ಪ್ಯಾರಿಸ್​ ಒಲಿಂಪಿಕ್ಸ್‌: 8 ತಾಸಿನಲ್ಲಿ 3 ಜಟ್ಟಿಗಳ ಬಗ್ಗುಬಡಿದು ಫೈನಲ್​​ ತಲುಪಿದ ವಿನೇಶ್​ ಪೋಗಟ್​ - Vinesh Phogat

ಒಂದೇ ದಿನದಲ್ಲಿ ಮೂರು ಮಹಿಳಾ ಪೈಲ್ವಾನ್​ರನ್ನು ಸೋಲಿಸಿದ ಭಾರತದ ಸ್ಟಾರ್​​ ಕುಸ್ತಿಪಟು ವಿನೇಶ್​ ಪೋಗಟ್​ ಪ್ಯಾರಿಸ್​ ಒಲಿಂಪಿಕ್ಸ್​ನಲ್ಲಿ ಫೈನಲ್​ ತಲುಪಿದ್ದಾರೆ. ಈ ಮೂಲಕ ಭಾರತಕ್ಕೆ ಮತ್ತೊಂದು ಪದಕ ಖಚಿತಪಡಿಸಿದ್ದಾರೆ.

ಪ್ಯಾರಿಸ್​/ನವದೆಹಲಿ: ಭಾರತದ ತಾರಾ ಕುಸ್ತಿಪಟು ವಿನೇಶ್​ ಪೋಗಟ್​ ಅವರು ಪ್ಯಾರಿಸ್​ ಒಲಿಂಪಿಕ್ಸ್‌ ಕುಸ್ತಿ ಸ್ಪರ್ಧೆಯಲ್ಲಿ ಫೈನಲ್​ ತಲುಪಿದ್ದಾರೆ. ಈ ಮೂಲಕ ಭಾರತಕ್ಕೆ ಮತ್ತೊಂದು ಪದಕ ಖಚಿತಪಡಿಸಿದ್ದಾರೆ. ಮಂಗಳವಾರ ನಡೆದ 50 ಕೆಜಿ ಸ್ಪರ್ಧೆಯ ಮಹಿಳೆಯರ ಸೆಮಿಫೈನಲ್​ ಪಂದ್ಯದಲ್ಲಿ ಕ್ಯೂಬಾದ ಯುಸ್ನೆಲಿಸ್ ಗುಜ್ಮನ್ ಲೋಪೆಜ್ ವಿರುದ್ಧ ಭಾರತದ ವಿನೇಶಾ 5-0 ಅಂತರದಲ್ಲಿ ಜಯಗಳಿಸಿದರು.

ಈ ಗೆಲುವಿನೊಂದಿಗೆ ಒಲಿಂಪಿಕ್ಸ್‌ನಲ್ಲಿ ಕುಸ್ತಿಯಲ್ಲಿ ಫೈನಲ್‌ಗೆ ಅರ್ಹತೆ ಪಡೆದ ಮೊದಲ ಭಾರತೀಯ ಮಹಿಳಾ ಮತ್ತು ಎರಡನೇ ಕುಸ್ತಿಪಟು ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಇದಕ್ಕೂ ಮೊದಲು ಸುಶೀಲ್​ ಕುಮಾರ್​ ಅವರು ಫೈನಲ್​ ತಲುಪಿದ್ದರು.

ವಿನೇಶ್ ಪೋಗಟ್​ ಅವರು ಆರಂಭದಿಂದಲೇ ಎದುರಾಳಿಯ ವಿರುದ್ಧ ಬಿಗಿಪಟ್ಟು ಹಾಕಿದರು. ಕ್ಯೂಬಾದ ಕುಸ್ತಿಪಟು ಭಾರತದ ಪೈಲ್ವಾನ್​​ ಮುಂದೆ ಮಿಸುಕಾಡಲು ಆಗಲಿಲ್ಲ. ಇದರಿಂದ ಸತತ ಅಂಕ ಪಡೆಯುತ್ತಾ ಸಾಗಿದ ವಿನೇಶ್​ 5 ಅಂಕ ಪಡೆದು ಏಕಮೇವಾಗಿ ಜಯ ಸಾಧಿಸಿದರು.

🇮🇳 Result Update: Women’s Wrestling Freestyle 50KG SF👇@Phogat_Vinesh on a winning spree, continues her quest for glory & assures a medal🏅 for 🇮🇳 💯🔥

The seasoned grappler picked up two historic wins earlier today and went past her Cuban opponent Yusneylis Guzman Lopez in… pic.twitter.com/Kd0pgYtNEF

— SAI Media (@Media_SAI) August 6, 2024

ವಿನೇಶ್​ ಪೋಗಟ್​ ಭಾರತದ ಸಿಂಹಿಣಿ: ಕುಸ್ತಿಯ ಅಖಾಡದಲ್ಲಿ ವಿಶ್ವದ ಖ್ಯಾತ ಜಟ್ಟಿಗಳಿಗೆ ಮಣ್ಣು ಮುಕ್ಕಿಸುತ್ತಿರುವ ಭಾರತದ ಪೈಲ್ವಾನ್​ ಬಗ್ಗೆ ಪುರುಷರ ಸ್ಟಾರ್​ ಕುಸ್ತಿಪಟು ಬಜರಂಗ್​ ಪೂನಿಯಾ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ವಿನೇಶ್​ 'ಭಾರತದ ಸಿಂಹಿಣಿ' ಎಂದು ಬಣ್ಣಿಸಿದ್ದಾರೆ.

ತಮ್ಮ ಸಾಮಾಜಿಕ ಮಾಧ್ಯಮ ಎಕ್ಸ್​ ಖಾತೆಯಲ್ಲಿ ಬರೆದುಕೊಂಡಿರುವ ಬಜರಂಗ್​ ಪೂನಿಯಾ, ಮಹಿಳಾ ಕುಸ್ತಿಪಟು ವಿನೇಶ್​ ಪೋಗಟ್​ ಅವರು 4 ಬಾರಿಯ ವಿಶ್ವ ಚಾಂಪಿಯನ್​ ಜಪಾನ್​ನ ಯುಇ ಸುಸಾಕಿ ಅವರನ್ನು ಮೊದಲ ಪಂದ್ಯದಲ್ಲೇ ಸೋಲಿಸಿದ್ದಾರೆ. ಎರಡನೇ ಸುತ್ತಿನಲ್ಲಿ ಮಾಜಿ ವಿಶ್ವ ಚಾಂಪಿಯನ್​ ಉಕ್ರೇನ್​ ಸ್ಪರ್ಧಿಗೆ ಮಣ್ಣು ಮುಕ್ಕಿಸಿದ್ದಾರೆ. ಆಕೆ ಜಗತ್ತನ್ನೇ ಗೆಲ್ಲಲು ಹೊರಟಿದ್ದಾರೆ ಎಂದು ಬರೆದುಕೊಂಡಿದ್ದಾರೆ.

ಖುಷಿ ಸಮಯದಲ್ಲಿ ಖೇದ: ಇಂತಹ ಖುಷಿ ಸಮಯದಲ್ಲಿ ನಿಮಗೊಂದು ಖೇದಕರ ವಿಷಯ ಹೇಳಲು ಬಯಸುವೆ. ಜಗತ್ತನ್ನೇ ಗೆಲ್ಲಲು ಹೊರಟಿರುವ ಹುಡುಗಿಯನ್ನು ಭಾರತದ ನೆಲದಲ್ಲಿಯೇ ಅವಮಾನಿಸಲಾಯಿತು. ರಸ್ತೆಯ ಮೇಲೆ ಎಳೆದಾಡಿದರು. ಲಾಠಿಯಿಂದ ಬಡಿದರು. ಆಕೆ ಜಗತ್ತಿನ ಎದುರು ಪರಾಕ್ರಮಿಯಾದರೂ, ಈ ದೇಶದ ವ್ಯವಸ್ಥೆಯಲ್ಲಿ ಸೋತಿದ್ದಾಳೆ ಎಂದು ಭಾವುಕ ಮಾತುಗಳನ್ನಾಡಿದ್ದಾರೆ.

ಕಳೆದ ವರ್ಷ ಭಾರತ ಕುಸ್ತಿ ಸಂಸ್ಥೆಯ ಅಧ್ಯಕ್ಷ, ಬಿಜೆಪಿ ಸಂಸದ ಬ್ರಿಜ್​ ಭೂಷಣ್​ ಅವರ ವಿರುದ್ಧ ಮಹಿಳಾ ಕುಸ್ತಿಪಟುಗಳು ದೊಡ್ಡ ಮಟ್ಟದಲ್ಲಿ ಧರಣಿ ನಡೆಸಿದ್ದರು.

ಇದನ್ನೂ ಓದಿ: ಒಲಿಂಪಿಕ್ಸ್​ ಕುಸ್ತಿ: ವಿನೇಶ್​ ಫೋಗಟ್​ಗೆ 2ನೇ ಗೆಲುವು; ಸೆಮಿಫೈನಲ್ ಪ್ರವೇಶ - Vinesh Phogat