ಬೆಂಗಳೂರು: ವೈದ್ಯಕೀಯ, ಎಂಜಿನಿಯರಿಂಗ್ ಸೇರಿದಂತೆ ಇತರ ವೃತ್ತಿಪರ ಕೋರ್ಸ್ಗಳ ಪ್ರವೇಶದ ಎರಡನೇ ಸುತ್ತಿನ ಸೀಟು ಹಂಚಿಕೆಯ ತಾತ್ಕಾಲಿಕ ಫಲಿತಾಂಶವನ್ನು ವೆಬ್ಸೈಟ್ನಲ್ಲಿ ಪ್ರಕಟಿಸಲಾಗಿದೆ ಎಂದು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರದ ಕಾರ್ಯನಿರ್ವಾಹಕ ನಿರ್ದೇಶಕ ಹೆಚ್.ಪ್ರಸನ್ನ ತಿಳಿಸಿದ್ದಾರೆ.
ಈ ಸುತ್ತಿನ ಸೀಟು ಹಂಚಿಕೆಗೆ ಸೆಪ್ಟೆಂಬರ್ 13ರ ಮಧ್ಯಾಹ್ನ 2 ಗಂಟೆವರೆಗೆ ನಮೂದಿಸಿದ ಆಪ್ಶನ್ಗಳನ್ನು ಪರಿಗಣಿಸಲಾಗಿದೆ ಎಂದು ಅವರು ಪತ್ರಿಕಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ. ಇದು ತಾತ್ಕಾಲಿಕ ಫಲಿತಾಂಶವಾಗಿರುವ ಕಾರಣ ಅಭ್ಯರ್ಥಿಗಳು ಕಾಲೇಜುಗಳಿಗೆ ಹೋಗಿ ಪ್ರವೇಶ ಪಡೆಯುವಂತಿಲ್ಲ ಎಂದು ವಿವರಿಸಿದ್ದಾರೆ.
ಯಾವುದಾದರೂ ನಿರ್ದಿಷ್ಟ ಆಕ್ಷೇಪಣೆಗಳು ಇದ್ದಲ್ಲಿ ಸೆಪ್ಟೆಂಬರ್ 19ರ ಬೆಳಗ್ಗೆ 10ಗಂಟೆಯೊಳಗೆ keauthority-ka@nic.inಗೆ ಇ-ಮೇಲ್ ಮಾಡಬಹುದು. ಆಕ್ಷೇಪಣೆ ಪರಿಶೀಲಿಸಿದ ನಂತರ ಅಂತಿಮ ಫಲಿತಾಂಶ ಪ್ರಕಟಿಸಲಾಗುವುದು ಎಂದು ಹೆಚ್. ಪ್ರಸನ್ನ ಮಾಹಿತಿ ನೀಡಿದ್ದಾರೆ.
ಪ್ರಾಧಿಕಾರದ ವೆಬ್ಸೈಟ್ಗೆ ಭೇಟಿ ನೀಡಿ: ಸೀಟು ಹಂಚಿಕೆ ಕುರಿತು ಪ್ರಕಟಿಸಲಾಗುವ ಸೂಚನೆಗಳು, ಅಧಿಸೂಚನೆಗಳು ಮತ್ತು ಪ್ರಕಟಣೆಗಳನ್ನು ನೋಡದೆ ಇರುವ ಕಾರಣದಿಂದ ಉಂಟಾಗುವ ಯಾವುದೇ ಪರಿಣಾಮಗಳಿಗೆ ಪ್ರಾಧಿಕಾರ ಜವಾಬ್ದಾರಿಯಲ್ಲ. ಅಭ್ಯರ್ಥಿಗಳು ಪ್ರತಿದಿನ ಕನಿಷ್ಠ ಎರಡು ಬಾರಿ ಪ್ರಾಧಿಕಾರದ ವೆಬ್ಸೈಟ್ಗೆ ಭೇಟಿ ನೀಡಬೇಕು ಎಂದು ಅವರು ತಿಳಿಸಿದ್ದಾರೆ.
ಸೀಟು ಹಂಚಿಕೆ ಮಾಹಿತಿ ಹೀಗಿದೆ: ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ ಪ್ರಕಟಿಸಿರುವ ಎರಡನೇ ಸುತ್ತಿನ ಸೀಟು ಹಂಚಿಕೆಯ ತಾತ್ಕಾಲಿಕ ಫಲಿತಾಂಶದ ಪ್ರಕಾರ, ಒಟ್ಟು 16,748 ಸೀಟು ಉಳಿದಿವೆ. ಒಟ್ಟು 1,29,417 ಸೀಟುಗಳ ಪೈಕಿ 1,12,677 ಸೀಟುಗಳು ಹಂಚಿಕೆಯಾಗಿವೆ ಎಂದು ಪ್ರಾಧಿಕಾರದ ಹೆಚ್.ಪ್ರಸನ್ನ ಮಾಹಿತಿ ಹಂಚಿಕೊಂಡಿದ್ದಾರೆ.
ಎಂಜಿನಿಯರಿಂಗ್ ಕೋರ್ಸ್ಗಳಿಗೆ 73,847 ಸೀಟು ಹಂಚಿಕೆಯಾಗಿದ್ದು, 3,126 ಸೀಟು ಉಳಿದಿವೆ. ವೈದ್ಯಕೀಯ ಕೋರ್ಸ್ ಪ್ರವೇಶಕ್ಕೆ 8,798 ಸೀಟು ಹಂಚಿಕೆಯಾಗಿದ್ದು, 383 ಮ್ಯಾನೇಜ್ಮೆಂಟ್ ಸೀಟು ಮಾತ್ರ ಹಂಚಿಕೆಗೆ ಬಾಕಿ ಇವೆ. ದಂತ ವೈದ್ಯಕೀಯ ಕೋರ್ಸ್ನಲ್ಲಿ 2,636 ಸೀಟು ಹಂಚಿಕೆಯಾಗಿ, ಕೇವಲ 14 ಸೀಟು ಮಾತ್ರ ಉಳಿದಿವೆ. ಬಿ-ಫಾರ್ಮಾ ಮತ್ತು ಫಾರ್ಮಾ- ಡಿ ಕೋರ್ಸ್ ಗಳ ಎಲ್ಲ ಸೀಟು ಹಂಚಿಕೆಯಾಗಿವೆ. ಕೃಷಿ ಕೋರ್ಸ್ಗಳಿಗೆ 2,782 ಸೀಟುಗಳ ಪೈಕಿ 12 ಸೀಟು ಮಾತ್ರ ಲಭ್ಯ ಇವೆ.
ಆಯುಷ್ನಲ್ಲಿ 5,790 ಸೀಟುಗಳು ಹಂಚಿಕೆಯಾಗಿದ್ದು, 2,477 ಸೀಟು ಉಳಿದಿವೆ. ಯೋಗ, ನ್ಯಾಚುರೋಪತಿಯಲ್ಕಿ 374 ಸೀಟು ಹಂಚಿಕೆಯಾಗಿ, 34 ಸೀಟು ಬಾಕಿ ಇವೆ. ಪಶುವೈದ್ಯ ಕೋರ್ಸ್ನಲ್ಲಿ 315 ಸೀಟು ಹಂಚಿಕೆಯಾಗಿದ್ದು, ಕೇವಲ ಒಂದು ಸೀಟು ಮಾತ್ರ ಲಭ್ಯವಿದೆ ಎಂದು ಪ್ರಾಧಿಕಾರದ ಕಾರ್ಯನಿರ್ವಾಹಕ ನಿರ್ದೇಶಕರು ವಿವರಿಸಿದ್ದಾರೆ.
ನರ್ಸಿಂಗ್ ಕೋರ್ಸ್ನಲ್ಲಿ 14,448 ಸೀಟು ಹಂಚಿಕೆಯಾಗಿ, 10,194 ಸೀಟುಗಳು ಬಾಕಿ ಉಳಿದಿವೆ. ಆರ್ಕಿಟೆಕ್ಚರ್ ಕೋರ್ಸ್ನಲ್ಲಿ 484 ಸೀಟುಗಳು ಹಂಚಿಕೆಯಾಗಿ, 498 ಸೀಟು ಬಾಕಿ ಇವೆ ಎಂದು ಅವರು ತಿಳಿಸಿದ್ದಾರೆ.
ಇದನ್ನೂ ಓದಿ: ಚಿಕ್ಕಬಳ್ಳಾಪುರದಲ್ಲಿ ಮಹಿಳೆಯರಿಗೆ ಭರ್ಜರಿ ಉದ್ಯೋಗಾವಕಾಶ - Chikkaballapur WCD Recruitment
