ಮುಂಬೈ/ಬೆಂಗಳೂರು: ಮುಂದಿನ 7 ವರ್ಷಗಳ ಅವಧಿಗೆ ನ್ಯೂಜಿಲೆಂಡ್ ಪುರುಷ ಹಾಗೂ ಮಹಿಳಾ ತಂಡಗಳ ಕ್ರಿಕೆಟ್ ಪಂದ್ಯಗಳನ್ನು ಭಾರತ ಹಾಗೂ ಭಾರತ ಉಪಖಂಡದ ಪ್ರದೇಶಗಳಲ್ಲಿ ಪ್ರಸಾರ ಮಾಡುವ ಮತ್ತು ಡಿಜಿಟಲ್ ಹಕ್ಕುಗಳನ್ನು ಸೋನಿ ಪಿಕ್ಚರ್ಸ್ ನೆಟ್ವರ್ಕ್ಸ್ ಇಂಡಿಯಾ (ಎಸ್.ಪಿ.ಎನ್.ಐ) ಪಡೆದುಕೊಂಡಿದೆ.
2024ರ ಮೇ 1ರಿಂದ 2031ರ ಏಪ್ರಿಲ್ 30ರವರೆಗಿನ ಅವಧಿಗೆ ಒಪ್ಪಂದ ಮಾಡಿಕೊಳ್ಳಲಾಗಿದೆ. ಈ ಅವಧಿಯು 2026-27 ಮತ್ತು 2030-31ರ ಭಾರತದ ನ್ಯೂಜಿಲೆಂಡ್ ಪ್ರವಾಸ ಸೇರಿದಂತೆ ನ್ಯೂಜಿಲೆಂಡ್ ತಂಡಕ್ಕೆ ನಿಗದಿಯಾಗಿರುವ ಇತರ ಎಲ್ಲಾ ದ್ವಿಪಕ್ಷೀಯ ಟೆಸ್ಟ್, ಏಕದಿನ ಮತ್ತು ಟಿ20 ಪಂದ್ಯಗಳ ಪ್ರಸಾರವನ್ನು ಒಳಗೊಂಡಿದೆ.
ಈಗಾಗಲೇ ಇಂಗ್ಲೆಂಡ್ ಮತ್ತು ವೇಲ್ಸ್ ಕ್ರಿಕೆಟ್ ಮಂಡಳಿ (ಇಸಿಬಿ) ಮತ್ತು ಶ್ರೀಲಂಕಾ ಕ್ರಿಕೆಟ್‌ನೊಂದಿಗೆ (ಎಸ್.ಎಲ್.ಸಿ ) ಒಪ್ಪಂದಗಳನ್ನು ಹೊಂದಿರುವ ಸೋನಿ ಪಿಕ್ಚರ್ಸ್ ಇಂಡಿಯಾ ನೆಟ್ವರ್ಕ್ನ ಪಟ್ಟಿಗೆ ಈ ಒಪ್ಪಂದ ಸಹ ಸೇರ್ಪಡೆಗೊಂಡಿದ್ದು, ಎಲ್ಲಾ ಪಂದ್ಯಗಳು ಸೋನಿ ಪಿಕ್ಚರ್ಸ್ ಇಂಡಿಯಾ ನೆಟ್ವರ್ಕ್ನ ಸ್ಪೋರ್ಟ್ಸ್ ಚಾನೆಲ್ಗಳು ಹಾಗೂ ಸೋನಿಲೈವ್‌ನಲ್ಲಿ ನೇರಪ್ರಸಾರವಾಗಲಿವೆ.
ಒಪ್ಪಂದದ ಕುರಿತು ಸೋನಿ ಪಿಕ್ಚರ್ಸ್ ನೆಟ್ವರ್ಕ್ಸ್ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಸಿಇಒ ಎನ್.ಪಿ.ಸಿಂಗ್ ಮಾತನಾಡಿ, "ನ್ಯೂಜಿಲೆಂಡ್ ಕ್ರಿಕೆಟ್‌ನೊಂದಿಗೆ ನಮ್ಮ ಹೊಸ ಪಾಲುದಾರಿಕೆಯನ್ನು ಘೋಷಿಸಲು ಹೆಮ್ಮೆ ಅನಿಸುತ್ತಿದೆ. ನ್ಯೂಜಿಲೆಂಡ್ ತನ್ನ ಅಸಾಧಾರಣ ಕ್ರೀಡಾ ಮನೋಭಾವ ಮತ್ತು ಶಕ್ತಿಗೆ ಹೆಸರುವಾಸಿಯಾಗಿದೆ. ಇದು ಜಾಗತಿಕವಾಗಿ ಅತ್ಯಂತ ಗೌರವಾನ್ವಿತ ಕ್ರಿಕೆಟ್ ತಂಡಗಳಲ್ಲಿ ಒಂದು. ಈ ತಂಡ ಮತ್ತು ಭಾರತದಲ್ಲಿನ ಅದರ ವಿಶೇಷ ಅಭಿಮಾನಿ ಬಳಗದ ನಡುವಿನ ಬಂಧವನ್ನು ಮತ್ತಷ್ಟು ಆಳಗೊಳಿಸಲು ಮತ್ತು ಪೋಷಿಸಲು ಇದು ನಮಗೆ ಸಿಕ್ಕ ಸೌಭಾಗ್ಯ'' ಎಂದರು.
ನ್ಯೂಜಿಲೆಂಡ್ ಕ್ರಿಕೆಟ್ ಅಧ್ಯಕ್ಷೆ ಡಯಾನಾ ಮಾತನಾಡಿ, "ಇದು ಎರಡೂ ಸಂಸ್ಥೆಗಳಿಗೆ ಹೆಮ್ಮೆಯ ಸಂಗತಿ. ವಿಶ್ವದರ್ಜೆಯ ಕ್ರೀಡಾ ಪಂದ್ಯಾವಳಿಗಳೊಂದಿಗೆ ಸೋನಿ ಪಿಕ್ಚರ್ಸ್ ನೆಟ್ವರ್ಕ್ಸ್ ಇಂಡಿಯಾ ಭಾರತದ ಪ್ರಮುಖ ಕ್ರೀಡಾ ವಿಷಯ ಪೂರೈಕೆದಾರರಲ್ಲಿ ಒಂದಾಗಿದೆ. ಈ ಸಹಯೋಗವನ್ನು ಎದುರು ನೋಡುತ್ತಿದ್ದೇವೆ'' ಎಂದು ಹೇಳಿದರು.
ನ್ಯೂಜಿಲೆಂಡ್ ತಂಡ ಜಾಗತಿಕವಾಗಿ ಇತ್ತೀಚಿನ ವರ್ಷಗಳಲ್ಲಿ ಯಶಸ್ಸು ಸಾಧಿಸಿದೆ. ಪುರುಷರ ತಂಡ 2021ರಲ್ಲಿ ಉದ್ಘಾಟನಾ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ ಪ್ರಶಸ್ತಿ ಗೆಲುವು ಸಾಧಿಸಿತ್ತು. ಅಲ್ಲದೇ ಹಿಂದಿನ ಟಿ20 ವಿಶ್ವಕಪ್ನಲ್ಲಿ ರನ್ನರ್ ಅಪ್ ಸ್ಥಾನ ಗಳಿಸಿದೆ. ಈ ಅಮೋಘ ಪ್ರದರ್ಶನದಿಂದ ತಂಡ ಲಕ್ಷಾಂತರ ಹೃದಯಗಳನ್ನು ಗೆದ್ದಿದೆ. ಭಾರತೀಯ ಉಪಖಂಡದ ಕ್ರಿಕೆಟ್ ಅಭಿಮಾನಿಗಳು 2031ರ ಋತುವಿನ ಅಂತ್ಯದವರೆಗೆ ಭಾರತ, ಆಸ್ಟ್ರೇಲಿಯಾ, ಇಂಗ್ಲೆಂಡ್ ಮತ್ತು ಪಾಕಿಸ್ತಾನ ವಿರುದ್ಧದ ನ್ಯೂಜಿಲೆಂಡ್ ತಂಡದ ಸೆಣಸಾಟಗಳನ್ನು ವೀಕ್ಷಿಸಲು ಸೋನಿ ಪಿಕ್ಚರ್ಸ್ ಇಂಡಿಯಾ ನೆಟ್ವರ್ಕ್ ವೇದಿಕೆ ಕಲ್ಪಿಸಲಿದೆ.
2024-25 ಮತ್ತು 2025-26ರ ಋತುಗಳಲ್ಲಿ ಭಾರತದಲ್ಲಿ ಸೋನಿ ಪಿಕ್ಚರ್ಸ್ ಇಂಡಿಯಾ ನೆಟ್ವರ್ಕ್ ಜೊತೆಗೆ ಅಮೆಜಾನ್ ಪ್ರೈಮ್ ಸಹ ಡಿಜಿಟಲ್ ಪ್ರಸಾರದ ಹಕ್ಕುಗಳನ್ನು ಹೊಂದಿದೆ.
ಇದನ್ನೂ ಓದಿ: 2027 ರವರೆಗೆ ಭಾರತದ ಕ್ರಿಕೆಟ್ ಪಂದ್ಯಗಳ ಪ್ರಸಾರ ಹಕ್ಕು ಡಿಸ್ನಿ ಸ್ಟಾರ್ ಸಂಸ್ಥೆ ಪಾಲು
