ಮಹಿಳಾ ಪ್ರೀಮಿಯರ್ ಲೀಗ್‌ ಅಂತಿಮ ಘಟ್ಟ ತಲುಪಿದೆ. ಕ್ರಿಕೆಟ್ ಪ್ರೇಮಿಗಳಿಗೆ, ಸೋಷಿಯಲ್ ಮೀಡಿಯಾ ಬಳಕೆದಾರರಿಗೆ 'ಡಬ್ಲ್ಯುಪಿಎಲ್' ವಿಡಿಯೋ ತುಣುಕುಗಳು ಭರಪೂರ ಮನರಂಜನೆ ಕೊಡುತ್ತಿವೆ. ಇದರ ಜೊತೆಗೆ ಐಪಿಎಲ್ ಜ್ವರ ಕೂಡಾ ಶುರುವಾಗಿದೆ. ಎಂದಿನಂತೆ ಆರ್ಸಿಬಿ ಅಭಿಮಾನಿಗಳು ಸಖತ್ ಜೋಶ್ನಲ್ಲಿದ್ದಾರೆ. 'ಈ ಬಾರಿ ಕಪ್ ನಮ್ದೆ' ಅನ್ನೋ ಟಾಪ್ ಡೈಲಾಗ್ ಆರ್ಸಿಬಿ ಫ್ಯಾನ್ಸ್ ಕಡೆಯಿಂದ ಬರುತ್ತಿದೆ. ಐಪಿಎಲ್ಗೆ ಬಿರುಸಿನ ತಯಾರಿ ನಡೆಯುತ್ತಿದ್ದು, ಅಭಿಮಾನಿಗಳು ಕಾತರರಾಗಿದ್ದಾರೆ. ಐಪಿಎಲ್ ಅಬ್ಬರಕ್ಕೆ ಕೆಲ ದಿನಗಳಷ್ಟೇ ಬಾಕಿ ಇದ್ದು, ಆರ್ಸಿಬಿ ಕೋಣಗಳೊಂದಿಗೆ ಕಾಂತಾರದ ಶಿವ ಬಂದಿದ್ದಾರೆ.
ನಟ-ನಿರ್ದೇಶಕ ರಿಷಬ್ ಶೆಟ್ಟಿ ಅವರ ವಿಶೇಷ ವಿಡಿಯೋವನ್ನು ಆರ್ಸಿಬಿ ತನ್ನ ಅಧಿಕೃತ ಸೋಷಿಯಲ್ ಮೀಡಿಯಾ ಖಾತೆಗಳಲ್ಲಿ ಹಂಚಿಕೊಂಡಿದೆ. ಪೋಸ್ಟ್ಗೆ, 'ರಿಷಬ್ ಶೆಟ್ಟಿ ಎನ್ ಹೇಳ್ತಿದ್ದಾರೆ ಅರ್ಥ ಆಯ್ತಾ?' ಎಂಬ ಕುತೂಹಲಕಾರಿ ಕ್ಯಾಪ್ಷನ್ ಕೊಟ್ಟಿದೆ. ರಿಷಬ್ ಕೂಡ ಇದೇ ವಿಡಿಯೋ ಹಂಚಿಕೊಂಡಿದ್ದು, 'ನಿಮ್ಗೆ ಅರ್ಥ ಆಯ್ತಾ???' ಎಂದು ಬರೆದುಕೊಂಡಿದ್ದಾರೆ.
ವಿಡಿಯೋದಲ್ಲಿ ರಿಷಬ್ ತಮ್ಮ ಬ್ಲಾಕ್ಬಸ್ಟರ್ ಸಿನಿಮಾ 'ಕಾಂತಾರ'ದ ಶಿವನ ಅವತಾರದಲ್ಲಿ ಕಾಣಿಸಿಕೊಂಡಿದ್ದಾರೆ. ಶಿವನ ಎಂಟ್ರಿಯಾಗುತ್ತಿದ್ದಂತೆ, ಮೂರು ಕೋಣಗಳು ಕಾಣಿಸಿಕೊಂಡಿವೆ. ಮೊದಲ ಕೋಣದ ಮೇಲೆ ಹೊದಿಸಿರುವ ಕೆಂಪು ಬಟ್ಟೆಯಲ್ಲಿ ರಾಯಲ್ ಎಂದು ಬರೆಯಲಾಗಿದೆ. ಎರಡನೇ ಕೋಣದ ಮೇಲೆ ಚಾಲೆಂಜರ್ಸ್ ಎಂದು ಬರೆಯಲಾಗಿದೆ. ಮೂರನೇ ಕೋಣದ ಮೇಲೆ ಬ್ಯಾಂಗಲೂರ್ ಎಂದು ಬರೆದಿದೆ. ಬ್ಯಾಂಗಲೂರ್ ಎಂದು ಬರೆದಿರುವ ಮೂರನೇ ಕೋಣವನ್ನು ಕಂಡ ರಿಷಬ್, ಭಟ್ರೆ ಇದು ಚೆನ್ನಾಗಿಲ್ಲ. ತೆಗೆದುಕೊಂಡು ಹೋಗಿ ಎಂದು ಹೇಳುತ್ತಾರೆ. ಆ ತಕ್ಷಣ, ಬ್ಯಾಂಗಲೂರ್ ಎಂದು ಬರೆದಿರುವ ಕೋಣವನ್ನು ಅಲ್ಲಿಂದ ಕರೆದುಕೊಂಡು ಹೋಗಲಾಗುತ್ತದೆ. ಆಗ ರಿಷಬ್, ಅರ್ಥವಾಯ್ತಾ? ಎಂದು ಕೇಳಿದ್ದಾರೆ.
ಇದನ್ನೂ ಓದಿ: ಸಂದೀಪ್ ರೆಡ್ಡಿ ವಂಗಾ ನಿರ್ದೇಶನದ 'ಅನಿಮಲ್' ವೀಕ್ಷಿಸಲಿಚ್ಛಿಸಿದ ಕಿರಣ್ ರಾವ್
ಈ ವಿಡಿಯೋ ಹಲವರ ತಲೆಗೆ ಹುಳ ಬಿಟ್ಟಂತಾಗಿದೆ. ಏನಿದರ ಅರ್ಥ ಎಂದು ನೆಟ್ಟಿಗರು ತಲೆ ಕೆಡಿಸಿಕೊಳ್ಳುತ್ತಿದ್ದಾರೆ. ಬ್ಯಾಂಗಲೂರ್ ಬದಲಿಗೆ ಬೆಂಗಳೂರು ಎಂದು ಬಳಸುವ ಯೋಚನೆ ಇದೆ. ಅದನ್ನೇ ಈ ವಿಡಿಯೋ ಮೂಲಕ ರಿಷಬ್ ಶೆಟ್ಟಿ ತಿಳಿಸಿದ್ದಾರೆ ಅನ್ನೋದು ಹಲವರ ಅಭಿಪ್ರಾಯ.
ಇದನ್ನೂ ಓದಿ: 'ಬ್ಲಿಂಕ್' ಸಿನಿಮಾಗೆ ಶಿವರಾಜ್ಕುಮಾರ್ ಸಪೋರ್ಟ್; ಹೊಸ ತಂಡಗಳ ಬೆನ್ನು ತಟ್ಟಬೇಕೆಂದ ನಟ
ಇದೇ ಮಾರ್ಚ್ 19ಕ್ಕೆ ಆರ್ಸಿಬಿ ಅನ್ಬಾಕ್ಸ್ ಈವೆಂಟ್ ಜರುಗಲಿದೆ. ಕಾರ್ಯಕ್ರಮದಲ್ಲಿ ಹೆಚ್ಚಿನ ಮಾಹಿತಿ ಸಿಗಲಿದೆ ಅನ್ನೋ ಸುಳಿವನ್ನು ಈ ವಿಡಿಯೋ ಬಿಟ್ಟುಕೊಟ್ಟಿದೆ. ಬೆಂಗಳೂರಿನಲ್ಲಿ ಆರ್ಸಿಬಿ ಅನ್ಬಾಕ್ಸ್ ಈವೆಂಟ್ ನಡೆಯಲಿದ್ದು, ಹೆಚ್ಚಿನ ಸಂಖ್ಯೆಯ ಅಭಿಮಾನಿಗಳು ಭಾಗಿಯಾಗೋ ನಿರೀಕ್ಷೆ ಇದೆ. ಸದ್ಯ ಜನಪ್ರಿಯ ನಟ ರಿಷಬ್ ಶೆಟ್ಟಿ ಅವರ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಜಾಗ ಗಿಟ್ಟಿಸಿಕೊಂಡಿದೆ.
