ಇಸ್ಲಾಮಾಬಾದ್: ವಿಶ್ವದ ಎಲ್ಲಾ ದೇಶಗಳು ಪೋಲಿಯೋ ರೋಗದಿಂದ ಮುಕ್ತವಾಗಿದ್ದರೂ ಪಾಕಿಸ್ತಾನ ಮತ್ತು ಅಘ್ಘಾನಿಸ್ತಾನ ಇನ್ನೂ ಹೊರಬಂದಿಲ್ಲ. ಈ ಕುರಿತು ಮಾತನಾಡಿರುವ ಪಾಕ್ ಪ್ರಧಾನಿ ಶೆಹಬಾಜ್ ಷರೀಫ್, "ದೇಶದಲ್ಲಿ ಪೋಲಿಯೋ ನಿರ್ಮೂಲನೆಗೆ ಅವಿರಹಿತ ಶ್ರಮ ವಹಿಸಲಾಗುತ್ತಿದೆ. ಈ ಗುರಿ ಸಾಧನೆಗೆ ಎಲ್ಲಾ ಭಾಗಿದಾರರ ನಿರಂತರ ಸಹಕಾರ ಅಗತ್ಯ" ಎಂದು ಹೇಳಿದ್ದಾರೆ.
ಸೌದಿ ಅರೇಬಿಯಾದ ರಿಯಾದ್ನಲ್ಲಿ ನಡೆಯುತ್ತಿರುವ ಎರಡು ದಿನಗಳ ವಿಶ್ವ ಆರ್ಥಿಕ ವೇದಿಕೆಯಲ್ಲಿ ಅವರು ಮಾತನಾಡಿದರು. ಬಿಲ್ ಆ್ಯಂಡ್ ಮಿಲಿಂದಾ ಗೇಟ್ಸ್ ಸಂಸ್ಥಾಪಕ ಬಿಲ್ ಗೇಟ್ಸ್ ಜೊತೆಗಿನ ಚರ್ಚೆಯ ವೇಳೆ ಈ ವಿಚಾರವನ್ನು ಅವರು ಪ್ರಸ್ತಾಪಿಸಿದರು.
ವಿಶ್ವ ಆರ್ಥಿಕ ವೇದಿಕೆಯ ವಿಶೇಷ ಸಭೆಯಲ್ಲಿ ಪಾಕ್ ಪ್ರಧಾನಿ ಜೊತೆಗೆ ಚರ್ಚಿಸಿದ ಗೇಟ್ಸ್, ಶರೀಫ್ ನಾಯಕತ್ವದಲ್ಲಿ ಪಂಜಾಬ್ ಪ್ರಾಂತ್ಯದಲ್ಲಿರುವ ಪೋಲಿಯೋ ಲಸಿಕೀಕರಣದ ಕಾರ್ಯಕ್ರಮದ ಬಗ್ಗೆ ಪ್ರಶಂಸೆ ವ್ಯಕ್ತಪಡಿಸಿದರು. ಅಲ್ಲದೇ, ದೇಶದೆಲ್ಲೆಡೆ ಈ ಕ್ರಮವನ್ನು ಜಾರಿಗೆ ತರುವಂತೆಯೂ ತಿಳಿಸಿದರು ಎಂದು ಎಕ್ಸ್ ವೇದಿಕೆಯಲ್ಲಿ ಬರೆದುಕೊಂಡಿದ್ದಾರೆ.
ಫೆಬ್ರವರಿ 2022ರಲ್ಲಿ ಬಿಲ್ ಗೇಟ್ಸ್ ಅವರ ಪಾಕಿಸ್ತಾನದ ಭೇಟಿಯನ್ನು ನೆನಪಿಸಿಕೊಂಡ ಷರೀಫ್, ಮತ್ತೊಮ್ಮೆ ಪಾಕಿಸ್ತಾನಕ್ಕೆ ಬರುವಂತೆಯೂ ಆಹ್ವಾನ ನೀಡಿದರು. ಗೇಟ್ಸ್ ಸಂಸ್ಥೆ ಹಾಗೂ ಪಾಕಿಸ್ತಾನದ ನಡುವೆ ಬಲವಾದ ಸಂಬಂಧವನ್ನು ಖಚಿತಗೊಳಿಸಲು ಕೆಲಸವನ್ನು ಮುಂದುವರೆಸುವಂತೆಯೂ ಮನವಿ ಮಾಡಿದ್ದಾರೆ.
ಇದಕ್ಕೂ ಮುನ್ನ ಷರೀಫ್ ಮತ್ತು ಗೇಟ್ಸ್ ಉನ್ನತ ಮಟ್ಟದ ಸಮಿತಿಯ ಚರ್ಚೆ ನಡೆಸಿದರು. ವಿಶ್ವ ಆರ್ಥಿಕ ವೇದಿಕೆಯ 'ರಿಡಿಫೈನಿಂಗ್ ದಿ ಗ್ಲೋಬಲ್ ಹೆಲ್ತ್ ಅಜೆಂಡಾ'ದಲ್ಲಿ ಅವರು ಮಾತುಕತೆ ನಡೆಸಿದ್ದಾರೆ. ಈ ವೇಳೆ, ಪಾಕಿಸ್ತಾನದಲ್ಲಿ ಪೋಲಿಯೋ ನಿರ್ಮೂಲನೆಗೆ ದೀರ್ಘಾವಧಿಯಲ್ಲಿ ನಮ್ಮನ್ನು ಬೆಂಬಲಿಸಿದ್ದಕ್ಕೆ ಬಿಲ್ ಗೇಟ್ಸ್‌ಗೆ ಧನ್ಯವಾದ ತಿಳಿಸಿದರು.
ಇದನ್ನೂ ಓದಿ: ಪಾಕಿಸ್ತಾನ: ಪೋಲಿಯೋ ಕಾರ್ಮಿಕರ ಬೆಂಗಾವಲಿಗಿದ್ದ ಪೊಲೀಸ್ಗೆ ಗುಂಡಿಕ್ಕಿ ಹತ್ಯೆ
