ಪ್ಯಾರಿಸ್(ಫ್ರಾನ್ಸ್): ಕೆಂಪು ಮಣ್ಣಿನ ಅಂಕಣದಲ್ಲಿ ಸೋಲಿಲ್ಲದ ರಾಣಿಯಂತೆ ಮೆರೆಯುತ್ತಿರುವ ಪೋಲ್ಯಾಂಡ್ನ ಇಗಾ ಸ್ವಿಯಾಟೆಕ್ ಸತತ ಮೂರನೇ ಸಲ ಫ್ರೆಂಚ್ ಓಪನ್ ಪ್ರಶಸ್ತಿಗೆ ಮುತ್ತಿಕ್ಕಿದ್ದಾರೆ. ಶನಿವಾರ ಇಲ್ಲಿ ನಡೆದ ಫೈನಲ್ನಲ್ಲಿ ಇಟಲಿಯ ಜಾಸ್ಮಿನ್ ಪಾವ್ಲೀನಿ ಅವರನ್ನು 6-2, 6-1 ನೇರ ಸೆಟ್‌ಗಳಿಂದ ಸುಲಭವಾಗಿ ಸೋಲಿಸಿದರು. ಕೇವಲ 1 ಗಂಟೆ 8 ನಿಮಿಷಗಳಲ್ಲಿ ಆಟ ಮುಗಿಯಿತು.
23 ವರ್ಷ ವಯಸ್ಸಿನ ಅಗ್ರ ಶ್ರೇಯಾಂಕಿತೆ ಆಟಗಾರ್ತಿ ಕಳೆದ ಐದು ವರ್ಷಗಳಲ್ಲಿ ಗೆದ್ದ ನಾಲ್ಕನೇ ಗ್ರ್ಯಾನ್ಸ್ಲಾಮ್ ಪ್ರಶಸ್ತಿ ಇದಾಗಿದೆ. ರೋಲೆಂಡ್ ಗ್ಯಾರೋಸ್ನಲ್ಲಿ ಸೋಲೇ ಕಾಣದಂತೆ ಮುನ್ನುಗ್ಗುತ್ತಿರುವ ಇಗಾ, ಅವೆ ಮಣ್ಣಿನ ಅಂಕಣದಲ್ಲಿ ಗೆಲುವಿನ ಅಂತರವನ್ನು 21-0 ಇಗ್ಗಿಸಿದರು. ಜೊತೆಗೆ, ವೃತ್ತಿ ಜೀವನದಲ್ಲಿ 35-2 ರ ಸ್ಟ್ರೈಕ್ರೇಟ್ ಕಾಪಾಡಿಕೊಂಡರು.
ಆರಂಭದಲ್ಲಿ 1-2 ರಿಂದ ಹಿನ್ನಡೆಯಲ್ಲಿದ್ದ ಸ್ವಿಯಾಟೆಕ್, ಬಳಿಕ ಹಿಂತಿರುಗಿ ನೋಡದಂತೆ ಬಲವಾದ ಹೊಡೆತಗಳಿಂದ ಸತತ 10 ಗೇಮ್ ಪಾಯಿಂಟ್ ಗಳಿಸಿ ಮೊದಲ ಸೆಟ್ ಅನ್ನು 6-2 ರಲ್ಲಿ ಗೆದ್ದುಕೊಂಡರು. ಬಳಿಕದ ಎರಡನೇ ಸೆಟ್ನಲ್ಲೂ 12ನೇ ಶ್ರೇಯಾಂಕದ ಆಟಗಾರ್ತಿ ಜಾಸ್ಮಿನ್ ಪಾವ್ಲೀನಿ ಸೆಟೆದು ನಿಲ್ಲಲು ಸಾಧ್ಯವಾಗದೇ 6-1 ರಲ್ಲಿ ಸೆಟ್ ಬಿಟ್ಟುಕೊಡುವುದರ ಜೊತೆಗೆ ಮೊದಲ ಗ್ರ್ಯಾನ್ಸ್ಲಾಮ್ ಗೆಲ್ಲುವ ಅವಕಾಶವನ್ನು ತಪ್ಪಿಸಿಕೊಂಡರು.
ಹ್ಯಾಟ್ರಿಕ್ ಸಾಧನೆಗೈದ ಎರಡನೇ ಆಟಗಾರ್ತಿ: ಇಗಾ ಸ್ವಿಯಾಟೆಕ್ಗೆ ಇದು ಸತತ ಮೂರನೇ ಫ್ರೆಂಚ್ ಓಪನ್ ಗೆಲುವಾಗಿದೆ. ಬೆಲ್ಜಿಯಮ್ನ ಜಸ್ಟಿನ್ ಹೆನಿಸ್ ಅವರ ಬಳಿಕ ಹ್ಯಾಟ್ರಿಕ್ ಸಾಧನೆ ಮಾಡಿದ ಎರಡನೇ ಆಟಗಾರ್ತಿ ಎಂಬ ದಾಖಲೆ ಸರಿಗಟ್ಟಿದರು. ಜಸ್ಟಿನ್ ಅವರು 2005 ರಿಂದ 2007 ರ ನಡುವೆ ಮೂರು ಬಾರಿ ಫ್ರೆಂಚ್ ಓಪನ್ ಜಯಿಸಿದ್ದರು. ಇಗಾ ವೃತ್ತಿಜೀವನದ ನಾಲ್ಕನೇ ಗ್ರ್ಯಾನ್ಸ್ಲಾಮ್ ಆಗಿದೆ. 2022 ರಲ್ಲಿ ಅಮೆರಿಕನ್ ಓಪನ್ ಚಾಂಪಿಯನ್ ಆಗಿದ್ದರು.
ರನ್ನರ್ ಅಪ್ ಪ್ರಶಸ್ತಿಗೆ ತೃಪ್ತಿ ಪಟ್ಟ ಜಾಸ್ಮಿನ್ ಪಾವ್ಲೀನಿ ಮೊದಲ ಬಾರಿಗೆ ಫೈನಲ್ ಪ್ರವೇಶಿಸಿದ್ದರು. ಈ ವರ್ಷದ ಆಸ್ಟ್ರೇಲಿಯನ್ ಓಪನ್ನಲ್ಲಿ ನಾಲ್ಕನೇ ಸುತ್ತು ಪ್ರವೇಶಿಸಿದ್ದೇ ಶ್ರೇಷ್ಠ ಸಾಧನೆಯಾಗಿತ್ತು. ಇದಕ್ಕೂ ಮೊದಲು ಯಾವುದೇ ಟೂರ್ನಿಗಳಲ್ಲಿ ಎರಡನೇ ಸುತ್ತನ್ನೂ ಪ್ರವೇಶಿಸಿರಲಿಲ್ಲ.
ಇಂದು ಡಬಲ್ಸ್ ಫೈನಲ್: ಸಿಂಗಲ್ಸ್ ಫೈನಲ್ ಸೋತಿದ್ದರೂ, ಜಾಸ್ಮಿನ್ ಪಾವ್ಲೀನಗೆ ಮತ್ತೊಂದು ಅವಕಾಶವಿದೆ. ಇಂದು (ಭಾನುವಾರ) ನಡೆಯುವ ಡಬಲ್ಸ್ ಫೈನಲ್ನಲ್ಲಿ ಸಾರಾ ಇರ್ರಾನಿ ಜೊತೆಗೂಡಿ ಆಡಲಿದ್ದಾರೆ.
ಇದನ್ನೂ ಓದಿ: ಟಿ20 ವಿಶ್ವಕಪ್: ಆಸ್ಟ್ರೇಲಿಯಾ ದಿಟ್ಟ ಪ್ರದರ್ಶನಕ್ಕೆ ಶರಣಾದ ಇಂಗ್ಲೆಂಡ್ - Australia Nails England
