ಪ್ಯಾರಿಸ್, ಫ್ರಾನ್ಸ್: ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಈ ಬಾರಿಗೆ ಬ್ರೇಕಿಂಗ್ ಈವೆಂಟ್ ಅನ್ನು ಸೇರ್ಪಡೆಗೊಳಿಸಿದ್ದು, ಶುಕ್ರವಾರ ರಾತ್ರಿ ನಡೆದ ಬ್ರೇಕಿಂಗ್ ಈವೆಂಟ್ನಲ್ಲಿ ಜಪಾನ್ನ 25 ವರ್ಷದ ಯುವತಿ ಬಿ-ಗರ್ಲ್ ಅಮಿ ಮೊದಲ ಚಿನ್ನದ ಪದಕವನ್ನು ಗೆದ್ದಿದ್ದಾರೆ.
16 ಡ್ಯಾನ್ಸರ್ಗಳಿದ್ದ ಅಖಾಡದಲ್ಲಿ ಅಮಿ ಯುವಾಸಾ ಅವರು ಸ್ಪಿನ್ನಿಂಗ್, ಫ್ಲಿಪ್ಪಿಂಗ್ ಹಾಗೂ ಟಾಪ್ಪ್ರಾಕ್ ಮಾಡುವ ಮೂಲಕ ಒಲಿಂಪಿಕ್ಸ್ನ ಮೊದಲ ಬ್ರೇಕಿಂಗ್ ಈವೆಂಟ್ನ ಚಿನ್ನದ ಪದಕವನ್ನು ತಮ್ಮದಾಗಿಸಿಕೊಂಡಿದ್ದಾರೆ.
ಅಮಿ ಯುವಾಸಾ ಅವರು ಲಿಥುವೇನಿಯಾದ ಬಿ-ಗರ್ಲ್ ನಿಕಾ (ಡೊಮಿನಿಕಾ ಬಾನೆವಿಕ್) ವಿರುದ್ಧದ ಪಂದ್ಯದಲ್ಲಿ ಎಲ್ಲ ಮೂರು ಸುತ್ತುಗಳನ್ನು ಗೆದ್ದು ಚಿನ್ನವನ್ನು ದೋಚಿದ್ದಾರೆ. ಪ್ಲೇಸ್ ಡೆ ಲಾ ಕಾನ್ಕಾರ್ಡ್ ಕ್ರೀಡಾಂಗಣದಲ್ಲಿ ಸುದೀರ್ಘ ಲಯಕ್ಕೆ ಹೆಜ್ಜೆ ಹಾಕಿ ತಮ್ಮ ಕೌಶಲ್ಯ ಪ್ರದರ್ಶಿಸಿದರು.
ಬಿ-ಗರ್ಲ್‌ಗಳು ಹೆಡ್‌ಸ್ಪಿನ್‌ಗಳು, ವಿಂಡ್‌ಮಿಲ್‌ಗಳು ಮತ್ತು ಬ್ಯಾಕ್‌ಫ್ಲಿಪ್‌ಗಳಂತಹ ಪವರ್ ಮೂವ್‌ಗಳ ಮೂಲಕ ಪ್ರೇಕ್ಷಕರನ್ನು ಬೆರಗುಗೊಳಿಸಿದರು. ಮಧ್ಯಾಹ್ನ ಆರಂಭಗೊಂಡು ರಾತ್ರಿ 10 ಗಂಟೆಯ ಮೊದಲು ಮುಕ್ತಾಯಗೊಂಡ ಬ್ರೇಕಿಂಗ್ ಈವೆಂಟ್ ನೋಡಲು ಸಂಜೆ ಉದ್ದಕ್ಕೂ ಅಭಿಮಾನಿಗಳು ಉತ್ಸಾಹದಿಂದ ಸೇರಿದ್ದರು.
ಕ್ವಾರ್ಟರ್‌ಫೈನಲ್ಸ್‌ ಹಂತದಲ್ಲಿ ಆರಂಭದಲ್ಲಿ, ಎಂಟು ಬಿ-ಗರ್ಲ್‌ಗಳು ತಲಾ ಮೂರು ಸುತ್ತುಗಳ ನಾಕ್‌ಔಟ್ ಕದನಗಳಲ್ಲಿ ಫೈನಲ್‌ಗೆ ಪ್ರವೇಶಿಸಲು ವಿಫಲರಾದರು. ಬಾನೆವಿಕ್ ಬೆಳ್ಳಿ ಪದಕವನ್ನು ಗೆದ್ದರೆ, ಚೀನಾದ ಬಿ-ಗರ್ಲ್ ಲಿಯು ಕ್ವಿಂಗಿ ನೆದರ್ಲ್ಯಾಂಡ್ಸ್ನ ಬಿ- ಗರ್ಲ್ ಇಂಡಿಯಾ ಸರ್ಡ್ಜೋ ವಿರುದ್ಧ ಸೆಣಸಿ ಕಂಚಿನ ಪದಕಕ್ಕೆ ಮುತ್ತಿಕ್ಕಿದರು. ಕ್ವಿಂಗಿ ಅವರು ಬ್ರೇಕಿಂಗ್ ಕ್ಷೇತ್ರಕ್ಕೆ ಹೊಸಬರು.
