ಪಾರ್ವತಮ್ಮ ಜನ್ಮದಿನ: ಗೀತಾ ನಿರ್ಮಾಣದ ಸಿನಿಮಾ ಅನೌನ್ಸ್; ಶಿವಣ್ಣನ ಸಹೋದರಿಯ ಪುತ್ರ ಹೀರೋ

ಗೀತಾ ಶಿವರಾಜ್​​ಕುಮಾರ್​ ನಿರ್ಮಾಣದ ಗೀತಾ ಪಿಕ್ಚರ್ಸ್ ಬ್ಯಾನರ್ ಅಡಿಯಲ್ಲಿ ಹೊಸ ಸಿನಿಮಾ ಘೋಷಣೆಯಾಗಿದ್ದು, ಶಿವರಾಜ್​ಕುಮಾರ್ ಸಹೋದರಿ‌‌ ಪೂರ್ಣಿಮಾರ ಪುತ್ರ ಧೀರೇನ್ ರಾಮ್​​ಕುಮಾರ್ ಮುಖ್ಯಭೂಮಿಕೆಯಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಕನ್ನಡ ಚಿತ್ರರಂಗಕ್ಕೆ ದೊಡ್ಮನೆ ಕುಟುಂಬದ ಕೊಡುಗೆ ಅಪಾರ. ವರನಟ ಡಾ.ರಾಜ್​​ಕುಮಾರ್ ಹಾಗೂ ಪಾರ್ವತಮ್ಮ ರಾಜ್‍ಕುಮಾರ್ ಅವರ ಸಾಮಾಜಿಕ ಮತ್ತು ಚಿತ್ರರಂಗದ ಕೊಡುಗೆ ದೊಡ್ಡದಿದೆ‌. ಇದೇ ಹಾದಿಯಲ್ಲಿ ಹ್ಯಾಟ್ರಿಕ್ ಹೀರೋ ಶಿವರಾಜ್​ಕುಮಾರ್ ಮತ್ತು ಪತ್ನಿ ಗೀತಾ ಹೆಜ್ಜೆ ಹಾಕುತ್ತಿದ್ದಾರೆ‌. ಗೀತಾ ಶಿವರಾಜ್​​ಕುಮಾರ್ ನಿರ್ಮಾಪಕಿಯಾಗಿ ಚಂದನವನದ ಭಾಗವಾಗಿದ್ದಾರೆ.

ಗೀತಾ ಪಿಕ್ಚರ್ಸ್ ಬ್ಯಾನರ್ ಹುಟ್ಟು ಹಾಕಿ ಮೊದಲನೆಯದಾಗಿ ವೇದ ಎಂಬ ಸಿನಿಮಾ ನಿರ್ಮಿಸಿದ ಅವರೀಗ ಕಂಟೆಂಟ್​ ಸಿನಿಮಾಗಳತ್ತ ಗಮನ ಹರಿಸಿದ್ದಾರೆ. ಇತ್ತೀಚೆಗೆ ಬಂದ ಭೈರತಿ ರಣಗಲ್ ಸೂಪರ್​ ಹಿಟ್​​ ಆಗಿದೆ. ಅಲ್ಲದೇ ಕಳೆದ ತಿಂಗಳಷ್ಟೇ ಎ‌‌ ಫಾರ್ ಆನಂದ್ ಸಿನಿಮಾವನ್ನು ಘೋಷಿಸಲಾಗಿದೆ. ಸದ್ಯ ಪಾರ್ವತಮ್ಮ ರಾಜ್‍ಕುಮಾರ್ ಹುಟ್ಟು ಹಬ್ಬದ ಸಲುವಾಗಿ ಗೀತಾ ಪಿಕ್ಚರ್ಸ್ ಬ್ಯಾನರ್ ಅಡಿಯಲ್ಲಿ ಹೊಸ ಸಿನಿಮಾ ಘೋಷಣೆಯಾಗಿದೆ.

PRODUCTION #4 | The Search Begins!!
The extremely passionate @dheerenrajkumar and the man behind Shakhahaari, @sandeepsunkad13 unite to embark on a journey that promises to captivate and leave you craving more. #GeethaPictures #NewKannadaMovie #MovieAnnouncement pic.twitter.com/h3lFQkt3VE

— Geetha Pictures (@GeethaPictures) December 6, 2024

ಗೀತಾ ಪಿಕ್ಚರ್ಸ್ ಬ್ಯಾನರ್ ಅಡಿಯಲ್ಲಿ ನಿರ್ಮಾಣಗೊಳ್ಳಲಿರುವ ಸಿನಿಮಾದಲ್ಲಿ ಹೀರೋ ಯಾರು ಎಂಬ ಕುತೂಹಲ ಸಹಜ. ಶಿವರಾಜ್​ಕುಮಾರ್ ಸಹೋದರಿ‌‌ ಪೂರ್ಣಿಮಾ ಅವರ ಪುತ್ರ ಧೀರೇನ್ ರಾಮ್​​ಕುಮಾರ್ ಈ ಚಿತ್ರದ ಮುಖ್ಯಭೂಮಿಕೆಯಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಗೀತಾ ಪಿಕ್ಚರ್ಸ್ ಬ್ಯಾನರ್ ಅಡಿ 'ಪ್ರೊಡಕ್ಷನ್ ನಂಬರ್ #4 The Search Begins' ಎಂಬ ಬರಹದೊಂದಿಗೆ ಹೊಸ ಪೋಸ್ಟರ್ ಅನಾವರಣಗೊಂಡಿದೆ. ಶಾಖಾಹಾರಿ ಎಂಬ ಸಿನಿಮಾ ಮಾಡಿ ಕನ್ನಡ ಚಿತ್ರರಂಗದಲ್ಲಿ ಭರವಸೆ ಹುಟ್ಟಿಸಿರೋ ನಿರ್ದೇಶಕ ಸಂದೀಪ್ ಸುಂಕದ್ ಅವರು ಧೀರೇನ್ ನಟನೆಯ ಈ ಸಿನಿಮಾವನ್ನು ನಿರ್ದೇಶಿಸುತ್ತಿದ್ದಾರೆ.

'ಶಿವ 123' ಚಿತ್ರದ ಮೂಲಕ ಧೀರೇನ್ ರಾಮ್​​ಕುಮಾರ್ ಮಾಸ್ ಲುಕ್​​ನಲ್ಲಿ ಚಿತ್ರರಂಗ ಪ್ರವೇಶಿಸಿದ್ದರು. ಆದ್ರೆ, ಈ ಸಿನಿಮಾ ಧೀರೇನ್ ರಾಮ್ ಕುಮಾರ್ ಅವರಿಗೆ ನಿರೀಕ್ಷಿತ ಮಟ್ಟದಲ್ಲಿ ಹೆಸರು ತಂದುಕೊಡಲಿಲ್ಲ. ಹೀಗಾಗಿ ಕೆ.ಆರ್.ಜಿ.ಸ್ಟುಡಿಯೋಸ್ ನಿರ್ಮಾಪಕರು ಧೀರೇನ್ ರಾಮ್ ಕುಮಾರ್ ಹೆಸರಿನ ಬದಲಾಗಿ ಧೀರೇನ್ ಆರ್ ರಾಜ್​​ಕುಮಾರ್ ಎಂದು ಹೆಸರು ಬದಲಾಯಿಸಿದರು‌.

ಇದನ್ನೂ ಓದಿ: ವದಂತಿ.. ಅದು ವದಂತಿಯಷ್ಟೇ! ಡಿವೋರ್ಸ್ ರೂಮರ್ಸ್​ ನಡುವೆ ಜೊತೆಯಾಗಿ ಕಾಣಿಸಿಕೊಂಡ ಐಶ್ವರ್ಯಾ ಅಭಿಷೇಕ್​

ಈ ಬಣ್ಣದ ಲೋಕದಲ್ಲಿ ಸಕ್ಸಸ್​ಗಾಗಿ ನಟ ನಟಿಯರು ತಮ್ಮ ಹೆಸರು ಬದಲಾವಣೆ ಮಾಡಿಕೊಳ್ಳುವುದು ಹೊಸತೇನಲ್ಲ. ಅದೇ ರೀತಿ ನಟ ಧೀರೇನ್ ರಾಮ್ ಕುಮಾರ್​ ಅವರೀಗ ಅದೃಷ್ಟ ಪರೀಕ್ಷೆಗಳಿದಿದ್ದಾರೆ‌. ಅವರಿಗಾಗಿ ಶಿವರಾಜ್​ಕುಮಾರ್ ಸಿನಿಮಾ ಮಾಡ್ತಾ ಇರೋದು ಗಮನಾರ್ಹ ವಿಚಾರ. ಪಾರ್ವತಮ್ಮ ರಾಜ್‍ಕುಮಾರ್ ಜನ್ಮದಿನದ ಅಂಗವಾಗಿ ಧೀರೇನ್ ಅವರ ಹೆಸರಿಡದ ಸಿನಿಮಾ‌ ಅನೌನ್ಸ್ ಆಗಿದ್ದು, ಈ‌ ಸಿನಿಮಾದಲ್ಲಿ ಯಾರೆಲ್ಲ‌‌ ಕಲಾವಿದರು ಇರ್ತಾರೆ? ತಂತ್ರಜ್ಞರು ಯಾರು? ಅನ್ನೋದು ಮುಂದಿನ ದಿನಗಳಲ್ಲಿ ಗೊತ್ತಾಗಲಿದೆ.