ಬೆಂಗಳೂರು : ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ (ಐಪಿಎಲ್) ಕೋಲ್ಕತ್ತಾ ನೈಟ್ ರೈಡರ್ಸ್ (ಕೆಕೆಆರ್) ಪರ ಆಲ್‌ರೌಂಡರ್ ಆಂಡ್ರೆ ರಸೆಲ್ ಶುಕ್ರವಾರ 100 ವಿಕೆಟ್ ಪಡೆದ ಮೊದಲ ವೇಗದ ಬೌಲರ್ ಎನಿಸಿಕೊಂಡಿದ್ದಾರೆ.
ನಗರದ ಎಂ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ಮತ್ತು ಕೆಕೆಆರ್ ನಡುವಿನ ಹಣಾಹಣಿಯಲ್ಲಿ ಆಂಡ್ರೆ ರಸೆಲ್ ಈ ಸಾಧನೆ ಮಾಡಿದರು. ತಮ್ಮ 114ನೇ ಐಪಿಎಲ್ ಪಂದ್ಯದಲ್ಲಿ ರಸೆಲ್ 17ನೇ ಓವರ್‌ನಲ್ಲಿ ರಜತ್ ಪಾಟಿದಾರ್ ಅವರ ವಿಕೆಟ್‌ನೊಂದಿಗೆ ಮೈಲಿಗಲ್ಲು ತಲುಪಿದರು. ಪಾಟಿದಾರ್ ಡೀಪ್ ಮಿಡ್ ವಿಕೆಟ್‌ನಲ್ಲಿ ರಿಂಕು ಸಿಂಗ್‌ಗೆ ಕ್ಯಾಚ್ ನೀಡಿದರು.
ಐಪಿಎಲ್ನಲ್ಲಿ 100 ವಿಕೆಟ್ ಗಳಿಸಿದ ಕೆಕೆಆರ್‌ನ ಏಕೈಕ ಎರಡನೇ ಬೌಲರ್ ಎಂಬ ಹೆಗ್ಗಳಿಕೆಗೂ ರಸೆಲ್ ಪಾತ್ರರಾದರು. 171 ಪಂದ್ಯಗಳಲ್ಲಿ 182 ವಿಕೆಟ್‌ಗಳೊಂದಿಗೆ ಆಫ್-ಸ್ಪಿನ್ನರ್ ಸುನಿಲ್ ನರೈನ್ ಚಾರ್ಟ್‌ನಲ್ಲಿ ಅಗ್ರಸ್ಥಾನದಲ್ಲಿದ್ದಾರೆ. 2014 ರ ಐಪಿಎಲ್ ಹರಾಜಿನಲ್ಲಿ ಇಬ್ಬರೂ ಆಟಗಾರರನ್ನು ಕೆಕೆಆರ್ ಆಯ್ಕೆ ಮಾಡಿತು. ಅಂದಿನಿಂದ ಈ ಇಬ್ಬರು ಕೆರಿಬಿಯನ್ ಆಟಗಾರರು ಫ್ರಾಂಚೈಸಿಯ ಅವಿಭಾಜ್ಯ ಅಂಗವಾಗಿದ್ದಾರೆ.
ಈ ಪಂದ್ಯಕ್ಕೂ ಮೊದಲು ರಸೆಲ್ 24.24 ರ ಸರಾಸರಿಯಲ್ಲಿ 98 ವಿಕೆಟ್‌ಗಳನ್ನು ಹೊಂದಿದ್ದರು. 9.30 ರ ಎಕಾನಮಿಯಲ್ಲಿ 15.64 ರ ಸ್ಟ್ರೈಕ್ ರೇಟ್‌ನಲ್ಲಿ ರನ್ ಬಿಟ್ಟು ಕೊಟ್ಟಿದ್ದಾರೆ. ಅಲ್ಲದೆ, ಕೆಕೆಆರ್‌ಗೆ ಐದು ವಿಕೆಟ್ ಪಡೆದ ಏಕೈಕ ವೇಗದ ಬೌಲರ್ ಆಗಿದ್ದಾರೆ. ನಂತರ ನರೈನ್ ಮತ್ತು ವರುಣ್ ಚಕ್ರವರ್ತಿ ಐದು ವಿಕೆಟ್‌ಗಳನ್ನು ಪಡೆದ ಸ್ಪಿನ್ನರ್ಸ್ಗಳಾಗಿದ್ದಾರೆ. ಇನ್ನು ನಾಲ್ಕು ವಿಕೆಟ್ ಪಡೆದವರ ಸಾಲಿನ ಮತ್ತೋರ್ವ ವೇಗದ ಬೌಲರ್ ಉಮೇಶ್ ಯಾದವ್ ಮತ್ತು ಚೈನಾಮನ್ ಖ್ಯಾತಿಯ ಕುಲದೀಪ್ ಯಾದವ್ ಜೊತೆಗೆ ಸಮವಾಗಿದ್ದಾರೆ.
ಐಪಿಎಲ್ನಲ್ಲಿ 'ಡ್ರೆ ರಸ್' ಎಂದು ಜನಪ್ರಿಯವಾಗಿರುವ ರಸೆಲ್ ಕೆಕೆಆರ್‌ಗೆ ಸ್ಫೋಟಕ ಫಿನಿಶರ್ ತಮ್ಮ ಪಾತ್ರವನ್ನು ನಿರ್ವಹಿಸಿಕೊಂಡು ಬಂದಿದ್ದಾರೆ. ತಮ್ಮ ಆಕ್ರಮಣಕಾರಿ ಬ್ಯಾಟಿಂಗ್ ಶೈಲಿಯಿಂದ ಕಳೆದ ಕೆಲವು ಋತುಗಳಲ್ಲಿ ಫ್ರಾಂಚೈಸಿಗಾಗಿ ಏಕಾಂಗಿಯಾಗಿ ಅನೇಕ ಪಂದ್ಯಗಳನ್ನು ಗೆಲ್ಲಿಸಿಕೊಟ್ಟಿದ್ದಾರೆ. 29.82 ರ ಸರಾಸರಿಯಲ್ಲಿ 2,326 ರನ್ ಗಳಿಸಿರುವ ರಸೆಲ್ 11 ಅರ್ಧ ಶತಕಗಳನ್ನು ಸಿಡಿಸಿದ್ದಾರೆ.
ಇದನ್ನೂ ಓದಿ : RCB Vs KKR: ಆರ್ಸಿಬಿ ವಿರುದ್ಧ ಗೆದ್ದು ಬೀಗಿದ ಕೆಕೆಆರ್ - IPL 2024
