ಸ್ಯಾನ್ ಫ್ರಾನ್ಸಿಸ್ಕೋ : ಬಳಕೆದಾರರ ಅನುಮತಿಯಿಲ್ಲದೆ ಕ್ರೋಮ್ ಬ್ರೌಸರ್ ಮೂಲಕ ಅವರಿಗೆ ಸಂಬಂಧಿಸಿದ ಡೇಟಾ ಸಂಗ್ರಹಣೆ ಮಾಡಿದ ಆರೋಪದಲ್ಲಿ ಟೆಕ್ ದೈತ್ಯ ಗೂಗಲ್ ಅಮೆರಿಕದಲ್ಲಿ ಕ್ಲಾಸ್-ಆಕ್ಷನ್ ಮೊಕದ್ದಮೆಯನ್ನು ಎದುರಿಸಲಿದೆ ಎಂದು ಇಲ್ಲಿನ ನ್ಯಾಯಾಲಯವೊಂದು ತೀರ್ಪು ನೀಡಿದೆ. ಗೂಗಲ್ ವಿರುದ್ಧದ ಪ್ರಕರಣವನ್ನು ಈ ಹಿಂದೆ ವಜಾಗೊಳಿಸಿದ ಡಿಸೆಂಬರ್ 2022 ರ ನ್ಯಾಯಾಲಯದ ತೀರ್ಪನ್ನು ಕ್ಯಾಲಿಫೋರ್ನಿಯಾ ರಾಜ್ಯದ ಫೆಡರಲ್ ಮೇಲ್ಮನವಿ ನ್ಯಾಯಾಲಯವು ರದ್ದುಗೊಳಿಸಿ ಮೇಲಿನಂತೆ ಆದೇಶ ನೀಡಿದೆ.
ಕ್ರೋಮ್ ಸಿಂಕ್ ಅನ್ನು ಸಕ್ರಿಯಗೊಳಿಸಲಾಗಿದೆಯೇ ಎಂಬುದನ್ನು ಪರಿಗಣಿಸದೆ ಗೂಗಲ್ ಕ್ರೋಮ್ ಬಳಕೆದಾರರ ಡೇಟಾ ಸಂಗ್ರಹಿಸಿದೆ ಎಂದು ಆರೋಪಿಸಿ 2020 ರಲ್ಲಿ ಮೊಕದ್ದಮೆ ದಾಖಲಿಸಲಾಗಿತ್ತು.
"ವಿವಿಧ ರಾಜ್ಯ ಮತ್ತು ಫೆಡರಲ್ ಕಾನೂನುಗಳನ್ನು ಉಲ್ಲಂಘಿಸಿ ಕಂಪನಿಯು ಬಳಕೆದಾರರ ಡೇಟಾವನ್ನು ರಹಸ್ಯವಾಗಿ ಸಂಗ್ರಹಿಸಿದೆ ಎಂದು ಆರೋಪಿಸಿ ದಾಖಲಾಗಿದ್ದ ಪ್ರಕರಣದಲ್ಲಿ ಗೂಗಲ್ ಎಲ್ಎಲ್ ಸಿ ಪರವಾಗಿ ಜಿಲ್ಲಾ ನ್ಯಾಯಾಲಯ ನೀಡಿದ ಸಾರಾಂಶ ತೀರ್ಪನ್ನು ಬದಲಿಸಿದ ಫೆಡರಲ್ ಮೇಲ್ಮನವಿ ನ್ಯಾಯಾಲಯ, ಮುಂದಿನ ವಿಚಾರಣೆಗಾಗಿ ರಿಮಾಂಡ್ ಮಾಡಲಾಗಿದೆ" ಎಂದು ತನ್ನ ತೀರ್ಪಿನಲ್ಲಿ ತಿಳಿಸಿದೆ.
ಕ್ರೋಮ್ ಉದ್ದೇಶಪೂರ್ವಕವಾಗಿ ಮತ್ತು ಕಾನೂನುಬಾಹಿರವಾಗಿ ಗೂಗಲ್ ಬ್ರೌಸಿಂಗ್ ಹಿಸ್ಟರಿ, ಐಪಿ ವಿಳಾಸಗಳು, ನಿರಂತರ ಕುಕೀ ಐಡೆಂಟಿಫೈಯರ್ಗಳು ಮತ್ತು ಅನನ್ಯ ಬ್ರೌಸರ್ ಐಡೆಂಟಿಫೈಯರ್ಗಳನ್ನು ತಮ್ಮ ಅನುಮತಿಯಿಲ್ಲದೆ ಸಂಗ್ರಹಿಸಿಕೊಂಡಿದೆ ಎಂದು ಅರ್ಜಿದಾರರು ಹೇಳಿದ್ದಾರೆ.
"ಜಿಲ್ಲಾ ನ್ಯಾಯಾಲಯವು ಗೂಗಲ್ನ ವಿವಿಧ ನಿಯಮಗಳನ್ನು ಪರಿಶೀಲಿಸಬೇಕಾಗಿತ್ತು ಮತ್ತು ಅವುಗಳನ್ನು ಓದುವ ಬಳಕೆದಾರರು ಡೇಟಾ ಸಂಗ್ರಹಣೆಗೆ ತಮ್ಮ ಒಪ್ಪಿಗೆಯನ್ನು ನೀಡಿದ್ದಾರೆಯೇ ಎಂಬುದನ್ನು ನಿರ್ಧರಿಸಬೇಕಾಗಿತ್ತು" ಎಂದು ಹೊಸ ತೀರ್ಪಿನಲ್ಲಿ ವಿವರಿಸಲಾಗಿದೆ.
ಸಮಂಜಸವಾದ ವ್ಯಕ್ತಿ ಕೇಂದ್ರಿತ ವಿಚಾರಣೆಯನ್ನು ನಡೆಸುವ ಬದಲು "ಬ್ರೌಸರ್ ಅಜ್ಞಾತವಾದ"ದ ಮೇಲೆ ವಿಚಾರಣೆಯನ್ನು ಕೇಂದ್ರೀಕರಿಸುವ ಮೂಲಕ, ಜಿಲ್ಲಾ ನ್ಯಾಯಾಲಯವು ಸರಿಯಾದ ಮಾನದಂಡವನ್ನು ಅನ್ವಯಿಸಲು ವಿಫಲವಾಗಿದೆ ಎಂದು ಫೆಡರಲ್ ನ್ಯಾಯಾಲಯ ಹೇಳಿದೆ.
ಫೆಡರಲ್ ನ್ಯಾಯಾಲಯದ ತೀರ್ಪಿನ ಬಗ್ಗೆ ಪ್ರತಿಕ್ರಿಯಿಸಿದ ಗೂಗಲ್ ವಕ್ತಾರರು, "ನಾವು ಈ ತೀರ್ಪನ್ನು ಒಪ್ಪುವುದಿಲ್ಲ ಮತ್ತು ಪ್ರಕರಣದ ಸತ್ಯಗಳು ನಮ್ಮ ಪರವಾಗಿವೆ ಎಂಬ ವಿಶ್ವಾಸವಿದೆ. ಕ್ರೋಮ್ ಸಿಂಕ್ ವೈಶಿಷ್ಟ್ಯವು ಜನ ತಮ್ಮ ವಿವಿಧ ಸಾಧನಗಳಲ್ಲಿ ಕ್ರೋಮ್ ಅನ್ನು ತಡೆರಹಿತವಾಗಿ ಬಳಸಲು ಸಹಾಯ ಮಾಡುತ್ತದೆ ಮತ್ತು ಸ್ಪಷ್ಟ ಗೌಪ್ಯತೆ ನಿಯಂತ್ರಣಗಳನ್ನು ಹೊಂದಿದೆ" ಎಂದು ಹೇಳಿದ್ದಾರೆ. ಗೂಗಲ್ ಕ್ರೋಮ್ ಬ್ರೌಸರ್ ಒಂದು ಉಚಿತ ವೆಬ್ ಬ್ರೌಸರ್ ಆಗಿದ್ದು, ಇಂಟರ್ ನೆಟ್ ಬ್ರೌಸ್ ಮಾಡಲು ಮತ್ತು ವೆಬ್ ಆಧಾರಿತ ಅಪ್ಲಿಕೇಶನ್ಗಳನ್ನು ಬಳಸಲು ಇದನ್ನು ಉಪಯೋಗಿಸಲಾಗುತ್ತದೆ.
ಇದನ್ನೂ ಓದಿ : ಅಣುಬಾಂಬ್ ಹೊತ್ತೊಯ್ಯಬಲ್ಲ ಪಾಕಿಸ್ತಾನದ ಶಾಹೀನ್-2 ಕ್ಷಿಪಣಿ ಪರೀಕ್ಷೆ ಯಶಸ್ವಿ - Shaheen II Ballistic Missile
