ನವದೆಹಲಿ: ಭಾನುವಾರ ನಡೆದ ಮಹಿಳಾ ಪ್ರೀಮಿಯರ್ ಲೀಗ್ನ ಪಂದ್ಯದಲ್ಲಿ ಗೆಲುವಿನ ಹೊಸ್ತಿಲಲ್ಲಿದ್ದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ಮಹಿಳಾ ತಂಡ ಕೊನೆಯಲ್ಲಿ ಮಾಡಿಕೊಂಡ ಎಡವಟ್ಟಿನಿಂದ ಡೆಲ್ಲಿ ಕ್ಯಾಪಿಟಲ್ಸ್ ವನಿತೆಯರ ವಿರುದ್ಧ 1 ರನ್ನಿಂದ ವೀರೋಚಿತ ಸೋಲು ಅನುಭವಿಸಿತು. ಗೆದ್ದ ಡೆಲ್ಲಿ ಪಾಯಿಂಟ್ ಪಟ್ಟಿಯಲ್ಲಿ ಮುಂಬೈ ಹಿಂದಿಕ್ಕಿ ಅಗ್ರಸ್ಥಾನಕ್ಕೇರಿತು.
ಕೊನೆಯ ಓವರ್ನಲ್ಲಿ ಗೆಲ್ಲಲು 17 ರನ್ ಅಗತ್ಯವಿದ್ದಾಗ ರಿಚಾ ಘೋಷ್ ಆಕರ್ಷಕ ಬ್ಯಾಟ್ ಮಾಡಿದರೂ, ಕೊನೆಯಲ್ಲಿ 2 ರನ್ ಇದ್ದಾಗ ಔಟಾದದ್ದು ತಂಡವನ್ನು ಸೋಲಿನಲ್ಲಿ ಮುಳುಗಿಸಿತು. ಮಹತ್ವದ ಪಂದ್ಯವನ್ನು ಕೈಚೆಲ್ಲಿದ್ದರಿಂದ ಪ್ಲೇಆಫ್ ಹಾದಿ ಮತ್ತಷ್ಟು ಕಠಿಣವಾಯಿತು.
ರೋಚಕ ಫೈನಲ್ ಓವರ್: ಡೆಲ್ಲಿ ಕ್ಯಾಪಿಟಲ್ಸ್ ವನಿತೆಯರು ನೀಡಿದ್ದ 181 ರನ್ಗಳ ಸವಾಲಿನ ಗುರಿಯನ್ನು ಬೆನ್ನಟ್ಟಿದ ಆರ್ಸಿಬಿ ಮಹಿಳೆಯರು ಗೆಲುವಿನ ದಡಕ್ಕೆ ಬಂದಿದ್ದರು. ಆದರೆ, ಅದೃಷ್ಟ ಕೈಕೊಟ್ಟಿತು. ಕೊನೆಯ ಓವರ್ನಲ್ಲಿ 17 ರನ್ ಬೇಕಿತ್ತು. ಜೆಸ್ ಜೆನಾಸನ್ ಬೌಲಿಂಗ್ನ ಮೊದಲ ಎಸೆತವನ್ನು ರಿಚಾ ಘೋಷ್ ಸಿಕ್ಸರ್ ಬಾರಿಸಿದರು. ಎರಡನೇ ಎಸೆತದಲ್ಲಿ ರನ್ ಬರಲಿಲ್ಲ. ಮೂರನೇ ಎಸೆತದಲ್ಲಿ ರನ್ಗಾಗಿ ಓಡಿದ ದಿಶಾ ಕಸತ್ ರನೌಟ್ ಆದರು.
ಮುಂದಿನ ಎಸೆತದಲ್ಲಿ 2 ರನ್ ಬಂತು. ಐದನೇ ಎಸೆತವನ್ನು ರಿಚಾ ಸಿಕ್ಸರ್ಗೆ ಅಟ್ಟಿದರು. ಇದರಿಂದ ಆರ್ಸಿಬಿ ಪಾಳಯದಲ್ಲಿ ಗೆಲುವಿನ ನಗೆ ಮೂಡಿತು. ಕೊನೆಯ ಎಸೆತದಲ್ಲಿ 2 ರನ್ ಬೇಕಿದ್ದಾಗ ರಿಚಾ ಓಡಿದರೂ, ಜೆನಾಸನ್ ಶೆಫಾಲಿ ಅವರ ಮಿಂಚಿನ ಫೀಲ್ಡಿಂಗ್ನಿಂದಾಗಿ ರನೌಟ್ ಆದರು. ಇದು ಆರ್ಸಿಬಿಯ ಅಭಿಮಾನಿಗಳ ಎದೆ ಧಸಕ್ ಎನ್ನುವಂತೆ ಮಾಡಿತು. ರಿಚಾ ಮೈದಾನದಲ್ಲೇ ಕಣ್ಣೀರು ಹಾಕಿದರೆ, ಡಗೌಟ್ನಲ್ಲಿ ಆಟಗಾರರು ತಲೆ ಮೇಲೆ ಕೈಹೊತ್ತು ಕೂತಿದ್ದರು.
ರಿಚಾ 29 ಎಸೆತಗಳಲ್ಲಿ 4 ಬೌಂಡರಿ, 3 ಸಿಕ್ಸರ್ಗಳಿಂದ 51 ರನ್ ಸಿಡಿಸಿದರು. ಇದಕ್ಕೂ ಮೊದಲು ನಾಯಕಿ ಸ್ಮೃತಿ ಮಂಧಾನ 5 ರನ್ಗೆ ವಿಕೆಟ್ ನೀಡಿದರೆ, ಸೋಫಿ ಮೊಲನ್ಯೂಕ್ಸ್ 33, ಎಲೈಸಿ ಪೆರಿ 49, ಜಾರ್ಜಿಯಾ ವರ್ಹೆಮ್ 12 ರನ್ ಬಾರಿಸಿದರು. ಎಲೈಸಿ ಪೆರಿ 1 ರನ್ನಿಂದ ಅರ್ಧಶತಕ ತಪ್ಪಿಸಿಕೊಂಡರು.
ಡೆಲ್ಲಿ ಡ್ಯಾಶಿಂಗ್ ಬ್ಯಾಟಿಂಗ್: ಇದಕ್ಕೂ ಮೊದಲು ಬ್ಯಾಟ್ ಮಾಡಿದ ಡೆಲ್ಲಿಗೆ ಜೆಮಿಮಾ ರೋಡ್ರಿಗಸ್ ಮತ್ತು ಅಲಿಸಿ ಕಾಪ್ಸಿ ನೆರವಾದರು. ರೋಡ್ರಿಗಸ್ 36 ಎಸೆತಗಳಲ್ಲಿ 58 ರನ್ ಸಿಡಿಸಿ ಅರ್ಧಶತಕ ದಾಖಲಿಸಿದರು. ಅಲಿಸಿ 32 ಬೌಲ್ನಲ್ಲಿ 48 ರನ್ ಸಿಡಿಸಿ ಶ್ರೇಯಾಂಕ್ ಪಾಟೀಲ್ಗೆ ವಿಕೆಟ್ ನೀಡಿದರು. ನಾಯಕಿ ಮೆಗ್ ಲ್ಯಾನಿಂಗ್ 29, ಶೆಫಾಲಿ ವರ್ಮಾ 23 ರನ್ ಮಾಡಿದರು. ಇದರಿಂದ ತಂಡ 20 ಓವರ್ಗಳಲ್ಲಿ 181 ರನ್ಗಳ ಸವಾಲಿನ ಮೊತ್ತ ದಾಖಲಿಸಿತು. ಕನ್ನಡತಿ ಯುವ ಆಫ್ ಸ್ಪಿನ್ನರ್ ಶ್ರೇಯಾಂಕಾ ಪಾಟೀಲ್ 4 ಓವರ್‌ಗಳ ಕೋಟಾದಲ್ಲಿ 26 ರನ್ ನೀಡಿ 4 ವಿಕೆಟ್ ಪಡೆದು ಮಿಂಚಿದರು.
ಪ್ಲೇಆಫ್ ಹಾದಿ ಕಠಿಣ: ಆರ್ಸಿಬಿ ಆಡಿದ 7 ಪಂದ್ಯಗಳಲ್ಲಿ 3 ರಲ್ಲಿ ಗೆದ್ದು 4 ರಲ್ಲಿ ಸೋತಿದೆ. ಇದೇ ಫಲಿತಾಂಶವನ್ನು ಯುಪಿ ವಾರಿಯರ್ಸ್ ಹೊಂದಿದೆ. ಮುಂದಿನ ಪಂದ್ಯದಲ್ಲಿ ಯುಪಿ ಮಹಿಳೆಯರು ಗುಜರಾತ್ ಜೈಂಟ್ಸ್ ವಿರುದ್ಧ ಆಡಲಿದ್ದು, ಗೆದ್ದರೆ ಆರ್ಸಿಬಿಯನ್ನು ಹಿಂದಿಕ್ಕಲಿದ್ದಾರೆ. ಆಗ ಆರ್ಸಿಬಿ ಮುಂಬೈ ಇಂಡಿಯನ್ಸ್ ವಿರುದ್ಧದ ಕೊನೆಯ ಪಂದ್ಯದಲ್ಲಿ ದೊಡ್ಡ ಅಂತರದಲ್ಲಿ ಗೆಲುವು ಪಡೆಯಬೇಕು. ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ಮಂಬೈ ಇಂಡಿಯನ್ಸ್ ಪ್ಲೇಆಫ್ ಸೇರಿವೆ.
ಇದನ್ನೂ ಓದಿ: ವಿಶ್ವ ಕ್ರಿಕೆಟ್ಗೆ ಭಾರತವೇ ನಂಬರ್ 1; ಮೂರೂ ಮಾದರಿಗಳಲ್ಲಿ ಟೀಂ ಇಂಡಿಯಾ ಅಗ್ರಜ
