ಬಿಗ್ ಬಾಸ್ನ ಈ ಸೀಸನ್ ಅಭಿನಯ ಚಕ್ರವರ್ತಿ ಸುದೀಪ್ ನಡೆಸಿಕೊಡುವ ಕೊನೆಯ ಸೀಸನ್. ಹಾಗಾಗಿ ಎಲ್ಲರೂ ಸೇರಿ ಕಾರ್ಯಕ್ರಮವನ್ನು ಅತ್ಯುತ್ತಮವಾಗಿ ನಡೆಸಿಕೊಡೋಣ ಎಂದು ತಿಳಿಸಿದ್ದರು. ಅದೆಷ್ಟೋ ಗಂಭೀರ ವಿಷಯಗಳಿದ್ದರೂ ಕೂಡಾ ನಿರೂಪಕ ಸುದೀಪ್ ಅವರು ಅವನ್ನು ನಯವಾಗೇ ತಿದ್ದಿ ತೀಡಿದ್ದರು. ಆದರೆ ಸ್ಪರ್ಧಿಗಳ ಜಗಳ, ಕಿರುಚಾಟ, ವಾದ ವಿವಾದಗಳು ಎಲ್ಲೆ ಮೀರುತ್ತಿದೆ. ಇನ್ನೇನು ಹೊಡೆದುಕೊಳ್ತಾರಾ ಅನ್ನೋವಷ್ಟರ ಮಟ್ಟಿಗೆ ಗಲಾಟೆಗಳು ನಡೆಯುತ್ತಿವೆ. ಮನೆಯ ಶಾಂತಿ ಕಾಪಾಡುವ ಜವಾಬ್ದಾರಿ ಕ್ಯಾಪ್ಟನ್ ಶಿಶಿರ್ ಅವರ ಮೇಲಿತ್ತು. ಇದೀಗ ಬಿಗ್ ಬಾಸೇ ಮಧ್ಯಪ್ರವೇಶಿಸಿದ್ದಾರೆ. ಅವರ ಮಾತು, ದನಿಯನ್ನು ಗಮನಿಸಿದರೆ ತಾಳ್ಮೆ ಕಳೆದುಕೊಂಡಂತೆ ತೋರುತ್ತಿದೆ.
ಕನ್ನಡದ ಅತ್ಯಂತ ಜನಪ್ರಿಯ ಕಾರ್ಯಕ್ರಮ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರೋ ''ಬಿಗ್ ಬಾಸ್ ಸೀಸನ್ 11'' ಮೂರನೇ ವಾರದ ಮಧ್ಯದಲ್ಲಿದೆ. ಕಳೆದ ಎಲ್ಲಾ ಸೀಸನ್ಗಳಿಗೆ ಹೋಲಿಸಿದರೆ ಜಗಳ, ಕಿರುಚಾಟ, ವಾದ ವಿವಾದಗಳು ಈ ಬಾರಿ ಹೆಚ್ಚಾಗಿದೆ. ಅದರಲ್ಲೂ ಮೊದಲೆರಡು ವಾರಗಳಲ್ಲಿ ಈ ಮಟ್ಟಿನ ಕಿರುಚಾಟ ಬಹುಶಃ ನಡೆದಿರಲಿಕ್ಕಿಲ್ಲ. ಅದರಂತೆ 3ನೇ ವಾರವೂ ಬಿಗ್ ಫೈಟ್ ನಡೆಯುತ್ತಿವೆ.
ತಾಳ್ಮೆ ಕಳೆದುಕೊಂಡರಾ ಬಿಗ್ ಬಾಸ್: ''ಇತಿ - ಮಿತಿ ಎಲ್ಲವೂ ಮರೆತ ಸ್ಪರ್ಧಿಗಳು!'' ಬಿಗ್ ಬಾಸ್ ಕನ್ನಡ ಸೀಸನ್ 11. ಸೋಮ - ಶುಕ್ರ ರಾತ್ರಿ 9:30ಕ್ಕೆ ಪ್ರಸಾರ ಎಂಬ ಕ್ಯಾಪ್ಷನ್ನೊಂದಿಗೆ ಬಿಗ್ ಬಾಸ್ ತನ್ನ ವಿವಿಧ ಸೋಷಿಯಲ್ ಮೀಡಿಯಾ ಪ್ಲ್ಯಾಟ್ಫಾರ್ಮ್ಗಳಲ್ಲಿ ಇಂದಿನ ಸಂಚಿಕೆಯ ಪ್ರೋಮೋ ಅನಾವರಣಗೊಳಿಸಿದೆ. ಮನೆಯಲ್ಲಿ ದೊಡ್ಡ ಗಲಾಟೆ ನಡೆದಿದೆ, ಬಿಗ್ ಬಾಸ್ ತಾಳ್ಮೆ ಕಳೆದುಕೊಳ್ಳುವಂತಾಗಿದೆ ಮತ್ತು ಆಕ್ರೋಶಗೊಂಡು ಸ್ಪರ್ಧಿಗಳ ವಿರುದ್ಧ ದನಿ ಏರಿಸುವಂತಾಗಿದೆ ಎಂಬುದರ ಸುಳಿವನ್ನು ಈ ಪ್ರೋಮೋ ಬಿಟ್ಟುಕೊಟ್ಟಿದೆ.
ಎಂದಿನಂತೆ ಇಂದು ಕೂಡಾ ನಾಮಿನೇಶನ್ ಪ್ರಕ್ರಿಯೆ ನಡೆಯಲಿದೆ. ಈ ವಾರ ಎಲಿಮಿನೇಶನ್ಗೆ ನೇರ ನಾಮಿನೇಶನ್ ಮಾಡುವ ಅವಕಾಶವನ್ನು ಬಿಗ್ ಬಾಸ್ ಕ್ಯಾಪ್ಟನ್ಗೆ ಕೊಡುತ್ತಿದ್ದಾರೆ. ಪ್ರತಿದಿನ ಈ ನಾಮಿನೇಶನ್ಗಳು ನಡೆಯುತ್ತಿದೆ. ಅದರಂತೆ ಇಂದು ಸಹ ನಡೆದಿದೆ.
ಕ್ಯಾಪ್ಟನ್ ಮೊದಲ ನಾಮಿನೇಷನ್ ಇವರು: ಪ್ರೋಮೋದಲ್ಲಿ, ನನ್ನ ಮೊದಲನೇ ನಾಮಿನೇಶನ್ ಧರ್ಮ ಅವರು ಎಂದು ಕ್ಯಾಪ್ಟನ್ ಶಿಶಿರ್ ತಿಳಿಸಿದ್ದಾರೆ. ಆ ಪ್ರಕಾರ, ಧರ್ಮ ಕಹಿ ಜ್ಯೂಸ್ ಕುಡಿದಿದ್ದಾರೆ. ಧರ್ಮ ಅವರನ್ನು ಟಾರ್ಗೆಟ್ ಮಾಡಲಾಗುತ್ತಿದೆ ಎಂದು ಜಗದೀಶ್ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಅದಕ್ಕೆ ಮಾನಸಾ ಪ್ರತಿಕ್ರಿಯಿಸಿ, ಎಲ್ಲಾ ವಿಷಯದಲ್ಲೂ ಬಾಯ್ ಹಾಕ್ತೀರಲ್ವಾ? ಎಂದು ತಿಳಿಸಿದ್ದಾರೆ. ನೀವ್ ಯಾರ್ ಮಾತಾಡೋಕೆ ಎಂದು ಜಗದೀಶ್ ಎಗರಿದ್ದಾರೆ. ಇಬ್ಬರ ಮಾತಿನ ಚಕಮಕಿ ಜೋರಾಗಿದೆ. ಮನೆ ಮಂದಿ ಮಧ್ಯಪ್ರವೇಶಿಸುವಂತಾಗಿದೆ. ಉಗ್ರಂ ಮಂಜು ಮತ್ತು ತ್ರಿವಿಕ್ರಮ್ ತಮ್ಮ ಆಕ್ರೋಶ ಹೊರಹಾಕಿದ್ದಾರೆ. ಏನ್ ನಿನ್ ಮನೆಗ್ ಬಂದಿದ್ದೀನಾ, ಥೂ ನಿನ್ ಯೋಗ್ಯತೆಗೆ, ಹೋಗೋಲೆ, ನೀನ್ ಹೋಗೋಲೆ ಎಂಬ ಮಾತುಗಳು ಬಂದಿವೆ. ಜಗದೀಶ್ ಮಂಜು ಎದುರು ಬದುರಾಗಿ ಕಿಡಿ ಕಾರಿದ್ದಾರೆ. ಸ್ಪರ್ಧಿಗಳು ಉಗ್ರಾವತಾರ ಎತ್ತಿದ ಕ್ಷಣ ಬಿಗ್ ಬಾಸ್ನ ಕರೆ ಬಂದಿದೆ. ನಂತರ ಆದೇಶ ಬಂದಿದೆ.
ಇದನ್ನೂ ಓದಿ: 'ಚಿತ್ರರಂಗಕ್ಕೆ ಕಾಶೀನಾಥ್ ಕೊಡುಗೆ ಅಪಾರ': ಪುತ್ರ ಅಭಿಮನ್ಯು ಸಿನಿಮಾಗೆ ಸುದೀಪ್ ಸಪೋರ್ಟ್
ಇದು ಬಿಗ್ ಬಾಸ್. ಎಲ್ಲರೂ ಸೋಫಾದಲ್ಲಿ ಕುಳಿತುಕೊಳ್ಳಿ ಎಂದು ಬಹಳ ಸಿಟ್ಟಿನಲ್ಲಿ ತಿಳಿಸಿದ್ದಾರೆ. ಅದಾಗ್ಯೂ ಸ್ಪರ್ಧಿಗಳು ತಮ್ಮ ಗಲಾಟೆ ಮುಂದುವರಿಸಿದ್ದಾರೆ. ಸಿಟ್ಟಿಗೆದ್ದ ಬಿಗ್ ಬಾಸ್ 'ಸದ್ದು' ಎಂದು ಜೋರಾಗಿ ತಿಳಿಸಿದ್ದಾರೆ. ''ಯಾರೂ ತುಟಿಕ್ ಪಿಟಿಕ್ ಅನ್ನೋ ಹಾಗಿಲ್ಲ!'' ಎಂದು ಬಹಳ ಆಕ್ರೋಶದಲ್ಲಿ ಸೂಚಿಸಿದ್ದಾರೆ. ನಂತರ, ಇಡೀ ಮನೆ ಸದಸ್ಯರು ಸೋಫಾ ಮೇಲೆ ಬಂದು ಕುಳಿತಿರೋದನ್ನು ಕಾಣಬಹುದು. ಮುಂದೆ ಏನಾಗಬಹುದು ಎಂದು ವೀಕ್ಷಕರ ಕುತೂಹಲ ಕೆರಳಿದೆ. ಈ ಬಾರಿ ಗಲಾಟೆ ಹೆಚ್ಚಾಯ್ತೆ? ಸೀಸನ್ 11ರ ಸ್ಪರ್ಧಿಗಳ ಬಗ್ಗೆ ನಿಮ್ಮ ಅಭಿಪ್ರಾಯವೇನು?.
