ನವದೆಹಲಿ: ಭಾರತದ ಷೇರು ಮಾರುಕಟ್ಟೆಗಳು ಸೋಮವಾರದ ವಹಿವಾಟಿನಲ್ಲಿ ಏರಿಕೆಯೊಂದಿಗೆ ಕೊನೆಗೊಂಡಿವೆ. 30 ಷೇರುಗಳ ಸೆನ್ಸೆಕ್ಸ್ 454 ಪಾಯಿಂಟ್ ಅಥವಾ ಶೇಕಡಾ 0.59 ರಷ್ಟು ಏರಿಕೆಯಾಗಿ 77,073.44 ರಲ್ಲಿ ಕೊನೆಗೊಂಡಿದೆ. ಸೂಚ್ಯಂಕವು ಇಂದು 76,584.84-77,318.94 ರ ವ್ಯಾಪ್ತಿಯಲ್ಲಿ ವಹಿವಾಟು ನಡೆಸಿತು. ಎನ್ಎಸ್ಇ ನಿಫ್ಟಿ 50 ಕೂಡ 141 ಪಾಯಿಂಟ್ಸ್ ಅಥವಾ ಶೇಕಡಾ 0.61 ರಷ್ಟು ಲಾಭದೊಂದಿಗೆ 23,344.75 ರಲ್ಲಿ ಕೊನೆಗೊಂಡಿತು. ನಿಫ್ಟಿ50 ದಿನದ ಗರಿಷ್ಠ 23,391.10 ಮತ್ತು ಕನಿಷ್ಠ 23,170.65 ರ ಮಧ್ಯೆ ವಹಿವಾಟು ನಡೆಸಿದೆ.
ನಿಫ್ಟಿ50 ಯಲ್ಲಿನ 50 ಘಟಕ ಷೇರುಗಳ ಪೈಕಿ 29 ಷೇರುಗಳು ಲಾಭದಲ್ಲಿ ಕೊನೆಗೊಂಡವು. ನಿಫ್ಟಿಯಲ್ಲಿ ಕೊಟಕ್ ಮಹೀಂದ್ರಾ ಬ್ಯಾಂಕ್, ವಿಪ್ರೋ, ಬಜಾಜ್ ಫೈನಾನ್ಸ್, ಬಜಾಜ್ ಫಿನ್ ಸರ್ವ್, ಎನ್ ಟಿಪಿಸಿ, ಎಸ್ ಬಿಐ, ಅದಾನಿ ಎಂಟರ್ ಪ್ರೈಸಸ್, ಭಾರತ್ ಎಲೆಕ್ಟ್ರಾನಿಕ್ಸ್ ಮತ್ತು ಬಿಪಿಸಿಎಲ್ ಲಾಭ ಗಳಿಸಿದ ಪ್ರಮುಖ ಷೇರುಗಳಾಗಿವೆ. ಎಸ್ಬಿಐ ಲೈಫ್, ಟ್ರೆಂಟ್, ಶ್ರೀರಾಮ್ ಫೈನಾನ್ಸ್ ಮತ್ತು ಅದಾನಿ ಪೋರ್ಟ್ಸ್ ಸೇರಿದಂತೆ 21 ಷೇರುಗಳು ಇಳಿಕೆಯೊಂದಿಗೆ ಕೊನೆಗೊಂಡರೆ, ಒಂದು ಷೇರು ಬದಲಾಗದೆ ಉಳಿದಿದೆ.
ವಿಶಾಲ ಮಾರುಕಟ್ಟೆಗಳಲ್ಲಿ, ನಿಫ್ಟಿ ಮಿಡ್ ಕ್ಯಾಪ್ 100 ಶೇಕಡಾ 0.91 ರಷ್ಟು ಏರಿಕೆಯಾಗಿ 55,106.20 ರಲ್ಲಿ ಕೊನೆಗೊಂಡರೆ, ನಿಫ್ಟಿ ಸ್ಮಾಲ್ ಕ್ಯಾಪ್ 100 ಶೇಕಡಾ 1.09 ರಷ್ಟು ಲಾಭದೊಂದಿಗೆ 17,864.65 ಕ್ಕೆ ಕೊನೆಗೊಂಡಿದೆ.
ನಿಫ್ಟಿ ವಲಯ ಸೂಚ್ಯಂಕಗಳು ಮಿಶ್ರ ಪ್ರವೃತ್ತಿಯನ್ನು ತೋರಿಸಿದ್ದು, ನಿಫ್ಟಿ ಖಾಸಗಿ ಬ್ಯಾಂಕ್ ಶೇಕಡಾ 2.38 ರಷ್ಟು ಲಾಭ ಗಳಿಸಿದರೆ, ನಿಫ್ಟಿ ಪಿಎಸ್ಯು ಬ್ಯಾಂಕ್ (1.99 ಶೇಕಡಾ) ಮತ್ತು ನಿಫ್ಟಿ ಬ್ಯಾಂಕ್ (1.67 ಶೇಕಡಾ) ನಂತರದ ಸ್ಥಾನಗಳಲ್ಲಿವೆ. ನಿಫ್ಟಿ ಫೈನಾನ್ಷಿಯಲ್ ಸರ್ವೀಸಸ್ ಶೇ 1.41 ಮತ್ತು ನಿಫ್ಟಿ ಮೆಟಲ್ ಶೇ 1.08ರಷ್ಟು ಏರಿಕೆ ಕಂಡಿವೆ. ಐಟಿ ಮತ್ತು ರಿಯಾಲ್ಟಿ ಸಾಧಾರಣ ಲಾಭವನ್ನು ದಾಖಲಿಸಿದರೆ, ನಿಫ್ಟಿ ಆಟೋ ಮತ್ತು ನಿಫ್ಟಿ ಎಫ್ಎಂಸಿಜಿ ಕ್ರಮವಾಗಿ ಶೇಕಡಾ 0.52 ಮತ್ತು ಶೇಕಡಾ 0.11 ರಷ್ಟು ಕುಸಿದವು.
ಸೋಮವಾರದಂದು ಯುಎಸ್ ಡಾಲರ್ ವಿರುದ್ಧ ರೂಪಾಯಿ 86.5675 ರಲ್ಲಿ ಕೊನೆಗೊಂಡಿದೆ. ಇದು ಹಿಂದಿನ ಅಧಿವೇಶನದಲ್ಲಿ 86.61 ರಲ್ಲಿ ಕೊನೆಗೊಂಡಿತ್ತು. ಡಾಲರ್ ಸೂಚ್ಯಂಕವು ಶೇಕಡಾ 0.2 ರಷ್ಟು ಕುಸಿದು 109.1 ಕ್ಕೆ ತಲುಪಿದ್ದರೆ, ಏಷ್ಯಾದ ಕರೆನ್ಸಿಗಳು ಬಹುತೇಕ 0.1% ಮತ್ತು 0.7% ರ ವ್ಯಾಪ್ತಿಯಲ್ಲಿ ಹೆಚ್ಚಳವಾಗಿವೆ.
ಇದನ್ನೂ ಓದಿ : ಸದ್ದು ಮಾಡಿದ್ದ ಹಿಂಡನ್ಬರ್ಗ್ ರಿಸರ್ಚ್ ಸ್ಥಗಿತ: ಸಂಸ್ಥಾಪಕರಿಂದ ಘೋಷಣೆ - HINDENBURG RESEARCH TO BE DISBANDED
