ಡಬ್ಲಿನ್ (ಐರ್ಲೆಂಡ್) : ಕಳೆದ ತಿಂಗಳು ಅನಿರೀಕ್ಷಿತವಾಗಿ ಅಧಿಕಾರದಿಂದ ಕೆಳಗಿಳಿದ ಲಿಯೋ ವರದ್ಕರ್ ಅವರಿಂದ ಅಧಿಕಾರ ವಹಿಸಿಕೊಳ್ಳಲು ಐರಿಶ್ ಇತಿಹಾಸದಲ್ಲಿ ಅತ್ಯಂತ ಕಿರಿಯ ಪ್ರಧಾನಿ ಸೈಮನ್ ಹ್ಯಾರಿಸ್ ಅವರನ್ನು ಸಂಸತ್ತು ಸೋಮವಾರ ಆಯ್ಕೆ ಮಾಡಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.
ಹ್ಯಾರಿಸ್ ಅವರ ನಾಮನಿರ್ದೇಶನವನ್ನು 88 - 69 ಮತಗಳಿಂದ ಅನುಮೋದಿಸಲಾಗಿದ್ದು, ಗ್ರೀನ್ ಪಾರ್ಟಿ ಮತ್ತು ಫಿಯಾನಾ ಫೇಲ್ ಅವರ ಎರಡು ಮೈತ್ರಿಕೂಟಗಳ ಬೆಂಬಲ ಪಡೆದುಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ. ಮಾಜಿ ಪಿಎಂ ವರದ್ಕರ್ ಅವರ ರಾಜೀನಾಮೆಯ ನಂತರ, 37 ವರ್ಷದ ಹ್ಯಾರಿಸ್ ಈ ಹಿಂದೆ ಶಿಕ್ಷಣ, ಸಂಶೋಧನೆ ಮತ್ತು ವಿಜ್ಞಾನ ಸಚಿವರಾಗಿದ್ದಾಗ ಐರ್ಲೆಂಡ್ನಲ್ಲಿನ ಕೋವಿಡ್ -19 ಪರಿಸ್ಥಿತಿಯನ್ನು ಜವಾಬ್ದಾರಿಯುತವಾಗಿ ನಿರ್ವಹಿಸಿದ್ದಕ್ಕೆ ಹೆಸರುವಾಸಿಯಾಗಿದ್ದಾರೆ.
"ನಾನು ಈ ನಾಮನಿರ್ದೇಶನವನ್ನು ತಾವೋಸೆಚ್ (ಪ್ರಧಾನ ಮಂತ್ರಿ) ಆಗಿ ಸೇವೆ ಸಲ್ಲಿಸಲು ಸ್ವೀಕರಿಸುತ್ತೇನೆ. ನೀವು ನನ್ನ ಮೇಲೆ ಇಟ್ಟಿರುವ ನಂಬಿಕೆಯನ್ನು ಉಳಿಸಿಕೊಳ್ಳಲು ನಾನು ಬದ್ಧನಾಗಿದ್ದೇನೆ" ಎಂದು ನೂತನ ಪ್ರಧಾನಿ ಸೈಮನ್ ಹ್ಯಾರಿಸ್ ಹೇಳಿದರು.
ತನ್ನ ಉಮೇದುವಾರಿಕೆ ಬೆಂಬಲಿಸಿದ ತನ್ನ ಹೊಸ ಆಡಳಿತದಲ್ಲಿ ಸಮ್ಮಿಶ್ರ ಪಾಲುದಾರರನ್ನು ಗುರುತಿಸಿ ಮಾತನಾಡಿದ ಹ್ಯಾರಿಸ್, ಏಕತೆ, ಸಹಯೋಗ ಮತ್ತು ಪರಸ್ಪರ ಗೌರವದ ಉತ್ಸಾಹದಲ್ಲಿ ಸರ್ಕಾರ ಮುನ್ನಡೆಸುತ್ತೇನೆ ಎಂದು ಹೇಳಿದರು. ವಾರಾಂತ್ಯದಲ್ಲಿ ನಡೆದ ಪಕ್ಷದ ಸಭೆಯಲ್ಲಿ ಹ್ಯಾರಿಸ್ ತನ್ನ ಪಕ್ಷವನ್ನು ಪುನರುಜ್ಜೀವನಗೊಳಿಸಲು ಪ್ರತಿಜ್ಞೆ ಮಾಡಿದರು. ಕಾನೂನು ಮತ್ತು ಸುವ್ಯವಸ್ಥೆ, ವ್ಯವಹಾರ ಮತ್ತು ಕೃಷಿ ಮುನ್ನಡೆಸುವುದಾಗಿ ಅವರು ಹೇಳಿದರು ಎಂದು ಅಲ್ಲಿನ ಮಾಧ್ಯಮಗಳು ವರದಿ ಮಾಡಿವೆ.
ಹ್ಯಾರಿಸ್, ಹದಿನಾರನೇ ವಯಸ್ಸಿನಲ್ಲಿ, ಫೈನ್ ಗೇಲ್‌ನ ಯುವ ಶಾಖೆಯನ್ನು ಸೇರಿಕೊಂಡರು. ಬಳಿಕ ರಾಜಕೀಯದಲ್ಲಿ ಹಂತ ಹಂತವಾಗಿ ಒಂದೊಂದೇ ಮೆಟ್ಟಿಲೇರುತ್ತಲೇ ಸಾಗಿದರು. ಅವರು 2011 ರಲ್ಲಿ ಎಂದರೆ ತಮ್ಮ 24 ನೇ ವಯಸ್ಸಿನಲ್ಲಿ ಸಂಸತ್ತಿಗೆ ಆಯ್ಕೆಯಾದರು. 22 ನೇ ವಯಸ್ಸಿನಲ್ಲಿ ಕೌಂಟಿ ಕೌನ್ಸಿಲರ್ ಆಗಿ ಸೇವೆ ಸಲ್ಲಿಸಿದ್ದರು. ಆ ಸಮಯದಲ್ಲಿ ಅವರು ಕಿರಿಯ ಸದಸ್ಯರಾಗಿದ್ದರಿಂದ ಅವರನ್ನು "ಬೇಬಿ ಆಫ್ ದಿ ಡೈಲ್" (ಐರಿಶ್ ಸಂಸತ್ತು) ಎಂದು ಕರೆಯಲಾಯಿತು.
29 ನೇ ವಯಸ್ಸಿನಲ್ಲಿ, ಅವರು 2016 ರಲ್ಲಿ ಆರೋಗ್ಯ ಸಚಿವರಾಗಿ ಮತ್ತು 2020 ರಲ್ಲಿ ಉನ್ನತ ಶಿಕ್ಷಣ ಸಚಿವರಾಗಿ ನೇಮಕಗೊಂಡರು. ತಮ್ಮ ವಯಸ್ಕ ಜೀವನದ ಹೆಚ್ಚಿನ ಭಾಗವನ್ನು ಸಂಸತ್ತಿನಲ್ಲಿ ಕಳೆದಿದ್ದರೂ, ಹ್ಯಾರಿಸ್ ತಮ್ಮನ್ನು ತಾವು ಆಕಸ್ಮಿಕ ರಾಜಕಾರಣಿ ಎಂದು ಹೇಳಿಕೊಳ್ಳುತ್ತಾರೆ.
ಹಿಂದಿನ ಪ್ರಧಾನಿ ಲಿಯೋ ವರದ್ಕರ್ ತಮ್ಮ 38ನೇ ವಯಸ್ಸಿನಲ್ಲಿ ಮೊದಲ ಬಾರಿಗೆ ಪ್ರಧಾನಿಯಾಗಿ ಆಯ್ಕೆಯಾದಾಗ ದೇಶದ ಅತ್ಯಂತ ಕಿರಿಯ ಪ್ರಧಾನಿ ಎಂಬ ಖ್ಯಾತಿ ಗಳಿಸಿದ್ದರು. ಪ್ರಧಾನಿ ಹುದ್ದೆಗೆ ಬದಲಿ ವ್ಯಕ್ತಿ ಆಯ್ಕೆಯಾದ ತಕ್ಷಣವೇ ತಾವು ಹುದ್ದೆಗೆ ರಾಜೀನಾಮೆ ನೀಡುವುದಾಗಿ ವರದ್ಕರ್ ಮಾರ್ಚ್ 20ರಂದು ಅನಿರೀಕ್ಷಿತವಾಗಿ ಘೋಷಣೆ ಮಾಡಿದ್ದರು. ವರದ್ಕರ್ ಅವರು ತಾನು ಸಲಿಂಗಕಾಮಿ ಎಂದು ಬಹಿರಂಗವಾಗಿ ಹೇಳಿಕೊಂಡ ದೇಶದ ಮೊದಲ ಪ್ರಧಾನಿಯಾಗಿದ್ದಾರೆ.
ಓದಿ: ಕೇಜ್ರಿವಾಲ್ ಅರ್ಜಿ ತಿರಸ್ಕರಿಸಿದ ದೆಹಲಿ ಹೈಕೋರ್ಟ್: ಬಂಧನ ಕಾನೂನು ಬದ್ಧ ಎಂದ ನ್ಯಾಯಾಲಯ - KEJRIWAL BAIL
