ಕಿಂಗ್‌ಸ್ಟೌನ್ (ವೆಸ್ಟ್ಇಂಡೀಸ್): ಆಸ್ಟ್ರೇಲಿಯಾಕ್ಕೆ ಏಕದಿನ ವಿಶ್ವಕಪ್ ಗೆಲ್ಲಿಸಿಕೊಟ್ಟ ಯಶಸ್ವಿ ವೇಗಿ ಪ್ಯಾಟ್ ಕಮಿನ್ಸ್ ಟಿ20 ವಿಶ್ವಕಪ್ನಲ್ಲಿ ಮಹತ್ವದ ಮೈಲಿಗಲ್ಲು ಸ್ಥಾಪಿಸಿದ್ದಾರೆ. ಸತತ ಎರಡು ಪಂದ್ಯಗಳಲ್ಲಿ ಮತ್ತು ಒಂದೇ ವಿಶ್ವಕಪ್ನಲ್ಲಿ ಎರಡು ಬಾರಿ ಹ್ಯಾಟ್ರಿಕ್ ಸಾಧನೆ ಮಾಡಿದ ವಿಶ್ವದ ಏಕೈಕ ಕ್ರಿಕೆಟಿಗ ಎಂಬ ಅಭಿದಾನಕ್ಕೆ ಪಾತ್ರರಾದರು.
ಅಫ್ಘಾನಿಸ್ತಾನ ವಿರುದ್ಧ ಜೂನ್ 23 ರಂದು ನಡೆದ ಸೂಪರ್-8 ಹಂತದ ಪಂದ್ಯದಲ್ಲಿ ಕಮಿನ್ಸ್ ಹ್ಯಾಟ್ರಿಕ್ ವಿಕೆಟ್ ಪಡೆದರು. ಇನಿಂಗ್ಸ್ನ 18ನೇ ಓವರ್ನ ಕೊನೆಯ ಎಸೆತದಲ್ಲಿ ರಶೀದ್ ಖಾನ್ ವಿಕೆಟ್ ಪಡೆದರೆ, ನಂತರದ 20ನೇ ಓವರ್ನ ಮೊದಲ ಎರಡು ಎಸೆತಗಳಲ್ಲಿ ಕರೀಂ ಜನತ್ ಮತ್ತು ಗುಲ್ಬದಿನ್ ನೈಬ್ರನ್ನು ಔಟ್ ಮಾಡುವ ಮೂಲಕ ಈ ವಿಶ್ವದಾಖಲೆ ಸೃಷ್ಟಿಸಿದರು.
ಇದೇ ವಿಶ್ವಕಪ್ನ ಕಳೆದ ಪಂದ್ಯದಲ್ಲಿ ಕಮಿನ್ಸ್ ಹ್ಯಾಟ್ರಿಕ್ ಸಾಧನೆ ಮಾಡಿದ್ದರು. 31 ವರ್ಷದ ಹಿರಿಯ ವೇಗಿ, ಬಾಂಗ್ಲಾದೇಶದ ವಿರುದ್ಧ ನಡೆದ ಸೂಪರ್ 8 ಹಂತದ ಪಂದ್ಯದಲ್ಲಿ ಸತತ ಮೂರು ಎಸೆತಗಳಲ್ಲಿ ವಿಕೆಟ್ ಕಿತ್ತಿದ್ದರು. ಅದರಲ್ಲೂ ಅವರು 18 ಮತ್ತು 20 ನೇ ಓವರ್ನಲ್ಲಿಯೇ ವಿಕೆಟ್ ಪಡೆದಿದ್ದು ವಿಶೇಷ. 18ನೇ ಓವರ್ನ 5 ಮತ್ತು 6ನೇ ಎಸೆತಗಳಲ್ಲಿ ಕ್ರಮವಾಗಿ ಮೊಹಮದುಲ್ಲಾ, ಮೆಹದಿ ಹಸನ್ರನ್ನು ಪೆವಿಲಿಯನ್ ಸೇರಿಸಿದ್ದರೆ, 20ನೇ ಓವರ್ನ ಮೊದಲ ಎಸೆತದಲ್ಲಿ ತೌಹಿದ್ ಹೃದೋಯ್ ವಿಕೆಟ್ ಉರುಳಿಸಿದ್ದರು.
ರೋಮಾಂಚಕ ಸಮಯ: ಇನ್ನು, ಪಂದ್ಯದ ಬಳಿಕ ಮಾತನಾಡಿದ ಕಮಿನ್ಸ್, ಆಸ್ಟ್ರೇಲಿಯಾ ಪರ 100ಕ್ಕೂ ಅಧಿಕ ಪಂದ್ಯಗಳನ್ನು ಆಡಿದ ನಂತರ ಸತತ ಎರಡು ಪಂದ್ಯಗಳಲ್ಲಿ ಹ್ಯಾಟ್ರಿಕ್ ವಿಕೆಟ್ ಪಡೆದಿರುವುದು ರೋಮಾಂಚಕ ಅನುಭವವಾಗಿದೆ ಎಂದು ಹೇಳಿದರು.
ಆಸ್ಟ್ರೇಲಿಯಾ ಪರ ನೂರಕ್ಕೂ ಅಧಿಕ ಪಂದ್ಯ ಆಡಿರುವ ಪ್ಯಾಟ್ ಕಮಿನ್ಸ್ ಈವರೆಗೆ ಒಂದು ಬಾರಿಯೂ ಹ್ಯಾಟ್ರಿಕ್ ಸಾಧನೆ ಮಾಡಿರಲಿಲ್ಲ. ಈ ಟಿ20 ವಿಶ್ವಕಪ್ನಲ್ಲಿ ಸತತ ಎರಡು ಪಂದ್ಯಗಳಲ್ಲಿ ಹ್ಯಾಟ್ರಿಕ್ ವಿಕೆಟ್ ಕಿತ್ತು ವಿಶ್ವದಾಖಲೆ ಬರೆದಿದ್ದಾರೆ.
ಆಸೀಸ್ಗೆ ಅಫ್ಘಾನ್ ಶಾಕ್: ಭಾನುವಾರ ಬೆಳಗ್ಗೆ ನಡೆದ ಪಂದ್ಯದಲ್ಲಿ ಆಸ್ಟ್ರೇಲಿಯಾಕ್ಕೆ ಅಫ್ಘಾನಿಸ್ತಾನ ಶಾಕ್ ನೀಡಿತು. ಸೆಮೀಸ್ಗೇರಲು ಮಹತ್ವದ ಪಂದ್ಯದಲ್ಲಿ ಅಫ್ಗಾನ್ ನೀಡಿದ 148 ರನ್ಗಳ ಗುರಿ ಮುಟ್ಟುವಲ್ಲಿ ವಿಫಲವಾಗಿ 127 ರನ್ಗೆ ಆಲೌಟ್ ಆಯಿತು. ಇದರಿಂದ 21 ರನ್ಗಳ ಸೋಲು ಕಂಡಿತು. ಗ್ಲೆನ್ ಮ್ಯಾಕ್ಸ್ವೆಲ್ (59) ಅರ್ಧಶತಕ ಹೊರತಾಗಿ ಉಳಿದ ಯಾವ ಬ್ಯಾಟರ್ಗಳೂ ರನ್ ಗಳಿಸಲಿಲ್ಲ. ಇದರಿಂದ ವೈಫಲ್ಯ ಅನುಭವಿಸಿ ಸೋಲು ಕಂಡಿತು. ಗುಲ್ಬದಿನ್ ನೈಬ್ 4, ನವೀನ್ ಉಲ್ ಹಕ್ 3 ವಿಕೆಟ್ ಪಡೆದು ಕಾಂಗರೂಗಳ ಹೆಡೆಮುರಿ ಕಟ್ಟಿದರು.
ಇದಕ್ಕೂ ಮೊದಲು ಬ್ಯಾಟ್ ಮಾಡಿದ ಅಫ್ಘನ್ಗೆ ಗುರ್ಬಾಜ್(60), ಇಬ್ರಾಹಿಂ ಝದ್ರನ್ (51) ಅರ್ಧಶತಕ ಗಳಿಸಿದರು. ಇದರ ನಂತರ ಬ್ಯಾಟಿಂಗ್ ನಷ್ಟಕ್ಕೀಡಾಗಿ 148 ರನ್ ಗಳಿಸಿತು. ಪ್ಯಾಟ್ ಕಮಿನ್ಸ್ 3, ಆ್ಯಡಂ ಝಂಪಾ 2 ವಿಕೆಟ್ ಪಡೆದರು.
ಇದನ್ನೂ ಓದಿ: ಆರ್ಚರಿ ವಿಶ್ವಕಪ್: ರಿಕರ್ವ್ ಮಿಶ್ರ ತಂಡಕ್ಕೆ ಕಂಚು, ಬಿಲ್ವಿದ್ಯೆಯಲ್ಲಿ ಭಾರತಕ್ಕೆ ಮೂರನೇ ಪದಕ - Archery team wins bronze
