ಟಿ20 ವಿಶ್ವಕಪ್​​ ಸೆಮಿ ಫೈನಲ್​: ಭಾರತ v/s ಇಂಗ್ಲೆಂಡ್​, ದ.ಆಫ್ರಿಕಾ v/s ಅಫ್ಘಾನಿಸ್ತಾನ; ಪಂದ್ಯಗಳ ವೇಳಾಪಟ್ಟಿ ಹೀಗಿದೆ - T20 WC Semi Final

ಟಿ20 ವಿಶ್ವಕಪ್​​ನ ಸೆಮಿಫೈನಲ್​ ತಂಡಗಳು ಅಂತಿಮವಾಗಿವೆ. ಮೊದಲ ಸೆಮೀಸ್‌ನಲ್ಲಿ ದಕ್ಷಿಣ ಆಫ್ರಿಕಾ v/s ಅಫ್ಘಾನಿಸ್ತಾನ ಸೆಣಸಾಡಿದರೆ, ಎರಡನೇ ಸೆಮೀಸ್​ನಲ್ಲಿ ಭಾರತ v/s ಹಾಲಿ ಚಾಂಪಿಯನ್​ ಇಂಗ್ಲೆಂಡ್​ ಫೈನಲ್​ ಟಿಕೆಟ್‌ಗಾಗಿ ಹೋರಾಡಲಿವೆ.

ಹೈದರಾಬಾದ್​: ಅಮೆರಿಕ ಮತ್ತು ವೆಸ್ಟ್​ ಇಂಡೀಸ್​ ಆತಿಥ್ಯದಲ್ಲಿ ನಡೆಯುತ್ತಿರುವ ಟಿ-20 ವಿಶ್ವಕಪ್​ ರೋಚಕ ಘಟ್ಟಕ್ಕೆ ಬಂದು ತಲುಪಿದೆ. ನಾಲ್ಕು ಬಲಿಷ್ಠ ತಂಡಗಳು ಸೆಮಿಫೈನಲ್ ತಲುಪಿದ್ದು, ಚಾಂಪಿಯನ್​ ಯಾರೆಂಬ ಪ್ರಶ್ನೆಗೆ ಇನ್ನೆರಡೇ ಹೆಜ್ಜೆ ದೂರ. ಇಂಗ್ಲೆಂಡ್​, ದಕ್ಷಿಣ ಆಫ್ರಿಕಾ, ಭಾರತ ಈಗಾಗಲೇ ನಾಲ್ಕರ ಘಟ್ಟಕ್ಕೆ ಲಗ್ಗೆ ಇಟ್ಟಿದ್ದವು. ಇಂದು (ಜೂನ್​ 25) ನಡೆದ ರೋಚಕ ಪಂದ್ಯದಲ್ಲಿ ಅಫ್ಘಾನಿಸ್ತಾನ, ಬಾಂಗ್ಲಾದೇಶವನ್ನು ಸೋಲಿಸುವ ಮೂಲಕ ಇದೇ ಮೊದಲ ಬಾರಿಗೆ ಸೆಮೀಸ್​ಗೆ ಎಂಟ್ರಿ ಕೊಟ್ಟಿದೆ.

ಇದರಿಂದ ನಾಲ್ಕು ತಂಡಗಳು ನಾಲ್ಕರ ಘಟ್ಟದಲ್ಲಿ ಸ್ಥಾನ ಭದ್ರಮಾಡಿಕೊಂಡಿವೆ. ಜೂನ್​ 27ರಂದು ಬೆಳಗ್ಗೆ 6 ಗಂಟೆಗೆ (ಭಾರತೀಯ ಕಾಲಮಾನ) ನಡೆಯುವ ಮೊದಲ ಸೆಮೀಸ್​ನಲ್ಲಿ ದಕ್ಷಿಣ ಆಫ್ರಿಕಾ ಮತ್ತು ಅಫ್ಘಾನಿಸ್ತಾನ ಎದುರಾದರೆ, ಅದೇ ದಿನ ರಾತ್ರಿ 8 ಗಂಟೆಗೆ ನಡೆಯುವ 2ನೇ ಸೆಮೀಸ್​​ನಲ್ಲಿ ಇಂಡಿಯಾ ಮತ್ತು ಇಂಗ್ಲೆಂಡ್​ ಸೆಣಸಾಡಲಿವೆ. ಇಲ್ಲಿ ಗೆಲ್ಲುವ ತಂಡಗಳು ಫೈನಲ್​ ಟಿಕೆಟ್​ ಪಡೆಯಲಿದ್ದು, ಜೂನ್​ 29ರಂದು ಪಂದ್ಯ ನಡೆಯಲಿದೆ. ವಿಶೇಷವೆಂದರೆ, ಭಾರತ ಮತ್ತು ದಕ್ಷಿಣ ಆಫ್ರಿಕಾ ಟೂರ್ನಿಯ ಆರಂಭದಿಂದ ನಡೆದ ಏಳು ಪಂದ್ಯಗಳನ್ನು ಗೆದ್ದು ಸೋಲೇ ಕಾಣದೆ ಸೆಮೀಸ್​ಗೆ ಬಂದಿವೆ.

The second semi-final is locked in 🔐

India and England will battle it out in Guyana for a place in the #T20WorldCup Final 2024 🇮🇳🏴󠁧󠁢󠁥󠁮󠁧󠁿 pic.twitter.com/4PQg2228Ao

— T20 World Cup (@T20WorldCup) June 24, 2024

ತಂಡಗಳ ಸೆಮೀಸ್​ ಹಾದಿ ಹೀಗಿದೆ: ಸೂಪರ್​-8 ಹಂತದಲ್ಲಿ 8 ತಂಡಗಳನ್ನು ಎರಡು ಗುಂಪುಗಳಲ್ಲಿ ವಿಂಗಡಿಸಲಾಗಿತ್ತು. ಮೊದಲ ಗುಂಪಿನಲ್ಲಿ ಭಾರತ, ಅಫ್ಘಾನಿಸ್ತಾನ, ಆಸ್ಟ್ರೇಲಿಯಾ, ಬಾಂಗ್ಲಾದೇಶ ಸ್ಥಾನ ಪಡೆದಿದ್ದರೆ, ಎರಡನೇ ಗುಂಪಿನಲ್ಲಿ ದಕ್ಷಿಣ ಆಫ್ರಿಕಾ, ಇಂಗ್ಲೆಂಡ್​, ಆತಿಥೇಯ ತಂಡಗಳಾದ ವೆಸ್ಟ್​ ಇಂಡೀಸ್​ ಮತ್ತು ಅಮೆರಿಕಗಳಿದ್ದವು.

ತಲಾ ಮೂರು ಪಂದ್ಯಗಳಲ್ಲಿ ದಕ್ಷಿಣ ಆಫ್ರಿಕಾ ಮೂರರಲ್ಲೂ ಗೆಲುವು ಸಾಧಿಸಿ, 6 ಅಂಕಗಳೊಂದಿಗೆ ಈವರೆಗೂ ಟೂರ್ನಿಯಲ್ಲಿ ಸೋಲರಿಯದೇ ಸೆಮೀಸ್​ಗೆ ಬಂದಿದೆ. ಆಂಗ್ಲ ಪಡೆಯು ದಕ್ಷಿಣ ಆಫ್ರಿಕಾ ವಿರುದ್ಧ ಸೋತು, ವೆಸ್ಟ್​ ಇಂಡೀಸ್​ ಮತ್ತು ಅಮೆರಿಕ ವಿರುದ್ಧ ಗೆದ್ದು 4 ಅಂಕಗಳೊಂದಿಗೆ ನಾಲ್ಕರ ಘಟ್ಟ ತಲುಪಿದೆ.

ಇತ್ತ ಎ ಗುಂಪಿನಲ್ಲಿದ್ದ ಬಲಿಷ್ಠ ಭಾರತ ಮೊದಲು ಬಾಂಗ್ಲಾದೇಶ, ಅಫ್ಘಾನಿಸ್ತಾನ, ಆಸ್ಟ್ರೇಲಿಯಾವನ್ನು ಸದೆಬಡಿದು 6 ಅಂಕಗಳನ್ನು ಸಂಪಾದಿಸಿ ವಿಶ್ವಕಪ್​​ನಲ್ಲಿ ಸೋಲಿಲ್ಲದ ಸರದಾರನಾಗಿ ಸೆಮೀಸ್​ಗೆ ಬಂದಿದೆ. ಆಸೀಸ್​, ಬಾಂಗ್ಲಾ ಮತ್ತು ಅಫ್ಘನ್​​ಗೆ ಸಮಾನ ಅವಕಾಶವಿದ್ಧ ಹೋರಾಟದಲ್ಲಿ ಅಫ್ಘಾನಿಸ್ತಾನ ತನ್ನ ಕೊನೆಯ ಪಂದ್ಯದಲ್ಲಿ ಬಾಂಗ್ಲಾ ತಂಡವನ್ನು ಬೇಟೆಯಾಡಿ ಕ್ರಿಕೆಟ್​ ಇತಿಹಾಸದಲ್ಲೇ ಮೊಟ್ಟಮೊದಲ ಬಾರಿಗೆ ಸೆಮಿಫೈನಲ್​ಗೆ ಲಗ್ಗೆ ಇಟ್ಟಿದೆ.

ಆಸೀಸ್​, ವಿಂಡೀಸ್​ಗೆ ನಿರಾಸೆ: ಮಾಜಿ ಚಾಂಪಿಯನ್​ ಆಸ್ಟ್ರೇಲಿಯಾ ಮುಖಭಂಗ ಅನುಭವಿಸಿದರೆ, ಆತಿಥೇಯ ದೈತ್ಯ ವೆಸ್ಟ್​ಇಂಡೀಸ್​ ತವರಿನಲ್ಲೇ ನಿರಾಸೆಗೆ ಒಳಗಾಯಿತು. ಈ ಮೂಲಕ 7 ಆವೃತ್ತಿಗಳಲ್ಲಿ ಯಾವುದೇ ಆತಿಥೇಯ ತಂಡವು ಚಾಂಪಿಯನ್​ ಆಗಿ ಹೊರಹೊಮ್ಮಲು ವಿಫಲವಾಗಿವೆ. ಹರಿಣಗಳ ಪಡೆ 10 ವರ್ಷಗಳ ಬಳಿಕ ಸೆಮೀಸ್​ಗೆ ಬಂದಿದೆ. 2014 ರಲ್ಲಿ ಸೆಮೀಸ್​ಗೆ ಬಂದಿದ್ದ ತಂಡ ಅದಾದ ಬಳಿಕ 2ನೇ ಸುತ್ತಿನಲ್ಲೇ ಹೊರಬಿದ್ದು ಚೋಕರ್ಸ್​ ಪಟ್ಟಿ ಕಟ್ಟಿಕೊಂಡಿತ್ತು. ಟಿ20 ವಿಶ್ವಕಪ್​​ನಲ್ಲಿ ಸತತ 7 ಪಂದ್ಯಗಳನ್ನು ಗೆದ್ದ ತಂಡಗಳಾಗಿ ಭಾರತ, ದಕ್ಷಿಣ ಆಫ್ರಿಕಾ ಗುರುತಿಸಿಕೊಂಡಿವೆ.

ಇದನ್ನೂ ಓದಿ: ಟಿ20 ವಿಶ್ವಕಪ್: ಮೊದಲ ಬಾರಿಗೆ ಸೆಮಿಫೈನಲ್ ತಲುಪಿದ ಅಫ್ಘಾನಿಸ್ತಾನ: ಬಾಂಗ್ಲಾ ಸೋಲಿನೊಂದಿಗೆ ವಿಶ್ವಕಪ್‌ನಿಂದ ಹೊರಬಿದ್ದ ಆಸ್ಟ್ರೇಲಿಯಾ - T20 World Cup 2024