ಬೆಂಗಳೂರು: ಜನವರಿ 26ರಂದು ರಕ್ಷಿತ್ ಶೆಟ್ಟಿ ನಿರ್ಮಿಸಿರುವ 'ಬ್ಯಾಚುಲರ್ ಪಾರ್ಟಿ' ಸಿನಿಮಾ ಬಿಡುಗಡೆಯಾಗಿ, ಸದ್ಯ ಒಟಿಟಿಯಲ್ಲಿ ಲಭ್ಯವಿದೆ. ಚಿತ್ರದಲ್ಲಿ 'ನ್ಯಾಯ ಎಲ್ಲಿದೆ' ಹಾಗೂ 'ಗಾಳಿಮಾತು' ಚಿತ್ರಗಳ 2 ಹಾಡುಗಳನ್ನು ಬಳಸಿರುವ ಹಿನ್ನೆಲೆಯಲ್ಲಿ ಕೃತಿಚೌರ್ಯ ಆರೋಪ ಪ್ರಕರಣ ದಾಖಲಾಗಿತ್ತು. ಈ ಕುರಿತು ರಕ್ಷಿತ್ ಶೆಟ್ಟಿ ಇಂದು ಯಶವಂತಪುರ ಪೊಲೀಸರೆದುರು ಹಾಜರಾಗಿ ಎರಡು ಗಂಟೆ ವಿಚಾರಣೆ ಎದುರಿಸಿದರು.
ಬಳಿಕ ಮಾಧ್ಯಮಗಳೊಂದಿಗೆ ಮಾತನಾಡಿದ ರಕ್ಷಿತ್ ಶೆಟ್ಟಿ, ''ಕಾಪಿರೈಟ್ ಬಗ್ಗೆ ಸಿನಿಮಾ ಇಂಡಸ್ಟ್ರಿಯಲ್ಲೇ ನಾಲೆಡ್ಜ್ ಇಲ್ಲ. ನನ್ನ ಪ್ರಕಾರ, ಇದು ಕಾಪಿರೈಟ್ ಉಲ್ಲಂಘನೆ ಅಲ್ಲ. ಸಂದರ್ಭಕ್ಕೆ ಬೇಕಾದಂತಹ ಹಿನ್ನೆಲೆ ಗೀತೆಯಾಗಿ ಆ ಹಾಡನ್ನು 6 ಸೆಕೆಂಡ್ ಅಷ್ಟೇ ಬಳಸಲಾಗಿದೆ. ಅಷ್ಟಕ್ಕೆ ಕಾಪಿರೈಟ್ಸ್ ಅಡಿ ದೂರು ದಾಖಲಿಸಿದ್ದಾರೆ. ಹಾಗಾದ್ರೆ, ಕನ್ನಡದ ಹಾಡನ್ನು ಕನ್ನಡ ಚಿತ್ರದಲ್ಲಿ ಬಳಕೆ ಮಾಡುವಂತೆಯೇ ಇಲ್ವಾ" ಎಂದು ಪ್ರಶ್ನಿಸಿದರು.
"ಈ ಬಗ್ಗೆ ಕಾನೂನು ಹೋರಾಟ ಮಾಡುತ್ತೇನೆ. ಕಾಪಿರೈಟ್ ಅಂದರೆ ಏನು ಎಂಬುದನ್ನು ನ್ಯಾಯಾಲಯದಲ್ಲಿ ನಾನು ತಿಳಿದುಕೊಳ್ಳಬೇಕು. ಈ ಹಿಂದೆಯೂ ಕೂಡಾ ಕಾಪಿರೈಟ್ ಪ್ರಕರಣದಡಿ ಹೋರಾಟ ಮಾಡಿದ್ದೆ" ಎಂದು ತಿಳಿಸಿದರು.
"ಜನವರಿಯಲ್ಲಿ ತೆರೆಕಂಡ ಬ್ಯಾಚುಲರ್ಸ್‌ ಚಿತ್ರದಲ್ಲಿ ಮೂರ್ನಾಲ್ಕು ಹಳೇ ಹಾಡುಗಳನ್ನು ಬ್ಯಾಕ್ ಗ್ರೌಂಡ್‌ನಲ್ಲಿ ಬಳಸುವ ಸನ್ನಿವೇಶವಿತ್ತು. ಈ ಹಾಡುಗಳ ಬಳಕೆಗೆ ಅನುಮತಿ ತೆಗೆದುಕೊಳ್ಳಲು ಮುಂದಾಗಿದ್ದೆ. ದೂರುದಾರರಿಂದ ದೊಡ್ಡ ಮೊತ್ತದ ಬೇಡಿಕೆ ಬಂತು. 3-4 ಬಾರಿ ಮಾತುಕತೆಯೂ ಆಗಿತ್ತು. ಆದ್ರೆ ಅಲ್ಲಿ ಸರಿಯಾದ ಪ್ರತಿಕ್ರಿಯೆ ಬಂದಿರಲಿಲ್ಲ. ಹೀಗಾಗಿ ಸಾಂದರ್ಭಿಕವಾಗಿ ಹಾಡು ಬಳಕೆಯಾಗಿದೆ ಅಷ್ಟೇ" ಎಂದು ತಿಳಿಸಿದರು.
''ಮೂರ್ನಾಲ್ಕು ಹಳೇ ಕನ್ನಡ ಹಾಡುಗಳನ್ನು ಬ್ಯಾಕ್ಗ್ರೌಂಡ್ನಲ್ಲಿ ಬಳಸಿದ್ದೆವು. ಎರಡು ಹಾಡುಗಳಿಗೆ ಸರಿಗಮ ಸಂಸ್ಥೆಯ ಅನುಮತಿ ಪಡೆದೆವು. ಅವರು ಹೇಳಿದ ಮೊತ್ತಕ್ಕೆ ಹಾಡುಗಳನ್ನು ತೆಗೆದುಕೊಂಡ್ವಿ. ಇನ್ನೆರಡು ಹಾಡುಗಳ ಬಗ್ಗೆ ಹೇಳಬೇಕಂದ್ರೆ, ಅದು ಕಾಪಿರೈಟ್ ವಯಲೇಶನ್ ಅಲ್ಲ. ಆದ್ರೂ ಅನುಮತಿ ಪಡೆಯಿರಿ ಎಂದು ನನ್ನ ಪ್ರೊಡಕ್ಷನ್ ಮ್ಯಾನೇಜರ್ ಬಳಿ ಹೇಳಿದ್ದೆ. ಪ್ರೊಡಕ್ಷನ್ ಮ್ಯಾನೇಜರ್ ಆ ಹಾಡುಗಳ ಹಕ್ಕುಸ್ವಾಮ್ಯ ಹೊಂದಿರುವ ಸಂಸ್ಥೆಗೆ ಕರೆ ಮಾಡಿದ್ದು, ಅವರು ದೊಡ್ಡ ಮಟ್ಟದ ಮೊತ್ತಕ್ಕೆ ಬೇಡಿಕೆ ಇಟ್ಟರು. ಏಕೆ ಇಷ್ಟು ದೊಡ್ಡ ಮೊತ್ತ ಪಾವತಿಸಬೇಕೆಂದು ನಮಗನಿಸಿತು. ಈ ಬಗ್ಗೆ ಎರಡ್ಮೂರು ಬಾರಿ ಮಾತುಕತೆ ಆಗಿದೆ. ಅವರು ಹೇಳ್ತೀವಿ ಅಂತಾ ತಿಳಿಸಿದ್ದರು. ಆದ್ರೆ ಪ್ರತಿಕ್ರಿಯೆ ಬರಲಿಲ್ಲ''.
ಇದನ್ನೂ ಓದಿ: ಮಾಲೀಕರ ಅನುಮತಿಯಿಲ್ಲದೇ ಹಾಡುಗಳ ಬಳಕೆ ಆರೋಪ: ವಿಚಾರಣೆಗೆ ಹಾಜರಾದ ರಕ್ಷಿತ್ ಶೆಟ್ಟಿ - Rakshit Shetty Case
''ಸಿನಿಮಾ ರಿಲೀಸ್ ಡೇಟ್ ಸಮೀಪಿಸಿದ ಹಿನ್ನೆಲೆಯಲ್ಲಿ ಕೆಲಸ ಮುಗಿಸಿ ಸಿನಿಮಾ ಬಿಡುಗಡೆಗೊಳಿಸಿದೆವು. 3-4 ತಿಂಗಳ ನಂತರ ಕೇಸ್ ಹಾಕಿದ್ದಾರೆ. ಒಂದು ಹಾಡು 6 ಸೆಕೆಂಡ್ ಟಿವಿಯಲ್ಲಿ ಬರುತ್ತದಷ್ಟೇ. ಮತ್ತೊಂದು ಶಾಲೆಯಲ್ಲಿ ವಿದ್ಯಾರ್ಥಿನಿ ಕ್ಲಾಸ್ ರೂಮ್ ಮುಂದೆ ಹಾಡುವಂತಹ ಸಂದರ್ಭ. ಇವರಡೂ ಕೂಡಾ ಕಾಪಿರೈಟ್ ವಯಲೇಶನ್ ಅಲ್ಲ ಅನ್ನೋದು ನನ್ನ ವಾದ. ಕಾಪಿರೈಟ್ ಬಗ್ಗೆ ಚಿತ್ರರಂಗದೊಳಗೇನೆ ಗೊಂದಲಗಳಿವೆ. ಹಾಗಾಗಿ ಕಾನೂನು ಹೋರಾಟದ ಮೂಲಕ ತಿಳಿದುಕೊಳ್ಳಲು ಬಯಸಿದ್ದೇವೆ. ಕನ್ನಡ ಸಿನಿಮಾಗಳಲ್ಲಿ ಕನ್ನಡ ಹಾಡುಗಳನ್ನು ತೋರಿಸುವಂತೆಯೇ ಇಲ್ಲವೇ?. ಅದನ್ನು ರೀಮೇಕ್ ಮಾಡಿಯೋ, ಯೂಟ್ಯೂಬ್ನಲ್ಲಿ ಬಿಟ್ಟು ಲಾಭ ಪಡೆಯುತ್ತಿಲ್ಲ. ಹಾಗಾಗಿ ಸರಿಯಾದ ರೂಲ್ಸ್ ಗೊತ್ತಾಗಬೇಕು. ಕಾಪಿರೈಟ್ ಬಗ್ಗೆ ತಿಳಿಯಬೇಕು. ಕಾನೂನು ಮೂಲಕ ತಿಳಿದುಕೊಳ್ಳಲಿದ್ದೇವೆ'' ಎಂದು ತಿಳಿಸಿದರು.
ಇದನ್ನೂ ಓದಿ: 'ಕಂಟೆಂಟ್ ಸಿನಿಮಾಗಳಿಂದ ಯಾರಿಗೂ ನಷ್ಟವಾಗಲ್ಲ': 'ಕಪಟಿ' ನಿರ್ಮಾಪಕ ದಯಾಳ್ ಪದ್ಮನಾಭನ್ - Kapati
