ಹೈದರಾಬಾದ್: ಕಳೆದ ಮೂರು ದಶಕದಿಂದ ಜನರನ್ನು ಮನರಂಜಿಸುತ್ತಿರುವ ನಟ ಅಕ್ಷಯ್ ಕುಮಾರ್, ಹಲವು ಬಿಗ್ ಹಿಟ್ ಸಿನಿಮಾಗಳನ್ನು ನೀಡಿದ್ದಾರೆ. ಆದರೆ, ಇತ್ತೀಚಿನ ದಿನಗಳಲ್ಲಿ ಅವರ ಸಿನಿಮಾಗಳು ಹೇಳಿಕೊಳ್ಳುವಂತ ಬಿಗ್ ಹಿಟ್ ನೀಡಿಲ್ಲ. ಇತ್ತೀಚಿಗೆ ತೆರೆ ಕಂಡ 'ಬಡೇ ಮಿಯಾ ಚೋಟೆ ಮಿಯಾ', 'ಮಿಷನ್ ರಾಣಿಗಂಜ್' ಮತ್ತು 'ಸೆಲ್ಫಿ' ಪ್ರೇಕ್ಷಕರನ್ನು ಸೆಳೆಯುವಲ್ಲಿ ವಿಫಲವಾಗಿದ್ದು, ಗಲ್ಲಾಪೆಟ್ಟಿಗೆಯಲ್ಲೂ ಸದ್ದು ಮಾಡಿಲ್ಲ. ಆದರೆ, ಇದೀಗ ತಮ್ಮದೇ ಸಂಸ್ಥೆ ಮೂಲಕ ಮತ್ತೊಂದು ಸಿನಿಮಾ ಮೂಲಕ ಬೆಳ್ಳಿ ತೆರೆ ಮೇಲೆ ಬರಲು ಅಕ್ಷಯ್ ಕುಮಾರ್ ಮುಂದಾಗಿದ್ದಾರೆ. ಹಲವು ನಿರೀಕ್ಷೆ ಹೊತ್ತು ಬರುತ್ತಿರುವ ಅಕ್ಷಯ್ ಹೊಸ ಸಿನಿಮಾ 'ಸರ್ಫಿರಾ' ಬಿಗ್ ಹಿಟ್ ಆಗುವ ನಿರೀಕ್ಷೆ ಹೊಂದಿದ್ದಾರೆ.
ತಮಿಳಿನಲ್ಲಿ ನಟ ಸೂರ್ಯ ನಟಿಸಿದ್ದ 'ಸೂರರೈ ಪೊಟ್ರು' ಸಿನಿಮಾದ ರಿಮೇಕ್ ಸರ್ಫಿರಾ ಆಗಿದೆ. ಈ ಚಿತ್ರ ಇದೇ ಜುಲೈ 12ಕ್ಕೆ ಬಿಡುಗಡೆಯಾಗುತ್ತಿದೆ. ಇದೇ ದಿನ ಕಮಲ್ ಹಾಸನ್ ಅಭಿನಯದ ಬಹು ನಿರೀಕ್ಷಿತ ಸಿನಿಮಾ 'ಇಂಡಿಯನ್ 2' ಕೂಡ ಬಿಡುಗಡೆಯಾಗುತ್ತಿದೆ. ಈ ಮೂಲಕ ಇಬ್ಬರು ಸೂಪರ್ ಸ್ಟಾರ್ಗಳ ಸಿನಿಮಾಗಳು ಮುಖಾಮುಖಿಯಾಗಲಿದೆ.
ಬುಧವಾರ 'ಸರ್ಫಿರಾ' ಚಿತ್ರದ ಪೋಸ್ಟರ್ ಅನ್ನು ನಟ ಅಕ್ಷಯ್ ಕುಮಾರ್ ಹಂಚಿಕೊಂಡಿದ್ದು, ಸಿನಿಮಾದ ಅಡ್ವಾನ್ಸ್ ಬುಕ್ಕಿಂಗ್ ಆರಂಭವಾಗಿರುವುದಾಗಿ ತಿಳಿಸಿದ್ದಾರೆ. ಹುಚ್ಚು ಕನಸೊಂದು ದೊಡ್ಡ ಪರದೆ ಮೇಲೆ ಹಾರುವ ಸಮಯವಿದು. ಅಡ್ವಾನ್ಸ್ ಬುಕ್ಕಿಂಗ್ ತೆರೆದಿದೆ ಎಂದು ಅಡಿಬರಹದ ಮೂಲಕ ಪೋಸ್ಟ್ ಹಂಚಿಕೊಂಡಿರುವ ನಟ, ಶುಕ್ರವಾರ ಸರ್ಫಿರಾ ತೆರೆ ಕಾಣಲಿದೆ ಎಂದಿದ್ದಾರೆ.
ಕಡಿಮೆ ವೆಚ್ಚದಲ್ಲಿ ವಿಮಾನ ಯಾನ ಸ್ಥಾಪಿಸಿ, ಭಾರತೀಯ ವಿಮಾನಯಾನದಲ್ಲೇ ಹೊಸ ಕ್ರಾಂತಿಕಾರಕ ಹೆಜ್ಜೆ ಇಟ್ಟ ಕನ್ನಡಿಗ ಕ್ಯಾಪ್ಟನ್ ಗೋಪಿನಾಥನ್ ಕಥೆ ಚಿತ್ರ ಹೊಂದಿದೆ.
ಹಿಂದಿಯಲ್ಲೂ ಈ ಸಿನಿಮಾಗೆ ನಿರ್ದೇಶಕಿ ಸುಧಾ ಕೊಂಗರಾ ಆ್ಯಕ್ಷನ್ ಕಟ್ ಹೇಳಿದ್ದಾರೆ. ಚಿತ್ರದಲ್ಲಿ ನಟ ಅಕ್ಷಯ್ ಕುಮಾರ್ಗೆ ರಾಧಿಕ ಮದನ್ ಜೊತೆಯಾಗಿದ್ದು, ಪರೇಶ್ ರಾವಲ್, ಸೀಮಾ ಬಿಸ್ವಾಸ್ ಪ್ರಮುಖ ಪಾತ್ರದಲ್ಲಿ ಕಂಡಿದ್ದಾರೆ. ವಿಶೇಷ ಪಾತ್ರದಲ್ಲಿ ನಟ ಸೂರ್ಯ ಕೂಡ ಕಾಣಿಸಲಿದ್ದಾರೆ.
ಚಿತ್ರಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಇಂಡಸ್ಟ್ರಿ ಟ್ರಾಕರ್ ಸ್ಯಾಕ್ನಿಕ್ ಪ್ರಕಾರ, ಚಿತ್ರ 800 ಪರದೆಯಲ್ಲಿ ಬಿಡುಗಡೆಯಾಗುತ್ತಿದ್ದು, 2700 ಟಿಕೆಟ್ ಮಾರಾಟವಾಗಿದೆ. ಅಡ್ವಾನ್ಸ್ ಬುಕ್ಕಿಂಗ್ನಿಂದ ಚಿತ್ರ 4.8 ಲಕ್ಷ ಗಳಿಸಿದೆ.
ಇದನ್ನೂ ಓದಿ: ಇನ್ನು 4 ದಿನದಲ್ಲಿ ದೊಡ್ಡ ಪರದೆ ಮೇಲೆ ಇಂಡಿಯನ್ 2; ಇನ್ನೂ ಆರಂಭವಾಗದ ಮುಂಗಡ ಬುಕಿಂಗ್
