ದಳಪತಿ ವಿಜಯ್​ ಕೊನೆ ಚಿತ್ರದಲ್ಲಿ ಶಿವಣ್ಣ: ಸೌತ್ ಸೂಪರ್​​ಸ್ಟಾರ್ಸ್ ಸಿನಿಮಾಗಳಲ್ಲಿ ಕಾಣಿಸಿಕೊಳ್ಳಲಿರುವ ಸೆಂಚುರಿ ಸ್ಟಾರ್

ಕನ್ನಡದ ಹಲವು ಪ್ರಾಜೆಕ್ಟ್​​ಗಳನ್ನು ಒಪ್ಪಿಕೊಂಡಿರುವ ಹೆಸರಾಂತ ನಟ ಶಿವರಾಜ್​ಕುಮಾರ್​​ ಸೌತ್ ಸೂಪರ್​​ಸ್ಟಾರ್ಸ್ ಸಿನಿಮಾಗಳಲ್ಲಿಯೂ ಕಾಣಿಸಿಕೊಳ್ಳಲಿದ್ದಾರೆ.

ಕರುನಾಡ ಚಕ್ರವರ್ತಿ ಶಿವರಾಜ್​ಕುಮಾರ್​ ಕನ್ನಡ ಚಿತ್ರರಂಗದ ಕೀರ್ತಿ. ಪ್ರಸ್ತುತ 'ಭೈರತಿ ರಣಗಲ್' ಚಿತ್ರದ ಜಪ‌ ಮಾಡುತ್ತಿರುವ ಸೆಂಚುರಿ ಸ್ಟಾರ್ ಬ್ಯುಸಿಯೆಸ್ಟ್ ಸ್ಟಾರ್​ ಅನ್ನೋದು ನಿಮಗೆ ತಿಳಿದೇ ಇದೆ. 62ರ ಹರೆಯದಲ್ಲೂ ಕ್ರಿಯಾಶೀಲರಾಗಿ ಸಿನಿಮಾವೆಂಬ ಗ್ಲ್ಯಾಮರ್​ ದುನಿಯಾದಲ್ಲಿ ಡಿಮ್ಯಾಂಡ್ ಕಡಿಮೆ ಮಾಡಿಕೊಳ್ಳದ ದೊಡ್ಮನೆ ದೊರೆ ಸ್ಯಾಂಡಲ್​ವುಡ್​ ಸ್ಟಾರ್ಸ್​ಗೆ​​ ಮಾತ್ರವಲ್ಲ, ಸೌತ್ ಸೂಪರ್ ಸ್ಟಾರ್​ಗಳಿಗೂ ಇಷ್ಟ ಆಗುವ ನಟ. ಈ ಕಾರಣಕ್ಕೆ ತಲೈವಾ ರಜನಿಕಾಂತ್ ಮುಖ್ಯಭೂಮಿಕೆಯ ಜೈಲರ್ ಸಿನಿಮಾ ಬಿಡುಗಡೆ ಆದ ಬಳಿಕ ತೆಲುಗು, ತಮಿಳು, ಮಲಯಾಳಂ ಪ್ರೇಕ್ಷಕರು ಮಾತ್ರವಲ್ಲ, ಅಲ್ಲಿನ ಸ್ಟಾರ್ಸ್​​ ಕೂಡಾ ಸೆಂಚುರಿ ಸ್ಟಾರ್ ನಮ್ಮ ಸಿನಿಮಾದ ಭಾಗವಾಗಬೇಕೆಂದುಕೊಳ್ಳುತ್ತಿದ್ದಾರೆ.

ಈ ನಿಟ್ಟಿನಲ್ಲಿ ಪರಭಾಷೆಯ ಸ್ಟಾರ್ ನಟರ ಸಿನಿಮಾಗಳಲ್ಲಿ ಶಿವರಾಜ್​ಕುಮಾರ್​ ಅವರಿಗೆ ಒಂದು ಪವರ್​ಫುಲ್ ಪಾತ್ರ ಕೊಡಲು ನಿರ್ದೇಶಕರುಗಳು ಮನಸ್ಸು ಮಾಡುತ್ತಿದ್ದಾರೆ. ಇದು ಸಿನಿಮಾ ವ್ಯಾಪಾರ ದೃಷ್ಟಿಯಿಂದ ಆಗಿದ್ರೂ ಕೂಡಾ, ಶಿವಣ್ಣನಿಗೆ ಪರಭಾಷೆಗಳಲ್ಲೂ ಅಭಿಮಾನಿಗಳಿದ್ದಾರೆ ಅನ್ನೋ ವಿಷಯವನ್ನು ಸೈಡಿಗಿಡುವಂತಿಲ್ಲ. ಅದಕ್ಕೆ ಸಾಕ್ಷಿ'ವೇದ' ಸಿನಿಮಾದ ಪಾತ್ರ ಹಾಗೂ ಜೈಲರ್ ಚಿತ್ರದ ನರಸಿಂಹನ ಪಾತ್ರವನ್ನು ತೆಲುಗು, ತಮಿಳು ಹಾಗೂ‌‌‌‌ ಮಲಯಾಳಂ ಸಿನಿ ಪ್ರೇಮಿಗಳು ಅಪ್ಪಿಕೊಂಡದ್ದು.

ಸದ್ಯ ಭೈರತಿ ರಣಗಲ್ ಸಹ ಕನ್ನಡ, ತೆಲುಗು, ತಮಿಳು, ಮಲಯಾಳಂನಲ್ಲಿ ತೆರೆಕಾಣಲು ಸಿದ್ಧವಾಗಿದೆ. ಜೊತೆಗೆ, ಹ್ಯಾಟ್ರಿಕ್ ಹೀರೋ ಸೌತ್ ಸಿನಿಮಾ ಇಂಡಸ್ಟ್ರಿಯ ಸೂಪರ್​ ಸ್ಟಾರ್ಸ್ ಸಿನಿಮಾಗಳಲ್ಲಿ ಭಾಗವಾಗುತ್ತಿದ್ದಾರೆ. ತಮಿಳು ನಟ ವಿಜಯ್ ಕೊನೆ ಸಿನಿಮಾದಲ್ಲಿ ಹ್ಯಾಟ್ರಿಕ್ ಹೀರೋ ಅಭಿನಯಿಸಲಿದ್ದಾರೆ‌. ಈ ಮಾತನ್ನು ಸ್ವತಃ ಭೈರತಿ ರಣಗಲ್ ಚಿತ್ರದ ಪ್ರಮೋಷನ್ ಸಂದರ್ಭ ಸೆಂಚುರಿ ಸ್ಟಾರ್​ ಹೇಳಿಕೊಂಡಿದ್ದಾರೆ.

ಬಾಲಯ್ಯ ಜೊತೆ ಶಿವರಾಜ್​ಕುಮಾರ್​ (Photo: ETV Bharat)

''ನಾನು ವಿಜಯ್ ಅವರ ಕೊನೆಯ ಚಿತ್ರದಲ್ಲಿ ನಟಿಸುತ್ತಿದ್ದೇನೆ. ಈಗಾಗಲೇ ಮಾತುಕತೆ ನಡೆದಿದೆ. ನನ್ನ ಸಿನಿಮಾಗಳ ಕಾಲ್ ಶೀಟ್ ನೋಡಿಕೊಂಡು ಶೂಟಿಂಗ್​ಗೆ ಹೋಗುತ್ತೇನೆ'' ಎಂದು ತಿಳಿಸಿದ್ದಾರೆ. ಕನ್ನಡದ ಪ್ರತಿಷ್ಠಿತ ಚಲನಚಿತ್ರ ನಿರ್ಮಾಣ ಸಂಸ್ಥೆ ಕೆವಿಎನ್ ಪ್ರೊಡಕ್ಷನ್ ಹೌಸ್ ಬರೋಬ್ಬರಿ 500 ಕೋಟಿ ರೂಪಾಯಿ ಬಜೆಟ್​ನಲ್ಲಿ ನಿರ್ಮಾಣ ಮಾಡುತ್ತಿದ್ದಾರೆ.

ತಲೈವಾ ರಜನಿಕಾಂತ್ ಜೊತೆ ಶಿವರಾಜ್​ಕುಮಾರ್ (Photo: ETV Bharat)

ಈ ಸಿನಿಮಾ ಜೊತೆಗೆ ಪ್ಯಾನ್‌ ವರ್ಲ್ಡ್‌ ಸ್ಟಾರ್ ರಾಮ್ ಚರಣ್ ತೇಜ್​ ಅಭಿನಯದ 'ಪ್ರೊಡಕ್ಷನ್ ನಂ 16' ಸಿನಿಮಾದಲ್ಲಿ ಸೆಂಚುರಿ ಸ್ಟಾರ್ ಪ್ರಮುಖ ಪಾತ್ರ ನಿರ್ವಹಿಸಲಿದ್ದಾರೆ. ಈ ಸಿನಿಮಾದ ಮಾತುಕತೆ ತಮಿಳು ನಟ ಧನುಷ್ ಜೊತೆಗಿನ ಕ್ಯಾಪ್ಟನ್ ಮಿಲ್ಲರ್ ಶೂಟಿಂಗ್ ಸಂದರ್ಭದಲ್ಲಿ 'ಪ್ರೊಡಕ್ಷನ್ ನಂ 16' ಚಿತ್ರತಂಡದೊಂದಿಗೆ ಆಗಿದೆಯೆಂದು ಶಿವಣ್ಣನ ಆಪ್ತರೊಬ್ಬರು ತಿಳಿಸಿದ್ದಾರೆ.

ಹ್ಯಾಟ್ರಿಕ್ ಹೀರೋ ಶಿವರಾಜ್​ಕುಮಾರ್ (Photo: ETV Bharat)

ಇದರ ಜೊತೆಗೆ ಮತ್ತೋರ್ವ ತೆಲುಗು ಸೂಪರ್​ ಸ್ಟಾರ್ ವಿಷ್ಣು ಮಂಚು ಅಭಿನಯದ ಪ್ಯಾನ್ ಇಂಡಿಯಾ 'ಕಣ್ಣಪ್ಪ' ಚಿತ್ರದಲ್ಲಿ ಶಿವರಾಜ್​ಕುಮಾರ್​ ಅವರು ಅಭಿಮಾನಿಗಳ ‌ಮನದಲ್ಲಿ ಉಳಿಯುವಂತಹ ಪಾತ್ರ ನಿರ್ವಹಿಸಿದ್ದಾರಂತೆ. ಈ ಹಿಂದೆ ಸಿನಿ ಪಂಡಿತರು ಈ ವಿಷಯವನ್ನು ತಮ್ಮ ಅಧಿಕೃತ ಸೋಷಿಯಲ್​ ಮೀಡಿಯಾಗಳಲ್ಲಿ ಹಂಚಿಕೊಂಡಿದ್ದರು.

ಇದರ ಮಧ್ಯೆ‌ ಮಲಯಾಳಂ ಸೂಪರ್ ಸ್ಟಾರ್ ಮೋಹನ್ ಲಾಲ್ ಅವರ ಲೂಸಿಫರ್ ಪಾರ್ಟ್ 2 ಸಿನಿಮಾದಲ್ಲಿ ಶಿವಣ್ಣ ಅಭಿನಯಿಸಲಿದ್ದಾರೆ. ಈ ವಿಚಾರವನ್ನು ಒಮ್ಮೆ ಶಿವರಾಜ್​ಕುಮಾರ್ ಚೆನ್ನೈ ಏರ್​ಪೋರ್ಟ್ ನಲ್ಲಿ ಮಾಧ್ಯಮದವರಿಗೆ ತಿಳಿಸಿದ್ದರು.

ಸೆಂಚುರಿ ಸ್ಟಾರ್ ಶಿವರಾಜ್​ಕುಮಾರ್​ (Photo: ETV Bharat)

ಇದನ್ನೂ ಓದಿ: ದೊಡ್ಮನೆ ಶಕ್ತಿ ಪಾರ್ವತಮ್ಮ ಹಾದಿಯಲ್ಲಿ ಸೊಸೆ ಗೀತಾ ಶಿವರಾಜ್​ಕುಮಾರ್: ಸಿನಿಮಾ ಫೈನಲ್ ಮಾಡೋದು ಇವರೇ

ಹೀಗೆ ಹೆಸರಾಂತ ನಟ ಶಿವರಾಜ್​ಕುಮಾರ್ ಕೈಯಲ್ಲಿ ಕನ್ನಡ‌ದ ಜೊತೆಗೆ ಪರಭಾಷೆಯ ಸ್ಟಾರ್ ನಟರ ಸಿನಿಮಾಗಳು ಸೇರಿದಂತೆ ಬರೋಬ್ಬರಿ 10ಕ್ಕೂ ಹೆಚ್ಚು ಪ್ರಾಜೆಕ್ಟ್​ಗಳಿವೆ. ಆದ್ರೆ ಆರೋಗ್ಯ ದೃಷ್ಟಿಯಿಂದ ಭೈರತಿ ರಣಗಲ್ ಬಿಡುಗಡೆಯಾದ ಒಂದು ವಾರಕ್ಕೆ ಶಿವಣ್ಣ ಅಮೆರಿಕ ಫ್ಲೈಟ್​​ ಹತ್ತಲಿದ್ದಾರೆ. ಅಲ್ಲಿ ಒಂದು ತಿಂಗಳ ಕಾಲ ಆಸ್ಪತ್ರೆಯಲ್ಲೇ ಚಿಕಿತ್ಸೆ ಪಡೆದು ಹೊಸ ವರ್ಷದ ಸಂದರ್ಭ ಬೆಂಗಳೂರಿಗೆ ಮರಳಲಿದ್ದಾರೆ‌. ಅವರೇ ಹೇಳಿಕೊಂಡಂತೆ, ಶಸ್ತ್ರಚಿಕಿತ್ಸೆಗೆ ಒಳಗಾಗಿ ನಾಲ್ಕೈದು ತಿಂಗಳ ಕಾಲ ವಿಶ್ರಾಂತಿ ಬೇಕು. ಅಲ್ಲಿಗೆ ಅವರು ಒಪ್ಪಿಕೊಂಡಿರುವ ಸಿನಿಮಾ ಶೂಟಿಂಗ್ ಡೇಟ್ಸ್ ಕೂಡಾ ಮುಂದಕ್ಕೆ ಹೋಗಲಿವೆ.

ಕರುನಾಡ ಚಕ್ರವರ್ತಿ ಶಿವರಾಜ್​ಕುಮಾರ್​ (Photo: ETV Bharat)

ಇದನ್ನೂ ಓದಿ: 'ಅವನಲ್ಲ ಅವಳು': ಲಿಂಗ ಬದಲಿಸಿಕೊಂಡ ಸಿನಿ ಸೆಲೆಬ್ರಿಟಿಗಳಿವರು; ಒಮ್ಮೆ ನೋಡಿಬಿಡಿ

ಒಟ್ಟಾರೆ ಬಹುಭಾಷಾ‌ ನಟರ ಸ್ನೇಹ ಹಾಗೂ‌ ನಿರ್ದೇಶಕ - ನಿರ್ಮಾಪಕರ ಪ್ರೀತಿ, ಬಾಂಧವ್ಯ ಮತ್ತು ಅಭಿಮಾನಿಗಳ ಅಭಿಮಾನಕ್ಕೆ ಬೆಲೆಕೊಟ್ಟು ಕೆಲ ಸಿನಿಮಾಗಳನ್ನು ಒಪ್ಪಿಕೊಳ್ಳುತ್ತಿದ್ದಾರೆ. ಕೆಲ ಪಾತ್ರಗಳು ಕರುನಾಡ ಚಕ್ರವರ್ತಿಯನ್ನೇ ಡಿಮ್ಯಾಂಡ್ ಮಾಡ್ತಿರೋದ್ರಿಂದ ಅವುಗಳನ್ನೂ ಒಪ್ಪಿಕೊಳ್ಳಬೇಕಿದೆ. 62ರಲ್ಲೂ ಹ್ಯಾಟ್ರಿಕ್ ಹೀರೋಗಿರುವ ಡಿಮ್ಯಾಂಡ್ ಯುವಕರಿಗೆ ಸ್ಫೂರ್ತಿಯಾಗಿದೆ.