ಸಮಂತಾ ರುತ್ ಪ್ರಭು, ದಕ್ಷಿಣ ಚಿತ್ರರಂಗದ ಖ್ಯಾತ ನಟಿಯರಲ್ಲೊಬ್ಬರು ಕೊನೆಯದಾಗಿ, ಖುಷಿ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. 2023ರ ಸೆಪ್ಟೆಂಬರ್ 1ರಂದು ತೆರೆಕಂಡ ಈ ಚಿತ್ರ ಯಶಸ್ವಿ ಆಗಿತ್ತು. ಅದಾದ ಬಳಿಕ ನಟಿಯ ಯಾವುದೇ ಚಿತ್ರಗಳು ಬಿಡುಗಡೆ ಆಗಿಲ್ಲ. ಹೊಸ ಸಿನಿಮಾಗಳು ಕೂಡ ಘೋಷಣೆಯಾಗಿಲ್ಲ.
ಮಯೋಸಿಟಿಸ್ ಹಿನ್ನೆಲೆ, ವಿರಾಮದಲ್ಲಿದ್ದ ಸಮಂತಾ ರುತ್ ಪ್ರಭು ಶೀಘ್ರದಲ್ಲೇ ಸಿನಿಮಾ ಪ್ರಾರಂಭಿಸಲಿದ್ದು, ಸದ್ಯ ಪಾಡ್ಕಾಸ್ಟ್ ಮೂಲಕ ತಮ್ಮ ಕೆಲಸ ಆರಂಭಿಸಿದ್ದಾರೆ. ಇತ್ತೀಚೆಗೆ ಕಾಲೇಜಿನಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ನಟಿ ತಮ್ಮ ಸಿನಿಪಯಣ ಮೆಲುಕುಹಾಕಿದರು. ಈ ವೇಳೆ, ನಟಿಯ ರೋಲ್ ಮಾಡೆಲ್ ಬಗ್ಗೆ ಕೇಳಲಾಯಿತು. ಈ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಸಮಂತಾ, ಅಲ್ಲು ಅರ್ಜುನ್ ನನ್ನ ಸ್ಫೂರ್ತಿಯ ಮೂಲ ಎಂಬುದಾಗಿ ಬಹಿರಂಗಪಡಿಸಿದರು. ತೆರೆ ಮೇಲಿನ ಅವರ ಬಹುಮುಖ ಪ್ರತಿಭೆ ಮತ್ತು ಕಲೆ ಮೇಲೆ ಅವರ ಸಮರ್ಪಣೆಯನ್ನು ನಟಿ ಶ್ಲಾಘಿಸಿದರು.
ಈ ಹಿಂದೆ ಸಮಂತಾ, ಅಲ್ಲು ಅರ್ಜುನ್ ಜೊತೆ ಎರಡು ಬಾರಿ ಕಾಣಿಸಿಕೊಂಡಿದ್ದಾರೆ. 2015ರ ಸನ್ ಆಫ್ ಸತ್ಯಮೂರ್ತಿ ಮತ್ತು ಇತ್ತೀಚಿನ ಬ್ಲಾಕ್‌ಬಸ್ಟರ್ ಸಿನಿಮಾ ಪುಷ್ಪ: ದಿ ರೈಸ್‌ನ ಪಾಪ್ಯುಲರ್ ಸಾಂಗ್ ಊ ಅಂಟಾವದಲ್ಲಿ ಕಾಣಿಸಿಕೊಂಡಿದ್ದರು. ವೈವಿಧ್ಯಮಯ ಪಾತ್ರಗಳಿಗೆ ಜೀವ ತುಂಬುವ ನಟನ ನಟನಾ ಸಾಮರ್ಥ್ಯವನ್ನು ಸಮಂತಾ ಕೊಂಡಾಡಿದ್ದಾರೆ. ಅಲ್ಲು ಅರ್ಜುನ್ನನ್ನು "acting beast'' ಎಂದು ಉಲ್ಲೇಖಿಸಿದ್ದಾರೆ. ತಮ್ಮ ವೃತ್ತಿಜೀವನದಲ್ಲಿ ಮಾರ್ಗದರ್ಶನಕ್ಕಾಗಿ ಅಲ್ಲು ಅರ್ಜುನ್ ಕಡೆ ನೋಡುವುದಾಗಿ ಬಹಿರಂಗಪಡಿಸಿದ್ದಾರೆ.
ಈ ಕಾರ್ಯಕ್ರಮದಲ್ಲಿ ಅಲ್ಲು ಅರ್ಜುನ್ ಮೇಲಿನ ಅಭಿಮಾನವನ್ನು ಒಪ್ಪಿಕೊಂಡಿದ್ದು ಮಾತ್ರವಲ್ಲದೇ, ವೃತ್ತಿಪರ ಮತ್ತು ವೈಯಕ್ತಿಕ ಜೀವನದಲ್ಲಿ ಎದುರಿಸಿದ ಸವಾಲುಗಳ ಬಗ್ಗೆಯೂ ದನಿ ಎತ್ತಿದ್ದಾರೆ. ವೈಯಕ್ತಿಕ ಜೀವನದಲ್ಲಿ ಹೆಚ್ಚು ಸವಾಲುಗಳೆದುರಾದವು ಎಂಬುದನ್ನು ಒಪ್ಪಿಕೊಂಡರು. ಮಯೋಸಿಟಿಸ್ ಜೊತೆ ಹೋರಾಟ, ಆ ಕಾಯಿಲೆ ಸ್ನಾಯುಗಳ ಮೇಲೆ ಬೀರಿದ ಪರಿಣಾಮವನ್ನು ಬಹಿರಂಗಪಡಿಸಿದರು. ಇದೇ ಸಂದರ್ಭ ಮಾನಸಿಕ ಮತ್ತು ದೈಹಿಕ ಯೋಗಕ್ಷೇಮವನ್ನು ಕಾಪಾಡಿಕೊಳ್ಳುವುದರ ಪ್ರಾಮುಖ್ಯತೆಯನ್ನು ಒತ್ತಿಹೇಳಿದರು. ನಟಿ ಆಗಾಗ್ಗೆ ಫಿಟ್ನೆಸ್ ಮತ್ತು ಮಾನಸಿಕ ಆರೋಗ್ಯಕ್ಕೆ ಸಂಬಂಧಿಸಿದಂತೆ ಸೋಷಿಯಲ್ ಮೀಡಿಯಾದಲ್ಲಿ ಸಲಹೆಗಳನ್ನು ಹಂಚಿಕೊಳ್ಳುತ್ತಿರುತ್ತಾರೆ.
ಇದನ್ನೂ ಓದಿ: ರಾಜಮೌಳಿ ಸಿನಿಮಾ: 8 ವಿಭಿನ್ನ ನೋಟದಲ್ಲಿ ಮಹೇಶ್ ಬಾಬು; ವಿದೇಶದಲ್ಲಿ ನಡೆಯಲಿದೆ ಚಿತ್ರೀಕರಣ?!
ಇತ್ತೀಚೆಗೆ, ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ 'ಟೇಕ್ 20' ಎಂಬ ಪಾಡ್ಕಾಸ್ಟ್ ಸೀರಿಸ್ ಲಾಂಚ್ ಮಾಡಿದ್ದಾರೆ. ಇದು ಮಾನಸಿಕ ಆರೋಗ್ಯ ಮತ್ತು ಫಿಟ್ನೆಸ್ ಸಂಬಂಧಿಸಿದ ವಿಷಯಗಳನ್ನು ಒಳಗೊಂಡಿರುತ್ತದೆ. ಮುಂದೆ ಸಿಟಾಡೆಲ್‌ ಸೀರಿಸ್ನಲ್ಲಿ ಬಾಲಿವುಡ್ ನಟ ವರುಣ್ ಧವನ್ ಜೊತೆ ಕಾಣಿಸಿಕೊಳ್ಳಲಿದ್ದಾರೆ.
ಇದನ್ನೂ ಓದಿ: ಕಮಲ್ ಹಾಸನ್ರ 'ಥಗ್ ಲೈಫ್‌'ನಿಂದ ಹೊರಬಂದ ದುಲ್ಕರ್ ಸಲ್ಮಾನ್!
