ಅಂಬಾಲ: ಕಳೆದ ನಾಲ್ಕೈದು ದಿನದಂದು ಕನಸಿನಲ್ಲಿ ದೇವಿ ಬಂದು ಮಾನವ ಬಲಿ ಕೇಳಿದಳು ಎಂದು ವ್ಯಕ್ತಿಯೊಬ್ಬನನ್ನು ಮಹಿಳೆ ತನ್ನ ಸಹಾಯಕರ ಜೊತೆ ಸೇರಿ ಹತ್ಯೆ ಮಾಡಿರುವ ಬೀಭತ್ಸ ಘಟನೆಯ ಪ್ರಕರಣ ಹರಿಯಾಣದ ಅಂಬಾಲದಲ್ಲಿ ನಡೆದಿದೆ. ಮಹೇಶ್ ಗುಪ್ತಾ (44) ಕೊಲೆಯಾದ ವ್ಯಕ್ತಿ. ಕಛ್ ಬಜಾರ್ ಅಂಬಾಲ ಕ್ಯಾಂಟ್ನ ನಿವಾಸಿಯಾಗಿದ್ದ ಈತ ದಿನಸಿ ಅಂಗಡಿ ಮಾಲೀಕನಾಗಿದ್ದ. ಇನ್ನು ಕೊಲೆ ಪ್ರಕರಣ ಸಂಬಂಧ ಆರೋಪಿ ಪ್ರಿಯಾ ಮತ್ತು ಆತನಿಗೆ ಸಹಾಯ ಮಾಡಿದ ಮೂವರು ಸಹಚರರನ್ನು ಪೊಲೀಸರು ಬಂಧಿಸಿದ್ದಾರೆ.
ಏನಿದು ಘಟನೆ: ಪ್ರಿಯಾ ಮತ್ತು ಆಕೆಯ ಸಹೋದರಿ, ಮಹೇಶ್ ಗುಪ್ತಾ ಅಂಗಡಿಯಿಂದ ಕೆಲವು ಸಾಮಗ್ರಿಗಳನ್ನು ಖರೀದಿಸಿ, ಮನೆಗೆ ಡೆಲಿವರಿ ನೀಡುವಂತೆ ತಿಳಿಸಿದ್ದರು. ಆ ದಿನದಿಂದ ಗುಪ್ತಾ ನಾಪತ್ತೆಯಾಗಿದ್ದಾರೆ ಎಂದು ಮೃತನ ಸಹೋದರ ಪೊಲೀಸರಿಗೆ ದೂರು ದಾಖಲಿಸಿದ್ದರು. ಸಾಮಗ್ರಿಗಳ ಡೆಲಿವರಿಗೆ ಹೋಗಿದ್ದ ಗುಪ್ತಾ ವಾಪಸ್ ಆಗದ ಹಿನ್ನೆಲೆ ಕುಟುಂಬಸ್ಥರು ಹುಡುಕಾಟ ನಡೆಸಿದ್ದರು. ಈ ವೇಳೆ, ಫೋನ್ಗೆ ಕರೆ ಮಾಡಿದರೂ ಪ್ರಯೋಜನವಾಗಿರಲಿಲ್ಲ. ಕಡೆಗೆ ಗುಪ್ತಾ ಬೈಕ್ ಪ್ರಿಯಾ ಮನೆ ಮುಂದೆ ನಿಂತಿರುವುದು ತಿಳಿದುಬಂದಿತ್ತು.
ಈ ಹಿನ್ನೆಲೆ ಗುಪ್ತಾ ಸಹೋದರ ಮತ್ತು ಕೆಲವರು, ಪ್ರಿಯಾ ಮನೆ ಬಾಗಿಲು ತಟ್ಟಿದ್ದರು. ಆದರೆ, ಒಳಗಿನಿಂದ ಯಾವುದೇ ಪ್ರತಿಕ್ರಿಯೆ ಬಂದಿರಲಿಲ್ಲ. ಈ ವೇಳೆ ಬಲವಂತದಿಂದ ಮನೆ ಬಾಗಿಲು ತೆಗೆದಾಗ ಪ್ರಿಯಾ, ಪ್ರೀತಿ ಮತ್ತು ಹೇಮಂತ್ ಎಂಬ ಮೂವರು ಆರೋಪಿಗಳು ಮಹೇಶ್ ಗುಪ್ತಾನ ದೇಹವನ್ನು ಸಾಗಿಸುವ ಪ್ರಯತ್ನ ನಡೆಸಿರುವುದು ಕಂಡು ಬಂದಿದೆ. ಪ್ರಜ್ಞಾಹೀನವಾಗಿ ಬಿದ್ದಿದ್ದ ಗುಪ್ತಾನ ಕತ್ತನ್ನು ಸ್ಕ್ರಾಫ್ನಿಂದ ಬಿಗಿದಿರುವುದು ಗೊತ್ತಾಗಿದೆ. ಅಲ್ಲದೇ ಆತನ ಕಾಲು ಮತ್ತು ಕಿವಿ ಹಿಂದೆ ಗಾಯಗಳು ಕಂಡು ಬಂದಿವೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.
ಕೃತ್ಯ ನಡೆದಿದ್ದು ಗೊತ್ತಾದ ತಕ್ಷಣಕ್ಕೆ ಗುಪ್ತಾನನ್ನು ಆಸ್ಪತ್ರೆಗೆ ಕರೆದೊಯ್ಯುಲಾಯಿತಾದರೂ ಈ ವೇಳೆಗಾಗಲೇ ಆತ ಸಾವನ್ನಪ್ಪಿರುವುದಾಗಿ ವೈದ್ಯರು ಘೋಷಿಸಿದರು.
ಇನ್ನು ಈ ಸಂಬಂಧ ಪ್ರಕರಣ ದಾಖಲಿಕೊಂಡಿರುವ ಪಡವ್ ಪೊಲೀಸ್ ಠಾಣೆಯ ಇನ್ಸ್ಪೆಕ್ಟರ್ ದಿಲೀಪ್ ಕುಮಾರ್ ಮಾತನಾಡಿ, ಮೂವರು ಆರೋಪಿಗಳನ್ನು ವಶಕ್ಕೆ ಪಡೆಯಲಾಗಿದೆ. ತನಿಖೆ ವೇಳೆ ಆರೋಪಿ ಪ್ರೀತಿ, ಕನಸಿನಲ್ಲಿ ನಾಲ್ಕೈದು ದಿನದಿಂದ ದೇವಿ ಕನಸಿನಲ್ಲಿ ಬಂದು ಮಾನವ ಬಲಿ ನೀಡುವಂತೆ ಕೇಳುತ್ತಿದ್ದಳು. ಈ ಹಿನ್ನೆಲೆಯಲ್ಲಿ ಕೃತ್ಯ ಎಸಗಿದ್ದಾಗಿ ತಿಳಿಸಿದ್ದಾಳೆ. ಅಷ್ಟೇ ಅಲ್ಲದೆ, ಈಕೆ ಈ ಹಿಂದೆ ಮಹೇಶ್ ಗುಪ್ತಾ ಅಂಗಡಿಯಲ್ಲಿ ಕೆಲಸ ನಿರ್ವಹಿಸಿದ್ದಳು ಎಂಬುದು ತನಿಖೆ ವೇಳೆ ಬಯಲಾಗಿದೆ. ಸದ್ಯ ಆರೋಪಿಗಳನ್ನು ಕೋರ್ಟ್ ಮುಂದೆ ಹಾಜರುಪಡಿಸಿ, ವಶಕ್ಕೆ ಪಡೆಯಲಾಗಿದೆ ಎಂದು ಮಾಹಿತಿ ನೀಡಿದ್ದಾರೆ. (ಪಿಟಿಐ)
ಇದನ್ನೂ ಓದಿ: ಉತ್ತರಪ್ರದೇಶದಲ್ಲಿ ಬಿಜೆಪಿ ಮುಖಂಡನ ಮೇಲೆ ಗುಂಡಿನ ದಾಳಿ: ಓರ್ವ ಸಾವು, ಮೂವರಿಗೆ ಗಾಯ
