ವಾಷಿಂಗ್ಟನ್ ಡಿಸಿ ( ಅಮೆರಿಕ): ದಕ್ಷಿಣ ಏಷ್ಯಾದ ಬೆಳವಣಿಗೆಯ ದರ 2024 ರಲ್ಲಿ 6.0 ಪ್ರತಿಶತದಷ್ಟು ಇರಲಿದೆ ಎಂದು ವಿಶ್ವಬ್ಯಾಂಕ್ ಅಂದಾಜಿಸಿದೆ. ದಕ್ಷಿಣ ಏಷ್ಯಾದ ಈ ಪರಿ ಬೆಳವಣಿಗೆಯು ಭಾರತದ ಆರ್ಥಿಕತೆಯ ಅಭಿವೃದ್ಧಿಯಿಂದ ಪ್ರಭಾವಿತವಾಗಿದೆ ಎಂದು ವರ್ಲ್ಡ್ ಬ್ಯಾಂಕ್ ಹೇಳಿದೆ.
ಜಾಬ್ಸ್ ಫಾರ್ ರೆಸಿಲಿಯೆನ್ಸ್ ಪ್ರಕಾರ, ಮಂಗಳವಾರ ಬಿಡುಗಡೆಯಾದ ಇತ್ತೀಚಿನ ದಕ್ಷಿಣ ಏಷ್ಯಾ ಅಭಿವೃದ್ಧಿ ವರದಿಯಲ್ಲಿ, ಭಾರತದಲ್ಲಿ ಉತ್ಪಾದನಾ ಬೆಳವಣಿಗೆಯು 2023-24 ನೇ ಸಾಲಿನಲ್ಲಿ ಶೇ 7.5ಕ್ಕೆ ತಲುಪುವ ಮೊದಲು ಮಧ್ಯಮ ಅವಧಿಯಲ್ಲಿ ಶೇ 6.6ಕ್ಕೆ ಮರಳುವ ನಿರೀಕ್ಷೆಯಿದೆ. ಸೇವಾ ವಲಯ ಹಾಗೂ ಉದ್ಯಮಗಳಲ್ಲಿನ ಚಟುವಟಿಕೆಗಳು ದೃಢವಾಗಿ ಬೆಳವಣಿಗೆ ಕಾಣುವ ನಿರೀಕ್ಷೆ ಇದೆ ಎಂದು ಅದು ತನ್ನ ವರದಿಯಲ್ಲಿ ಹೇಳಿದೆ.
ವಿಶ್ವ ಬ್ಯಾಂಕ್ ವರದಿಯ ಪ್ರಕಾರ ನಿರಂತರವಾದ ರಚನಾತ್ಮಕ ಸವಾಲುಗಳು ಆರ್ಥಿಕ ಬೆಳವಣಿಗೆಗಳನ್ನು ಕುಂಠಿತ ಮಾಡಬಹುದು. ಉದ್ಯೋಗಗಳನ್ನು ಸೃಷ್ಟಿಸುವ ಸವಾಲುಗಳು ರಾಷ್ಟ್ರಗಳ ಮುಂದಿದ್ದು, ಹವಾಮಾನ ವೈಪರೀತ್ಯವೂ ಬಲವಾದ ಹೊಡೆತ ನೀಡುವ ಸಾಧ್ಯತೆಗಳೂ ಇವೆ ಎಂದು ವಿಶ್ವಬ್ಯಾಂಕ್ ಎಚ್ಚರಿಕೆ ಕೂಡಾ ನೀಡಿದೆ. "ದಕ್ಷಿಣ ಏಷ್ಯಾದ ಬೆಳವಣಿಗೆಯ ನಿರೀಕ್ಷೆಗಳು ಅಲ್ಪಾವಧಿಯಲ್ಲಿ ಉಜ್ವಲವಾಗಿರುತ್ತವೆ, ಆದರೆ, ದುರ್ಬಲವಾದ ಹಣಕಾಸಿನ ಸ್ಥಿತಿಗಳು ಮತ್ತು ಹೆಚ್ಚುತ್ತಿರುವ ಹವಾಮಾನ ವೈಪರೀತ್ಯಗಳು ದಿಗಂತದಲ್ಲಿ ಕಪ್ಪು ಮೋಡಗಳಿದ್ದಂತೆ ಎಂದು ವಿಶ್ವ ಬ್ಯಾಂಕ್ನ ದಕ್ಷಿಣ ಏಷ್ಯಾದ ಉಪಾಧ್ಯಕ್ಷ ಮಾರ್ಟಿನ್ ರೈಸರ್ ಹೇಳಿದ್ದಾರೆ
ದೇಶದ ಆರ್ಥಿಕ ಬೆಳವಣಿಗೆಗಳು ಇದೇ ರೀತಿಯಲ್ಲಿ ಮುಂದುವರೆಯಬೇಕಾದರೆ, ಖಾಸಗಿ ಹೂಡಿಕೆಯನ್ನು ಹೆಚ್ಚಿಸಿಕೊಳ್ಳಬೇಕು ಮತ್ತು ಹೆಚ್ಚಿನ ಉದ್ಯೋಗಾವಕಾಶಗಳನ್ನು ಸೃಷ್ಟಿಸಬೇಕು ಎಂದು ಅವರು ಇದೇ ವೇಳೆ ಸಲಹೆ ನೀಡಿದ್ದಾರೆ. FY24-25 ರಲ್ಲಿ 2.3 ಶೇಕಡಾ ಬೆಳವಣಿಗೆಯೊಂದಿಗೆ ಪಾಕಿಸ್ತಾನದ ಆರ್ಥಿಕತೆ ಸ್ವಲ್ಪ ಮಟ್ಟಿಗೆ ಚೇತರಿಕೆ ಕಾಣಬಹುದು ಎಂದು ಯೋಜಿಸಿದೆ. ಆದರೆ, ಶ್ರೀಲಂಕಾದಲ್ಲಿ ಉತ್ಪಾದನೆಯ ಬೆಳವಣಿಗೆಯು 2025 ರಲ್ಲಿ 2.5 ಶೇಕಡಾಕ್ಕೆ ಹೆಚ್ಚಾಗುವ ನಿರೀಕ್ಷೆಯಿದೆ, ಪ್ರವಾಸೋದ್ಯಮ ಚೇತರಿಕೆ ಕಾಣಬಹುದು ಎಂದು ಅಂದಾಜಿಸಲಾಗಿದೆ. ಬಾಂಗ್ಲಾದೇಶದಲ್ಲಿ, 2024 ಮತ್ತು 25 ರಲ್ಲಿ ಉತ್ಪಾದನೆಯು ಶೇಕಡಾ 5.7 ರಷ್ಟು ಏರಿಕೆಯಾಗುವ ನಿರೀಕ್ಷೆಯಿದೆ ಎಂದು ವರ್ಲ್ಡ್ ಬ್ಯಾಂಕ್ ತನ್ನ ವರದಿಯಲ್ಲಿ ಹೇಳಿದೆ.
ಮುಕ್ತ ವ್ಯಾಪಾರ ಮತ್ತು ಹಣಕಾಸು ಹರಿವು ಹೆಚ್ಚಿಸುವುದು, ಹಣಕಾಸು ವಲಯದ ನಿರ್ಬಂಧಗಳನ್ನು ತೆಗೆದುಹಾಕುವುದು, ಶಿಕ್ಷಣ ಕ್ಷೇತ್ರದಲ್ಲಿ ಸುಧಾರಣೆ ಮತ್ತು ಮಹಿಳೆಯರ ಆರ್ಥಿಕ ಚಟುವಟಿಕೆಯ ಮೇಲಿನ ನಿರ್ಬಂಧಗಳನ್ನು ತೆಗೆದುಹಾಕುವ ಮೂಲಕ ಉದ್ಯೋಗಾವಕಾಶಳನ್ನು ಹೆಚ್ಚು ಮಾಡುವಂತೆ ಬ್ಯಾಂಕ್ ಸಲಹೆ ನೀಡಿದೆ. ಹಿಂದಿನ ಮಾರ್ಚ್ 27 ರಂದು, ಮೋರ್ಗಾನ್ ಸ್ಟಾನ್ಲಿ ತನ್ನ ಭಾರತದ ಜಿಡಿಪಿ ಬೆಳವಣಿಗೆಯನ್ನು 2024-25ನೇ ಸಾಲಿನ ಹಣಕಾಸು ವರ್ಷಕ್ಕೆ 6.8 ಪ್ರತಿಶತಕ್ಕೆ ಏರಿಕೆ ಆಗಲಿದೆ ಎಂದು ಹೇಳಿತ್ತು.
ಇದನ್ನು ಓದಿ: ನಮಗೆ ಕೊಟ್ಟ GST ಬಿಲ್‌ ಅಸಲಿಯೋ, ನಕಲಿಯೋ ತಿಳಿಯುವುದು ಹೇಗೆ? - Fake GST Bill
