ತಮಿಳು ನಟ ವಿಜಯ್ ಸೇತುಪತಿ ತಮ್ಮ ಮುಂದಿನ 'ಮಹಾರಾಜ' ಸಿನಿಮಾವನ್ನು ಪ್ರಚಾರ ಮಾಡುವುದರಲ್ಲಿ ಸಖತ್ ಬ್ಯುಸಿಯಾಗಿದ್ದಾರೆ. ಚಿತ್ರದ ಪ್ರಮೋಶನ್ ವೇಳೆ, ಕಿರಿಯ ನಾಯಕಿಯರೊಂದಿಗೆ ಕೆಲಸ ಮಾಡುವ ನಾಯಕರ ದೃಷ್ಟಿಕೋನದ ಬಗ್ಗೆ ಸೇತುಪತಿಗೆ ಪ್ರಶ್ನೆ ಎದುರಾಯಿತು. ಈ ವಿಷಯವನ್ನು ಮುಂದುವರಿಸೋದನ್ನು ನಟ ನಯವಾಗಿ ನಿರಾಕರಿಸಿದರು. ನಾನು ಈ ಹಿಂದೆಯೇ ಈ ಬಗ್ಗೆ ಮಾತನಾಡಿದ್ದೇನೆ. 'ದಯವಿಟ್ಟು ಈ ವಿಷಯವನ್ನು ಬಿಡಿ' ಎಂದು ಮಾಧ್ಯಮದವರಿಗೆ ವಿನಂತಿ ಮಾಡಿದರು.
ಕೆಲ ದಿನಗಳ ಹಿಂದಿನ ಸಂದರ್ಶನವೊಂದರಲ್ಲಿ ವಿಜಯ್ ಸೇತುಪತಿ, 2021ರ ಉಪ್ಪೆನ್ನಾ ಚಿತ್ರದಲ್ಲಿ ಕೃತಿ ಶೆಟ್ಟಿ ಅವರೊಂದಿಗೆ ಕೆಲಸ ಮಾಡಿದ ಅನುಭವವನ್ನು ಉಲ್ಲೇಖಿಸಿ, ಈ ಮೇಲಿನ ವಿಷಯದ ಕುರಿತು ತಮ್ಮ ಆಲೋಚನೆಗಳನ್ನು ಹಂಚಿಕೊಂಡಿದ್ದರು. ಮತ್ತೊಂದು ಪ್ರಾಜೆಕ್ಟ್ನಲ್ಲಿ ಕೃತಿ ಶೆಟ್ಟಿಯನ್ನು ನಾಯಕಿಯಾಗಿ ಪರಿಗಣಿಸಲು ನಿರ್ದೇಶಕರೊಬ್ಬರು ನನ್ನನ್ನು ಸಂಪರ್ಕಿಸಿದ್ದರು. ಆದರೆ, ಆ ಆಫರ್ ಅನ್ನು ನಿರಾಕರಿಸಿದ್ದೆ ಎಂದು ತಿಳಿಸಿದರು.
ಆ ಚಿತ್ರದಲ್ಲಿ ಇವರು ತಂದೆ ಮಗಳ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಕ್ಲೈಮ್ಯಾಕ್ಸ್ ಸೀನ್ನಲ್ಲಿ ಗೊಂದಲಕ್ಕೊಳಗಾಗಿದ್ದ ಕೃತಿಗೆ ಪ್ರೋತ್ಸಾಹ ನೀಡಿದ್ದ ವಿಜಯ್, ನನ್ನನ್ನು ನಿನ್ನ ತಂದೆಯೆಂದು ಭಾವಿಸಿ, ಮುಕ್ತವಾಗಿ ಅಭಿನಯಿಸು ಎಂದು ಧೈರ್ಯ ತುಂಬಿದ್ದರು. ಉಪ್ಪೇನ್ನಾ ಚಿತ್ರೀಕರಣದ ವೇಳೆ ತಂದೆ ಮಗಳ ಪಾತ್ರವೆಂಬುದನ್ನು ತಿಳಿಯದ ಮತ್ತೋರ್ವ ನಿರ್ದೇಶಕರು ಈ ಆಫರ್ ಕೊಟ್ಟಿದ್ದರೆಂಬುದನ್ನೂ ಹಿಂದಿನ ಸಂದರ್ಶನದಲ್ಲಿ ಬಹಿರಂಗಪಡಿಸಿದ್ದರು.
ಯಾವ ನಾಯಕನೊಂದಿಗೆ ನಟಿಸಬೇಕು ಎಂಬ ನಿರ್ಧಾರವನ್ನು ನಟಿಮಣಿಯರೂ ತೆಗೆದುಕೊಳ್ಳುತ್ತಾರೆ. "ಅವರು (ಕೃತಿ) ನನ್ನೊಂದಿಗೆ ನಟಿಸಲು ಬಯಸುವುದಿಲ್ಲ ಎಂದು ಹೇಳಿದರೆ?, ಅವರು ಕೂಡ ಇಲ್ಲ ಎಂದು ಹೇಳಬಹುದು. ಒಮ್ಮೆ ಮಗಳಾಗಿ ನಟಿಸಿದ ಅವರು ಈ ಆಫರ್ ತಿರಸ್ಕರಿಸುತ್ತಿದ್ದರೇನೋ" ಎಂದು ವಿಜಯ್ ತಿಳಿಸಿದರು. ತಮ್ಮ ಪ್ರಮೋಶನಲ್ ಈವೆಂಟ್ನಲ್ಲಿ ಈ ವಿಷಯದ ಬಗ್ಗೆ ಈಗಾಗಲೇ ನನ್ನ ಅಭಿಪ್ರಾಯ ಹಂಚಿಕೊಂಡಿದ್ದೇನೆ. ಹಾಗಾಗಿ ಈ ಬಗ್ಗೆ ಹೆಚ್ಚು ಮಾತನಾಡುವುದಿಲ್ಲ ಎಂದು ಪ್ರತಿಕ್ರಿಯೆಗೆ ನಯವಾಗಿ ತಿರಸ್ಕರಿಸಿದರು.
ಇದನ್ನೂ ಓದಿ: 'ದೊಡ್ಡ ತಪ್ಪು': ಯಾತ್ರಾರ್ಥಿಗಳ ಮೇಲಿನ ಉಗ್ರರ ದಾಳಿಗೆ ಆಲಿಯಾ, ಅಟ್ಲೀ ಸೇರಿ ತಾರೆಯರ ಆಕ್ರೋಶ - Reasi Terror Attack
ಇನ್ನು ವಿಜಯ್, ಟಾಲಿವುಡ್ ಸೂಪರ್ ಸ್ಟಾರ್ ಪವನ್ ಕಲ್ಯಾಣ್ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಅವರನ್ನು ಆನ್ ಸ್ಕ್ರೀನ್, ಆಫ್ ಸ್ಕ್ರೀನ್ ಎರಡರಲ್ಲೂ 'ಮಾಸ್ ಹೀರೋ' ಎಂದು ಬಣ್ಣಿಸಿದರು. ಪವನ್ ಕಲ್ಯಾಣ್ ಅವರ ಜನಸೇನಾ ಪಕ್ಷದ ಸಾಧನೆ ಬಗ್ಗೆಯೂ ಶ್ಲಾಘಿಸಿದರು.
ಇದನ್ನೂ ಓದಿ: 'ಕಲ್ಕಿ 2898 ಎಡಿ' ಟ್ರೇಲರ್: 24 ಗಂಟೆಯೊಳಗೆ 13 ಮಿಲಿಯನ್ ವೀಕ್ಷಣೆ; ಹೊಸ ಪೋಸ್ಟರ್ ರಿಲೀಸ್ - Klaki 2898 AD
ವಿಜಯ್ ಸೇತುಪತಿ ತಮ್ಮ 50ನೇ ಚಿತ್ರ 'ಮಹಾರಾಜ' ಬಿಡುಗಡೆಗೆ ಎದುರು ನೋಡುತ್ತಿದ್ದಾರೆ. ನಿಥಿಲನ್ ಸಾಮಿನಾಥನ್ ನಿರ್ದೇಶನದ ಈ ಚಿತ್ರದಲ್ಲಿ ವಿಜಯ್ ಜೊತೆಗೆ ಅನುರಾಗ್ ಕಶ್ಯಪ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಜೂನ್ 14 ರಂದು ಬಿಡುಗಡೆ ಆಗಲಿರುವ ಈ ಚಿತ್ರದ ಬಗ್ಗೆ ಅಭಿಮಾನಿಗಳು ಸಾಕಷ್ಟು ನಿರೀಕ್ಷೆಗಳನ್ನು ಇಟ್ಟುಕೊಂಡಿದ್ದಾರೆ.
