ಪಾಕ್ ವಿರುದ್ಧ ಇಂಗ್ಲೆಂಡ್ ಸಿಡಿಲಬ್ಬರದ ಬ್ಯಾಟಿಂಗ್​: ಬ್ರೂಕ್​ ದಾಖಲೆಯ ತ್ರಿಶತಕ, ರೂಟ್​ ದ್ವಿಶತಕ!

England Vs Pakistan 1st Test: ಪಾಕಿಸ್ತಾನ ವಿರುದ್ಧದ ಮೊದಲ ಟೆಸ್ಟ್​ ಪಂದ್ಯದಲ್ಲಿ ಇಂಗ್ಲೆಂಡ್​ ಬ್ಯಾಟರ್​ಗಳು ರನ್​ಮಳೆ ಹರಿಸಿದರು. ಹ್ಯಾರಿ ಬ್ರೂಕ್​ ತ್ರಿಶತಕ ಮತ್ತು ಜೋ ರೂಟ್ ದ್ವಿಶತಕ ಸಿಡಿಸಿದ್ದಾರೆ.​

England Vs Pakistan 1st Test: ಪಾಕಿಸ್ತಾನ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಇಂಗ್ಲೆಂಡ್ ರನ್‌ ಮಳೆ ಹರಿಸಿದೆ. ಮೊದಲ ಇನ್ನಿಂಗ್ಸ್​ನಲ್ಲಿ ಸ್ಟಾರ್ ಆಟಗಾರ ಹ್ಯಾರಿ ಬ್ರೂಕ್ ತ್ರಿಶತಕ ಸಿಡಿಸಿದರೆ, ಜೋ ರೂಟ್ ದ್ವಿಶತಕದಾಟವಾಡಿದರು. ಇದರೊಂದಿಗೆ ಇಂಗ್ಲೆಂಡ್ 823 ರನ್‌ಗಳಿಗೆ ಮೊದಲ ಇನ್ನಿಂಗ್ಸ್ ಡಿಕ್ಲೇರ್ ಮಾಡಿಕೊಂಡಿತು.

ಪಾಕ್​ ಬೌಲರ್​ಗಳನ್ನು ಚೆಂಡಾಡಿದ ಹ್ಯಾರಿ ಬ್ರೂಕ್ 322 ಎಸೆತಗಳಲ್ಲಿ 29 ಬೌಂಡರಿ ಮತ್ತು ಮೂರು ಸಿಕ್ಸರ್‌ ಸಹಾಯದಿಂದ 317 ರನ್​ ಕಲೆಹಾಕಿದರು. ಜೋ ರೂಟ್ 375 ಎಸೆತಗಳಲ್ಲಿ 262 ರನ್ ಪೇರಿಸಿದರು. ಇದರಲ್ಲಿ 17 ಬೌಂಡರಿಗಳು ಸೇರಿದ್ದವು.

ದಾಖಲೆ ಬುಕ್ ಸೇರಿದ ಬ್ರೂಕ್​: ಬ್ರೂಕ್​ 310 ಎಸೆತಗಳಲ್ಲಿ ತ್ರಿಶತಕ ಪೂರೈಸಿದರು. ಇದರೊಂದಿಗೆ ಟೆಸ್ಟ್​ನಲ್ಲಿ ವೇಗವಾಗಿ ತ್ರಿಶತಕ ಬಾರಿಸಿದ ಎರಡನೇ ಆಟಗಾರ ಎನಿಸಿಕೊಂಡರು. ಅತಿ ವೇಗದ ತ್ರಿಶತಕದ ದಾಖಲೆ ಟೀಂ ಇಂಡಿಯಾದ ಮಾಜಿ ದಿಗ್ಗಜ ಬ್ಯಾಟರ್​ ವೀರೇಂದ್ರ ಸೆಹ್ವಾಗ್ ಹೆಸರಿನಲ್ಲಿದೆ. ಸೆಹ್ವಾಗ್ 2008ರಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ 278 ಎಸೆತಗಳಲ್ಲಿ ತ್ರಿಶತಕ ಸಿಡಿಸಿದ್ದರು.

THE 2ND FASTEST TRIPLE CENTURY IN TEST HISTORY. 🥶

- Harry Brook reached his 300 with 97.41 Strike Rate. 🤯 pic.twitter.com/knYkZg6fgS

— Mufaddal Vohra (@mufaddal_vohra) October 10, 2024

ಬ್ರೂಕ್ ಇಂಗ್ಲೆಂಡ್ ಪರ ತ್ರಿಶತಕ ಸಿಡಿಸಿದ ಆರನೇ ಆಟಗಾರ ಎನಿಸಿಕೊಂಡರು. ಇವರಿಗಿಂತ ಮೊದಲು ಲಿಯೊನಾರ್ಡ್ ಹಟ್ಟನ್ (364), ವಾಲಿ ಹ್ಯಾಮಂಡ್ (336*), ಗ್ರಹಾಂ ಗೂಚ್ (333), ಆಂಡಿ ಸಂಧಮ್ (325) ಮತ್ತು ಜಾನ್ ಎಡ್ರಿಚ್ (310*) ಈ ಸಾಧನೆ ಮಾಡಿದ್ದರು.

ರೂಟ್​ ದಾಖಲೆ: ಮುಲ್ತಾನ್​ ಮೈದಾನದಲ್ಲಿ ದ್ವಿಶತಕ ಸಿಡಿಸಿದ ರೂಟ್​ ಹೊಸ ದಾಖಲೆಯೊಂದನ್ನು ಬರೆದರು. ಇಂಗ್ಲೆಂಡ್‌ ಪರ ಅತಿ ಹೆಚ್ಚು 250+ ಸ್ಕೋರ್‌ ಗಳಿಸಿದ 3ನೇ ಆಟಗಾರ ಎನಿಸಿಕೊಂಡರು. ಅಲ್ಲದೇ ಪಾಕಿಸ್ತಾನ ವಿರುದ್ಧ ಈ ಸಾಧನೆ ಮಾಡಿದ ವಿಶ್ವದ ಎರಡನೇ ಮತ್ತ ಇಂಗ್ಲೆಂಡ್​ನ ಮೊದಲ ಬ್ಯಾಟರ್ ಆದರು.

HARRY BROOK MISSED BRIAN LARA'S ALL TIME RECORD BY JUST 83 RUNS...!!! 🤯 pic.twitter.com/tQrJZJoWOP

— Mufaddal Vohra (@mufaddal_vohra) October 10, 2024

ವಿಶ್ವದಾಖಲೆಯ ಜೊತೆಯಾಟ: ಜೋ ರೂಟ್-ಹ್ಯಾರಿ ಬ್ರೂಕ್ ನಾಲ್ಕನೇ ವಿಕೆಟ್‌ಗೆ 454 ರನ್‌ಗಳ ಬೃಹತ್ ಜೊತೆಯಾಟವಾಡಿದರು. ಈ ಅನುಕ್ರಮದಲ್ಲಿ, ರೂಟ್-ಬ್ರೂಕ್ ಜೋಡಿ ಟೆಸ್ಟ್ ಕ್ರಿಕೆಟ್‌ನಲ್ಲಿ ಅತ್ಯಧಿಕ ರನ್ ಜೊತೆಯಾಟವಾಡಿದ ನಾಲ್ಕನೇ ಜೋಡಿ ಎಂಬ ದಾಖಲೆ ನಿರ್ಮಿಸಿತು. ಈ ಪಟ್ಟಿಯಲ್ಲಿ ಶ್ರೀಲಂಕಾದ ಕುಮಾರ ಸಂಗಕ್ಕಾರ-ಮಹೇಲಾ ಜಯವರ್ಧನೆ (624 ರನ್) ಮತ್ತು ಜಯಸೂರ್ಯ-ಮಹಾನಾಮ (576 ರನ್) ಈ ಪಟ್ಟಿಯಲ್ಲಿ ಮೊದಲ ಎರಡು ಸ್ಥಾನಗಳಲ್ಲಿದ್ದಾರೆ. ನ್ಯೂಜಿಲೆಂಡ್‌ನ ಮಾರ್ಟಿನ್ ಕ್ರೋವ್-ಆಂಡ್ರ್ಯೂ ಜೋನ್ಸ್ (467 ರನ್) ಮೂರನೇ ಸ್ಥಾನದಲ್ಲಿದ್ದಾರೆ.

ಟೆಸ್ಟ್ ಕ್ರಿಕೆಟ್‌ನ ಗರಿಷ್ಠ ಸ್ಕೋರ್:

• 952/9 ಡಿ - ಶ್ರೀಲಂಕಾ, ಕೊಲಂಬೊ, 1997
• 903/7 ಡಿ - ಇಂಗ್ಲೆಂಡ್, ದಿ ಓವಲ್, 1938
• 849 - ಇಂಗ್ಲೆಂಡ್, ಕಿಂಗ್ಸ್ಟನ್, 1930
• 823/7 ಡಿ - ಇಂಗ್ಲೆಂಡ್, ಮುಲ್ತಾನ್, 2024*
• 790/3 ಡಿ - ವೆಸ್ಟ್ ಇಂಡೀಸ್, ಕಿಂಗ್ಸ್ಟನ್, 1958

ಇದನ್ನೂ ಓದಿ: ಟೆನಿಸ್​​ಗೆ ವಿದಾಯ ಹೇಳಿದ 22 ಬಾರಿಯ ಗ್ರ್ಯಾಂಡ್‌ಸ್ಲಾಮ್​ ಚಾಂಪಿಯನ್​ ರಾಫೆಲ್​ ನಡಾಲ್​