ನವದೆಹಲಿ: ಶುದ್ಧ ಸಸ್ಯಹಾರಿಗಳಿಗಾಗಿ 'ಪ್ಯೂರ್ ವೆಜ್ ಮೋಡ್' ಹಾಗು 'ಪ್ಯೂರ್ ವೆಜ್ ಫ್ಲೀಟ್' ಪರಿಚಯಿಸಿದ್ದ ಜೊಮಾಟೊ ಕ್ರಮಕ್ಕೆ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಸಾಕಷ್ಟು ಪರ-ವಿರೋಧ ಪ್ರತಿಕ್ರಿಯೆಗಳು ವ್ಯಕ್ತವಾಗುತ್ತಿವೆ.
ಈ ಕುರಿತು ಪ್ರತಿಕ್ರಿಯಿಸಿರುವ ಸಂಸ್ಥೆಯ ಸಿಇಒ ದೀಪಿಂದರ್ ಗೋಯೆಲ್, ಭಾರೀ ಪ್ರಮಾಣದಲ್ಲಿ ನಕಾರಾತ್ಮಕ ಟೀಕೆಗಳು ವ್ಯಕ್ತವಾದಲ್ಲಿ ನಾವು ಈ ವ್ಯವಸ್ಥೆಯನ್ನು ಹಿಂಪಡೆಯುತ್ತೇವೆ ಎಂದು ಹೇಳಿದ್ದಾರೆ.
ಮಾಂಸಾಹಾರ ಮತ್ತು ಸಸ್ಯಾಹಾರದ ಬಾಕ್ಸ್ಗಳನ್ನು ಒಟ್ಟಿಗೆ ಕೊಂಡೊಯ್ಯುವಾಗ ವಾಸನೆಗಳ ಸಮಸ್ಯೆಗಳು ಎದುರಾಗುತ್ತಿತ್ತು. ಈ ಕಾರಣದಿಂದ ನಾವು ಪ್ಯೂರ್ ವೆಜ್ ಫ್ಲೀಟ್ ಪರಿಚಯಿಸಿ, ಸಸ್ಯಾಹಾರವನ್ನು ಪ್ರತ್ಯೇಕವಾಗಿ ಡೆಲಿವರಿ ಮಾಡುವ ನಿರ್ಧಾರ ಕೈಗೊಂಡೆವು ಎಂದು ಅವರು 'ಎಕ್ಸ್' ಪೋಸ್ಟ್ನಲ್ಲಿ ಸ್ಪಷ್ಟಪಡಿಸಿದ್ದಾರೆ.
ಕೆಲವು ಸೊಸೈಟಿಗಳು ಮತ್ತು ರೆಸಿಡೆನ್ಸಿಯಲ್ ವೆಲ್ಫೇರ್ ಅಸೋಸಿಯೇಷನ್‌ಗಳು (ಆರ್ಡಬ್ಲ್ಯೂಎ) ನಮ್ಮ ಜೊಮಾಟೊ ಫ್ಲೀಟ್ ಅನ್ನು ಒಳಗೆ ಸೇರಿಸುತ್ತಿಲ್ಲ ಎಂಬ ಸುದ್ದಿಗಳನ್ನು ಕೇಳುತ್ತಿದ್ದೇವೆ. ಇಂತಹ ಪ್ರಕರಣಗಳಲ್ಲಿ ನಾವು ಆರ್ಡಬ್ಲ್ಯೂಎಗಳ ಜೊತೆಗೆ ಈ ರೀತಿ ಆಗದಂತೆ ಕೆಲಸ ಮಾಡುತ್ತೇವೆ. ಹೊಸ ಬದಲಾವಣೆಯಿಂದ ನಮ್ಮ ಜವಾಬ್ದಾರಿಯ ಕುರಿತು ನಾವು ಅರ್ಥೈಸಿಕೊಳ್ಳುತ್ತೇವೆ. ಪ್ಯೂರ್ ವೆಜ್ ಮೋಡ್ ಅಥವಾ ಪ್ಯೂರ್ ವೆಜ್ ಫ್ಲೀಟ್ ಯಾವುದೇ ಧರ್ಮ ಅಥವಾ ರಾಜಕೀಯ ಆದ್ಯತೆಯಲ್ಲ ಎಂಬುದನ್ನು ಮತ್ತೊಮ್ಮೆ ಸ್ಪಷ್ಟಪಡಿಸುತ್ತೇವೆ ಎಂದು ತಿಳಿಸಿದ್ದಾರೆ.
ಪ್ಯೂರ್ ವೆಜ್ ಮೋಡ್ ಮತ್ತು ಫ್ಲೀಟ್ ಪರಿಚಯದ ಬಳಿಕ, ಮಾಂಸಾಹಾರ ಸೇವಿಸುವ ಅನೇಕ ಯುವ ಜನರು ಇದೀಗ ನಮ್ಮ ಪೋಷಕರು ಕೂಡ ಜೊಮಾಟೊ ಬಳಕೆ ಮಾಡುತ್ತಾರೆ ಎಂಬ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ ಎಂದು ಇದೇ ವೇಳೆ ಹರ್ಷ ವ್ಯಕ್ತಪಡಿಸಿದ್ದಾರೆ.
ಈ ಹೊಸ ಫೀಚರ್ ಗ್ರಾಹಕರ ಆಹಾರದ ಆದ್ಯತೆಗೆ ಅನುಗುಣವಾಗಿ ಮಾತ್ರವೇ ಸೇವೆ ಸಲ್ಲಿಸಲಿದೆ. ಅನೇಕ ಗ್ರಾಹಕರು ಯಾವುದೇ ಧರ್ಮ ಅಥವಾ ಜಾತಿಯನ್ನು ಗಮನಿಸದೇ, ಕೇವಲ ಮಾಂಸಾಹಾರವನ್ನು ರೆಸ್ಟೋರೆಂಟ್ಗಳು ಪೂರೈಸುತ್ತದೆ ಎಂಬ ಒಂದೇ ಕಾರಣಕ್ಕೆ ಆ ರೆಸ್ಟೋರೆಂಟ್ಗಳಿಂದ ಆರ್ಡರ್ ಮಾಡುವುದಿಲ್ಲ ಎಂಬುದು ನಮಗೆ ತಿಳಿದಿದೆ. ಈ ಕಾರಣಕ್ಕೆ ಹೊಸ ಕ್ರಮ ನಡೆಸಲಾಗಿದೆ. ವೆಜ್ ಡೆಲಿವರಿ ಫ್ಲೀಟ್ನಲ್ಲಿ ಕಾರ್ಯ ನಿರ್ವಹಿಸುವ ನಮ್ಮ ಡೆಲಿವರಿ ಪಾರ್ಟನರ್ಗಳ ಆಹಾರ ಆದ್ಯತೆಯ ಮೇರೆಗೆ ಕೂಡ ನಾವು ತಾರತಮ್ಯ ಮಾಡುವುದಿಲ್ಲ ಎಂದಿದ್ದಾರೆ. (ಐಎಎನ್ಎಸ್)
ಇದನ್ನೂ ಓದಿ: ಶುದ್ಧ ಸಸ್ಯಾಹಾರಿ ಗ್ರಾಹಕರಿಗಾಗಿ "ಪ್ಯೂರ್ ವೆಜ್ ಮೋಡ್" ಸೇವೆ ಆರಂಭಿಸಿದ ಜೊಮಾಟೊ
