ನ್ಯೂಯಾರ್ಕ್: ಜಾಗತಿಕ ಸಂತೋಷ ಸೂಚ್ಯಂಕ ವರದಿಯಲ್ಲಿ 148 ದೇಶಗಳ ಪೈಕಿ ಭಾರತ 126ನೇ ಸ್ಥಾನ ಪಡೆದಿದೆ. ವಿಶ್ವದಲ್ಲೇ ಅಧಿಕ ಜನಸಂಖ್ಯೆ ಹೊಂದಿರುವ ಭಾರತದ ಹಿರಿಯ ವಯಸ್ಕರು ಜೀವನ ತೃಪ್ತಿ ಹೊಂದಿರುವುದು ವರದಿಯಲ್ಲಿ ಕಂಡುಬಂದಿದೆ.
ಫಿನ್ಲೆಂಡ್‌ಗೆ ಮೊದಲ ಸ್ಥಾನ: 2024ರ ವಿಶ್ವದ ಸಂತೋಷದಾಯಕ ದೇಶಗಳ ವರದಿಯಲ್ಲಿ (World Happiness Report) ಮೊದಲ ಸ್ಥಾನವನ್ನು ಫಿನ್ಲೆಂಡ್ ಪಡೆದಿದ್ದು, ಏಳನೇ ಬಾರಿಗೆ ಈ ಶ್ರೇಯಾಂಕ ಕಾಪಾಡಿಕೊಂಡಿರುವ ಹೆಗ್ಗಳಿಕೆಗೂ ಕೂಡ ಈ ದೇಶ ಪಾತ್ರವಾಗಿದೆ. ಫಿನ್ಲೆಂಡ್ ಬಳಿಕ ಡೆನ್ಮಾರ್ಕ್, ಐಸ್ಲ್ಯಾಂಡ್, ಸ್ವೀಡನ್, ಇಸ್ರೇಲ್, ನೆದರ್ಲ್ಯಾಂಡ್ಸ್, ನಾರ್ವೆ, ಲಕ್ಸಂಬರ್ಗ್, ಸ್ವಿಟ್ಜರ್ಲೆಂಡ್ ಮತ್ತು ಆಸ್ಟ್ರೇಲಿಯಾ ಈ ಪಟ್ಟಿಯಲ್ಲಿ ಮೊದಲ ಹತ್ತು ಸ್ಥಾನಗಳಲ್ಲಿವೆ.
ವಿಶ್ವಸಂಸ್ಥೆಯ ಅಂತಾರಾಷ್ಟ್ರೀಯ ಸಂತೋಷದ ದಿನದ ಹಿನ್ನೆಲೆಯಲ್ಲಿ ಈ ಪಟ್ಟಿ ಬಿಡುಗಡೆಯಾಗಿದೆ. ಪಟ್ಟಿಯಲ್ಲಿ ಭಾರತದ ನಂತರದ ಸ್ಥಾನಗಳಲ್ಲಿ ಲಿಬಿಯಾ, ಇರಾಕ್, ಪ್ಯಾಲೆಸ್ಟೈನ್ ಮತ್ತು ನೈಗರ್ ದೇಶಗಳಿವೆ.
ಗಲ್ಲುಪ್, ದಿ ಆಕ್ಸ್‌ಫರ್ಡ್ ವೆಲ್ಬಿಯಿಂಗ್ ರಿಸರ್ಚ್ ಸೆಂಟರ್, ವಿಶ್ವಸಂಸ್ಥೆಯ ಸಸ್ಟೈನಬಲ್ ಡೆವಲಪ್ಮೆಂಟ್ ಸಲ್ಯೂಷನ್ ನೆಟ್ವರ್ಕ್ ಮತ್ತು ಡಬ್ಲ್ಯೂಎಚ್ಆರ್ ಸಹಭಾಗಿತ್ವದಲ್ಲಿ ಈ ವರದಿ ತಯಾರಿಸಲಾಗಿದೆ.
ಮೊದಲ ಬಾರಿಗೆ 20ರ ಪಟ್ಟಿಯಿಂದ ಅಮೆರಿಕ ಹೊರಕ್ಕೆ: ಇನ್ನು ಈ ಪಟ್ಟಿಯಲ್ಲಿ ಅಮೆರಿಕದ ಸ್ಥಾನ ಕಳೆದ ಬಾರಿಗಿಂತ ಕುಸಿದಿದೆ. 2012ರಿಂದ ವಿಶ್ವ ಸಂತೋಷದ ವರದಿ ಪ್ರಕಟವಾಗುತ್ತಿದ್ದು, ಇದೇ ಮೊದಲ ಬಾರಿಗೆ ಅಮೆರಿಕ ಮೊದಲ 20 ದೇಶಗಳ ಪಟ್ಟಿಯಲ್ಲಿ ಸ್ಥಾನ ಕಳೆದುಕೊಂಡಿದ್ದು, 23ನೇ ಸ್ಥಾನ ದಕ್ಕಿದೆ. ಇದಕ್ಕೆ ಪ್ರಮುಖ ಕಾರಣ 30 ವರ್ಷದೊಳಗಿನವರ ಯೋಗಕ್ಷೇಮವಾಗಿದೆ.
ವಿಶ್ವ ಅಸಂತೋಷ ದೇಶಗಳ ಪಟ್ಟಿಯಲ್ಲಿ ಅಫ್ಘಾನಿಸ್ತಾನ ಕಾಣಿಸಿಕೊಂಡಿದೆ. ಈ ಪಟ್ಟಿಯಲ್ಲಿ ಪಾಕಿಸ್ತಾನ 108ನೇ ಸ್ಥಾನದಲ್ಲಿದೆ.
ಇದನ್ನೂ ಓದಿ: ವಿಶ್ವ ಸಂತೋಷ ಸೂಚ್ಯಂಕ 2023: ಅಗ್ರಸ್ಥಾನದಲ್ಲಿ ಫಿನ್ಲೆಂಡ್: ಭಾರತ, ನೆರೆರಾಷ್ಟ್ರಗಳ ಸ್ಥಾನವೇನು?
