ಈ ಸಿನಿಮಾ ಎಂಬ ಬಣ್ಣದ ಪ್ರಪಂಚದಲ್ಲಿ 50ನೇ ವರ್ಷಕ್ಕೆ ಕಾಲಿಟ್ಟಿರುವ ನಟ ಮಂಚು ಮೋಹನ್ ಬಾಬು, ಭಾರತೀಯ ಚಿತ್ರೋದ್ಯಮಕ್ಕೆ ಕೊಟ್ಟಿರುವ ಕೊಡುಗೆ ಅಪಾರ. ಐದು ದಶಕಗಳ ಅವಧಿಯಲ್ಲಿ ತೆಲುಗು ಸಿನಿಮಾರಂಗದಲ್ಲಿ ತಮ್ಮದೇ ಆದ ದಾಖಲೆಗಳನ್ನು ಸೃಷ್ಟಿಸಿದ್ದಾರೆ. ಅಮೋಘ ಅಭಿನಯದ ಮೂಲಕ ಅಭಿಮಾನಿಗಳ ಹೃದಯದಲ್ಲಿ ತಮ್ಮ ಸ್ಥಾನವನ್ನು ಭದ್ರಪಡಿಸಿಕೊಂಡಿದ್ದಾರೆ.
ಐದು ದಶಕ, ನೂರಾರು ಸಿನಿಮಾಗಳು, ಒಂದಕ್ಕಿಂತ ಒಂದು ವಿಭಿನ್ನ ಪಾತ್ರಗಳು, ಹತ್ತಾರು ಪ್ರಶಸ್ತಿಗಳು. ಹೀಗೆ ಮೋಹನ್ ಬಾಬು ಅವರ ಈ 5 ದಶಕದ ಬಣ್ಣದ ಲೋಕದ ವೃತ್ತಿ ಜೀವನವೇ ಕಲರ್‌ಫುಲ್. ಮಾರ್ಚ್ 19, 1952ರಂದು ಚಿತ್ತೂರು ಜಿಲ್ಲೆಯ ಮೊದುಗುಲಪಾಲೆಂನಲ್ಲಿ ಜನಿಸಿದ ಮೋಹನ್ ಬಾಬು, ಆರಂಭದಲ್ಲಿ ರಂಗಭೂಮಿ ಕಲಾ ಪ್ರದರ್ಶನದ ಬಗ್ಗೆ ಅಪಾರ ಆಸಕ್ತಿ ಹೊಂದಿದ್ದರು. ಸಿನಿಮಾಗಳಲ್ಲಿ ನಟಿಸುವುದು ಅವರ ಕನಸಾಗಿತ್ತು. ಕನಸು ನನಸು ಮಾಡಿಕೊಳ್ಳಲು ಗುರಿಯತ್ತ ದಣಿವರಿಯಿಲ್ಲದೇ ಶ್ರಮಿಸಿದರು. ಆಗಾಗ್ಗೆ ನಿದ್ರೆಯಿಲ್ಲದ ರಾತ್ರಿಗಳನ್ನು ಕಳೆದಿದ್ದಾರೆ. ಚಿತ್ರರಂಗದಲ್ಲಿ ಅವಕಾಶಗಳಿಗಾಗಿ ಶ್ರಮಿಸಿದರು. ಸುಡುವ ಬಿಸಿಲು, ಮಳೆ ಮತ್ತು ಹಸಿವಿನಂತಹ ಸವಾಲುಗಳಿಗೆ ಎದೆಗುಂದದೆ ಅವರ ಅವಿರತ ಪ್ರಯತ್ನಗಳು ಅಂತಿಮವಾಗಿ ಫಲ ನೀಡಿತು. ಬೆಳ್ಳಿತೆರೆಯಲ್ಲಿ ತನಗಾಗಿ ಒಂದು ಸ್ಥಾನವನ್ನು ಕೆತ್ತುವ ಅವರ ಬದ್ಧತೆಯು ತೆಲುಗು ಚಿತ್ರರಂಗದಲ್ಲಿ ಅತ್ಯಂತ ಗೌರವಾನ್ವಿತ ನಟರಲ್ಲಿ ಒಬ್ಬರಾಗಲು ಕಾರಣವಾಯಿತು.
ಮದ್ರಾಸ್ ಫಿಲ್ಮ್ ಇನ್‌ಸ್ಟಿಟ್ಯೂಟ್‌ನಲ್ಲಿ ತರಬೇತಿ: ಮೋಹನ್ ಬಾಬು ಅವರು ಚಿತ್ರರಂಗದಲ್ಲಿ ವೃತ್ತಿಜೀವನವನ್ನು ಮುಂದುವರಿಸುವ ಗುರಿಯೊಂದಿಗೆ ಮದ್ರಾಸಿಗೆ ತೆರಳಿದರು. ಸಿನಿಮಾಸಕ್ತಿಯಿಂದ ಮದ್ರಾಸ್ ಫಿಲ್ಮ್ ಇನ್‌ಸ್ಟಿಟ್ಯೂಟ್‌ಗೆ ಸೇರಿಕೊಂಡು ತರಬೇತಿ ಪಡೆದರು. ಈ ಸಮಯದಲ್ಲಿ ಅವರು ಮದ್ರಾಸಿನ ವೈಎಂಸಿಎ ಕಾಲೇಜಿನಲ್ಲಿ ದೈಹಿಕ ತರಬೇತುದಾರರಾಗಿಯೂ ಕೆಲಸ ಮಾಡಿದರು. 1969ರಲ್ಲಿ ತಮ್ಮ ಸಿನಿಮಾ ವೃತ್ತಿಜೀವನದತ್ತ ಮೊದಲ ಹೆಜ್ಜೆ ಇಟ್ಟರು. ನಿರ್ದೇಶಕಿ ಲಕ್ಷ್ಮಿ ದೀಪಕ್ ಅವರ ಬಳಿ ಅಪ್ರೆಂಟಿಸ್ ಆಗಿ ಕೆಲಸ ಮಾಡಿದರು. 1974ರಲ್ಲಿ ಕನ್ನವಾರಿ ಕಲಲು ಮತ್ತು ಅಲ್ಲೂರಿ ಸೀತಾರಾಮ ರಾಜು ಚಿತ್ರಗಳಲ್ಲಿ ಪಾತ್ರ ವಹಿಸಿದರು. ಈ ಸಮಯದಲ್ಲಿ ಚಿತ್ರಕಥೆಗಾರ ಮತ್ತು ನಿರ್ದೇಶಕ ದಾಸರಿ ನಾರಾಯಣ ರಾವ್ ಅವರನ್ನು ಭೇಟಿಯಾದರು.
ಭಕ್ತವತ್ಸಲಂ ನಾಯ್ಡು ಎಂಬ ಹೆಸರಿನಲ್ಲಿ ನಾಯಕ ನಟನಾಗಿ ಪರಿಚಯ: 1975ರಲ್ಲಿ "ಸ್ವರ್ಗಂ ನರಕಂ" ಸಿನಿಮಾ ಮೂಲಕ ದೊಡ್ಡ ಹಿಟ್ ಪಡೆದುಕೊಂಡರು. ಅಲ್ಲಿ ಅವರು ದಾಸರಿ ನಾರಾಯಣ ರಾವ್ ಅವರ ಗಮನವನ್ನು ಸೆಳೆದರು. ಭಕ್ತವತ್ಸಲಂ ನಾಯ್ಡು ಎಂಬ ಹೆಸರಿನಲ್ಲಿ ನಾಯಕ ನಟರಾಗಿಯೂ ಪರಿಚಯಿಸಲ್ಪಟ್ಟರು. ಇದು ಅವರ ಭವಿಷ್ಯದ ಸ್ಟಾರ್‌ಡಮ್‌ಗೆ ಅಡಿಪಾಯವನ್ನು ಹಾಕಿತು. ಖಳನಾಯಕರಿಂದ ಹಿಡಿದು ನಾಯಕರವರೆಗೆ ಮತ್ತು ಕಾಮಿಕ್ ಪಾತ್ರಗಳವರೆಗೆ ಸಿಕ್ಕ ಪಾತ್ರಕ್ಕೆ ಜೀವ ತುಂಬುವ ಕೆಲಸ ಮಾಡಿದರು. "ಅಲ್ಲುಡುಗರು", "ಅಸೆಂಬ್ಲಿ ರೌಡಿ" ಮತ್ತು "ರೌಡಿ ಗಾರಿ ಪೆಲ್ಲಿ"ಯಂತಹ ಚಿತ್ರಗಳಲ್ಲಿನ ಅವರ ನಟನೆ ಅವರನ್ನು ಸ್ಟಾರ್ ಆಗಿ ನಿಲ್ಲಿಸಿತು. "ಅಲ್ಲರಿ ಮೊಗುಡು", "ಬ್ರಹ್ಮ", "ಮೇಜರ್ ಚಂದ್ರಕಾಂತ್" ಮತ್ತು "ಪೆದರಾಯುಡು" ಮುಂತಾದ ಚಿತ್ರಗಳು ಅವರಿಗೆ "ಕಲೆಕ್ಷನ್ ಕಿಂಗ್" ಎಂಬ ಬಿರುದನ್ನು ತಂದುಕೊಟ್ಟವು. "ಕೊಡಮ ಸಿಂಹಂ", "ಬ್ರಹ್ಮ", "ಚಿಟ್ಟೆಮ್ಮ ಮೊಗುಡು", "ಕಲೆಕ್ಟರ್ ಗಾರು" ಮುಂತಾದ ಚಿತ್ರಗಳಲ್ಲಿನ ಅವರ ಅಭಿನಯವು ಖ್ಯಾತಿಯನ್ನು ಮತ್ತಷ್ಟು ಗಟ್ಟಿಗೊಳಿಸಿತು.
ಉತ್ತಮ ಹೆಸರು ತಂದುಕೊಟ್ಟ ಮೇಜರ್ ಚಂದ್ರಕಾಂತ್:
1983ರಲ್ಲಿ ಮೋಹನ್ ಬಾಬು ಅವರು ಶ್ರೀ ಲಕ್ಷ್ಮಿ ಪ್ರಸನ್ನ ಪಿಕ್ಚರ್ಸ್ ಸ್ಥಾಪನೆಯೊಂದಿಗೆ ನಿರ್ಮಾಪಕರಾಗಿ ಹೊಸ ಪಾತ್ರವನ್ನು ವಹಿಸಿಕೊಂಡರು. 72ಕ್ಕೂ ಹೆಚ್ಚು ಯಶಸ್ವಿ ಚಿತ್ರಗಳನ್ನು ನಿರ್ಮಿಸಿದರು. 1993ರಲ್ಲಿ ಎನ್.ಟಿ. ರಾಮರಾವ್ ಜತೆಗೆ "ಮೇಜರ್ ಚಂದ್ರಕಾಂತ್" ಸಿನಿಮಾ ಮಾಡಿ ದೊಡ್ಡ ಹಿಟ್ ಪಡೆದುಕೊಂಡರು. ಆ ಕಾಲದ ದೊಡ್ಡ ಬ್ಲಾಕ್‌ಬಸ್ಟರ್‌ಗಳಲ್ಲಿ ಈ ಸಿನಿಮಾ ಸಹ ಒಂದಾಗಿದೆ. ತಮ್ಮ ಸಿನಿಮಾ ವೃತ್ತಿಜೀವನದ ಜೊತೆಗೆ, ಮೋಹನ್ ಬಾಬು ಅವರು 1992 ರಲ್ಲಿ ಶಿಕ್ಷಣ ಕ್ಷೇತ್ರಕ್ಕೆ ಕಾಲಿಟ್ಟರು. ಹಿಂದುಳಿದ ವಿದ್ಯಾರ್ಥಿಗಳಿಗೆ ಕೈಗೆಟುಕುವ ಶಿಕ್ಷಣವನ್ನು ಒದಗಿಸಲು ಶ್ರೀ ವಿದ್ಯಾನಿಕೇತನ ಎಜುಕೇಷನಲ್ ಟ್ರಸ್ಟ್ ಅನ್ನು ಸ್ಥಾಪಿಸಿದರು. ಶ್ರೀ ವಿದ್ಯಾನಿಕೇತನ ಇಂಟರ್‌ನ್ಯಾಶನಲ್ ಸ್ಕೂಲ್, ಕಾಲೇಜ್ ಆಫ್ ಇಂಜಿನಿಯರಿಂಗ್ ಮತ್ತು ಇತರೆ ಕಾಲೇಜುಗಳನ್ನು ಒಳಗೊಂಡಂತೆ ಶಿಕ್ಷಣ ಸಂಸ್ಥೆಗಳ ಸರಣಿಯನ್ನು ಸ್ಥಾಪಿಸಿದರು. ಅವುಗಳೀಗ ವಿದ್ಯಾರ್ಥಿಗಳಿಗೆ ಗುಣಮಟ್ಟದ ಶಿಕ್ಷಣವನ್ನು ಪೂರೈಸುತ್ತಿವೆ.
2007ರಲ್ಲಿ ಪದ್ಮಶ್ರೀ ಪ್ರಶಸ್ತಿ:
ಸಿನಿಮಾ ಮತ್ತು ಶಿಕ್ಷಣ ಕ್ಷೇತ್ರಗಳಿಗೆ ಮೋಹನ್ ಬಾಬು ಅವರ ಅಪಾರ ಕೊಡುಗೆಗಳಿಂದಾಗಿ ಅವರಿಗೆ ಭಾರತ ಸರ್ಕಾರದಿಂದ 2007ರಲ್ಲಿ ಪದ್ಮಶ್ರೀ ಪ್ರಶಸ್ತಿ ಸೇರಿದಂತೆ ಹಲವಾರು ಗೌರವಗಳು ಸಂದವು. ಅವರ ಪರಂಪರೆಯು 2022ರಲ್ಲಿ ತಿರುಪತಿಯಲ್ಲಿ ಮೋಹನ್ ಬಾಬು ವಿಶ್ವವಿದ್ಯಾಲಯದ ರಚನೆಯವರೆಗೆ ವಿಸ್ತರಿಸಿದೆ. 2016ರಲ್ಲಿ ಫಿಲ್ಮ್‌ಫೇರ್ ಜೀವಮಾನ ಸಾಧನೆ ಪ್ರಶಸ್ತಿ (ದಕ್ಷಿಣ) ಸೇರಿದಂತೆ ಸಾಕಷ್ಟು ಪ್ರಶಸ್ತಿಗಳು ಅರಸಿ ಬಂದಿವೆ. ಅತ್ಯುತ್ತಮ ನಟ ಪೆದರಾಯುಡು (1995), SIIMA ವಿಶೇಷ ಮೆಚ್ಚುಗೆ ಪ್ರಶಸ್ತಿ (2017), ಗ್ಲೋರಿ ಆಫ್ ಇಂಡಿಯಾ ಇಂಟರ್ನ್ಯಾಷನಲ್ ಪ್ರಶಸ್ತಿ, ಪ್ರತಿಷ್ಠಿತ ನವರಸ ನಟರತ್ನ ಪ್ರಶಸ್ತಿ (2016) ಸಹ ಪಡೆದಿದ್ದಾರೆ. 1995 ರಿಂದ 2001ರವರೆಗೆ ರಾಜ್ಯಸಭೆಯಲ್ಲಿ ಸಂಸತ್ ಸದಸ್ಯರಾಗಿಯೂ ಸೇವೆ ಸಲ್ಲಿಸಿದ್ದಾರೆ.
ಇದನ್ನೂ ಓದಿ: ಅಲ್ಲು ಅರ್ಜುನ್ ಜೊತೆ ಸೊಂಟ ಬಳುಕಿಸಿದ ಶ್ರೀಲೀಲಾ: 'ಕಿಸ್ಸಿಕ್' ಪ್ರೋಮೋ ನೋಡಿದ್ರಾ?
ಪ್ರಸ್ತುತ, ಮೋಹನ್ ಬಾಬು ಐತಿಹಾಸಿಕ ನಾಟಕ ಕಣ್ಣಪ್ಪನಲ್ಲಿ ಕೆಲಸ ಮಾಡುತ್ತಿದ್ದಾರೆ. ಇದು ಭಾರಿ ನಿರೀಕ್ಷೆಯನ್ನು ಹುಟ್ಟುಹಾಕಿದೆ. ಚಿತ್ರದಲ್ಲಿ ಅವರ ಮಹದೇವ ಶಾಸ್ತ್ರಿ ಪಾತ್ರವು ಅವರ ವೃತ್ತಿಜೀವನದಲ್ಲಿ ಮತ್ತೊಂದು ನಿರ್ಣಾಯಕ ಪಾತ್ರವಾಗುವಂತೆ ತೋರಿದೆ. ಈ ಚಿತ್ರವು ಭಕ್ತಿಯ ವಿಷಯಗಳು ಮತ್ತು ಶ್ರೀ ಕಾಳಹಸ್ತಿಯ ಮಹತ್ವವನ್ನು ಅನ್ವೇಷಿಸಲು ಸಿದ್ಧವಾಗಿದೆ. ಭಾರತೀಯ ಚಿತ್ರರಂಗಕ್ಕೆ ಜೀವಮಾನದ ಶ್ರೇಷ್ಠತೆಯನ್ನು ನೀಡಿದ ನಟನ ಶೀರ್ಷಿಕೆಗೆ ಮತ್ತೊಂದು ಗರಿಯಾಗಲಿದೆ ಎಂದು ಭರವಸೆ ನೀಡುತ್ತದೆ.
ಇದನ್ನೂ ಓದಿ: ಬಿಗ್ ಬಾಸ್ ಸ್ಪರ್ಧಿ ಹನುಮಂತುಗೆ ಬಟ್ಟೆ ಕಳುಹಿಸಿಕೊಟ್ಟ ಸುದೀಪ್‌: ಹೃದಯಸ್ಪರ್ಶಿ ಪತ್ರದಲ್ಲೇನಿದೆ?
ಮೋಹನ್ ಬಾಬು ಚಿತ್ರರಂಗದಲ್ಲಿ ಸುವರ್ಣ ಮಹೋತ್ಸವ ಆಚರಿಸುತ್ತಿದ್ದಾರೆ. ಸಣ್ಣ ಪಟ್ಟಣದ ಕನಸುಗಾರನಿಂದ ಸಿನಿಮಾ ಐಕಾನ್‌ವರೆಗೆ ಅವರ ಪ್ರಯಾಣವು ಅವರ ಉತ್ಸಾಹ, ಪರಿಶ್ರಮಕ್ಕೆ ಸಾಕ್ಷಿಯಾಗಿದೆ. ಸಿನಿಮಾ, ಶಿಕ್ಷಣ ಮತ್ತು ಸಮಾಜಕ್ಕೆ ಅವರ ಕೊಡುಗೆಗಳು ಮುಂದಿನ ಪೀಳಿಗೆಗೆ ಸ್ಫೂರ್ತಿ ನೀಡುತ್ತಲೇ ಇರುತ್ತವೆ.
