ನವದೆಹಲಿ: ಕಬ್ಬಿನ ರಸ, ಬಿ-ಹೆವಿ ಮತ್ತು ಸಿ-ಹೆವಿ ಮೊಲಾಸಿಸ್ನಿಂದ ಎಥೆನಾಲ್ ಉತ್ಪಾದನೆಯ ಮೇಲೆ ವಿಧಿಸಲಾಗಿದ್ದ ನಿರ್ಬಂಧಗಳನ್ನು ಸರ್ಕಾರ ತೆಗೆದುಹಾಕಿದೆ. ನವೆಂಬರ್ನಿಂದ ಪ್ರಾರಂಭವಾಗುವ ಮುಂದಿನ ವರ್ಷದ ಎಥೆನಾಲ್ ಪೂರೈಕೆ ವರ್ಷದಿಂದ ಎಥೆನಾಲ್ ಉತ್ಪಾದನೆ ಮೇಲಿನ ನಿರ್ಬಂಧಗಳು ತೆರವಾಗಲಿವೆ.
ಸಕ್ಕರೆ ಕಾರ್ಖಾನೆಗಳು ಮತ್ತು ಡಿಸ್ಟಿಲರಿಗಳು ತೈಲ ಮಾರುಕಟ್ಟೆ ಕಂಪನಿಗಳೊಂದಿಗೆ ಒಪ್ಪಂದ ಮಾಡಿಕೊಂಡಿರುವಂತೆ ಕಬ್ಬಿನ ರಸ, ಸಕ್ಕರೆ ಸಿರಪ್, ಬಿ-ಹೆವಿ ಅಥವಾ ಸಿ-ಹೆವಿ ಮೊಲಾಸಿಸ್ನಿಂದ ಎಥೆನಾಲ್ ಉತ್ಪಾದಿಸಬಹುದು ಎಂದು ಆಹಾರ ಮತ್ತು ಸಾರ್ವಜನಿಕ ವಿತರಣಾ ಇಲಾಖೆ ಗುರುವಾರ ಪ್ರಕಟಣೆಯಲ್ಲಿ ತಿಳಿಸಿದೆ.
ದೇಶದಲ್ಲಿ ಬೇಡಿಕೆಗೆ ತಕ್ಕಷ್ಟು ಸಕ್ಕರೆ ಲಭ್ಯವಿರುವುದನ್ನು ಆಹಾರ ಮತ್ತು ಸಾರ್ವಜನಿಕ ವಿತರಣಾ ಇಲಾಖೆ ಆಗಾಗ ಖಚಿತಪಡಿಸಿಕೊಂಡು ಎಥೆನಾಲ್ ತಯಾರಿಕೆಗೆ ಸಕ್ಕರೆಯನ್ನು ಪೂರೈಸಲಿದೆ. ದೇಶದ ಮಾರುಕಟ್ಟೆಯಲ್ಲಿ ಬೇಡಿಕೆಗೆ ತಕ್ಕಷ್ಟು ಸಕ್ಕರೆಯ ಪೂರೈಕೆಗಾಗಿ ಇಲಾಖೆ ಕಳೆದ ಡಿಸೆಂಬರ್ ನಿಂದ ಎಥೆನಾಲ್ ಉತ್ಪಾದನೆಯನ್ನು ನಿರ್ಬಂಧಿಸಿತ್ತು.
2024-25ರ ಎಥೆನಾಲ್ ವರ್ಷದಲ್ಲಿ ಕಬ್ಬಿನ ರಸ, ಬಿ-ಹೆವಿ ಮೊಲಾಸಿಸ್ ಮತ್ತು ಸಿ-ಹೆವಿ ಮೊಲಾಸಿಸ್ನಿಂದ ಅನಿರ್ಬಂಧಿತ ಎಥೆನಾಲ್ ಉತ್ಪಾದನೆಗೆ ಅವಕಾಶ ನೀಡುವುದು ಉದ್ಯಮಕ್ಕೆ ಗಮನಾರ್ಹ ಲಾಭದಾಯಕವಾಗಿದೆ ಎಂದು ಭಾರತೀಯ ಸಕ್ಕರೆ ಮತ್ತು ಜೈವಿಕ ಇಂಧನ ತಯಾರಕರ ಸಂಘದ ಮಹಾನಿರ್ದೇಶಕ ದೀಪಕ್ ಬಲ್ಲಾನಿ ಹೇಳಿದ್ದಾರೆ.
ಅಧಿಕೃತ ಅಂಕಿಅಂಶಗಳ ಪ್ರಕಾರ, ಭಾರತದಲ್ಲಿ ಪೆಟ್ರೋಲ್ ಹಾಗೂ ಡೀಸೆಲ್ನೊಂದಿಗೆ ಎಥೆನಾಲ್ ಮಿಶ್ರಣವು ಪ್ರಸಕ್ತ ಋತುವಿನ ಜುಲೈ ವೇಳೆಗೆ ಶೇ 13.3 ಕ್ಕೆ ತಲುಪಿದೆ. ಇದು 2022-23 ಋತುವಿನಲ್ಲಿ ಶೇ 12.6 ರಷ್ಟಿತ್ತು.
ಪ್ರಸ್ತುತ, ದೇಶದ ಒಟ್ಟು ಎಥೆನಾಲ್ ಉತ್ಪಾದನಾ ಸಾಮರ್ಥ್ಯವು 1,589 ಕೋಟಿ ಲೀಟರ್ ಆಗಿದೆ. ತೈಲ ಮಾರುಕಟ್ಟೆ ಕಂಪನಿಗಳು 2023-24ರ ಋತುವಿನಲ್ಲಿ ಮಿಶ್ರಣಕ್ಕಾಗಿ 505 ಕೋಟಿ ಲೀಟರ್ ಎಥೆನಾಲ್ ಖರೀದಿಸಿವೆ. 2025-26ರ ವೇಳೆಗೆ ಶೇ.20ರಷ್ಟು ಎಥೆನಾಲ್ ಮಿಶ್ರಣದ ಗುರಿಯನ್ನು ಸಾಧಿಸುವ ಗುರಿಯನ್ನು ಸರಕಾರ ಹೊಂದಿದೆ. ಬ್ರೆಜಿಲ್ ನಂತರ ಭಾರತವು ವಿಶ್ವದ ಎರಡನೇ ಅತಿದೊಡ್ಡ ಸಕ್ಕರೆ ಉತ್ಪಾದಿಸುವ ದೇಶವಾಗಿದೆ.
ಆಲ್ಕೋಹಾಲ್, ಈಥೈಲ್ ಆಲ್ಕೋಹಾಲ್ ಅಥವಾ ಧಾನ್ಯದ ಆಲ್ಕೋಹಾಲ್ ಎಂದೂ ಕರೆಯಲ್ಪಡುವ ಎಥೆನಾಲ್ ಬಣ್ಣರಹಿತ ದ್ರವವಾಗಿದೆ ಮತ್ತು ಇದು ಬಿಯರ್, ವೈನ್ ಅಥವಾ ಬ್ರಾಂಡಿಯಂತಹ ಆಲ್ಕೊಹಾಲ್ ಯುಕ್ತ ಪಾನೀಯಗಳಲ್ಲಿನ ಒಂದು ಘಟಕಾಂಶವಾಗಿದೆ. ಎಥೆನಾಲ್ ಅತ್ಯಧಿಕ ದಹನಶೀಲ ವಸ್ತುವಾಗಿದ್ದು, ಇದನ್ನು ಬೆಂಕಿಯ ಹತ್ತಿರಕ್ಕೆ ತೆಗೆದುಕೊಂಡು ಹೋಗಬಾರದು.
ಇದನ್ನೂ ಓದಿ : ಕೇಂದ್ರ ಸರ್ಕಾರಕ್ಕೆ 3,662 ಕೋಟಿ ರೂ.ಗಳ ಮತ್ತೊಂದು ಕಂತಿನ ಲಾಭಾಂಶ ಪಾವತಿಸಿದ LIC - LIC hands over dividend to govt
