ಹೈದರಾಬಾದ್: ಕಳೆದ 2 ತಿಂಗಳಿನಿಂದ ಕ್ರಿಕೆಟ್ ಅಭಿಮಾನಿಗಳಿಗೆ ರಸದೌತಣ ನೀಡುತ್ತಾ ಬಂದಿರುವ 2024 ರ ಐಪಿಎಲ್ ಹಂಗಾಮ ಕೊನೆಯ ಘಟ್ಟಕ್ಕೆ ತಲುಪಿದೆ. ಲೀಗ್ ಎಲ್ಲ 70 ಪಂದ್ಯಗಳು ಮಕ್ತಾಯಗೊಂಡಿದ್ದು, ಟಾಪ್ 4 ತಂಡಗಳು ಪ್ಲೇಆಫ್ನಲ್ಲಿ ಸ್ಥಾನ ಭದ್ರ ಮಾಡಿಕೊಂಡಿವೆ.
ಮಾರ್ಚ್ 22 ರಿಂದ ಆರಂಭವಾಗಿದ್ದ ಐಪಿಎಲ್ ಕ್ರೀಡಾಭಿಮಾನಿಗಳಿಗೆ ಭರಪೂರ ಮನರಂಜನೆ ನೀಡಿದೆ. ಟೂರ್ನಿಯಲ್ಲಿ ಭಾಗವಹಿಸಿದ್ದ 10 ತಂಡಗಳ ಪೈಕಿ 4 ಟೀಮ್ಗಳು ಟ್ರೋಫಿ ಸನಿಹಕ್ಕೆ ಬಂದಿವೆ. ನಾಳೆಯಿಂದ ಕ್ವಾಲಿಫೈಯರ್ ಪಂದ್ಯಗಳು ಆರಂಭವಾಗಲಿವೆ.
ಹೀಗಿದೆ ಫೈನಲ್ ಹಾದಿ: ಕೋಲ್ಕತ್ತಾ ನೈಟ್ ರೈಡರ್ಸ್, ಸನ್ರೈಸರ್ಸ್ ಹೈದರಾಬಾದ್, ರಾಜಸ್ಥಾನ ರಾಯಲ್ಸ್, ಬೆಂಗಳೂರು ರಾಯಲ್ ಚಾಲೆಂಜರ್ಸ್ ತಂಡಗಳು ಪ್ಲೇಆಫ್ಗೇರಿವೆ. ಇದರಲ್ಲಿ ಮೊದಲ ಕ್ವಾಲಿಫೈಯರ್ ಪಂದ್ಯ ಮೇ 21 ರಂದು ಕೋಲ್ಕತ್ತಾ ನೈಟ್ ರೈಡರ್ಸ್ v/s ಸನ್ರೈಸರ್ಸ್ ಹೈದರಾಬಾದ್ ನಡುವೆ ಗುಜರಾತ್ನ ಅಹಮದಾಬಾದ್ನಲ್ಲಿ ನಡೆಯಲಿದೆ.
ಎಲಿಮಿನೇಟರ್ ಪಂದ್ಯದಲ್ಲಿ ಪಾಯಿಂಟ್ ಪಟ್ಟಿಯಲ್ಲಿ ಮೂರನೇ ಮತ್ತು ನಾಲ್ಕನೇ ಸ್ಥಾನ ಪಡೆದ ರಾಜಸ್ಥಾನ ರಾಯಲ್ಸ್, ಬೆಂಗಳೂರು ರಾಯಲ್ ಚಾಲೆಂಜರ್ಸ್ ತಂಡಗಳು ಎದುರಾಗಲಿವೆ. ಈ ಪಂದ್ಯ ಮೇ 22 ರಂದು ಅಹಮದಾಬಾದ್ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಜರುಗಲಿದೆ.
ಮೊದಲ ಕ್ವಾಲಿಫೈಯರ್ ಗೆದ್ದ ತಂಡ ನೇರವಾಗಿ ಫೈನಲ್ಗೆ ಲಗ್ಗೆ ಇಟ್ಟರೆ, ಸೋತ ತಂಡಕ್ಕೆ ಇನ್ನೊಂದು ಅವಕಾಶ ಇರಲಿದೆ. ಅಂದರೆ, 2ನೇ ಕ್ವಾಲಿಫೈಯರ್ ಪಂದ್ಯವಾಡಲಿದೆ. ಇತ್ತ ಎಲಿಮಿನೇಟರ್ ಪಂದ್ಯದಲ್ಲಿ ಗೆದ್ದ ತಂಡ ಕ್ವಾಲಿಫೈಯರ್ 2 ಹಂತಕ್ಕೆ ತಲುಪಿದರೆ, ಸೋತ ತಂಡ ಟೂರ್ನಿಯಿಂದ ಹೊರಬೀಳಲಿದೆ. ಎರಡನೇ ಕ್ವಾಲಿಫೈಯರ್ ಪಂದ್ಯ ಮೇ 24 ರಂದು ಚೆನ್ನೈನ ಚೆಪಾಕ್ ಕ್ರೀಡಾಂಗಣದಲ್ಲಿ ನಡೆಯಲಿದೆ.
2ನೇ ಕ್ವಾಲಿಫೈಯರ್ ಹೈದರಾಬಾದ್ ಅಥವಾ ಕೋಲ್ಕತ್ತಾ ತಂಡಗಳ ಪೈಕಿ ಒಂದು ತಂಡ ಆಡುವುದು ಪಕ್ಕಾ. ಇಲ್ಲಿ ಎದುರಾಳಿಯಾಗಿ ಆರ್ಸಿಬಿ ಹಾಗೂ ರಾಜಸ್ಥಾನಗಳಲ್ಲಿ ಯಾವ ತಂಡ ಇರಲಿದೆ ಎಂಬುದು ಕುತೂಹಲಕರ ಪ್ರಶ್ನೆಯಾಗಿದೆ. ಇನ್ನೂ, ಕ್ರಿಕೆಟ್ ಲೋಕವೇ ಎದುರು ನೋಡುತ್ತಿರುವ ಫೈನಲ್ ಪಂದ್ಯ ಚೆನ್ನೈನಲ್ಲಿ ಮೇ 26 ರಂದು ನಡೆಯಲಿದೆ.
ತಂಡ ಹೋರಾಟ ಹೀಗಿತ್ತು: ಪ್ಲೇಆಫ್ಗೆ ಮೊದಲ ತಂಡವಾಗಿ ಲಗ್ಗೆ ಇಟ್ಟಿದ್ದು ಕೆಕೆಆರ್. ಆಡಿದ 14 ಪಂದ್ಯಗಳಲ್ಲಿ 9 ಗೆದ್ದು, 3 ರಲ್ಲಿ ಸೋತಿದೆ. 1 ಫಲಿತಾಂ ಬಂದಿಲ್ಲ. 20 ಅಂಕಗಳೊಂದಿಗೆ ಪಾಯಿಂಟ್ಸ್ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದೆ. 17 ಅಂಕಗಳೊಂದಿಗೆ 2ನೇ ಸ್ಥಾನದಲ್ಲಿರುವ ಸನ್ರೈಸರ್ಸ್ ಹೈದರಾಬಾದ್ 14 ರಲ್ಲಿ 8 ಗೆದ್ದು, 5 ರಲ್ಲಿ ಸೋತಿದೆ. 1 ಪಂದ್ಯ ಮಳೆಗೆ ಆಹುತಿಯಾಗಿದೆ. ಮೂರನೇ ತಂಡವಾಗಿ ಪ್ಲೇಆಫ್ಗೆ ಬಂದಿದೆ.
2ನೇ ತಂಡವಾಗಿ ಪ್ಲೇಆಫ್ಗೇರಿದ ರಾಜಸ್ಥಾನ ರಾಯಲ್ಸ್ ಆಡಿದ 14 ಪಂದ್ಯಗಳಲ್ಲಿ 8 ಗೆಲುವು, 5 ಸೋಲಿನೊಂದಿಗೆ 17 ಅಂಕ ಹೊಂದಿದೆ ನೆಟ್ರನ್ರೇಟ್ ಆಧಾರದಲ್ಲಿ ಅಂಕಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದೆ. ಇನ್ನು ಟೂರ್ನಿಯಲ್ಲಿ ಪವಾಡಗಳನ್ನು ಸೃಷ್ಟಿಸುತ್ತಾ ಅಚ್ಚರಿಯ ರೀತಿಯಲ್ಲಿ ನಾಲ್ಕರ ಹಂತಕ್ಕೆ ಏರಿರುವ ಆರ್ಸಿಬಿ 14 ರಲ್ಲಿ ತಲಾ 7 ಗೆಲುವು, ಸೋಲಿನೊಂದಿಗೆ 14 ಅಂಕ ಹೊಂದಿದೆ.
ಇದನ್ನೂ ಓದಿ: "ಅಂದು ಟೀಕಿಸಿದವರಿಂದಲೇ ಇಂದು ಹೊಗಳಿಕೆ": ಒಂದೇ ರಾತ್ರಿಯಲ್ಲಿ ಹೀರೋ ಆದ ಯಶ್ ದಯಾಳ್ - Yash Dayal
