯಾಂಕ್ ವಂಚಿಸಿದೆ. ಅಲ್ಲದೆ, ಮಾರಾಟದ ಕುರಿತಂತೆ ತಮ್ಮ ಕಕ್ಷಿದಾರರ ಗಮನಕ್ಕೆ ಬಂದಿರಲಿಲ್ಲ. ಹಲವು ವರ್ಷಗಳ ಬಳಿಕ ಈ ಬಗ್ಗೆ ಗೊತ್ತಾಗಿದೆ ಎಂದು ತಿಳಿಸಿದ್ದರು. ಇದಕ್ಕೆ ಆಕ್ಷೇಪಿಸಿದ ಬ್ಯಾಂಕ್ ಪರ ವಕೀಲರು, ಅರ್ಜಿದಾರರಿಗೆ ತಮ್ಮ ಆಸ್ತಿ ಮಾರಾಟ ಮಾಡಲಾಗುತ್ತಿದೆ ಎಂಬುದನ್ನು ತಿಳಿಸಿತ್ತು. 2014ರ ಸೆಪ್ಟೆಂಬರ್ 22ರಂದು ಜಮೀನು ಮಾರಾಟ ನೋಟಿಸ್ ಪ್ರಶ್ನಿಸಿ ಡಿಆರ್‌ಟಿ ಮುಂದೆ ಅರ್ಜಿ ಸಲ್ಲಿಸಿದ್ದರು. ಅದು ವಜಾಗೊಂಡ ಬಳಿಕ 9 ವರ್ಷಗಳ ನಂತರ ಹೈಕೋರ್ಟ್​ನಲ್ಲಿ ಪ್ರಶ್ನಿಸಿದ್ದಾರೆ ಎಂದು ವಾದಿಸಿದ್ದರು.

ರಿಪ್ ವ್ಯಾನ್ ವಿಂಕಲ್ಸ್ ಕಥೆಯ ಸಾರಾಂಶ: ಇದು 1819ರಲ್ಲಿ ವಾಷಿಂಗ್ಟನ್ ಇರ್ವಿಂಗ್ ಎಂಬ ಅಮೆರಿಕನ್ ಲೇಖಕ ಬರೆದ ಒಂದು ಸಣ್ಣ ಕಥೆ. ಈ ಕಥೆ ಇಪ್ಪತ್ತು ವರ್ಷಗಳ ನಂತರ ನಿದ್ರೆಗೆ ಜಾರುವ ಮತ್ತು ಇಪ್ಪತ್ತು ವರ್ಷಗಳ ನಂತರ ಎಚ್ಚರಗೊಳ್ಳುವ, ಬದಲಾದ ಜಗತ್ತು ನೋಡುವ ಅಮೆರಿಕನ್ ಕ್ರಾಂತಿ ತಪ್ಪಿಸಿಕೊಂಡ ಕುರಿತಾಗಿದೆ. ಅಂತಹ ರಿಪ್ ವ್ಯಾನ್ ವಿಂಕಲ್ಸ್‌ಗೆ ನ್ಯಾಯಾಲಯದ ಬಾಗಿಲುಗಳು ಸದಾ ಮುಚ್ಚಲ್ಪಡುತ್ತವೆ ಎಂದು ಪೀಠ ಖಾರವಾಗಿ ಪ್ರತಿಕ್ರಿಯಿಸಿತು.

ಇದನ್ನೂ ಓದಿ: ರಾಜ್ಯ ಹೈಕೋರ್ಟ್ ಮುಖ್ಯ ನ್ಯಾಯಮೂರ್ತಿಯಾಗಿ ಪಿ.ಎಸ್.ದಿನೇಶ್ ಕುಮಾರ್ ನೇಮಕ