ಬಾರ್ಡರ್​ ಗಾವಸ್ಕರ್​ ಟ್ರೋಫಿಗೂ ಮೊದಲೇ ಆಸ್ಟ್ರೇಲಿಯಾಗೆ ದೊಡ್ಡ ಆಘಾತ: ದಿಢೀರ್​ ನಿವೃತ್ತಿ ಘೋಷಿಸಿದ ಸ್ಟಾರ್​ ಆಟಗಾರ!

ಆಸ್ಟ್ರೇಲಿಯಾದ ಸ್ಟಾರ್​ ಬ್ಯಾಟರ್​ ಮತ್ತು ವಿಕೆಟ್​ ಕೀಪರ್​ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ನಿವೃತ್ತಿ ಘೋಷಿಸಿದ್ದಾರೆ.

ನವದೆಹಲಿ: ಆಸ್ಟ್ರೇಲಿಯಾ ಪರ ಮೂರು ಟಿ20 ವಿಶ್ವಕಪ್​ ಆಡಿದ್ದ ಸ್ಟಾರ್​ ಬ್ಯಾಟರ್​ ಮತ್ತು ವಿಕೆಟ್ ಕೀಪರ್ ಮ್ಯಾಥ್ಯೂ ವೇಡ್ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದಾರೆ. 2021ರಲ್ಲಿ ಮೊದಲ ಬಾರಿಗೆ ತಂಡವನ್ನು ಟಿ-20 ವಿಶ್ವಕಪ್ ವಿಜೇತರನ್ನಾಗಿ ಮಾಡುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ವೇಡ್ ಮಂಗಳವಾರ ವಿದಾಯ ಹೇಳಿದ್ದಾರೆ. ಆದರೇ ದೇಶಿ ಲೀಗ್​ನಲ್ಲಿ ಮುಂದುವರೆಯುವುದಾಗಿ ತಿಳಿಸಿದ್ದಾರೆ.

ವೇಡ್​ ವೃತ್ತಿಜೀವನ: ಈ ಎಡಗೈ ಬ್ಯಾಟರ್​ ಆಸ್ಟ್ರೇಲಿಯಾ ಪರ 13 ವರ್ಷಗಳ ಕಾಲ ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡಿದ್ದು 225ಕ್ಕೂ ಹೆಚ್ಚು ಅಂತಾರಾಷ್ಟ್ರೀಯ ಪಂದ್ಯಗಳನ್ನು ಆಡಿದ್ದಾರೆ. ಈ ಪೈಕಿ 92 ಟಿ20 ಪಂದ್ಯ, 97 ಏಕದಿನ ಪಂದ್ಯಗಳು, 36 ಟೆಸ್ಟ್​ ಪಂದ್ಯಗಳ ಸೇರಿವೆ. ಟಿ20 ಸ್ವರೂಪದಲ್ಲಿ 1202 ರನ್ ಗಳಿಸಿದ್ದ ಅವರು, ಏಕದಿನದಲ್ಲಿ 1867 ರನ್ ಕಲೆ ಹಾಕಿದ್ದಾರೆ. ಫೆಬ್ರವರಿ 2012ರಲ್ಲಿ ಆಸ್ಟ್ರೇಲಿಯಾ ಪರ ಮೊದಲ ಏಕದಿನ ಆಡಿದ ವೇಡ್, ಜುಲೈ 2021ರಲ್ಲಿ ತಮ್ಮ ಕೊನೆಯ ODI ಪಂದ್ಯವನ್ನಾಡಿದ್ದರು. 36ರ ಹರೆಯದ ಈ ಕ್ರಿಕೆಟಿಗ ತಮ್ಮ ಅಂತಾರಾಷ್ಟ್ರೀಯ ವೃತ್ತಿಜೀವನದಲ್ಲಿ ವೈಟ್ ಬಾಲ್ ಕ್ರಿಕೆಟ್‌ನಲ್ಲಿ ಹೆಚ್ಚಿನ ಪಂದ್ಯಗಳನ್ನು ಆಡಿದ್ದಾರೆ.

36 Test matches. 97 ODIs. 92 T20 Internationals.

Congratulations to Matthew Wade on an outstanding international cricket career! pic.twitter.com/SDWl1OhqZC

— Cricket Australia (@CricketAus) October 29, 2024

3 ಟಿ20 ವಿಶ್ವಕಪ್​: ವೇಡ್​ ಆಸ್ಟ್ರೇಲಿಯಾ ಪರ ಮೂರು ಟಿ20 ವಿಶ್ವಕಪ್ ಆಡಿದ್ದಾರೆ. ಅದರಲ್ಲಿ 2021ರಲ್ಲಿ ಆಸೀಸ್​ ಟಿ20 ವಿಶ್ವಕಪ್​ ಗೆದ್ದಿತ್ತು. ಈ ವೇಳೆ ವೇಡ್​​ ತಂಡದ ಉಪನಾಯಕರಾಗಿದ್ದರು. ಸೆಮಿಫೈನಲ್‌ನಲ್ಲಿ, ಅವರು ಪಾಕಿಸ್ತಾನದ ವಿರುದ್ಧ 17 ಎಸೆತಗಳಲ್ಲಿ ಅಜೇಯ 41ರನ್ ಗಳಿಸಿದರು ಮತ್ತು ತಂಡವನ್ನು ಫೈನಲ್​ಗೆ ಕಂಡೊಯ್ಯುವಲ್ಲಿ ಮುಖ್ಯಪಾತ್ರ ವಹಿಸಿದ್ದರು. ಮ್ಯಾಥ್ಯೂ ವೇಡ್ ಆಸ್ಟ್ರೇಲಿಯ ಪರ ಒಟ್ಟು 36 ಟೆಸ್ಟ್ ಪಂದ್ಯಗಳನ್ನು ಆಡಿದ್ದಾರೆ, ಇದರಲ್ಲಿ ಅವರ ಅತ್ಯುತ್ತಮ ಸ್ಕೋರ್ 117ರನ್ ಆಗಿತ್ತು, ಆ್ಯಶಸ್‌ ಸರಣಿಯಲ್ಲಿ ಈ ಸಾಧನೆ ಮಾಡಿದ್ದರು.

ಕೋಚ್ ಸ್ಟಾಫ್​: ಅಂತಾರಾಷ್ಟ್ರೀಯ ಪಂದ್ಯಕ್ಕೆ ನಿವೃತ್ತಿ ಘೋಷಿಸಿರುವ ವೇಡ್​ ಆಸ್ಟ್ರೇಲಿಯಾ ಕೋಚಿಂಗ್​ ಸ್ಟಾಫ್​ನಲ್ಲಿ ಸ್ಥಾನ ಪಡೆದಿದ್ದಾರೆ. ಮುಂದಿನ ತಿಂಗಳು ಪಾಕಿಸ್ತಾನ ವಿರುದ್ಧ ನಡೆಯಲಿರುವ ಟಿ-20 ಸರಣಿಯಲ್ಲಿ ​ ಆಸ್ಟ್ರೇಲಿಯಾ ತಂಡದ ಕೋಚಿಂಗ್​ ಸ್ಟಾಫ್​ನಲ್ಲಿರಲಿದ್ದಾರೆ. "ಕಳೆದ ಟಿ20 ವಿಶ್ವಕಪ್​ನಂತರ ನನ್ನ ಅಂತಾರಾಷ್ಟ್ರೀಯ ದಿನಗಳು ಮುಗಿದಿವೆ ಎಂದು ನನಗೆ ಸಂಪೂರ್ಣವಾಗಿ ತಿಳಿದಿತ್ತು. ತಂಡದಲ್ಲಿ ಉತ್ತಮ ಅವಕಾಶಗಳು ಸಿಕ್ಕಿವೆ ಇದಕ್ಕಾಗಿ ನಾನು ಕೃತಜ್ಞನಾಗಿದ್ದೇನೆ, ದೇಶಿ ಲೀಗ್​ಗಳಲ್ಲಿ ತಮ್ಮ ಆಟವನ್ನು ಮುಂದುವರೆಸಲಿದ್ದೇನೆ. ತಂಡದ ಎಲ್ಲ ಸದಸ್ಯರಿಗೆ, ಸಿಬ್ಬಂದಿ ಮತ್ತು ತರಬೇತುದಾರರಿಗೆ ಧನ್ಯವಾದ ಹೇಳಲು ಬಯಸುತ್ತೇನೆ" ಎಂದು ನಿವೃತ್ತಿ ಘೋಷಿಸಿದ್ದಾರೆ.

2ನೇ ನಿವೃತ್ತಿ: 8 ತಿಂಗಳ ಅವಧಿಯಲ್ಲಿ ಇದು ವೇಡ್ ಅವರ ಎರಡನೇ ನಿವೃತ್ತಿಯಾಗಿದೆ. ಈ ವರ್ಷದ ಮಾರ್ಚ್‌ನಲ್ಲಿ, ಅವರು ಶೆಫೀಲ್ಡ್ ಶೀಲ್ಡ್‌ನ ಫೈನಲ್‌ನಲ್ಲಿ ಆಡಿದ ನಂತರ ಪ್ರಥಮ ದರ್ಜೆ ಅಂದರೆ ರೆಡ್ ಬಾಲ್ ಕ್ರಿಕೆಟ್‌ನಿಂದ ನಿವೃತ್ತಿ ಘೋಷಿಸಿದ್ದರು.

ಇದನ್ನೂ ಓದಿ: ಮುಂಬೈ ರೀಟೈನ್​ ಲಿಸ್ಟ್‌ನಲ್ಲಿ ಆ ಮೂವರು ಫಿಕ್ಸ್​​​ - ಆದ್ರೆ ರೋಹಿತ್ ಶರ್ಮಾ?: ಬಿಗ್​ ಅಪ್ಡೇಟ್​ ನೀಡಿದ ಭಜ್ಜಿ