ನವದೆಹಲಿ: 32 ವರ್ಷದ ಮಹಿಳೆಯೊಬ್ಬರ ಪಿತ್ತ ಕೋಶದಲ್ಲಿದ್ದ 1,500 ಕಲ್ಲುಗಳನ್ನು ಹೊರ ತೆಗೆಯುವಲ್ಲಿ ವೈದ್ಯರು ಯಶಸ್ವಿಯಾಗಿದ್ದಾರೆ.
ವೃತ್ತಿಯಲ್ಲಿ ಐಟಿ ಉದ್ಯೋಗಿಯಾಗಿದ್ದ ಮಹಿಳೆ ನಿಯಮಿತವಾಗಿ ಜಂಕ್ ಮತ್ತು ಕೊಬ್ಬಿನ ಆಹಾರವನ್ನು ಸೇವನೆ ಮಾಡುತ್ತಿದ್ದರು. ಪರಿಣಾಮವಾಗಿ ಅವರಿಗೆ ಉಬ್ಬರ, ಹಿಗ್ಗುವಿಕೆ, ಭಾರದಂತಹ ಸಮಸ್ಯೆ ಅನುಭವ ಆಗುತ್ತಿತ್ತು. ಈ ಸಮಸ್ಯೆ ತಗ್ಗಿಸಲು ಮಹಿಳೆ ಅಂಟಾಸಿಡ್ನಂತಹ ಮಾತ್ರೆಗಳನ್ನು ಕಳೆದ ಮೂರು ತಿಂಗಳಿನಿಂದ ನಿಯಮಿತವಾಗಿ ಸೇವಿಸಿದ್ದಾರೆ.
ಇದೇ ವೇಳೆ ಮಹಿಳೆ ತಮ್ಮ ಬಲ ಹೊಟ್ಟೆಯ ಮೇಲ್ಭಾಗದಲ್ಲಿ ಆಗಿಂದಾಗ್ಗೆ ನೋವಿನ ಸಮಸ್ಯೆ ಅನುಭವಿಸಿದ್ದಾರೆ. ಜೊತೆಗೆ ಬಲಭುಜ ಮತ್ತು ಬೆನ್ನಿನಲ್ಲಿ ಕೂಡ ನೋವು ಕಾಣಿಸಿಕೊಂಡಿದೆ. ಈ ನೋವು ಆಕೆಗೆ ತಲೆ ಸುತ್ತುವಿಕೆ ಸಮಸ್ಯೆ ಮತ್ತು ವಾಂತಿಗೆ ಕಾರಣವಾಗಿದೆ.
ಈ ಸಂದರ್ಭದಲ್ಲಿ ಮಹಿಳೆ ಕುಟುಂಬ ವೈದ್ಯರನ್ನು ಪರೀಕ್ಷಿಸಿದ್ದಾರೆ. ಅವರ ಸಲಹೆಯಂತೆ ಅಲ್ಟ್ರಾಸೌಂಡ್ಗೆ ಒಳಗಾದಾಗ ಆಕೆಯ ಪಿತ್ತಕೋಶದ ತುಂಬ ಕಲ್ಲಿರುವುದು ಪತ್ತೆಯಾಗಿದೆ.
ಸರ್ ಗಂಗಾ ರಾಮ್ ಆಸ್ಪತ್ರೆಯ ವೈದ್ಯರು ಸರ್ಜರಿ ಮೂಲಕ ಪಿತ್ತಕೋಶದ ಸರ್ಜರಿ ನಡೆಸಿ, ಕಲ್ಲನ್ನು ಹೊರ ತೆಗೆದಿದ್ದಾರೆ. ಆಕೆಯ ಹೊಟ್ಟೆಯಲ್ಲಿ 10 ಎಂಎಂ ಮತ್ತು 5 ಎಂಎಂ ರಂಧ್ರಗಳನ್ನು ಮಾಡಿ ಪಿತ್ತಕೋಶದಲ್ಲಿನ ಕಲ್ಲನ್ನು ಹೊರ ತೆಗೆದಿರುವುದಾಗಿ ಎಂದು ಸರ್ ಗಂಗಾ ರಾಮ್ ಆಸ್ಪತ್ರೆಯ ವೈದ್ಯ ಮನೀಷ್ ಕೆ ಗುಪ್ತಾ ತಿಳಿಸಿದ್ದಾರೆ.
