ಹೈದರಾಬಾದ್: ಐಪಿಎಲ್ 17 ನೇ ಋತುವಿನ ಲೀಗ್ ಹಂತವು ಪೂರ್ಣಗೊಂಡಿದೆ. ಇನ್ನು 4 ಪಂದ್ಯಗಳಲ್ಲಿ ಈ ಋತುವಿನ ವಿಜೇತರು ಯಾರೆಂಬುದು ನಿರ್ಧಾರವಾಗಲಿದೆ. ಚೆನ್ನೈ ತಂಡವನ್ನು ಬಗ್ಗುಬಡಿದು ರೋಚಕವಾಗಿ ಪ್ಲೇ ಆಫ್ಗೆ ಬಂದಿರುವ ರಾಯಲ್ ಚಾಲೆಂಜರ್ಸ್ ಜೊತೆಗೆ ರಾಜಸ್ಥಾನ ರಾಯಲ್ಸ್, ಕೋಲ್ಕತ್ತಾ ನೈಟ್ ರೈಡರ್ಸ್, ಸನ್ರೈಸರ್ಸ್ ಹೈದರಾಬಾದ್ ತಂಡಗಳು ಪ್ರಶಸ್ತಿಗಾಗಿ ಹೋರಾಟ ನಡೆಸಲಿವೆ.
ಅಂಕಪಟ್ಟಿಯಲ್ಲಿ ಮೊದಲೆರಡು ಸ್ಥಾನಗಳಲ್ಲಿರುವ ಕೋಲ್ಕತ್ತಾ ನೈಟ್ ರೈಡರ್ಸ್ ಮತ್ತು ಸನ್ರೈಸರ್ಸ್ ಹೈದರಾಬಾದ್ ತಂಡಗಳು ಮೇ 21 ರಂದು ಅಹಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆಯುವ ಮೊದಲ ಕ್ವಾಲಿಫೈಯರ್ ಪಂದ್ಯದಲ್ಲಿ ಮುಖಾಮುಖಿಯಾಗಲಿವೆ. ಇಲ್ಲಿ ಗೆಲ್ಲುವ ತಂಡ ನೇರವಾಗಿ ಫೈನಲ್ ಪ್ರವೇಶಿಸಲಿದೆ. ಇತ್ತಂಡಗಳು ಲೀಗ್ ಹಂತದಲ್ಲಿ ಹಲವು ತಂಡಗಳನ್ನು ಮಣಿಸಿ ಪ್ರಶಸ್ತಿ ಸುತ್ತಿಗೆ ಬಂದಿವೆ.
ಫೈನಲ್ ತಲುಪೋರ್ಯಾರು?: ಮೊದಲ ಕ್ವಾಲಿಫೈಯರ್ನಲ್ಲಿ ಎದುರಾಗುತ್ತಿರುವ ಹೈದರಾಬಾದ್ ಮತ್ತು ಕೋಲ್ಕತ್ತಾದಲ್ಲಿ ಯಾವ ತಂಡ ಗೆದ್ದರೂ ನೇರವಾಗಿ ಫೈನಲ್ ತಲುಪಲಿದೆ. ಎರಡೂ ತಂಡಗಳು ಐಪಿಎಲ್ ಮಾಜಿ ಚಾಂಪಿಯನ್ ಆಗಿದ್ದು, ಯಾವ ತಂಡ ಮೊದಲು ಫೈನಲ್ ತಲುಪಲಿದೆ ಎಂಬ ನಿರೀಕ್ಷೆ ಇದೆ. ಟೂರ್ನಿಯಲ್ಲಿ ಅಬ್ಬರಿಸಿ ಬೊಬ್ಬಿರಿದಿರುವ ಸನ್ರೈಸರ್ಸ್ ಬಲಿಷ್ಠ ಕೋಲ್ಕತ್ತಾ ಸವಾಲನ್ನು ಹೇಗೆ ಎದುರಿಸಲಿದೆ ಎಂಬುದು ಕುತೂಹಲದ ಸಂಗತಿ.
ಕಳೆದ ಆವೃತ್ತಿಯಲ್ಲಿ ಹೀನಾಯ ಪ್ರದರ್ಶನ ನೀಡಿ ಅಂಕಪಟ್ಟಿಯಲ್ಲಿ ಕೊನೆಯ ಸ್ಥಾನ ಪಡೆದಿದ್ದ ಹೈದರಾಬಾದ್ ಈ ಬಾರಿ ಡ್ಯಾಶಿಂಗ್ ಪ್ರದರ್ಶನದೊಂದಿಗೆ ಪ್ಲೇ ಆಫ್ ತಲುಪಿದೆ. ಬಲಿಷ್ಠ ತಂಡಗಳನ್ನು ಸೋಲಿಸಿ ಪಾಯಿಂಟ್ ಪಟ್ಟಿಯಲ್ಲಿ ಎರಡನೇ ಸ್ಥಾನ ಪಡೆದಿದೆ. ಜೊತೆಗೆ ಎರಡು ಬಾರಿ ಅತ್ಯಧಿಕ ಸ್ಕೋರ್ ದಾಖಲೆ ನಿರ್ಮಿಸಿದೆ. (287/3, 277/3).
ಹೈದರಾಬಾದ್ ಬ್ಯಾಟಿಂಗ್ ಪವರ್: ತಂಡದ ಆರಂಭಿಕ ಜೋಡಿ ಅಭಿಷೇಕ್ ಶರ್ಮಾ ಮತ್ತು ಟ್ರಾವಿಸ್ ಹೆಡ್ ಜೊತೆಯಾಟ ತಂಡದ ಬಲವಾಗಿದೆ. ಈ ಸೂಪರ್ ಹಿಟ್ ಜೋಡಿ ಸಿಡಿದರೆ, ಕೋಲ್ಕತ್ತಾಗೆ ಸಂಕಷ್ಟ ತಪ್ಪಿದ್ದಲ್ಲ. ನಿತೀಶ್ ರೆಡ್ಡಿ, ಹೆನ್ರಿಚ್ ಕ್ಲಾಸಿನ್ ಮಧ್ಯಮ ಕ್ರಮಾಂಕದಲ್ಲಿ ಸಾಥ್ ನೀಡಲಿದ್ದಾರೆ. ಕೊನೆಯಲ್ಲಿ ಅಬ್ದುಲ್ ಸಮದ್ ಕೂಡ ಮಿಂಚುತ್ತಿದ್ದಾರೆ. ಈ ಆಟಗಾರರು ತಮ್ಮ ಫಾರ್ಮ್ ಮುಂದುವರಿಸಿದರೆ ಹೈದರಾಬಾದ್ ಫೈನಲ್ ತಲುಪಲು ಸಹಾಯವಾಗಲಿದೆ. ಬೌಲಿಂಗ್ನಲ್ಲಿ ವೇಗಿಗಳಾದ ಭುವನೇಶ್ವರ್, ನಟರಾಜನ್ ಮತ್ತು ನಾಯಕ ಪ್ಯಾಟ್ ಕಮ್ಮಿನ್ಸ್ ಬಿಗಿ ದಾಳಿ ನಡೆಸಬೇಕು. ಕೋಲ್ಕತ್ತಾದಲ್ಲಿ ಸ್ಪಿನ್ನರ್ಗಳಿದ್ದರೆ, ಹೈದರಾಬಾದ್‌ನಲ್ಲಿ ಬಲಿಷ್ಠ ವೇಗಿಗಳ ಪಡೆ ಇದೆ.
ಕೋಲ್ಕತ್ತಾದ್ದೇ ಮೇಲುಗೈ: ಟೂರ್ನಿಯಲ್ಲಿ ತಂಡಗಳ ಈವರೆಗಿನ ಪ್ರದರ್ಶನ ಗಮನಿಸಿದರೆ, ಕೋಲ್ಕತ್ತಾ ನೈಟ್ ರೈಡರ್ಸ್ ಎಲ್ಲ ವಿಭಾಗದಲ್ಲೂ ಬಲಾಢ್ಯವಾಗಿದೆ. ಆರಂಭಿಕ ಸುನಿಲ್ ನರೈನ್ ಮತ್ತು ಫಿಲ್ ಸಾಲ್ಟ್ ಅತ್ಯುತ್ತಮ ಫಾರ್ಮ್‌ನಲ್ಲಿದ್ದಾರೆ. ಅದರಲ್ಲೂ ನರೈನ್ ಸ್ಪಿನ್ಗಿಂತಲೂ ಬ್ಯಾಟಿಂಗ್ನಲ್ಲೇ ಮೋಡಿ ಮಾಡಿದ್ದಾರೆ. ನಾಯಕ ಶ್ರೇಯಸ್ ಅಯ್ಯರ್, ವೆಂಕಟೇಶ್ ಅಯ್ಯರ್ ಹೆಚ್ಚು ಫಾರ್ಮ್‌ನಲ್ಲಿಲ್ಲ. ಪಂದ್ಯದ ದಿಕ್ಕನ್ನೇ ಬದಲಿಸಬಲ್ಲ ರಿಂಕು ಸಿಂಗ್, ಆಂಡ್ರೆ ರಸೆಲ್ರನ್ನು ಔಟ್ ಮಾಡಲು ಹೈದರಾಬಾದ್ ವಿಶೇಷ ತಂತ್ರ ರೂಪಿಸಬೇಕು. ಬೌಲಿಂಗ್ನಲ್ಲಿ ಹರ್ಷಿತ್ ರಾಣಾ, ವರುಣ್ ಚಕ್ರವರ್ತಿ ಮತ್ತು ಸುನಿಲ್ ನರೈನ್ ಅಪಾಯಕಾರಿಯಾಗಿದ್ದಾರೆ.
ಪಿಚ್ ರಿಪೋರ್ಟ್ ಹೀಗಿದೆ: ಉತ್ತಮ ವೇಗ ಮತ್ತು ಬೌನ್ಸ್ ಹೊಂದಿರುವ ಅಹಮದಾಬಾದ್ ಪಿಚ್ ಬ್ಯಾಟರ್ ಮತ್ತು ಬೌಲರ್‌ಗಳಿಗೆ ಸೂಕ್ತವಾಗಿದೆ. ಮೊದಲು ಬ್ಯಾಟ್ ಮಾಡುವ ತಂಡಕ್ಕೆ ಗೆಲುವಿನ ಸಾಧ್ಯತೆ ಹೆಚ್ಚು. ಐಪಿಎಲ್ನಲ್ಲಿ ಇತ್ತಂಡಗಳು ಇದುವರೆಗೆ 26 ಬಾರಿ ಮುಖಾಮುಖಿಯಾಗಿವೆ. ಇದರಲ್ಲಿ ಕೆಕೆಆರ್ 17 ಪಂದ್ಯ ಗೆದ್ದಿದ್ದರೆ, ಸನ್ರೈಸರ್ಸ್ ಕೇವಲ 7 ರಲ್ಲಿ ಜಯ ಸಾಧಿಸಿದೆ. ಈ ಋತುವಿನಲ್ಲಿ ಆಡಿದ ಒಂದು ಪಂದ್ಯದಲ್ಲೂ ಕೋಲ್ಕತ್ತಾ ವಿರುದ್ಧ ಹೈದರಾಬಾದ್ ಸೋತಿದೆ.
ಇದನ್ನೂ ಓದಿ: ಎಲಿಮಿನೇಟರ್ ಪಂದ್ಯ: ಅಹಮದಾಬಾದ್ಗೆ ಬಂದಿಳಿದ ಆರ್ಸಿಬಿಗೆ ಭವ್ಯ ಸ್ವಾಗತ - RCB Players reached Ahmedabad
