ಸುದೀಪ್. ಚಂದನವನ ಮಾತ್ರವಲ್ಲ, ಭಾರತೀಯ ಚಿತ್ರರಂಗದಲ್ಲೇ ವಿಭಿನ್ನ ಸ್ಟಾರ್ಡಮ್ ಹೊಂದಿರುವ ಸೂಪರ್ ಸ್ಟಾರ್. ಅಭಿನಯ ಚಕ್ರವರ್ತಿ ಎಂಬ ಬಿರುದೇ ಸಾಕು ಇವರ ಮುನ್ನುಡಿಗೆ. ಕರುನಾಡಿನಲ್ಲಿ ಮನೆ ಮನೆ ಮಾತಾಗಿರುವ ಇವರ ವರ್ಚಸ್ಸು ವರ್ಣನಾತೀತ. ಅಭಿಮಾನಿ ಬಳಗ ಕೂಡಾ ಲೆಕ್ಕಕ್ಕೆ ಸಿಗದಷ್ಟಿದೆ. ಹೀಗೆ, ತಮ್ಮ ನಡೆ, ನುಡಿ, ನಟನಾ ಪ್ರತಿಭೆ ಮೂಲಕ ಸದಾ ಚರ್ಚೆಯ ವಿಷಯವಾಗಿರುವ ಕಿಚ್ಚ ಸುದೀಪ್ ಚಿತ್ರರಂಗ ಪ್ರವೇಶಿಸಿ 29 ವರ್ಷಗಳಾಗಿವೆ. ಈ ಹಿನ್ನೆಲೆಯಲ್ಲಿ ಸೋಷಿಯಲ್ ಮೀಡಿಯಾದಲ್ಲಿ ಮನದುಂಬಿ ಮಾತನಾಡಿದ್ದಾರೆ.
ಕಿಚ್ಚ ಸುದೀಪ್ ಎಕ್ಸ್‌ ಪೋಸ್ಟ್‌: ''29 ವರ್ಷಗಳು, ನನ್ನೀ ಪ್ರಯಾಣಕ್ಕೆ ಕೃತಜ್ಞನಾಗಿದ್ದೇನೆ. ಪ್ರೇಕ್ಷಕರನ್ನು ಮನರಂಜಿಸುವುದು ಮತ್ತು ಅನೇಕರೊಂದಿಗೆ ಪ್ರತಿಧ್ವನಿಸುವ ಕಥೆಗಳನ್ನು ಹಂಚಿಕೊಳ್ಳುವುದು ಒಂದು ಗೌರವಕರ ಕ್ಷಣ. ನಿಮ್ಮೆಲ್ಲರಿಂದ ನನಗೆ ದೊರೆತ ಪ್ರೀತಿ ಮತ್ತು ಬೆಂಬಲವು ನಿರಂತರ ಪ್ರೇರಣೆಯ ಮೂಲ. ನನ್ನ ಕೆಲಸ ಅಂಥ ಸಮರ್ಪಿತ ಅಭಿಮಾನಿಗಳನ್ನು ಹೊಂದಿರುವುದು ನಿಜವಾಗಿಯೂ ಸೌಭಾಗ್ಯ. ನಿಮ್ಮ ಅಚಲ ಪ್ರೋತ್ಸಾಹ ಪ್ರತೀ ಸವಾಲನ್ನು ಸಾರ್ಥಕಗೊಳಿಸಿದೆ. ಅದು ನನಗೆ ಎಷ್ಟು ಅರ್ಥಪೂರ್ಣ ಎಂಬುದನ್ನು ವ್ಯಕ್ತಪಡಿಸಲು ಪದಗಳಿಲ್ಲ. ಈ ಅದ್ಭುತ ಪ್ರಯಾಣದ ಭಾಗವಾಗಿದ್ದಕ್ಕಾಗಿ ಹೃದಯತುಂಬಿ "ಧನ್ಯವಾದಗಳು" ಎಂದು ನಾನು ಹೇಳಬಲ್ಲೆ'' ಎಂದು ಸುದೀಪ್ ಬರೆದುಕೊಂಡಿದ್ದಾರೆ.
29 years,,,
— Kichcha Sudeepa (@KicchaSudeep) January 31, 2025
I feel an immense sense of gratitude for the journey I've experienced. It's been an honor to entertain audiences and share stories that resonate with so many. The love and support I have received from all of you have been a constant source of motivation, and I am…
ಏರಿಳಿತ ಕಂಡೇ ಶಿಖರ ಏರಿದ ಪ್ರತಿಭೆ: 1996ರ ಜನವರಿ 31ರಂದು ಕಂಠೀರವ ಸ್ಟುಡಿಯೋದಲ್ಲಿ 'ಬ್ರಹ್ಮ' ಸಿನಿಮಾ ಮೂಲಕ ಸುದೀಪ್ ಸಿನಿಪಯಣ ಶುರುವಾಯಿತು. ಬ್ರಹ್ಮ ಸಿನಿಮಾದಲ್ಲಿ ಕೆಲಸ ಮಾಡಿದ್ರೂ ಆ ಪ್ರಾಜೆಕ್ಟ್ ಪೂರ್ಣಗೊಳ್ಳಲಿಲ್ಲ. ನಂತರ ತಾಯವ್ವ ಸಿನಿಮಾ ಬಿಡುಗಡೆ ಆಯಿತು. ಇನ್ನೊಂದು ವರ್ಷ ಕಳೆದರೆ ಸುದೀಪ್ ಸಿನಿರಂಗದಲ್ಲಿ 3 ದಶಕ ಪೂರೈಸಲಿದ್ದಾರೆ. ಇವರ ಸಿನಿಪಯಣವೇನೂ ಅಷ್ಟು ಸುಲಭವಿರಲಿಲ್ಲ. ಏರಿಳಿತ ಕಂಡೇ ಶಿಖರ ಏರಿದ ಪ್ರತಿಭೆ. ತಮ್ಮ ಅಮೋಘ ಅಭಿನಯ, ವಾಕ್ಚಾತುರ್ಯ, ಸಮಾಜ ಸೇವೆ, ವರ್ಚಸ್ಸಿನಿಂದ ಕೋಟ್ಯಂತರ ಕಟ್ಟಾ ಅಭಿಮಾನಿಗಳನ್ನು ಸಂಪಾದಿಸುವಲ್ಲಿ ಯಶಸ್ವಿ ಆಗಿದ್ದಾರೆ ಕಿಚ್ಚ.
ನಟನೆ ಮಾತ್ರವಲ್ಲ....: ಭಾರತೀಯ ಚಿತ್ರರಂಗದಲ್ಲಿ ಬಹುಬೇಡಿಕೆ ನಟನಾಗಿ ಮಾತ್ರವಲ್ಲದೇ ನಿರ್ದೇಶಕ, ನಿರ್ಮಾಪಕ, ಸ್ಕ್ರೀನ್ರೈಟರ್, ನಿರೂಪಕ, ಗಾಯಕನಾಗಿಯೂ ಗುರುತಿಸಿಕೊಂಡಿದ್ದಾರೆ. ಬ್ಲಾಕ್ಬಸ್ಟರ್ ಸಿನಿಮಾಗಳ ಜೊತೆಗೆ ಬಿಗ್ ಬಾಸ್ ಸಾರಥಿ ಎಂದೇ ಜನಪ್ರಿಯರಾಗಿದ್ದಾರೆ. 29 ವರ್ಷಗಳಿಂದ ಕನ್ನಡ ಚಿತ್ರರಂಗಕ್ಕೆ ಸೇವೆ ಒದಗಿಸುತ್ತಾ ಬಂದಿರುವ ಅಭಿನಯ ಚಕ್ರವರ್ತಿ ಹಿಂದಿ, ತೆಲುಗು, ತಮಿಳು ಸಿನಿಮಾಗಳಲ್ಲಿಯೂ ನಟಿಸುವ ಮೂಲಕ ಭಾರತೀಯ ಚಿತ್ರರಂಗದಾದ್ಯಂತ ಸದ್ದು ಮಾಡಿದ್ದಾರೆ.
ಸಿನಿಪಯಣ: 1997ರಲ್ಲಿ ತಾಯವ್ವ ಸಿನಿಮಾ ಮೂಲಕ ಸಿನಿಪಯಣ ಆರಂಭಿಸಿದ ಸುದೀಪ್ ನಂತರ ಸ್ಪರ್ಶ ಸಿನಿಮಾದಲ್ಲಿ ಕೆಲಸ ಮಾಡಿದ್ರು. 2001ರಲ್ಲಿ ಬಂದ ಹುಚ್ಚ ಸಿನಿಮಾ ಕಿಚ್ಚನ ವೃತ್ತಿಜೀವನದಲ್ಲೇ ದೊಡ್ಡ ಮೈಲಿಗಲ್ಲಾಯಿತು. ನಂತರ ನಟ ಹಿಂತಿರುಗಿ ನೋಡಲೇ ಇಲ್ಲ. ನಂದಿ, ಕಿಚ್ಚ, ಸ್ವಾತಿ ಮುತ್ತು, ಮೈ ಆಟೋಗ್ರಾಫ್, ಶಾಂತಿ ನಿವಾಸ, ಮುಸ್ಸಂಜೆ ಮಾತು, ವೀರ ಮದಕರಿ, ಜಸ್ಟ್ ಮಾತ್ ಮಾತಲ್ಲಿ, ವಿಷ್ಣುವರ್ಧನ, ಕೆಂಪೇಗೌಡ, ಈಗ, ಮಾಣಿಕ್ಯ, ರನ್ನ, ಕೋಟಿಗೊಬ್ಬ 2, ಹೆಬ್ಬುಲಿ, ದಿ ವಿಲೆನ್, ವಿಕ್ರಾಂತ್ ರೋಣ ಹೀಗೆ ಹಲವು ಚಿತ್ರಗಳಲ್ಲಿ ಕೆಲಸ ಮಾಡಿದ್ದಾರೆ. ಕೊನೆಯದಾಗಿ, 2024ರ ಡಿಸೆಂಬರ್ನಲ್ಲಿ ಬಿಡುಗಡೆ ಆದ 'ಮ್ಯಾಕ್ಸ್' ಸೂಪರ್ ಹಿಟ್ ಆಗಿದ್ದು, ನಟನ ಮುಂದಿನ ಚಿತ್ರಕ್ಕಾಗಿ ಅಭಿಮಾನಿಗಳು ಕಾತರರಾಗಿದ್ದಾರೆ.
ಇದನ್ನೂ ಓದಿ: ವಿದ್ಯಾಭ್ಯಾಸಕ್ಕೆ ಅಡ್ಡಿಯಾಯ್ತು ಬಡತನ, ಅದೃಷ್ಟ ಬದಲಿಸಿತು ಕುಂಭಮೇಳ: ಬಾಲಿವುಡ್‌ಗೆ 'ಮೊನಾಲಿಸಾ' ಎಂಟ್ರಿ
ಸಮಾಜ ಸೇವೆ: ಸುದೀಪ್ ಸಿನಿಮಾ ಮಾತ್ರವಲ್ಲದೇ ತಮ್ಮ ಸಮಾಜಸೇವೆಯಿಂದಲೂ ಗುರುತಿಸಿಕೊಂಡಿದ್ದಾರೆ. ತಮ್ಮ ಕಿಚ್ಚ ಸುದೀಪ ಚಾರಿಟೇಬಲ್ ಸೊಸೈಟಿ ಮೂಲಕ ಪರೋಪಕಾರಿ ಚಟುವಟಿಕೆಗಳಲ್ಲಿ ತೊಡಗಿಸಿಕೊಂಡಿದ್ದಾರೆ. ಈ ಟ್ರಸ್ಟ್, ಬಡ ಶಾಲಾ ಮಕ್ಕಳಿಗೆ ಸಮವಸ್ತ್ರ ಮತ್ತು ವಿದ್ಯಾರ್ಥಿವೇತನವನ್ನು ನೀಡುವ ಮೂಲಕ ಸಹಾಯ ಮಾಡುತ್ತದೆ. ಕೋವಿಡ್ ಸಂದರ್ಭ ಹಿರಿಯ ಕನ್ನಡ ಚಲನಚಿತ್ರ ಕಲಾವಿದರು, ತಂತ್ರಜ್ಞರು ಮತ್ತು ಇತರರಿಗೆ ಅಗತ್ಯ ಸಹಾಯವನ್ನು ನೀಡಿತ್ತು. ಅಗತ್ಯವಿರುವವರಿಗೆ ಈ ಸಂಸ್ಥೆ ಸಹಾಯ ಹಸ್ತ ಚಾಚುತ್ತಾ ಬಂದಿದೆ.
ಇದನ್ನೂ ಓದಿ: ಕ್ಯಾನ್ಸರ್‌ ಗೆದ್ದು ಬಾಸ್‌ನಂತೆ ಕಿರುತೆರೆಯಲ್ಲಿ ಕಾಣಿಸಿಕೊಂಡ ಶಿವಣ್ಣ; 'ಮಹಾ ಮನರಂಜನೆ'ಗೆ ನೀವು ರೆಡಿಯಾಗಿ!
ಬಿಗ್ ಬಾಸ್ ಸಾರಥಿ: ಸುದೀಪ್ ಅಂದಾಕ್ಷಣ ಬಹುತೇಕರ ತಲೆಗೆ ಮೊದಲು ಬರೋದು ಬಿಗ್ ಬಾಸ್. ಸತತ 11 ಸೀಸನ್ಗಳನ್ನು ನಡೆಸಿಕೊಟ್ಟಿದ್ದಾರೆ. ಈ ರಿಯಾಲಿಟಿ ಶೋನ ಜನಪ್ರಿಯತೆಗೆ ಸುದೀಪ್ ಅವರ ಪಾಲು ದೊಡ್ಡದಿದೆ. ತಮ್ಮ ನಿರೂಪಣಾ ಶೈಲಿ, ವಾಕ್ಚಾತುರ್ಯದಿಂದ ಸಖತ್ ಹೈಲೆಟ್ ಆಗಿದ್ದಾರೆ. ಆದ್ರೆ ಇದು ನನ್ನ ಕೊನೆ ಸೀಸನ್ ಎಂದು ಸುದೀಪ್ ಘೋಷಿಸಿರೋದು ಅಭಿಮಾನಿಗಳಲ್ಲಿ ಬೇಸರ ಮೂಡಿಸಿದೆ. ಪ್ರೇಕ್ಷಕರಿಗಾಗಿ ಕಿಚ್ಚ ತಮ್ಮ ನಿರ್ಧಾರ ಬದಲಿಸಿಕೊಳ್ಳುತ್ತಾರಾ ಅನ್ನೋದನ್ನು ಕಾದು ನೋಡಬೇಕಿದೆ.
