ಮುಂಬೈ: ಭಾರತದ ವಿದೇಶಿ ವಿನಿಮಯ ಮೀಸಲು ಏಪ್ರಿಲ್ 19ರ ವೇಳೆಗೆ 2.83 ಬಿಲಿಯನ್ ಡಾಲರ್ ಇಳಿಕೆಯಾಗಿ 640.33 ಬಿಲಿಯನ್ ಡಾಲರ್ಗೆ ತಲುಪಿದೆ ಎಂದು ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ಶುಕ್ರವಾರ ಬಿಡುಗಡೆ ಮಾಡಿದ ಇತ್ತೀಚಿನ ಅಂಕಿ ಅಂಶಗಳು ತಿಳಿಸಿವೆ. ಎಂಟು ವಾರಗಳ ಕಾಲ ಸ್ಥಿರವಾಗಿ ಏರಿದ ನಂತರ ಮೊದಲ ಬಾರಿಗೆ ಏಪ್ರಿಲ್ 12 ಕ್ಕೆ ಕೊನೆಗೊಂಡ ವಾರದಲ್ಲಿ ದೇಶದ ವಿದೇಶಿ ವಿನಿಮಯ ಸಂಗ್ರಹ 5.4 ಬಿಲಿಯನ್ ಡಾಲರ್ ಇಳಿದು 643.16 ಬಿಲಿಯನ್ ಡಾಲರ್ಗೆ ತಲುಪಿದೆ.
ಇತ್ತೀಚಿನ ಅಂಕಿಅಂಶಗಳ ಪ್ರಕಾರ, ವಿದೇಶಿ ಕರೆನ್ಸಿ ಸ್ವತ್ತುಗಳು (ಎಫ್ಸಿಎಗಳು) 3.79 ಬಿಲಿಯನ್ ಡಾಲರ್ನಿಂದ 560.86 ಬಿಲಿಯನ್ ಡಾಲರ್ಗೆ ಇಳಿಕೆಯಾಗಿದ್ದು, ವಿದೇಶಿ ವಿನಿಮಯ ಸಂಗ್ರಹದ ಭಾಗವಾಗಿರುವ ಚಿನ್ನದ ಮೀಸಲು 1.01 ಬಿಲಿಯನ್ ಡಾಲರ್ ಏರಿಕೆಯಾಗಿ 56.81 ಬಿಲಿಯನ್ ಡಾಲರ್ಗೆ ತಲುಪಿದೆ.
ತೈಲ ಬೆಲೆಗಳು ಹೆಚ್ಚುತ್ತಿರುವುದರಿಂದ ಭಾರತೀಯ ಕರೆನ್ಸಿ ದುರ್ಬಲಗೊಂಡಿದೆ. ಇನ್ನು ಆಮದುಗಳು ದುಬಾರಿಯಾಗಿರುವುದರಿಂದ ಹಾಗೂ ಇದಕ್ಕೆ ಡಾಲರ್ ನೀಡಬೇಕಾಗುವುದರಿಂದ ಡಾಲರ್ ಬೇಡಿಕೆ ಹೆಚ್ಚಾಗುತ್ತಿದೆ.
ರೂಪಾಯಿಯ ಚಂಚಲತೆಯನ್ನು ನಿಗ್ರಹಿಸಲು ಆರ್ಬಿಐ ಸಕ್ರಿಯವಾಗಿ ಡಾಲರ್ಗಳನ್ನು ಮಾರುಕಟ್ಟೆಯಲ್ಲಿ ಬಿಡುಗಡೆ ಮಾಡುತ್ತಿರುವುದು ವಿದೇಶಿ ಕರೆನ್ಸಿ ಸ್ವತ್ತುಗಳ ಕುಸಿತಕ್ಕೆ ಕಾರಣವಾಗಿದೆ ಎಂದು ಮಾರುಕಟ್ಟೆ ವಿಶ್ಲೇಷಕರು ಹೇಳಿದ್ದಾರೆ. ಮಧ್ಯಪ್ರಾಚ್ಯ ಸಂಘರ್ಷದಿಂದ ಉಂಟಾಗಿರುವ ಭೌಗೋಳಿಕ ರಾಜಕೀಯ ಅನಿಶ್ಚಿತತೆಗಳ ನಡುವೆ ಕೇಂದ್ರ ಬ್ಯಾಂಕುಗಳು ಇತ್ತೀಚಿನ ತಿಂಗಳುಗಳಲ್ಲಿ ಸುರಕ್ಷಿತ ಹೂಡಿಕೆ ಮಾರ್ಗವಾಗಿ ಚಿನ್ನವನ್ನು ಖರೀದಿಸುತ್ತಿವೆ.
ದಾಖಲೆಯ ವಿದೇಶಿ ವಿನಿಮಯ ಮೀಸಲು ಭಾರತೀಯ ಆರ್ಥಿಕತೆಯ ಶಕ್ತಿಯ ಪ್ರತಿಬಿಂಬ ಎಂದು ಆರ್ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ಈ ತಿಂಗಳ ಆರಂಭದಲ್ಲಿ ಉಲ್ಲೇಖಿಸಿದ್ದರು.
"ಗಣನೀಯ ಪ್ರಮಾಣದ ವಿದೇಶಿ ವಿನಿಮಯ ಮೀಸಲುಗಳ ರೂಪದಲ್ಲಿ ಬಲವಾದ ಬಫರ್ ಅನ್ನು ನಿರ್ಮಿಸುವುದು ನಮ್ಮ ಪ್ರಮುಖ ಗಮನವಾಗಿದೆ. ಇದು ಕಾಲ ಬದಲಾದಾಗ ಅಥವಾ ಭಾರಿ ಮಳೆಯಾದಾಗ ನಮಗೆ ಸಹಾಯ ಮಾಡುತ್ತದೆ" ಎಂದು ಏಪ್ರಿಲ್ 1 ರಂದು ಪ್ರಾರಂಭವಾದ ಪ್ರಸಕ್ತ ಹಣಕಾಸು ವರ್ಷದ ಮೊದಲ ಹಣಕಾಸು ನೀತಿ ಪರಾಮರ್ಶೆಯ ಸಂದರ್ಭದಲ್ಲಿ ಅವರು ಹೇಳಿದ್ದರು.
ಆರ್ಬಿಐನ ಬ್ಯಾಂಕಿನ ಫಾರ್ವರ್ಡ್ ಹೋಲ್ಡಿಂಗ್ಸ್ ಸೇರಿದಂತೆ ಭಾರತದ ವಿದೇಶಿ ವಿನಿಮಯ ಮೀಸಲು ಈಗ ಸುಮಾರು 11 ತಿಂಗಳ ಆಮದಿಗೆ ಪಾವತಿ ಮಾಡಲು ಸಾಕಾಗಬಹುದು. ಇದು ಎರಡು ವರ್ಷಗಳ ಗರಿಷ್ಠವಾಗಿದೆ.
ಇದನ್ನೂ ಓದಿ : F77 Mach-2 ಎಲೆಕ್ಟ್ರಿಕ್ ಮೋಟರ್ ಸೈಕಲ್ ಬಿಡುಗಡೆ: ವಿಶೇಷತೆ, ವಿನ್ಯಾಸ, ಬೆಲೆ- ಸಂಪೂರ್ಣ ವಿವರ - Electric Motorcycle
