ಬ್ಯಾಟ್​ ಇಲ್ಲದೇ ಸೆಂಚುರಿ ಬಾರಿಸಿದ್ದ ಇಮ್ರಾನ್​ಗೆ ಮತ್ತೆ ಹಿನ್ನೆಡೆ: ಅಧಿಕಾರದ ಚುಕ್ಕಾಣಿ ಹಿಡಿಯಲು ಮೈತ್ರಿ ಸರ್ಕಾರದ ಉತ್ಸಾಹ

ಪಾಕಿಸ್ತಾನದ ಚುನಾವಣೆಯ ಮೇಲೆ ಸೇನೆ ಪ್ರಭಾವ ಬೀರಿದೆ. ಯಾರು ಅಧಿಕಾರಕ್ಕೆ ಬರಬೇಕು ಎಂಬ ವಿಷಯದಲ್ಲಿ ತನ್ನ ಹಿಡಿದ ಇಟ್ಟುಕೊಂಡಿದೆ. ನವಾಜ್ ಷರೀಫ್ ನೇತೃತ್ವದ ಪಿಎಂಎಲ್ - ಎನ್ ಒಕ್ಕೂಟ ಸರ್ಕಾರವನ್ನು ಅಧಿಕಾರಕ್ಕೆ ತರಲು ಸೇನೆ ಸಂಪೂರ್ಣ ಸಹಕಾರ ನೀಡುತ್ತಿದೆ.

ಇಸ್ಲಾಮಾಬಾದ್​, ಪಾಕಿಸ್ತಾನ: ಪಾಕಿಸ್ತಾನದ ಚುನಾವಣೆ ಮೇಲೆ ಪ್ರಭಾವ ಬೀರಿದ ಸೇನೆ, ಯಾರು ಅಧಿಕಾರಕ್ಕೆ ಬರಬೇಕು ಎಂಬ ವಿಷಯದಲ್ಲಿ ತನ್ನದೇ ಮಾತು ನಡೆಯುವಂತೆ ನಡೆದುಕೊಳ್ಳುತ್ತಿದೆ. ನವಾಜ್ ಷರೀಫ್ ನೇತೃತ್ವದ ಪಿಎಂಎಲ್ - ಎನ್ ಒಕ್ಕೂಟ ಸರ್ಕಾರಕ್ಕೆ ಸೇನೆ ಸಂಪೂರ್ಣ ಸಹಕಾರ ನೀಡುತ್ತಿದೆ. ಅಷ್ಟೇ ಅಲ್ಲ ಪಿಪಿಪಿ ಜೊತೆಗೆ ಪಾಕಿಸ್ತಾನದಲ್ಲಿ ಸಮ್ಮಿಶ್ರ ಸರ್ಕಾರ ರಚಿಸಲು ಸಜ್ಜಾಗಿರುವ ಪಿಎಂಎಲ್-ಎನ್ ಭಾನುವಾರ ಸಂಸತ್ತಿನಲ್ಲಿ ತನ್ನ ಬಲವನ್ನು ಹೆಚ್ಚಿಸಿಕೊಳ್ಳಲು ಇಮ್ರಾನ್ ಖಾನ್ ಪಕ್ಷದ ಬೆಂಬಲಿತ ಮೊದಲ ಸ್ವತಂತ್ರ ಅಭ್ಯರ್ಥಿಯ ಬೆಂಬಲವನ್ನು ಪಡೆಯುವಲ್ಲಿ ಯಶಸ್ವಿಯಾಗಿದೆ.

ಲಾಹೋರ್‌ನ ನ್ಯಾಷನಲ್ ಅಸೆಂಬ್ಲಿಯ 121ನೇ ಕ್ಷೇತ್ರದಲ್ಲಿ ಪಾಕಿಸ್ತಾನ್ ಮುಸ್ಲಿಂ ಲೀಗ್ - ನವಾಜ್‌ನ ಧೀಮಂತ ಶೇಖ್ ರೋಹೈಲ್ ಅಸ್ಗರ್ ಅವರನ್ನು ಸೋಲಿಸಿದ ಪಾಕಿಸ್ತಾನ್ ತೆಹ್ರೀಕ್-ಇ-ಇನ್ಸಾಫ್ (ಪಿಟಿಐ) ಬೆಂಬಲಿತ ಅಭ್ಯರ್ಥಿ ವಾಸಿಂ ಖಾದಿರ್ ಅವರು ಪಿಎಂಎಲ್ - ಎನ್‌ಗೆ ಸೇರ್ಪಡೆಗೊಂಡಿದ್ದಾರೆ. ನಾನು ಪಿಎಂಎಲ್ - ಎನ್‌ಗೆ ಸೇರಿದ್ದೇನೆ ಅದು ನನ್ನ ಮನೆಯಾಗಿದೆ, ”ಎಂದು ಸಭೆಯ ನಂತರ ಖಾದಿರ್ ಹೇಳಿಕೆ ನೀಡಿದ್ದಾರೆ.

ಪಿಎಂಎಲ್-ಎನ್ ಮೂಲಗಳ ಪ್ರಕಾರ, ಪಿಟಿಐ ಬೆಂಬಲಿತ ವಿಜೇತರನ್ನ ಮನವೊಲಿಸಿ, ಪಿಎಂಎಲ್​​- ಎನ್​ಗೆ ಸೆಳೆದುಕೊಳ್ಳುವ ಕಾರ್ಯ ನಡೆಯುತ್ತಿದೆ. ಮುಂದಿನ 24 ರಿಂದ 48 ಗಂಟೆಗಳಲ್ಲಿ ಅಂತಹ ಅಭ್ಯರ್ಥಿಗಳು ಪಿಎಂಎಲ್-ಎನ್‌ಗೆ ಸೇರಲಿದ್ದಾರೆ ಎಂಬ ಮಾತುಗಳು ಕೇಳಿ ಬಂದಿವೆ.

ಪಾಕಿಸ್ತಾನದ ಚುನಾವಣಾ ಆಯೋಗವು ಭಾನುವಾರ ಬಿಡುಗಡೆ ಮಾಡಿದ ಅಂತಿಮ ಫಲಿತಾಂಶಗಳ ಪ್ರಕಾರ, 265 ಸ್ಥಾನಗಳ ರಾಷ್ಟ್ರೀಯ ಅಸೆಂಬ್ಲಿ ಚುನಾವಣೆಯಲ್ಲಿ PML-N 75 ಸ್ಥಾನಗಳನ್ನು ಗೆದ್ದಿದೆ. ಇಮ್ರಾನ್ ಅವರ ಪಾಕಿಸ್ತಾನ್ ತೆಹ್ರೀಕ್-ಇ-ಇನ್ಸಾಫ್ (ಪಿಟಿಐ) ಪಕ್ಷದ ಬೆಂಬಲಿಗರಾಗಿ ಸ್ವತಂತ್ರವಾಗಿ ಸ್ಪರ್ಧಿಸಿದ ಅಭ್ಯರ್ಥಿಗಳು ಅತಿ ಹೆಚ್ಚು 101 ಸ್ಥಾನಗಳಲ್ಲಿ ಗೆಲುವು ಸಾಧಿಸಿದ್ದಾರೆ. ಸೇನೆ ಬಯಸುತ್ತಿರುವ ಪಿಎಂಎಲ್-ಎನ್ ಪಕ್ಷಕ್ಕೆ ಅಧಿಕಾರಕ್ಕೆ ಬರಬೇಕು ಎಂದರೆ ಬಿಲಾವಲ್ ಭುಟ್ಟೊ ನೇತೃತ್ವದ ಪಾಕಿಸ್ತಾನ್ ಪೀಪಲ್ಸ್ ಪಾರ್ಟಿ (54) ಬೆಂಬಲದ ಅಗತ್ಯವಿದೆ. ಎರಡು ಪಕ್ಷಗಳು ಒಗ್ಗೂಡಿದರೆ 129 ಸ್ಥಾನಗಳಾಗುತ್ತವೆ. ಆಗಲೂ ಬಹುಮತಕ್ಕೆ ನಾಲ್ವರು ಸದಸ್ಯರ ಕೊರತೆ ಉಂಟಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಪಿಟಿಐ ಬೆಂಬಲಿತ ಸಂಸದರನ್ನು ಪಕ್ಷಕ್ಕೆ ಸೆಳೆದುಕೊಳ್ಳಲು ಪಿಎಂಎಲ್​​ - ಎನ್​​ ಹವಣಿಸುತ್ತಿದೆ.

ಇನ್ನು ನವಾಜ್ ಷರೀಫ್ 17 ಸ್ಥಾನಗಳನ್ನು ಗೆದ್ದ MQM-P ಯೊಂದಿಗೆ ಮಾತುಕತೆ ನಡೆಸುತ್ತಿದ್ದಾರೆ. ಸರ್ಕಾರ ರಚಿಸಲು 133 ಸ್ಥಾನಗಳ ಅಗತ್ಯವಿದೆ. ಈ ಮೂರು ಪಕ್ಷಗಳು ಒಟ್ಟಾದರೆ ಅಧಿಕಾರ ಸಿಗುತ್ತದೆ. PPP ಮತ್ತು MQM-P ಈ ಮೈತ್ರಿಗೆ ಇನ್ನೂ ಹಸಿರು ನಿಶಾನೆ ಸಿಕ್ಕಿಲ್ಲ. ಷರೀಫ್ ಪ್ರಧಾನಿಯಾಗುವುದು ಪಿಪಿಪಿಗೆ ಇಷ್ಟವಿಲ್ಲ ಎಂಬ ವರದಿಗಳೂ ಇವೆ. ಈ ಹಿನ್ನೆಲೆ ಪಿಎಂಎಲ್-ಎನ್ ನವಾಜ್ ಸಹೋದರ ಶೆಹಬಾಜ್ ಹೆಸರನ್ನು ಪ್ರಸ್ತಾಪಿಸುತ್ತಿದೆ. ಇದಕ್ಕೆ ಸೇನೆ ಒಪ್ಪುವ ಸಾಧ್ಯತೆಗಳಿವೆ.

ಇಮ್ರಾನ್ ನೇತೃತ್ವದ ಪಿಟಿಐ, ನಾವೇ ಸರ್ಕಾರ ರಚಿಸುತ್ತೇವೆ ಎಂದು ನಿಧಾನವಾಗಿ ಹೇಳುತ್ತಿದೆ. 170 ಸೀಟು ಗೆದ್ದಿದ್ದೇವೆ. ಆದರೆ ಅಧಿಕಾರಿಗಳು ಅಕ್ರಮ ಮಾಡಿ ಅಭ್ಯರ್ಥಿಗಳನ್ನು ಸೋಲಿಸುತ್ತಿದ್ದಾರೆ. ಚುನಾವಣೆಯಲ್ಲಿ ಸೋತ ಪಿಟಿಐ ಪರ ಸ್ವತಂತ್ರ ಅಭ್ಯರ್ಥಿಗಳು ನ್ಯಾಯಾಲಯಗಳಲ್ಲಿ ಅರ್ಜಿಗಳ ಮೇಲೆ ಅರ್ಜಿಗಳನ್ನು ಸಲ್ಲಿಸುತ್ತಿದ್ದಾರೆ ಎಂದು ಪಿಟಿಐ ಹೇಳಿದೆ.

ಬ್ಯಾಟ್ ಇಲ್ಲದೆಯೇ ಶತಕ ಬಾರಿಸಿದ ಖಾನ್!: ಜೈಲಿನಲ್ಲಿದ್ದ ಇಮ್ರಾನ್ ಖಾನ್ ಪಾಕಿಸ್ತಾನದ ಚುನಾವಣೆಯಲ್ಲಿ ಬ್ಯಾಟ್ ಇಲ್ಲದೇ ಶತಕ ಬಾರಿಸಿದ್ದಾರೆ. ಚುನಾವಣಾ ಆಯೋಗದ ಅಧಿಕೃತ ಪ್ರಕಟಣೆಯ ಪ್ರಕಾರ, 265 ರಾಷ್ಟ್ರೀಯ ಅಸೆಂಬ್ಲಿ ಸ್ಥಾನಗಳಲ್ಲಿ ಇಮ್ರಾನ್ ನೇತೃತ್ವದ ಪಿಟಿಐನಿಂದ ಸ್ವತಂತ್ರವಾಗಿ ಸ್ಪರ್ಧಿಸಿದ ಅಭ್ಯರ್ಥಿಗಳು 101 ಸ್ಥಾನಗಳನ್ನು ಗೆದ್ದಿದ್ದಾರೆ. ಚುನಾವಣಾ ಆಯೋಗವು ಪಿಟಿಐ ಬ್ಯಾಟ್ ಚಿಹ್ನೆಯನ್ನು ರದ್ದುಗೊಳಿಸಿದ ನಂತರ ಪಕ್ಷದ ಅಭ್ಯರ್ಥಿಗಳು ವಿವಿಧ ಚಿಹ್ನೆಗಳೊಂದಿಗೆ ಸ್ವತಂತ್ರವಾಗಿ ಸ್ಪರ್ಧಿಸಿ ಪಿಎಂಎಲ್​ ಎನ್​​ ಹಾಗೂ ಪಿಪಿಪಿ ಪಕ್ಷಗಳಿಗೆ ಸೆಡ್ಡು ಹೊಡೆದಿತ್ತು.

ಓದಿ: ಪಾಕಿಸ್ತಾನ ಚುನಾವಣಾ ಫಲಿತಾಂಶಕ್ಕೆ ಮಾನ್ಯತೆ ನೀಡದಂತೆ ಯುಎಸ್ ಸಂಸದರ ಒತ್ತಾಯ