ಬೆಂಗಳೂರು: ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ ಶನಿವಾರ ಮಾಡು ಇಲ್ಲವೇ ಮಡಿ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ 27 ರನ್ಗಳಿಂದ ಜಯ ಸಾಧಿಸಿದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಪ್ಲೇಆಫ್ ಹಂತಕ್ಕೇರಿದೆ. ಪಂದ್ಯದ ಕೊನೆಯ ಓವರ್ನಲ್ಲಿ ಅದ್ಭುತ ಬೌಲಿಂಗ್ ತೋರಿದ ಯಶ್ ದಯಾಳ್ಗೆ ಎಲ್ಲೆಡೆಯಿಂದ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಆರ್ಸಿಬಿ ನಾಯಕ ಫಾಫ್ ಡು ಪ್ಲೆಸಿಸ್ ಕೂಡ ಯುವ ವೇಗಿಯನ್ನು ಶ್ಲಾಘಿಸಿದ್ದಾರೆ.
219 ರನ್ ಗುರಿ ಬೆನ್ನಟ್ಟಿದ ಸಿಎಸ್ಕೆಗೆ ಕೊನೆಯ ಓವರ್ನಲ್ಲಿ ಪ್ಲೇಆಫ್ಗೆ ತಲುಪಲು 17 ರನ್ ಅಗತ್ಯವಿತ್ತು. ಆಗ ನಾಯಕ ಪ್ಲೆಸಿಸ್ ನೀಡಿದ ಜವಾಬ್ದಾರಿ ಹೊತ್ತ ಯಶ್ ದಯಾಳ್ಗೆ ಮೊದಲ ಎಸೆತದಲ್ಲೇ ಎಂ.ಎಸ್. ಧೋನಿ ಸಿಕ್ಸರ್ ಚಚ್ಚುವ ಮೂಲಕ ಶಾಕ್ ನೀಡಿದ್ದರು. ಆದರೆ, ಮುಂದಿನ ಎಸೆತದಲ್ಲೇ ಧೋನಿಯನ್ನು ಪೆವಿಲಿಯನ್ಗೆ ಅಟ್ಟಿದ ಯಶ್, ಪಂದ್ಯವನ್ನು ಆರ್ಸಿಬಿ ಕಡೆ ವಾಲುವಂತೆ ಮಾಡಿದರು. ನಂತರದ ಎಸೆತಗಳಲ್ಲಿ ಜಡೇಜಾರನ್ನು ಕಟ್ಟಿಹಾಕಿದ ದಯಾಳ್ ಬೆಂಗಳೂರು ತಂಡಕ್ಕೆ ಗೆಲುವಿನ ಸಂಭ್ರಮ ತಂದರು.
ಪಂದ್ಯದ ನಂತರ ಮಾತನಾಡಿದ ನಾಯಕ ಫಾಫ್ ಡು ಪ್ಲೆಸಿಸ್, "ಎಂತಹ ರಾತ್ರಿ ಅದು, ಅದ್ಭುತ ವಾತಾವರಣ. ತವರಿನ ಅಭಿಮಾನಿಗಳ ಎದುರು ಈ ಋತುವನ್ನು ಮುಗಿಸುತ್ತಿರುವುದು ಬಹಳ ಖುಷಿ ತಂದಿದೆ. ಮೊದಲು ಬ್ಯಾಟಿಂಗ್ ಮಾಡುವುದು ಸುಲಭವಿರಲಿಲ್ಲ. ನಾನು ಟಿ20 ಪಂದ್ಯವನ್ನಾಡಿದ ಅತ್ಯಂತ ಕಠಿಣ ಪಿಚ್ ಇದಾಗಿದೆ. ಮಳೆ ಬ್ರೇಕ್ ಬಳಿಕ ಮತ್ತೆ ಬ್ಯಾಟಿಂಗ್ ಆರಂಭಿಸಿದಾಗ ನಾನು ಹಾಗೂ ವಿರಾಟ್ 140-150 ರನ್ ಗಳಿಕೆ ಬಗ್ಗೆ ಮಾತನಾಡಿದೆವು. ಪಿಚ್ನಲ್ಲಿ ತಿರುವು ಕಂಡು ಇದು ರಾಂಚಿಯ 5ನೇ ದಿನದ ಟೆಸ್ಟ್ ಪಂದ್ಯದಂತಿದೆ ಎಂದು ಮಿಚೆಲ್ ಸ್ಯಾಂಟ್ನರ್ ಬಳಿ ನಾನು ಹೇಳಿದೆ'' ಎಂದರು.
''ಅಂತಹ ಪಿಚ್ನಲ್ಲಿ 200 ರನ್ ಬಾರಿಸಿದ್ದು ನಂಬಲಸಾಧ್ಯವಾದುದು. ಕೊನೆಯ 6 ಪಂದ್ಯಗಳಲ್ಲಿಯೂ ಬ್ಯಾಟರ್ಗಳು ಉತ್ತಮ ಸ್ಟ್ರೈಕ್ ರೇಟ್ನೊಂದಿಗೆ ಆಡಿದರು. ಅದಕ್ಕೂ ಮುನ್ನ ನಾವು ಬಹಳ ನಿಧಾನವಾಗಿದ್ದೆವು. ನಾವು ಸುಮಾರು 175 ರನ್ ಡಿಫೆಂಡ್ ಮಾಡುತ್ತಿದ್ದು, ಕೆಲ ಹಂತದಲ್ಲಿ ಪಂದ್ಯವು ತೀರ ಪೈಪೋಟಿಯಿಂದ ಕೂಡಿತ್ತು. ಎಂ.ಎಸ್. ಧೋನಿ ಆಡುವುದನ್ನು ನೋಡಿ ಗೆಲುವು ಕಷ್ಟ ಎನ್ನಿಸಿತು. ಯಾಕೆಂದರೆ ಧೋನಿ ಹಲವು ಬಾರಿ ಪಂದ್ಯ ಗೆಲ್ಲಿಸಿದವರು. ಅಂತಹ ಸಂದರ್ಭದಲ್ಲಿ ಯಶ್ ದಯಾಳ್ ಬೌಲಿಂಗ್ ಮಾಡಿರುವುದು ಅದ್ಭುತವಾಗಿತ್ತು. ನಾನು ಈ ಪಂದ್ಯ ಪುರುಷ ಗೌರವವನ್ನು ಯಶ್ಗೆ ಅರ್ಪಿಸುತ್ತೇನೆ'' ಎಂದು ತಿಳಿಸಿದರು.
''ಈ ಪಿಚ್ನಲ್ಲಿ ನಿಧಾನಗತಿಯ ಬೌಲಿಂಗ್ ಉತ್ತಮ ಆಯ್ಕೆ ಹಾಗೂ ನಿನ್ನ ಕೌಶಲ್ಯಗಳ ಮೇಲೆ ಭರವಸೆ ಇಡುವಂತೆ ನಾನು ಯಶ್ಗೆ ಸಲಹೆ ನೀಡಿದ್ದೆ. ಯಾಕೆಂದರೆ, ಮೊದಲ ಎಸೆತ ಯಾರ್ಕರ್ ಹಾಕುವಲ್ಲಿ ವಿಫಲರಾಗಿದ್ದರು. ಅದರಂತೆ ನಿಧಾನಗತಿಯ ಎಸೆತವು ಫಲಿಸಿತು'' ಎಂದು ಶ್ಲಾಘಿಸಿದರು.
ಅಭಿಮಾನಿಗಳ ಬಗ್ಗೆ ಮಾತನಾಡುತ್ತ, ''ರಾತ್ರಿ ಅಭಿಮಾನಿಗಳು ಬಹಳ ಕ್ರೇಜಿಯಾಗಿದ್ದರು. ನಾವು ಗೆಲ್ಲದಿದ್ದ ಸಂದರ್ಭದಲ್ಲೂ ಅವರು ನಮ್ಮ ಬೆಂಬಲಕ್ಕೆ ಬಂದಿದ್ದರು. ಇಂದು ನಾವು ಏನಾದರೂ ಮಾಡಲೇಬೇಕೆಂದು ಅಂದುಕೊಂಡಿದ್ದೆವು. ಅದರಂತೆ, ಸಿಎಸ್ಕೆ ಹಾಗೂ ಆರ್ಸಿಬಿ ನಡುವಿನ ಪಂದ್ಯ ರೋಚಕವಾಗಿದ್ದಲ್ಲದೆ, ನಂಬಲಸಾಧ್ಯವಾದ ವಾತಾವರಣ ಮೂಡಿದೆ. ಬೆಂಬಲ ನೀಡಿದ್ದಕ್ಕಾಗಿ ತಂಡವು ಪ್ರೇಕ್ಷಕರಿಗೆ ಧನ್ಯವಾದ ಸಲ್ಲಿಸುತ್ತದೆ. ನಾವು ಸತತವಾಗಿ 6 ಪಂದ್ಯಗಳನ್ನು ಜಯಿಸಿರುವುದು ಪ್ರಾಮುಖ್ಯವಾಗಿದೆ. ನಾಕೌಟ್‌ಗೆ ಪ್ರವೇಶಿಸುವ ಮೊದಲ ಗುರಿಯನ್ನು ಸಾಧಿಸಿದ್ದೇವೆ. ಅದನ್ನು ಆನಂದಿಸುತ್ತ ನಾಳೆ ಮತ್ತೆ ಮುಂದಿನ ತಯಾರಿ ಆರಂಭಿಸಬೇಕಿದೆ'' ಎಂದು ಹೇಳಿದರು.
ಇದನ್ನೂ ಓದಿ: ಭರ್ಜರಿ ಗೆಲುವು; ಸಿಎಸ್ಕೆ ಮನೆಗೆ, ಆರ್ಸಿಬಿ ಪ್ಲೇಆಫ್ಗೆ - RCB BEAT CSK
