ಜೈಪುರ (ರಾಜಸ್ಥಾನ): ಬುಂದಿ ಜಿಲ್ಲೆಯ ನೈನ್ವಾ ಉಪ ಜಿಲ್ಲಾ ಆಸ್ಪತ್ರೆಯ ಹೊರಗಿನ ಬೆಂಚ್‌ನಲ್ಲಿ ಮಹಿಳೆಯೊಬ್ಬರು ಮಗುವಿಗೆ ಜನ್ಮ ನೀಡಿದ ಹಿನ್ನೆಲೆ ರಾಜಸ್ಥಾನದ ವೈದ್ಯಕೀಯ ಮತ್ತು ಆರೋಗ್ಯ ಇಲಾಖೆ ಸೋಮವಾರ ವೈದ್ಯರು ಮತ್ತು ಎಎನ್‌ಎಂ ಸಿಬ್ಬಂದಿಯನ್ನು ಅಮಾನತು ಮಾಡಿ ಆದೇಶ ಹೊರಡಿಸಿದೆ.
ತನಿಖಾ ಸಮಿತಿ ರಚನೆ: ಹೆರಿಗೆ ನೋವಿನಿಂದ ಬಳಲುತ್ತಿದ್ದ ಗರ್ಭಿಣಿಯನ್ನು ಹೆರಿಗೆ ಕೊಠಡಿಗೆ ಕರೆದೊಯ್ಯುವ ಬದಲು ಭಾನುವಾರ ಆಸ್ಪತ್ರೆಯ ಹೊರಭಾಗದ ಬೆಂಚಿನ ಮೇಲೆ ಕೂರುವಂತೆ ಸೂಚಿಸಲಾಗಿದೆ ಎಂದು ಆರೋಗ್ಯ ಅಧಿಕಾರಿಗಳು ತಿಳಿಸಿದ್ದಾರೆ. ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿರುವ ವೈದ್ಯಕೀಯ ಮತ್ತು ಆರೋಗ್ಯ ಇಲಾಖೆಯ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಶುಭ್ರಾ ಸಿಂಗ್ ಪ್ರಕರಣದ ತನಿಖೆಗಾಗಿ ತನಿಖಾ ಸಮಿತಿಯನ್ನು ರಚಿಸಿದ್ದಾರೆ.
ಸಾರ್ವಜನಿಕ ಆರೋಗ್ಯ ನಿರ್ದೇಶಕ ಹೇಳಿಕೆ: ಪ್ರಕರಣದ ಕುರಿತು ಬುಂದಿ ಜಿಲ್ಲಾಧಿಕಾರಿಯಿಂದ ಮಾಹಿತಿ ಕೇಳಲಾಗಿದ್ದು, ವರದಿ ಸಲ್ಲಿಸುವಂತೆ ನೈನ್ವಾ ಉಪವಿಭಾಗಾಧಿಕಾರಿಗೆ ಸೂಚಿಸಲಾಗಿದೆ. ಅಧಿಕಾರಿಗಳಿಂದ ಬಂದ ಮಾಹಿತಿ ಆಧರಿಸಿ, ಈ ಪ್ರಕರಣದಲ್ಲಿ ತಪ್ಪಿತಸ್ಥರಾಗಿರುವ ವೈದ್ಯರು ಮತ್ತು ಎಎನ್‌ಎಂ ಸಿಬ್ಬಂದಿ ವಿರುದ್ಧ ಇಲಾಖೆ ಕಠಿಣ ಕ್ರಮ ಕೈಗೊಂಡಿದೆ ಎಂದು ಸಾರ್ವಜನಿಕ ಆರೋಗ್ಯ ನಿರ್ದೇಶಕ ರವಿಪ್ರಕಾಶ್ ಮಾಥೂರ್ ತಿಳಿಸಿದ್ದಾರೆ.
ಘಟನೆಯ ವೇಳೆ ಆಸ್ಪತ್ರೆಯಲ್ಲಿ ಕರ್ತವ್ಯದಲ್ಲಿದ್ದ ಹಿರಿಯ ವೈದ್ಯಾಧಿಕಾರಿ ಮುರಾರಿಲಾಲ್ ಮೀನಾ ಮತ್ತು ಎಎನ್‌ಎಂ (ಸಹಾಯಕ ನರ್ಸ್) ಕುಸುಮಲತಾ ಶರ್ಮಾ ಅವರನ್ನು ಅಮಾನತುಗೊಳಿಸಲಾಗಿದೆ. ಅಲ್ಲದೇ, ನೈನ್ವಾ ಪಿಎಂಒ ಸಮುಂದರ್ ಲಾಲ್ ಮೀನಾ ಅವರನ್ನು ಹಿರಿಯ ವೈದ್ಯಾಧಿಕಾರಿ ಕೃಷ್ಣ ಕುಮಾರ್ ಅವರನ್ನು ನೇಮಕ ಮಾಡಲಾಗಿದೆ.
ಗಾಯತ್ರಿ ಮೀನಾ, ಕೆಲಾ ದೇವಿ ಮೀನಾ, ಶಿವದತ್, ಕೌಶಲ್ಯ ಗುರ್ಜರ್ ಮತ್ತು ಹೇಮಂತ್ ಮಹಾವಾರ್ ಸೇರಿದಂತೆ ಇತರ ನರ್ಸಿಂಗ್ ಸಿಬ್ಬಂದಿಗೂ ನೋಟಿಸ್ ನೀಡಲಾಗಿದೆ ಎಂದು ರವಿಪ್ರಕಾಶ್ ಮಾಥೂರ್ ಮಾಹಿತಿ ನೀಡಿದರು.
ಇದನ್ನೂ ಓದಿ: ವ್ಯಕ್ತಿಯನ್ನ ಗುಂಡಿಕ್ಕಿ ಹತ್ಯೆ ಮಾಡಿದ ಅಪರಿಚಿತರು: ಜಮ್ಮು ಕಾಶ್ಮೀರದಲ್ಲಿ ಹೈ-ಅಲರ್ಟ್ - man shot dead
