ಕೀವ್ (ಉಕ್ರೇನ್): ಅಮೆರಿಕದ ಅಧ್ಯಕ್ಷರಾಗಿ ಆಯ್ಕೆಯಾಗಿರುವ ಡೊನಾಲ್ಡ್ ಟ್ರಂಪ್ ಅವರಿಗೆ ವಿಶ್ವದ ವಿವಿಧ ರಾಷ್ಟ್ರಗಳ ನಾಯಕರು ಅಭಿನಂದನೆ ಸಲ್ಲಿಸಿದ್ದಾರೆ. ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಅವರು ಶುಭಾಶಯ ತಿಳಿಸಿಲು ಟ್ರಂಪ್ಗೆ ಕರೆ ಮಾಡಿದಾಗ ಅದನ್ನು ವಿಶ್ವದ ನಂ.1 ಸಿರಿವಂತ ಉದ್ಯಮಿ ಎಲಾನ್ ಮಸ್ಕ್ ಸ್ವೀಕರಿಸಿದ್ದರು ಎಂಬ ಕುತೂಹಲದ ಸಂಗತಿ ಹೊರಬಿದ್ದಿದೆ.
ಉಕ್ರೇನ್ ಅಧ್ಯಕ್ಷರು ಅಮೆರಿಕದ ನೂತನ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ಗೆ ಗೆಲುವಿನ ಅಭಿನಂದನೆ ಸಲ್ಲಿಸಲು ಕರೆ ಮಾಡಿದ್ದರು. ಈ ವೇಳೆ ಟ್ರಂಪ್ ಅದನ್ನು ಮಸ್ಕ್ಗೆ ನೀಡಿ ಮಾತನಾಡುವಂತೆ ಸೂಚಿಸಿದರು. ಝೆಲೆನ್ಸ್ಕಿ ಅವರು ಮಸ್ಕ್ ಜೊತೆ ಮಾತನಾಡಿದರು. ಅಭಿನಂದನೆ ತಿಳಿಸಿದ ಬಳಿಕ, ಉಕ್ರೇನ್ಗೆ ಸ್ಟಾರ್‌ಲಿಂಕ್ ಉಪಗ್ರಹ ಇಂಟರ್ನೆಟ್ ವಿಸ್ತರಿಸಿದ್ದಕ್ಕಾಗಿ ಸ್ಪೇಸ್‌ಎಕ್ಸ್ ಮಾಲೀಕನಿಗೆ ಧನ್ಯವಾದ ಅರ್ಪಿಸಿದರು ಎಂದು ಅಧಿಕಾರಿಯೊಬ್ಬರು ಮಾಹಿತಿ ಹಂಚಿಕೊಂಡಿದ್ದಾರೆ.
ಟ್ರಂಪ್ ಆಡಳಿತದಲ್ಲಿ ಮಸ್ಕ್ ನೆರಳು: ಅಧ್ಯಕ್ಷೀಯ ಚುನಾವಣೆಯಲ್ಲಿ ಡೊನಾಲ್ಡ್ ಟ್ರಂಪ್ಗೆ ಅವರಿಗೆ ಉದ್ಯಮಿ ಎಲಾನ್ ಮಸ್ಕ್ ಅವರು ಬೆಂಬಲ ಘೋಷಿಸಿದ್ದರು. ಜೊತೆಗೆ 60 ಕೋಟಿಗೂ ಅಧಿಕ ದೇಣಿಗೆ ನೀಡಿದ್ದಲ್ಲದೆ, ಮತ ಪ್ರಚಾರವನ್ನೂ ಮಾಡಿದ್ದರು. ಹೀಗಾಗಿ, ಟ್ರಂಪ್ ಅವರ ಆಡಳಿತದಲ್ಲಿ ಮಸ್ಕ್ ಪ್ರಭಾವ ಬೀರುವರೇ ಎಂಬ ಪ್ರಶ್ನೆ ಎದ್ದಿದೆ.
ಟ್ರಂಪ್ಗೆ ಬಂದ ಅಭಿನಂದನಾ ವೈಯಕ್ತಿಕ ಕರೆಗಳನ್ನು ಮಸ್ಕ್ ಸ್ವೀಕರಿಸಿ ಮಾತನಾಡಿದ್ದು ಇದನ್ನು ಪುಷ್ಟೀಕರಿಸುತ್ತದೆ. ಜೊತೆಗೆ ಡೊನಾಲ್ಡ್ ಟ್ರಂಪ್ ಕೂಡ ಈ ಬಗ್ಗೆ ಮಾತನಾಡಿದ್ದು, ಸರ್ಕಾರದ ದಕ್ಷತೆಯಲ್ಲಿ ಮಸ್ಕ್ ಔಪಚಾರಿಕ ಪಾತ್ರ ವಹಿಸಲಿದ್ದಾರೆ ಎಂದಿದ್ದರು.
ಉಕ್ರೇನ್ - ರಷ್ಯಾ ಯುದ್ಧ ನಿಲ್ಲಿಸ್ತಾರಾ?: ಡೊನಾಲ್ಡ್ ಟ್ರಂಪ್ ತಾವು ಅಧಿಕಾರಕ್ಕೆ ಬಂದ ಮೇಲೆ ಉಕ್ರೇನ್ ಮತ್ತು ರಷ್ಯಾ ಮಧ್ಯೆ ನಡೆಯುತ್ತಿರುವ ಯುದ್ಧವನ್ನು ನಿಲ್ಲಿಸುವುದಾಗಿ ಅಭಯ ನೀಡಿದ್ದರು. ಮುಂದಿನ ವರ್ಷದ ಜನವರಿ 20 ರಂದು ಟ್ರಂಪ್ ಅಧಿಕೃತವಾಗಿ ಅಧ್ಯಕ್ಷಗಿರಿ ಪಡೆಯಲಿದ್ದಾರೆ. ಉಭಯ ರಾಷ್ಟ್ರಗಳ ನಾಯಕರ ಜೊತೆಗೆ ಮಾತುಕತೆ ನಡೆಸಿ ಮೂರು ವರ್ಷಗಳ ಸಂಘರ್ಷಕ್ಕೆ ಇತಿಶ್ರೀ ಹಾಡಲಿದ್ದಾರೆಯೇ ಎಂಬ ಕೌತುಕವಿದೆ.
ಟ್ರಂಪ್ ಯುದ್ಧವನ್ನು ಶೀಘ್ರವಾಗಿ ಕೊನೆಗೊಳಿಸುವ ಭರವಸೆ ನೀಡಿದ್ದರೂ, ಶಾಂತಿ ಸಂಧಾನಕ್ಕಾಗಿ ರಷ್ಯಾಕ್ಕೆ ಕೆಲವು ಪ್ರದೇಶಗಳನ್ನು ಬಿಟ್ಟುಕೊಡಲು ಉಕ್ರೇನ್ಗೆ ಸಲಹೆ ನೀಡಿದ್ದರು. ಆದರೆ, ಇದನ್ನು ಝೆಲೆನ್ಸ್ಕಿ ತಿರಸ್ಕರಿಸಿದ್ದರು. 2017 ರಲ್ಲಿ ರಷ್ಯಾ ವಿರುದ್ಧದ ಹೋರಾಟದಲ್ಲಿ ಉಕ್ರೇನ್ಗೆ ಶಸ್ತ್ರಾಸ್ತ್ರಗಳನ್ನು ಕಳುಹಿಸಿದ್ದು ಇದೇ ಟ್ರಂಪ್ ಆಡಳಿತ. ಈಗಿನ ಅಧ್ಯಕ್ಷ ಜೋ ಬೈಡನ್ ಅವರು ಕೂಡ ಉಕ್ರೇನ್ಗೆ ಮಿಲಿಟರಿ ಮತ್ತು ಆರ್ಥಿಕ ಸಹಾಯ ನೀಡಿದ್ದಾರೆ.
ಇದನ್ನೂ ಓದಿ: ಭಾರತವೂ ಈಗ ಜಾಗತಿಕ ಸೂಪರ್ ಪವರ್ ರಾಷ್ಟ್ರ: ವ್ಲಾಡಿಮಿರ್ ಪುಟಿನ್ ಶ್ಲಾಘನೆ
