ನವದೆಹಲಿ: ಭಾರತ ಕ್ರಿಕೆಟ್ ತಂಡದ ಸ್ಟಾರ್ ಆಲ್‌ರೌಂಡರ್ ಮತ್ತು ಉಪನಾಯಕ ಹಾರ್ದಿಕ್ ಪಾಂಡ್ಯ ಅವರ ಅದ್ಭುತ ಪ್ರದರ್ಶನ ಈ ಭಾರಿ ಭಾರತ 17 ವರ್ಷಗಳ ನಂತರ ಜೂನ್ 29 ರಂದು ಎರಡನೇ ಟಿ20 ವಿಶ್ವಕಪ್ ಪ್ರಶಸ್ತಿಯನ್ನು ಗೆಲ್ಲಲು ಸಹಾಯ ಮಾಡಿತು. ರೋಹಿತ್ ಶರ್ಮಾ ನಾಯಕತ್ವದ ಟೀಂ ಇಂಡಿಯಾ ಐಸಿಸಿ ಟಿ20 ವಿಶ್ವಕಪ್ 2024 ರ ಫೈನಲ್ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾವನ್ನು 7 ರನ್‌ಗಳಿಂದ ಸೋಲಿಸಿತು. ಈ ಪಂದ್ಯ ರೋಚಕವಾಗಿದ್ದು, ಈ ಗೆಲುವಿನಲ್ಲಿ ಹಾರ್ದಿಕ್ ಪಾಂಡ್ಯ ಅವರ ಕೊಡುಗೆ ದೊಡ್ಡದಿದೆ. ಅವರು 3 ಓವರ್‌ಗಳಲ್ಲಿ 20 ರನ್ ನೀಡಿ 3 ಪ್ರಮುಖ ವಿಕೆಟ್ ಪಡೆದಿದ್ದರು.
VIDEO | Cricketer Hardik Pandya (@hardikpandya7) attends a roadshow in Vadodara to celebrate Team India's T20 World Cup victory. pic.twitter.com/Qp4rFg3Mxl
— Press Trust of India (@PTI_News) July 15, 2024
ವಡೋದರಾದಲ್ಲಿ ಹಾರ್ದಿಕ್ ಪಾಂಡ್ಯ ಉತ್ಸವ: ಟಿ20 ವಿಶ್ವಕಪ್ ಗೆದ್ದ 16 ದಿನಗಳ ನಂತರ ಹಾರ್ದಿಕ್ ಪಾಂಡ್ಯ ಅವರು ಬರೋಡಾ ತಲುಪಿದರು. ಅಲ್ಲಿ ಅವರಿಗೆ ಆತ್ಮೀಯ ಸ್ವಾಗತ ನೀಡಲಾಯಿತು. ಹಾರ್ದಿಕ್ ಪಾಂಡ್ಯ ಸ್ಥಳೀಯ ಆಟಗಾರನಾಗಿ ನಗರದ ಬೀದಿಗಳಲ್ಲಿ ಗೆಲುವಿನ ಉತ್ಸವ ನಡೆಸಿದರು. ಈ ವೇಳೆ ಹಾರ್ದಿಕ್‌ರನ್ನು ನೋಡಲು ರಸ್ತೆಯಲ್ಲಿ ಜನಸಾಗರವೇ ನೆರೆದಿತ್ತು. ಹಾರ್ದಿಕ್ ಅವರ ಮೆರವಣಿಗೆಯ ಸಮಯದಲ್ಲಿ ನಗರದ ಬೀದಿಗಳಲ್ಲಿ 3.5 ಲಕ್ಷಕ್ಕೂ ಹೆಚ್ಚು ಜನರು ಭಾಗಿಯಾಗಿದ್ದರು. ಈ ಮೆರವಣಿಗೆಯನ್ನು 5.5 ಕಿಲೋಮೀಟರ್ ಉದ್ದಕ್ಕೂ ನಡೆಸಲಾಯಿತು.
ಹಾರ್ದಿಕ್ ಪ್ರಯಾಣಿಸುತ್ತಿದ್ದ ವಾಹನದ ಮೇಲೆ ‘ಹಾರ್ದಿಕ್ ಪಾಂಡ್ಯ ಪರೇಡ್ ಆಫ್ ಬರೋಡಾ’ ಎಂದು ಬರೆಯಲಾಗಿತ್ತು. ಪಾಂಡ್ಯ ಅವರ ಬಸ್ ಹಳೆಯ ನಗರದಿಂದ (ಮಾಂಡ್ವಿ) ಪ್ರಾರಂಭವಾಗಿ ಸುಮಾರು 3.5 ರಿಂದ 4 ಕಿಲೋಮೀಟರ್ ಪ್ರಯಾಣಿಸಿ ಅಕೋಟಾದಲ್ಲಿ ಕೊನೆಗೊಂಡಿತು. ಈ ವೇಳೆ ಎಲ್ಲೆಡೆ ಅಭಿಮಾನಿಗಳ ದಂಡೇ ನೆರೆದಿದ್ದು, ಹಾರ್ದಿಕ್, ಹಾರ್ದಿಕ್ ಘೋಷಣೆಗಳು ಕೇಳಿಬಂದವು.
ಈ ಸಂದರ್ಭದಲ್ಲಿ ಮಾತನಾಡಿದ ಪಾಂಡ್ಯ, ಯಾವಾಗಲೂ ನಮ್ಮನ್ನು ಬೆಂಬಲಿಸುತ್ತಿರುವುದಕ್ಕಾಗಿ ಮತ್ತು ನಮ್ಮ ಮೇಲೆ ಅಚಲವಾದ ನಂಬಿಕೆಯನ್ನು ಹೊಂದಿದ್ದಕ್ಕಾಗಿ ಬರೋಡದ ಜನರಿಗೆ ಧನ್ಯವಾದಗಳು ಎಂದರು. ಈ ಸಂದರ್ಭದಲ್ಲಿ, ಅವರು ಬರೋಡಾ ಪೊಲೀಸರು ಮತ್ತು ಈ ಪರೇಡ್‌ನಲ್ಲಿ ಕೆಲಸ ಮಾಡಿದ ಎಲ್ಲಾ ಸ್ವಯಂಸೇವಕರಿಗೆ ಧನ್ಯವಾದಗಳನ್ನು ಅರ್ಪಿಸಿದರು. ಇದಕ್ಕೂ ಮುನ್ನ ಮುಂಬೈನಲ್ಲಿ ನಡೆದ ರೋಡ್ ಶೋನಲ್ಲಿ ಇಡೀ ವಿಶ್ವ ವಿಜೇತ ತಂಡ ಕಪ್‌ನೊಂದಿಗೆ ಮರಳಿತ್ತು. ಅದಾದ ಬಳಿಕ ಈಗ ವಡೋದರಾದಲ್ಲಿ ಪಾಂಡ್ಯ ರೋಡ್ ಶೋ ದೇಶದ ಗಮನ ಸೆಳೆದಿದೆ.
