ನವದೆಹಲಿ: ಒಂದಕ್ಕಿಂತ ಹೆಚ್ಚು ಮೊಬೈಲ್ ಸಿಮ್ಗಳನ್ನು ಹೊಂದಿರುವ ಗ್ರಾಹಕರಿಗೆ ಇದು ಮಹತ್ವದ ಮಾಹಿತಿ. ಸಿಮ್ನಲ್ಲಿ 20 ರೂ ಬ್ಯಾಲೆನ್ಸ್ ಇದ್ರೆ ಆ ಸಿಮ್ 90 ದಿನಗಳವರೆಗೆ ನಿಷ್ಕ್ರಿಯವಾಗಲ್ಲ ಎಂದು ಟ್ರಾಯ್ ಸ್ಪಷ್ಟಪಡಿಸಿದೆ. ಜೊತೆಗೆ ಕೇವಲ ವಾಯ್ಸ್ ಕರೆಗಳಿಗೆ ಮಾತ್ರ ಪ್ಲಾನ್ಗಳನ್ನು ರೂಪಿಸಲು ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ (ಟ್ರಾಯ್)ವು ಟೆಲಿಕಾಂ ಕಂಪನಿಗಳಿಗೆ ನಿರ್ದೇಶನ ನೀಡಿದೆ.
ಸಿಮ್ ಕಾರ್ಡ್ಗಳ ನಿಷ್ಕ್ರಿಯತೆ ಮತ್ತು ವಾಯ್ಸ್ ಕರೆಗಳ ಯೋಜನೆಗಳಿಗೆ ಸಂಬಂಧಿಸಿದಂತೆ ಟ್ರಾಯ್ ಮಹತ್ವದ ನಿರ್ಧಾರ ಕೈಗೊಂಡಿದೆ. ಇದು ಇಂಟರ್ನೆಟ್ ಡೇಟಾ ಅಗತ್ಯವಿಲ್ಲದ ಬಳಕೆದಾರರಿಗೆ ಹೆಚ್ಚಿನ ಅನುಕೂಲ ನೀಡುತ್ತದೆ.
20 ರೂ ಬ್ಯಾಲೆನ್ಸ್ ಇದ್ರೆ ಸಿಮ್ ಸಕ್ರಿಯ: ಟೆಲಿಕಾಂ ಗ್ರಾಹಕ ಸಂರಕ್ಷಣಾ ನಿಯಮಗಳ (TCPR) 6ನೇ ತಿದ್ದುಪಡಿಯ ಪ್ರಕಾರ, ಯಾವುದೇ ಟೆಲಿಕಾಂ ಕಂಪನಿಯ ಬಳಕೆದಾರರು ತಮ್ಮ ಸಿಮ್ನಲ್ಲಿ ಕನಿಷ್ಠ 20 ರೂ ಬ್ಯಾಲೆನ್ಸ್ ಹೊಂದಿದ್ದರೆ 90 ದಿನಗಳವರೆಗೆ ಸಿಮ್ ನಿಷ್ಕ್ರಿಯವಾಗಲ್ಲ ಎಂದು ಟ್ರಾಯ್ ತಿಳಿಸಿದೆ.
— TRAI (@TRAI) January 23, 2025
ಕೇವಲ ಕರೆ ಮತ್ತು ಎಸ್ಎಂಎಸ್ನಂತಹ ಅಗತ್ಯ ಸೇವೆ ಬಳಸುವ 2ಜಿ ಬಳಕೆದಾರರಿಗೆ ರೀಚಾರ್ಜ್ ಹೊರೆ ತಗ್ಗಿಸಲು ಟ್ರಾಯ್ ಕ್ರಮ ಕೈಗೊಂಡಿದೆ. ಕೇವಲ 20 ರೂ ರೀಚಾರ್ಜ್ ಮಾಡಿದ್ರೆ 90 ದಿನಗಳವರೆಗೆ ಸಿಮ್ ಸಕ್ರಿಯವಾಗಿರಲಿದೆ. ಇದರಿಂದ 150 ಮಿಲಿಯನ್ 2ಜಿ ಬಳಕೆದಾರರಿಗೆ ಅನುಕೂಲವಾಗಲಿದೆ.
ವಾಯ್ಸ್ ಕಾಲ್ ರೀಚಾರ್ಜ್ ಪ್ಲಾನ್ಗಳು: ಡೇಟಾ ಅಗತ್ಯವಾದರೂ, ಕೆಲ ಬಳಕೆದಾರರಿಗೆ ಇದು ಅನಗತ್ಯ. ಹೀಗಾಗಿ, ಇಂಟರ್ನೆಟ್ ಬಳಸದ ಗ್ರಾಹಕರಿಗೆ ಹೆಚ್ಚಿನ ಅನುಕೂಲ ಮಾಡಿಕೊಡಲು ಟೆಲಿಕಾಂ ಕಂಪನಿಗಳು ಕೇವಲ ವಾಯ್ಸ್ ಕಾಲ್ ಯೋಜನೆಗಳನ್ನು ರೂಪಿಸಲು ಸೂಚಿಸಿದೆ. ಇದರಲ್ಲಿ ಬಳಕೆದಾರರು ಕೇವಲ ಕರೆ ಮಾಡುವ ಮತ್ತು ಸಂದೇಶ ರವಾನಿಸುವ ಸೇವೆಯನ್ನು ಹೊಂದಿರುತ್ತಾರೆ. ದರ ಕೂಡ ಕಡಿಮೆ ಇರುತ್ತದೆ.
ಈಗಿನ ಡೇಟಾ ಪ್ಯಾಕ್ ಸಹಿತ ಯೋಜನೆಗಳು ದುಬಾರಿಯಾಗಿದ್ದು, ಇಂಟರ್ನೆಟ್ ಬಳಸದ ಗ್ರಾಹಕರಿಗೆ ಇದು ಹೊರೆಯಾಗಿತ್ತು. ಇದನ್ನು ತಪ್ಪಿಸಲು ಟ್ರಾಯ್ ಹೊಸ ನಿಯಮ ರೂಪಿಸಿದೆ.
ಈಗ ಕರೆ ಯೋಜನೆಗಳು ಹೇಗಿವೆ?: ಟ್ರಾಯ್ ಸೂಚನೆಯ ಬಳಿಕ ಜಿಯೋ ಮತ್ತು ಭಾರ್ತಿ ಏರ್ಟೆಲ್ ಟೆಲಿಕಾಂ ಕಂಪನಿಗಳು ಕೇವಲ ಕರೆ ಮಾಡಲು ಮಾಡಲು ಮಾತ್ರ ಪ್ರೀಪೇಯ್ಡ್ ಯೋಜನೆಗಳನ್ನು ಪ್ರಾರಂಭಿಸಿವೆ. ಉದಾಹರಣೆಗೆ, ಜಿಯೋ, 84 ದಿನಗಳ ಅವಧಿಗೆ 458 ರೂಪಾಯಿ, ವಾರ್ಷಿಕ ಯೋಜನೆಗೆ 1,958 ರೂಪಾಯಿ ದರ ನಿಗದಿ ಮಾಡಿದೆ. ಎರಡೂ ಯೋಜನೆಗಳು ಅನಿಯಮಿತ ಧ್ವನಿ ಕರೆ, ಉಚಿತ SMS ಮತ್ತು ಜಿಯೋ ಅಪ್ಲಿಕೇಶನ್‌ಗಳ ಉಚಿತ ಬಳಕೆ ಹೊಂದಿವೆ. ಏರ್ಟೆಲ್ ಕೂಡ ಧ್ವನಿ ಕರೆ ಯೋಜನೆಗಳನ್ನು ಪರಿಷ್ಕರಿಸಿದೆ. 84 ದಿನಗಳ ಅವಧಿಗೆ 499 ರೂಪಾಯಿ, ವಾರ್ಷಿಕ ಪ್ಯಾಕೇಜ್‌ಗಳಿಗೆ ₹40-70 ರಷ್ಟು ಕಡಿಮೆ ಮಾಡಿದೆ.
ಓದಿ: Jio ಗ್ರಾಹಕರಿಗೆ ಸೂಪರ್ ಅಪ್‌ಡೇಟ್: ಮನೆಯಲ್ಲೇ ಕುಳಿತು SIM ಆ್ಯಕ್ಟಿವೇಟ್ ಮಾಡಿ! - JIO iActivate Service
