ಕೆಲಸದ ಸ್ಥಳದಲ್ಲಿನ ಒತ್ತಡ ನಿಭಾಯಿಸುವುದೇಗೆ? ಇಲ್ಲಿದೆ ಪರಿಹಾರ

ಈ ಕೆಲಸದ ಒತ್ತಡವು ಕೋಪ ಅಥವಾ ಖಿನ್ನತೆ, ಧೂಮಪಾನ ಮತ್ತು ಆಲ್ಕೋಹಾಲ್​ ಚಟಕ್ಕೆ ಕಾರಣವಾಗುತ್ತದೆ.

ನವದೆಹಲಿ: ಕೆಲಸದ ಸ್ಥಳದ ಒತ್ತಡವು ಇಂದು ಕಟುವಾಸ್ತವ ಆಗಿದ್ದು, ಈ ಕುರಿತು ವೈಯಕ್ತಿಕ ಮತ್ತು ಸಂಸ್ಥೆಗಳ ಮ್ಯಾನೇಜ್​​ಮೆಂಟ್​ ಮಟ್ಟದಲ್ಲೂ ಪರಿಹಾರದ ಅಗತ್ಯತೆ ಇದೆ ಎಂದು ಮಾನಸಿಕ ತಜ್ಞರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಇತ್ತೀಚಿಗೆ ಕೆಲಸದ ಒತ್ತಡದ ಹಿನ್ನೆಲೆ ವ್ಯಕ್ತಿಯೋರ್ವ ಹೃದಯಾಘಾತಕ್ಕೆ ಒಳಗಾದರೆ, ಮತ್ತೋರ್ವ ಆತ್ಮಹತ್ಯೆಗೆ ಶರಣಾಗಿದ್ದರು. ಈ ನಿಟ್ಟಿನಲ್ಲಿ ಕೆಲಸದ ಸ್ಥಳದ ಒತ್ತಡ ಕುರಿತು ಗಂಭೀರ ಚಿಂತನೆ ಮಾಡುವ ಅವಶ್ಯಕತೆ ಇದೆ.

ಈ ಕುರಿತು ಮಾತನಾಡಿರುವ ದೆಹಲಿಯ ಶ್ರೀ ಗಂಗಾ ರಾಮ್​ ಆಸ್ಪತ್ರೆಯ ಮನೋವೈದ್ಯಕೀಯ ವಿಭಾಗದ ಮುಖ್ಯಸ್ಥ ಡಾ ರಾಜೀವ್​ ಮೆಹ್ತಾ, ಅಧಿಕ ಕೆಲಸ, ಕೆಲಸದ ಸ್ಥಳದಲ್ಲಿನ ಆಂತರಿಕ ಸಂಬಂಧ, ಡೆಡ್​ಲೈನ್​, ದೀರ್ಘ ಕೆಲಸ ಮತ್ತು ಪ್ರಯಾಣದ ಸಮಯ ಈ ಎಲ್ಲವೂ ಕೂಡ ಕೆಲಸದ ಒತ್ತಡಕ್ಕೆ ಕಾರಣವಾಗುವ ಪ್ರಮುಖ ಅಂಶಗಳಾಗಿವೆ.

ಕೆಲಸದ ಒತ್ತಡದಿಂದ ಏನೆಲ್ಲಾ ಸಮಸ್ಯೆ; ಈ ಕೆಲಸದ ಒತ್ತಡವು ಕೋಪ ಅಥವಾ ಖಿನ್ನತೆ, ಧೂಮಪಾನ ಮತ್ತು ಆಲ್ಕೋಹಾಲ್​ ಚಟಕ್ಕೆ ಕಾರಣವಾಗುತ್ತದೆ. ಮನೆಯಲ್ಲಿನ ಆಂತರಿಕ ಸಂಬಂಧಗಳು ಹಳಿ ತಪ್ಪಬಹುದು. ಜೊತೆಗೆ ಮಧುಮೇಹ, ಅಧಿಕ ರಕ್ತದೊತ್ತಡ, ಬೆನ್ನು ನೋವು ಮುಂತಾದ ಆರೋಗ್ಯ ಸಮಸ್ಯೆಗಳು ಕಾಣಿಸಿಕೊಳ್ಳುತ್ತವೆ.

ಪರಿಹಾರ ಏನು; ವೈದ್ಯರಾದ ರಾಜೀವ್​ ಹೇಳುವಂತೆ, ಈ ಒತ್ತಡವನ್ನು ಹೊಡೆದೊಡಿಸುವ ಪ್ರಮುಖ ಹೆಜ್ಜೆ ಎಂದರೆ, ಉದ್ಯೋಗ ಸ್ಥಳದಲ್ಲಿ ದೃಢವಾಗಿದ್ದು, ಕೆಲವು ಗಡಿಗಳನ್ನು ರೂಪಿಸಿಕೊಳ್ಳುವುದು ಅವಶ್ಯ. ಹೌದು ಎಂದು ಹೇಳುವಷ್ಟೇ ದೃಢವಾಗಿ ಇಲ್ಲ ಎಂಬುದನ್ನು ಹೇಳುವುದು ಪ್ರಮುಖವಾಗುತ್ತದೆ.

ಕೆಲಸದ ಸಂದರ್ಭದಲ್ಲಿ ಪ್ರತಿ ಗಂಟೆಗೊಮ್ಮೆ 15-20 ನಿಮಿಷ ವಿರಾಮ ಪಡೆಯಿರಿ. ಈ ಸಮಯದಲ್ಲಿ ನಿಮ್ಮ ಡೆಸ್ಕ್​ ಮತ್ತು ಕಚೇರಿಯ ಜನರಿಂದ ದೂರದಲ್ಲಿ ವಾಕ್​ನಂತ ಅಭ್ಯಾಸ ರೂಢಿಸಿಕೊಳ್ಳುವುದು ಕೂಡ ಅವಶ್ಯವಾಗುತ್ತದೆ ಎನ್ನುತ್ತಾರೆ ಮನೋವೈಜ್ಞಾನಿಕ ಸಮಾಲೋಚಕಿ ದಿವ್ಯಾ ಮೊಹಿಂದ್ರೊ.

ಅಷ್ಟೇ ಅಲ್ಲದೇ, ಕಚೇರಿಯ ಮ್ಯಾನೇಜ್​ಮೆಂಟ್​ ಮತ್ತು ಸಹ ಕೆಲಸಗಾರರು ಕೂಡ ಉದ್ಯೋಗಿಯನ್ನು ಒತ್ತಡ ಮುಕ್ತವಾಗಿರಿಸುವಲ್ಲಿ ಪ್ರಮುಖ ಪಾತ್ರವನ್ನು ಹೊಂದಿದ್ದಾರೆ. ಉದ್ಯೋಗಿಗಳಿಗೆ ಅಧಿಕ ಕೆಲಸ, ಹೊರೆಯನ್ನು ನೀಡುವುದರ ಬದಲಾಗಿ ಅವರ ಮಿತಿ ಅರಿಯುವುದು ಅವಶ್ಯ. ಜೊತೆಗೆ ಅವರ ಜೊತೆ ಸಹಾನುಭೂತಿ ಹೊಂದಬೇಕಿದೆ ಎಂದಿದ್ದಾರೆ ಡಾ ರಾಜೀವ್​​.

ಎಲ್ಲಾ ವೃತ್ತಿಪರರು ತಮ್ಮ ಕೆಲಸದ ಜವಾಬ್ದಾರಿಗಳನ್ನು ಕೆಲಸದಲ್ಲಿ ಸಹೋದ್ಯೋಗಿಗಳೊಂದಿಗೆ ಮತ್ತು ಮನೆಯಲ್ಲಿ ಕುಟುಂಬದ ಸದಸ್ಯರೊಂದಿಗೆ ಹಂಚಿಕೊಳ್ಳಬೇಕು. ಇದರಿಂದ ಅವರು ಕೂಡ ಜವಾಬ್ದಾರಿಯುತವಾಗಿರಲು ಸಹಾಯ ಮಾಡುತ್ತದೆ. ಇದರಿಂದಾಗಿ ಉದ್ಯೋಗ ಸ್ಥಳ ಮತ್ತು ಜೀವನವನ್ನು ಸುಲಭವಾಗಿ ನಿಭಾಯಿಸಬಹುದು ಎನ್ನುತ್ತಾರೆ ದಿವ್ಯಾ.

ವೃತ್ತಿ- ಜೀವನದ ಸಮಾತೋಲನ ಸಾಧಿಸಲು ಯೋಗ, ವ್ಯಾಯಾಮ, ಸಮತೋಲನದ ಆಹಾರ, ಕುಟುಂಬ ಮತ್ತು ಸ್ನೇಹಿತರೊಂದಿಗೆ ಸಮಯ ಕಳೆಯುವಿಕೆ, ಸರಿಯಾದ ನಿದ್ರೆ, ಹೈಡ್ರೇಷನ್​ ಮತ್ತು ನಿಯಮಿತ ವಿರಾಮ ಮತ್ತು ರಜೆ ಪಡೆಯುವುದು ಅವಶ್ಯಕ. ಜೊತೆಗೆ ಸರಿಯಾದ ಸಮಯದಲ್ಲಿ ಮಾನಸಿಕ ಆರೋಗ್ಯ ವೃತ್ತಿಪರರ ಸಹಾಯ ಪಡೆಯುವುದು ಅವಶ್ಯ ಎಂದು ತಜ್ಞರು ಸಲಹೆ ನೀಡಿದ್ದಾರೆ. (ಐಎಎನ್​ಎಸ್​)

ಇದನ್ನೂ ಓದಿ: ಭೌತಿಕ ಬಳಕೆದಾರರಲ್ಲಿ ಬೇಸರ, ಒತ್ತಡಕ್ಕೆ ಕಾರಣವಾಗುವ ಸೋಷಿಯಲ್​ ಮೀಡಿಯಾ