ಬೆಂಗಳೂರು: ಪ್ರಸ್ತಕ ಐಪಿಎಲ್ ಪಂದ್ಯಾವಳಿಯು ರೋಚಕತೆ ಪಡೆದಿದ್ದು, ಪ್ಲೇಆಫ್ ಅರ್ಹತೆಗಾಗಿ ತಂಡಗಳು ಸೆಣಸಾಡುತ್ತಿವೆ. ಅದರಲ್ಲಿ ಮೇ 18 ರಂದು ಆರ್ಸಿಬಿ ಮತ್ತು ಸಿಎಸ್ಕೆ ನಡುವಿನ ಪಂದ್ಯ ಭಾರಿ ಕುತೂಹಲಕ್ಕೆ ಕಾರಣವಾಗಿದೆ. ಅತಿ ಮಹತ್ವದ ಪಂದ್ಯಕ್ಕೆ ನಗರದ ಚಿನ್ನಸ್ವಾಮಿ ಕ್ರೀಡಾಂಗಣ ಸಾಕ್ಷಿಯಾಗಲಿದೆ.
ಪಂದ್ಯವನ್ನು ಹತ್ತಿರದಿಂದ ಕಣ್ತುಂಬಿಕೊಳ್ಳಲು ಜನರು ಪಂದ್ಯದ ಟಿಕೆಟ್ಗಾಗಿ ಸಾವಿರಗಟ್ಟಲೇ ಸುರಿಯುತ್ತಿದ್ದಾರೆ. ಭಾರಿ ದುಬಾರಿಯಾಗಿರುವ ಟಿಕೆಟ್ಗಳನ್ನು ಖರೀದಿಸಲು ಅಭಿಮಾನಿಗಳು ಇನ್ನಿಲ್ಲದ ಕಸರತ್ತು ಮಾಡುತ್ತಿದ್ದಾರೆ. ಇದನ್ನೇ ಬಳಸಿಕೊಂಡ ಸೈಬರ್ ಅಪರಾಧಿಗಳು ಯುವಕನೊಬ್ಬನ ಬಳಿ 2.94 ಲಕ್ಷ ರೂಪಾಯಿ ಹಣ ಎಗರಿಸಿದ್ದಾರೆ.
ಖಾಸಗಿ ಕಂಪನಿಯಲ್ಲಿ ಕೆಲಸ ಮಾಡುವ ಶಶಾಂಕ್ (26) ಹಣ ಕಳೆದುಕೊಂಡ ವ್ಯಕ್ತಿ. ಸಾಮಾಜಿಕ ಜಾಲತಾಣ ಇನ್ಸ್ಟಾಗ್ರಾಮ್ನಲ್ಲಿ ಟಿಕೆಟ್ ಲಭ್ಯವಿರುವುದಾಗಿ ಬಂದ ನಕಲಿ ಲಿಂಕ್ ಓಪನ್ ಮಾಡಿ, ಹಣ ಕಳೆದುಕೊಂಡಿದ್ದಾನೆ.
ಸಿಎಸ್ಕೆ ಮತ್ತು ಆರ್ಸಿಬಿ ಪಂದ್ಯ ಟಿಕೆಟ್ ಲಭ್ಯ ಇರುವ ಬಗ್ಗೆ ಮೇ 11 ರಂದು ಬಂದ ಜಾಹೀರಾತಿನ ಕೊಂಡಿಯನ್ನು ಒತ್ತಿದ್ದು, ಅಪರಿಚಿತ ಅಪರಾಧಿಯನ್ನು ಸಂಪರ್ಕಿಸಿದ್ದಾನೆ. ಪದ್ಮಾ ಸಿನ್ಹಾ ವಿಜಯ್ಕುಮಾರ್ ಎಂದು ಪರಿಚಯಿಸಿಕೊಂಡ ಆರೋಪಿ, ಟಿಕೆಟ್ ಲಭ್ಯವಿರುವುದಾಗಿ ಹೇಳಿದ್ದಾನೆ. ಇದನ್ನು ನಂಬಿದ ಶಶಾಂಕ್ ಮೂರು ಟಿಕೆಟ್ಗಳಿಗೆ 7,900 ರೂಪಾಯಿ ಹಣವನ್ನು ಆನ್ಲೈನ್ ಮೂಲಕ ಪಾವತಿಸಿದ್ದಾನೆ.
ಅನಂತರ ಟಿಕೆಟ್ ನೀಡದಿದ್ದಾಗ ಅನುಮಾನ ಬಂದು ಹಣ ನೀಡುವಂತೆ ಆರೋಪಿಯನ್ನ ಕೇಳಿದ್ದಾನೆ. ಹಣ ವಾಪಸ್ ಕಳುಹಿಸುವುದಾಗಿ ನಂಬಿಸಿದ ಆರೋಪಿ ಹಂತ ಹಂತವಾಗಿ ಶಶಾಂಕ್ನ ಬ್ಯಾಂಕ್ ಖಾತೆಯಲ್ಲಿದ್ದ 2.94 ಲಕ್ಷ ರೂಪಾಯಿ ವರ್ಗಾಯಿಸಿಕೊಂಡು ವಂಚಿಸಿದ್ದಾನೆ.
ತಾನು ಮೋಸ ಹೋದ ಬಗ್ಗೆ ತಿಳಿದುಕೊಂಡ ಶಶಾಂಕ್ ಈ ಸಂಬಂಧ ಅಪರಿಚಿತ ಆರೋಪಿಯ ವಿರುದ್ಧ ನಗರದ ಸೆಂಟ್ರಲ್ ಸೆನ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾನೆ. ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.
ಇದನ್ನೂ ಓದಿ: ಮೇ 18 ರ ಆರ್ಸಿಬಿ - ಸಿಎಸ್ಕೆ ನಡುವಿನ 'ವರ್ಚುಯಲ್ ಫೈನಲ್'ಗೆ ಮಳೆ ಭೀತಿ: ಹವಾಮಾನ ಇಲಾಖೆ ಹೇಳೋದೇನು? - RCB Vs CSK match
