ಬೆಂಗಳೂರ: ಇತ್ತೀಚೆಗೆ ನಕ್ಸಲ್ ಚಳವಳಿಯಲ್ಲಿ ಭಾಗಿಯಾದ ವಿಕ್ರಂ ಗೌಡ ಅವರನ್ನು ನಕಲಿ ಎನ್ಕೌಂಟರ್ ಮೂಲಕ ಕೊಲ್ಲಲಾಗಿದೆ. ಈ ಬಗ್ಗೆ ನ್ಯಾಯಾಂಗ ತನಿಖೆಗೆ ವಹಿಸಬೇಕು ಎಂದು ನಕ್ಸಲ್ ಚಳವಳಿಯಿಂದ ಹೊರ ಬಂದಿರುವ ನೂರ್ ಶ್ರೀಧರ್ ಮತ್ತು ಸುರಿಮನೆ ನಾಗರಾಜ್ ಆಗ್ರಹಿಸಿದರು.
ನಗರದಲ್ಲಿ ನಡೆದ ಜಂಟಿ ಮಾಧ್ಯಮಗೋಷ್ಟಿಯಲ್ಲಿ ಮಾತನಾಡಿದ ಅವರು, ''ವಿಕ್ರಂ ಗೌಡ ಹತ್ಯೆ ಮಾಡಿರುವುದರಿಂದ ಹಲವು ಸಂಶಯಗಳಿವೆ. ಈ ಕೃತ್ಯದ ಹಿಂದೆ ಪೊಲೀಸ್ ಇಲಾಖೆ ಕೈವಾಡ ಇರುವ ಸಂಶಯ ಇದೆ. ಈ ಬಗ್ಗೆ ನ್ಯಾಯಾಂಗ ತನಿಖೆ ನಡೆಸದಿದ್ದಲ್ಲಿ ಮೃತರಾದ ವಿಕ್ರಂ ಗೌಡ ಹತ್ಯೆಯಲ್ಲಿ ಮುಖ್ಯಮಂತ್ರಿಗಳ ಪಾತ್ರ ಇರುವ ಸಂಶಯಕ್ಕೆ ಕಾರಣವಾಗಲಿದೆ'' ಎಂದರು.
ಆದ್ದರಿಂದ ಸತ್ಯಾಂಶ ಹೊರಬರಬೇಕಾಗಿದ್ದು, ನ್ಯಾಯಾಂಗ ತನಿಖೆಗೆ ವಹಿಸಬೇಕು ಎಂದು ಆಗ್ರಹಿಸಿದರು.
ನಕ್ಸಲರಿಗೆ ಕಿವಿಮಾತು: ಕಾಡಿನಲ್ಲಿದ್ದು ಹೋರಾಡುವ ಬದಲಾಗಿ ನಾಡಿಗೆ ಬಂದು ಜನರ ನಡುವೆ ಇದ್ದು ಹೋರಾಟಗಳನ್ನು ನಡೆಸಬೇಕು. ಅದಕ್ಕೆ ಸರ್ಕಾರ ಸಹಕರಿಸಬೇಕು ಎಂದು ನಕ್ಸಲ್ ಚಳವಳಿಯಲ್ಲಿ ಭಾಗಿಯಾಗಿರುವವರಿಗೆ ಇದೇ ವೇಳೆ ಅವರು ಕಿವಿಮಾತು ಹೇಳಿದರು.
