ಬೆಂಗಳೂರು: ಗೆಲ್ಲುವ ಸಲುವಾಗಿ ಹೋರಾಟ ಮಾಡಬೇಕು. ಆದರೆ, ಸನ್ರೈಸರ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ಸೋಲಿನ ಅಂತರವನ್ನು ಕಡಿಮೆ ತಗ್ಗಿಸಿಕೊಳ್ಳಲು ಹೋರಾಟ ನಡೆಸಿತು. ಅದರಲ್ಲಿ ತುಸು ಯಶಸ್ಸು ಕಂಡು 25 ರನ್ಗಳಿಂದ ಪರಾಜಯ ಕಂಡಿತು. ಐಪಿಎಲ್ನಲ್ಲಿ ಇದು ತಂಡಕ್ಕೆ 6ನೇ ಸೋಲು.
ಇಲ್ಲಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಸೋಮವಾರ ರಾತ್ರಿ ನಡೆದ ಪಂದ್ಯದಲ್ಲಿ ರನ್ ಮಳೆಯೇ ಹರಿಯಿತು. ಹೈದರಾಬಾದ್ ತಂಡ ತನ್ನ ದಾಖಲೆಯನ್ನು ಮತ್ತಷ್ಟು ಉತ್ತಮಪಡಿಸಿಕೊಂಡು, ಐಪಿಎಲ್ ಇತಿಹಾಸದಲ್ಲಿ ಮತ್ತೊಂದು ಚಾರಿತ್ರಿಕ ಸಾಧನೆ ಮಾಡಿತು. ಆರ್ಸಿಬಿ ಕೂಡ ತನ್ನ 2ನೇ ಅತ್ಯಧಿಕ ರನ್ ಕೂಡ ದಾಖಲಿಸಿತು. ಪಂದ್ಯದಲ್ಲಿ ಹಲವು ದಾಖಲೆಗಳು ಸೃಷ್ಟಿಯಾದವು.
ಚಿನ್ನಸ್ವಾಮಿಯಲ್ಲಿ 'ಸನ್'ರೈಸ್: ಆರ್ಸಿಬಿ ಬೌಲರ್ಗಳು ಮತ್ತೆ ದಂಡಿಸಿಕೊಳ್ಳಲಿದ್ದಾರೆ ಎಂಬ ನಿರೀಕ್ಷೆಯು ಹುಸಿಯಾಗಲಿಲ್ಲ. ಚಿಕ್ಕದಾದ ಕ್ರೀಡಾಂಗಣದಲ್ಲಿ ತನ್ನ ಬ್ಯಾಲಿಂಗ್ ಬಲವನ್ನ ತೋರಿಸಿದ ಸನ್ರೈಸರ್ಸ್ ಹೈದರಾಬಾದ್ ದಾಖಲೆಯ ಶಿಖರ ಕಟ್ಟಿತು. ಆರಂಭಿಕರಾದ ಟ್ರೇವಿಸ್ ಹೆಡ್ ಮತ್ತು ಅಭಿಷೇಕ್ ಶರ್ಮಾ ಪವರ್ಪ್ಲೇ ಮುಗಿಯುವ ಹೊತ್ತಿಗೆ 76 ರನ್ ಸಿಡಿಸಿ ತಂಡದ ಗುರಿಯನ್ನ ಸೆಟ್ ಮಾಡಿದ್ದರು. 8ನೇ ಓವರ್ಗಳಲ್ಲಿ 100 ರನ್ ದಾಟಿತು.
ಆರ್ಸಿಬಿ ಬೌಲರ್ಗಳನ್ನು ಚೆಂಡಾಡಿದ ಹೆಡ್ 41 ಎಸೆತಗಳಲ್ಲಿ ಭರ್ಜರಿ ಶತಕ ಸಾಧನೆ ಮಾಡಿದರು. ಅವರ ಇನಿಂಗ್ಸ್ನಲ್ಲಿ 8 ಸಿಕ್ಸರ್, 9 ಬೌಂಡರಿಗಳು ಇದ್ದಿದ್ದು ಬಿರುಗಾಳಿ ಬ್ಯಾಟಿಂಗ್ಗೆ ಸಾಕ್ಷಿಯಾಗಿದ್ದವು. ಅಭಿಷೇಕ್ ಶರ್ಮಾ 34 ರನ್ಗೆ ಔಟಾದ ಬಳಿಕ ಬಂದ ಹೆನ್ರಿಕ್ ಕ್ಲಾಸಿನ್ ತಾನೂ ಕಡಿಮೆ ಇಲ್ಲ ಎಂಬಂತೆ ಬ್ಯಾಟ್ ಬೀಸಿ 31 ಎಸೆತಗಲ್ಲಿ 7 ಸಿಕ್ಸರ್, 2 ಬೌಂಡರಿ ಸಮೇತ 67 ರನ್ ಚಚ್ಚಿದರು. ಕೊನೆಯಲ್ಲಿ ಆ್ಯಡಂ ಮಾರ್ಕ್ರಮ್ 32, ಅಬ್ದುಲ್ ಸಮದ್ 37 ರನ್ ಚಚ್ಚಿ ಆರ್ಸಿಬಿ ಬೌಲರ್ಗಳ ಮೇಲೆ ಕರುಣೆಯನ್ನೂ ತೋರಿಸಲಿಲ್ಲ.
ದಾಖಲೆ ಮರುಸ್ಥಾಪನೆ: ಕೆಲವೇ ದಿನಗಳ ಹಿಂದಷ್ಟೇ ಮುಂಬೈ ಇಂಡಿಯನ್ಸ್ ವಿರುದ್ಧ ಐಪಿಎಲ್ ಇತಿಹಾಸದಲ್ಲೇ ಅತ್ಯಧಿಕ ರನ್ ಗಳಿಸಿ ದಾಖಲೆ ಬರೆದಿದ್ದ ಸನ್ರೈಸರ್ಸ್ ಹೈದರಾಬಾದ್, ಆರ್ಸಿಬಿ ಎದುರು ತನ್ನ ದಾಖಲೆಯನ್ನು ಮತ್ತಷ್ಟು ವಿಸ್ತರಿಸಿತು. 20 ಓವರ್ಗಳಲ್ಲಿ 3 ವಿಕೆಟ್ಗೆ 287 ರನ್ ಗಳಿಸಿ ಚಾರಿತ್ರಿಕ ದಾಖಲೆ ಮಾಡಿತು. ಇದಕ್ಕೂ ಮೊದಲೇ ಇದೇ ತಂಡ 277 ರನ್ ಗಳಿಸಿತ್ತು. ಎರಡೂ ಅತ್ಯಧಿಕ ರನ್ ದಾಖಲೆ ಈ ತಂಡದ ಹೆಸರಿನಲ್ಲಿದೆ.
ಸೋಲಿನಲ್ಲೂ ಆರ್ಸಿಬಿ ಹೋರಾಟ: ಎದುರಿರುವ ಅಸಾಧ್ಯ ಗುರಿ ಕಂಡಾಗಲೇ ಸೋಲು ಖಚಿತವಾಗಿದ್ದರೂ, ಹೋರಾಟ ನಡೆಸಿದ ಆರ್ಸಿಬಿ 7 ವಿಕೆಟ್ಗೆ 262 ರನ್ ಗಳಿಸಿತು. ಈ ಆವೃತ್ತಿಯಲ್ಲಿ ಮೊದಲ ಬಾರಿಗೆ ಬಿರುಸಿನ ಬ್ಯಾಟ್ ಮಾಡಿದ ವಿರಾಟ್ ಕೊಹ್ಲಿ ಮತ್ತು ನಾಯಕ ಡುಪ್ಲೆಸಿಸ್ ಪವರ್ಪ್ಲೇಯ 6 ಓವರ್ಗಳಲ್ಲಿ 79 ರನ್ ಚಚ್ಚಿದರು. ನಂತರದ ಓವರ್ನಲ್ಲಿ ವಿರಾಟ್ ದೊಡ್ಡ ಹೊಡೆತಕ್ಕೆ ಕೈ ಹಾಕಿ ಔಟಾದರು. ಬಳಿಕ ಸಹಜ ಎಂಬಂತೆ ಮಧ್ಯಮ ಕ್ರಮಾಂಕದ ಆಟಗಾರರು ವಿರಾಟ್ ಕೊಹ್ಲಿ ಜೊತೆಗೂಡಿ ಪೆವಿಲಿಯನ್ಗೆ ಹೆಜ್ಜೆಹಾಕಿದರು.
ತಂಡ ಸೋಲಿನ ದವಡೆಗೆ ಸಿಲುಕಿದ್ದರೂ ದಿಟ್ಟ ಹೋರಾಟ ನಡೆಸಿ ನಾಯಕ ಪ್ಲೆಸಿಸ್ 28 ಎಸೆತಗಳಲ್ಲಿ 62 ರನ್ ಮಾಡಿದರೆ, ಫಿನಿಶಿಂಗ್ ಸ್ಟಾರ್ ದಿನೇಶ್ ಕಾರ್ತಿಕ್ ಅಬ್ಬರಿಸಿದರು. 35 ಎಸೆತಗಳಲ್ಲಿ 83 ರನ್ ಗಳಿಸಿದ ಕಾರ್ತಿಕ್ 7 ಸಿಕ್ಸರ್, 5 ಬೌಂಡರಿ ಬಾರಿಸಿದರು. ಅನುಜ್ ರಾವತ್ ಕೊನೆಯಲ್ಲಿ 25 ರನ್ ಮಾಡಿ ಸೋಲಿನ ಅಂತರವನ್ನು ತುಸು ಕಡಿಮೆ ಮಾಡಿದರು. 6ನೇ ಸೋಲು ಕಾಣುವ ಮೂಲಕ ತಂಡ ಪ್ಲೇ ಆಫ್ನಿಂದ ಬಹುತೇಕ ಹೊರಬಿದ್ದಂತಾಗಿದೆ. ಎಂಟರಘಟ್ಟಕ್ಕೆ ತಲುಪಬೇಕಾದರೆ ಪವಾಡವೇ ನಡೆಯಬೇಕು.
ಇತರ ದಾಖಲೆಗಳು: ಇನ್ನೂ ಪಂದ್ಯದಲ್ಲಿ ಹಲವು ದಾಖಲೆಗಳು ರಚನೆಯಾದವು. ಐಪಿಎಲ್ ಟೂರ್ನಿಯಲ್ಲಿ ಕಡಿಮೆ ರನ್ ಗಳಿಸಿದ (48) ಮತ್ತು ಅತ್ಯಧಿಕ ರನ್ ಬಿಟ್ಟುಕೊಟ್ಟ (287) ರನ್ ಬಿಟ್ಟುಕೊಟ್ಟ ತಂಡ ಎಂಬ ಕುಖ್ಯಾತಿಗೆ ಆರ್ಸಿಬಿ ಪಾತ್ರವಾಯಿತು. ಒಂದೇ ಪಂದ್ಯದಲ್ಲಿ 2ನೇ ಸಲ 38 ಸಿಕ್ಸರ್ ದಾಖಲಾದವು. ಆರ್ಸಿಬಿಯ 4 ಬೌಲರ್ಗಳು 50 ಕ್ಕೂ ಅಧಿಕ ರನ್ ಬಿಟ್ಟುಕೊಟ್ಟರು. ತಜ್ಞ ಬೌಲರ್ಗಳು ಈ ಸಾಧನೆ ಮಾಡಿದ್ದು ಇದೇ ಮೊದಲು. ಪಂದ್ಯವೊಂದರಲ್ಲಿ 549 ರನ್ ದಾಖಲಾದವು. ಐಪಿಎಲ್ ಜೊತೆಗೆ ಟಿ -20 ಇತಿಹಾಸದಲ್ಲೇ ಅತ್ಯಧಿಕ ಮೊತ್ತವಾಗಿದೆ. ಈ ಹಿಂದೆ ಮುಂಬೈ ಮತ್ತು ಹೈದರಾಬಾದ್ ನಡುವಿನ ಪಂದ್ಯದಲ್ಲಿ 523 ರನ್ ದಾಖಲಾಗಿದ್ದವು.
ಇದನ್ನೂ ಓದಿ: IPL ಇತಿಹಾಸದಲ್ಲೇ ಹೊಸ ದಾಖಲೆ! ರನ್ ಹೊಳೆ ಹರಿಸಿದ ಹೈದರಾಬಾದ್; ಆರ್ಸಿಬಿಗೆ 287 ರನ್ ಗುರಿ! - RCB Vs SRH
