ಸಾಗರೋತ್ತರ ಪ್ರದೇಶದಲ್ಲಿ ಪ್ರತಿಷ್ಠಿತ 'ಕೇನ್ಸ್ ಚಲನಚಿತ್ರೋತ್ಸವ 2024' ನಡೆಯುತ್ತಿದೆ. ಈಗಾಗಲೇ ಕೆಲವು ನಟಿಮಣಿಯರು ಈ ವೇದಿಕೆಯಲ್ಲಿ ತಮ್ಮ ಸೌಂದರ್ಯ ಪ್ರದರ್ಶಿಸಿದ್ದಾರೆ. ಕೋಟ್ಯಂತರ ಅಭಿಮಾನಿಗಳು ಇದೇ ವೇದಿಕೆಯಲ್ಲಿ ಮಾಜಿ ವಿಶ್ವ ಸುಂದರಿ ಐಶ್ವರ್ಯಾ ರೈ ನೋಟ ಕಣ್ತುಂಬಿಕೊಳ್ಳಲು ಕಾತರರಾಗಿದ್ದರು. ಅಂತೂ ಇಂತೂ, ನೆಟ್ಟಿಗರು ಕುತೂಹಲದಿಂದ ಕಾಯುತ್ತಿದ್ದ ಕ್ಷಣ ಕೊನೆಗೂ ಬಂದಿದೆ. ಸಾಮಾಜಿಕ ಜಾಲತಾಣದಲ್ಲೀಗ ಐಶ್ವರ್ಯಾ ರೈ ಬಚ್ಚನ್ ಅವರ ಫೋಟೋಗಳದ್ದೇ ಸದ್ದು.
ಐಶ್ವರ್ಯಾ ಕೇನ್ಸ್ ಚಲನಚಿತ್ರೋತ್ಸವದ ಮೆರುಗು ಹೆಚ್ಚಿಸಿದ್ದಾರೆ. ವಿಭಿನ್ನ ಫ್ಯಾಶನ್ ಸೆನ್ಸ್ನಿಂದ ಪ್ರೇಕ್ಷಕರನ್ನು ಮಂತ್ರಮುಗ್ಧಗೊಳಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ನಟಿಯ ನೋಟಕ್ಕಾಗಿ ಕಾಯುವವರ ಸಂಖ್ಯೆಯೂ ದೊಡ್ಡದಿದೆ. ಇದೀಗ ಕೇನ್ಸ್ ಈವೆಂಟ್ನಿಂದ ಸ್ಟಾರ್ ನಟಿಯ ಸುಂದರ ಫೋಟೋಗಳನ್ನು ಬಹಿರಂಗಪಡಿಸಲಾಗಿದೆ.
ಮನರಂಜನಾ ಕ್ಷೇತ್ರದಲ್ಲಿ ತನ್ನದೇ ಆದ ಸ್ಥಾನಮಾನ ಹೊಂದಿರುವ ಕೇನ್ಸ್ ಫಿಲ್ಮ್ ಫೆಸ್ಟಿವಲ್‌ನಲ್ಲಿ ಹೆಚ್ಚಾಗಿ ಕಾಣಿಸಿಕೊಳ್ಳುವ ಮಾಜಿ ವಿಶ್ವಸುಂದರಿ ಬುಧವಾರ ತಡರಾತ್ರಿ ಮಗಳು ಆರಾಧ್ಯ ಜೊತೆ ಮುಂಬೈ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಕಾಣಿಸಿಕೊಂಡಿದ್ದರು. ಗಾಯವಾದ ಬಲಗೈಗೆ ಆರ್ಮ್ ಸ್ಲಿಂಗ್ ಧರಿಸಿದ್ದರು. ನಟಿಯ ಕೈಗೆ ಪೆಟ್ಟಾಗಿರುವುದು ಖಚಿತವಾಗಿತ್ತು. ಈ ಸ್ಥಿತಿಯಲ್ಲಿ ಹೇಗೆ ಫ್ಯಾಶನ್ ಈವೆಂಟ್‌ನಲ್ಲಿ ಭಾಗಿಯಾಗುತ್ತಾರೆ ಎಂದು ಹಲವರು ಚಿಂತಿತರಾಗಿದ್ದರು. ಪಾಪರಾಜಿಗಳು ಏರ್ಪೋರ್ಟ್‌ನಿಂದ ಹಂಚಿಕೊಂಡ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿ, ಐಶ್ವರ್ಯಾಗೆ ಏನಾಯ್ತು? ಎಂದು ಅಭಿಮಾನಿಗಳು ಆತಂಕಕ್ಕೊಳಗಾಗಿದ್ದರು. ಆದ್ರೀಗ ನಟಿ ರೆಡ್ ಕಾರ್ಪೆಟ್ ಮೇಲೆ ಹೆಜ್ಜೆ ಹಾಕಿರುವ ಫೋಟೋಗಳು ಹೊರಬಿದ್ದಿದೆ. ಐಶ್ವರ್ಯಾ ಮತ್ತು ಆರಾಧ್ಯಗೆ ಕೇನ್ಸ್‌ನಲ್ಲಿ ಆತ್ಮೀಯ ಸ್ವಾಗತ ಕೋರಲಾಗಿದೆ.
ಇದನ್ನೂ ಓದಿ: ಐಶ್ವರ್ಯಾ ರೈ ಕೈಗೆ ಗಾಯ: ಮಗಳೊಂದಿಗೆ ಏರ್ಪೋರ್ಟ್ನಲ್ಲಿ ಕಾಣಿಸಿಕೊಂಡ ಚೆಲುವೆ - Aishwarya Rai Injured
77ನೇ ಆವೃತ್ತಿಯ ಈ ಚಿತ್ರೋತ್ಸವದಲ್ಲಿ ರೈ, ಬ್ಲ್ಯಾಕ್, ವೈಟ್, ಗೋಲ್ಡನ್ ಕಾಂಬಿನೆಶನ್ನ ಗೌನ್‌ನಲ್ಲಿ ಕಾಣಿಸಿಕೊಂಡರು. ಪ್ರತೀ ಬಾರಿಯಂತೆ ಈ ವರ್ಷವೂ ವಿಭಿನ್ನ ಶೈಲಿಯ ಉಡುಗೆ ಮತ್ತು ತನ್ನ ಸೌಂದರ್ಯದಿಂದ ಹೆಚ್ಚಿನವರ ಮನ ಗೆದ್ದಿದ್ದಾರೆ. ಐಶ್ವರ್ಯಾ 'ಫಲ್ಗುಣಿ ಶೇನ್ ಪಿಕಾಕ್' ವಿನ್ಯಾಸಗೊಳಿಸಿರುವ ಉಡುಗೆ ಧರಿಸಿದ್ದರು.
ಇದನ್ನೂ ಓದಿ: 26 ವರ್ಷಗಳ ಬಳಿಕ ನಾಳೆ 'A' ರೀ ರಿಲೀಸ್: ಇದು ನನ್ನ ಬದುಕು ಬದಲಿಸಿದ ಸಿನಿಮಾ ಎಂದ ನಟಿ ಚಾಂದಿನಿ - A Movie Re Release
2024ರ ಕೇನ್ಸ್ ಫಿಲ್ಮ್ ಫೆಸ್ಟಿವಲ್ ಫ್ರಾನ್ಸ್ನ ಕೇನ್ಸ್ ಪ್ರದೇಶದಲ್ಲಿ ಇದೇ ಮಾರ್ಚ್ 14ಕ್ಕೆ (ಮಂಗಳವಾರ) ಆರಂಭವಾಗಿದ್ದು, 25 (ಬರುವ ಶನಿವಾರ)ರಂದು ಪೂರ್ಣಗೊಳ್ಳಲಿದೆ. ಊರ್ವಶಿ ರೌಟೇಲಾ, ಐಶ್ವರ್ಯಾ ರೈ ಬಚ್ಚನ್ ಈಗಾಗಲೇ ಕೇನ್ಸ್ ಕಾರ್ಪೆಟ್ ಮೇಲೆ ನಡೆದಿದ್ದಾರೆ. ಉಳಿದಂತೆ ಕಿಯಾರಾ ಅಡ್ವಾಣಿ, ಶೋಭಿತಾ ಧೂಳಿಪಾಲ, ಜಾಕ್ವೆಲಿನ್ ಫರ್ನಾಂಡಿಸ್ ಮತ್ತು ಅದಿತಿ ರಾವ್ ಹೈದರಿ ಸೇರಿದಂತೆ ಹಲವರು ಕಾಣಿಸಿಕೊಳ್ಳಲಿದ್ದಾರೆ. ಸದ್ಯ ಸೋಷಿಯಲ್ ಮೀಡಿಯಾದಲ್ಲಿ ಲೇಡಿ ಬಚ್ಚನ್ ಫೋಟೋಗಳು ಸದ್ದು ಮಾಡುತ್ತಿವೆ. ನಟಿಯ ನೋಟಕ್ಕೆ ಮೆಚ್ಚುಗೆಯ ಮಹಾಪೂರ ಹರಿದುಬರುತ್ತಿದೆ. ಅಭಿಮಾನಿಗಳು ತಮ್ಮ ಪ್ರತಿಕ್ರಿಯೆ ಕೊಡುತ್ತಿದ್ದಾರೆ.
