ತಿರುವರೂರು (ತಮಿಳುನಾಡು): ಅಮೆರಿಕ ಅಧ್ಯಕ್ಷೀಯ ಚುನಾವಣೆಯಲ್ಲಿ ದೊಡ್ಡ ಟರ್ನ್ ಸಿಕ್ಕಿದೆ. ಡೆಮಾಕ್ರಟಿಕ್ ಪಕ್ಷದ ಅಭ್ಯರ್ಥಿಯಾಗಿದ್ದ ಹಾಲಿ ಅಧ್ಯಕ್ಷ ಜೋ ಬೈಡೆನ್ ಚುನಾವಣೆಯಿಂದ ಹಿಂದೆ ಸರಿದು ಉಪಾಧ್ಯಕ್ಷೆ, ಭಾರತೀಯ ಮೂಲದ ಕಮಲಾ ಹ್ಯಾರೀಸ್ ಅವರನ್ನು ಪಕ್ಷದ ಅಭ್ಯರ್ಥಿಯನ್ನಾಗಿ ಘೋಷಿಸಿದ್ದಾರೆ. ಇದು ಅಮೆರಿಕದಲ್ಲಿ ಭಾರೀ ಸಂಚಲನ ಮೂಡಿಸಿದ್ದಲ್ಲದೇ, ಭಾರತದಲ್ಲೂ ಸಂತಸ ಹೆಚ್ಚುವಂತೆ ಮಾಡಿದೆ.
ಇದಕ್ಕೆ ಪ್ರಮುಖ ಕಾರಣ, ಕಮಲಾ ಹ್ಯಾರಿಸ್ ಅವರು ಭಾರತದ ಮೂಲದವರು. ಅವರ ಸಂಬಂಧಿಕರು ತಮಿಳುನಾಡಿನಲ್ಲಿ ಇದ್ದಾರೆ. ಈ ನೆಲದ ಸಂಬಂಧ ಹೊಂದಿರುವ ಮಹಿಳೆಗೆ ವಿಶ್ವದ ದೊಡ್ಡಣ್ಣ ಎಂದು ಕರೆಯಿಸಿಕೊಳ್ಳುವ ರಾಷ್ಟ್ರದ ಅಧ್ಯಕ್ಷೀಯ ಉಮೇದುವಾರಿಕೆ ಸಿಕ್ಕಿದ್ದು ಹೆಮ್ಮೆಯ ಸಂಗತಿಯಾಗಿದೆ. ಹೀಗಾಗಿ ಅವರ ಸಂಬಂಧಿಕರು ಟೆಂಪಲ್ ರನ್ ನಡೆಸುತ್ತಿದ್ದಾರೆ.
ಬಂಧುಗಳಿಂದ ಗೆಲುವಿಗೆ ಪೂಜೆ: ಕಮಲಾ ಹ್ಯಾರಿಸ್ ಅವರ ಕುಟುಂಬದ ಬಂಧುಗಳು ಇನ್ನೂ ತಮಿಳುನಾಡಿನಲ್ಲಿ ಇದ್ದಾರೆ. ಕಮಲಾರ ತಾಯಿ ಶ್ಯಾಮಲಾ ಅವರ ಸಹೋದರಿ ಚೆನ್ನೈನಲ್ಲಿ ನೆಲೆಸಿದ್ದಾರೆ. ಇತರ ಕೆಲವು ಸಂಬಂಧಿಕರು ತುಲಸೇಂದ್ರಪುರಂ ಗ್ರಾಮದಲ್ಲಿದ್ದಾರೆ. ಕಮಲಾ ಅವರ ಪೂರ್ವಜರ ದೇವಾಲಯವಾದ ಧರ್ಮ ಶಾಸ್ತಾವು ಇಲ್ಲಿದೆ. ಕೆಲವು ವರ್ಷಗಳ ಹಿಂದೆ ದೇವಸ್ಥಾನಕ್ಕೆ ಕಮಲಾ ಅವರು ದೇಣಿಗೆ ಕೂಡ ನೀಡಿದ್ದರು. ಇದರ ವಿವರಗಳನ್ನು ದೇವಾಲಯದ ಶಾಸನದಲ್ಲಿ ಬರೆಸಲಾಗಿದೆ.
ಹೀಗಾಗಿ, ತುಳಸೇಂದ್ರಪುರಂ ಗ್ರಾಮದಲ್ಲಿನ ಕುಲದೈವಕ್ಕೆ ಅವರ ಸಂಬಂಧಿಕರು ಪೂಜೆ ಸಲ್ಲಿಸಿದ್ದಾರೆ. ಅಧ್ಯಕ್ಷೀಯ ಚುನಾವಣೆಯಲ್ಲಿ ಗೆಲ್ಲಬೇಕು ಮತ್ತು ದೇಶದ ಆಡಳಿತದ ಚುಕ್ಕಾಣಿ ಹಿಡಿಯಬೇಕು. ಭಾರತದ ಅಭಿವೃದ್ಧಿಗೆ ಸಹಕರಿಸಬೇಕು ಎಂದೆಲ್ಲಾ ಪ್ರಾರ್ಥನೆ ಸಲ್ಲಿಸಿದ್ದಾರೆ.
ಈ ಬಗ್ಗೆ ಈಟಿವಿ ಭಾರತ್ ಜೊತೆಗೆ ಮಾತನಾಡಿರುವ ಕಮಲಾ ಹ್ಯಾರಿಸ್ ಸೋದರ ಸಂಬಂಧಿ ಆನಂದ್, 2019ರಲ್ಲಿ ಕಮಲಾ ಹ್ಯಾರಿಸ್ ಅಮೆರಿಕದ ಉಪಾಧ್ಯಕ್ಷರಾಗಿ ಆಯ್ಕೆಯಾದಾಗ ಹಬ್ಬದಂತೆ ಆಚರಿಸಿದ್ದೆವು. ಅಧ್ಯಕ್ಷೀಯ ಚುನಾವಣೆಯಲ್ಲೂ ಅವರು ಗೆಲ್ಲುವುದು ಖಚಿತ. ಅಧ್ಯಕ್ಷರಾದ ಬಳಿಕ ಭಾರತದ ಅಭಿವೃದ್ಧಿಗೆ ಸಹಕರಿಸಬೇಕೆಂಬುದು ನಮ್ಮ ಆಸೆ ಎಂದರು.
ಇನ್ನೊಬ್ಬ ಸಂಬಂಧಿ ರೂಪದರ್ಶಿನಿ ಮಾತನಾಡಿ, ಅಮೆರಿಕ ಅಧ್ಯಕ್ಷೀಯ ಚುನಾವಣೆಯಲ್ಲಿ ಕಮಲಾ ಹ್ಯಾರಿಸ್ ಹೆಸರು ಪ್ರಸ್ತಾಪವಾಗಿರುವುದು ಸಂತಸ ತಂದಿದೆ. ಅವರು ಖಂಡಿತ ಗೆಲ್ಲುತ್ತಾರೆ. ಅವರಿಗಾಗಿ ದೇವರಲ್ಲಿ ಪ್ರಾರ್ಥಿಸುತ್ತೇವೆ. ಚುನಾವಣೆಯಲ್ಲಿ ಗೆದ್ದ ನಂತರ ಭಾರತಕ್ಕೆ ಬರಬೇಕು. ನಮ್ಮ ದೇಶದ ಅಭಿವೃದ್ಧಿಯನ್ನು ಬೆಂಬಲಿಸಲಿ ಎಂದರು.
ಕಮಲಾಗೆ ಭಾರತದ ಬಂಧ ಹೀಗಿದೆ?: ಕಮಲಾ ಹ್ಯಾರಿಸ್ ಅವರ ತಾಯಿ ಶ್ಯಾಮಲಾ. ಇವರ ಮೂಲ ಭಾರತದ ತಮಿಳುನಾಡು. ಶ್ಯಾಮಲಾ ಅವರ ತಂದೆ ಪಿ.ವಿ.ಗೋಪಾಲನ್ ಅವರು ಭಾರತದ ಸ್ವಾತಂತ್ರ್ಯ ಹೋರಾಟಗಾರಾಗಿದ್ದರು. 1950-60ರ ವೇಳೆ ಅಮೆರಿಕದ ಜಾಂಬಿಯಾ ಸರ್ಕಾರದಲ್ಲಿ ಭಾರತದ ವಲಸಿಗರ ನಿರ್ದೇಶಕರಾಗಿ ಕೆಲಸ ಮಾಡಿದ್ದರು. ವಲಸಿಗರ ರಕ್ಷಣೆಗಾಗಿ ತೆರಳಿದ್ದ ಗೋಪಾಲನ್ ಅವರು ಬಳಿಕ ಅಲ್ಲಿಯೇ ನೆಲೆಸಿದ್ದರು. ನಂತರ ಜಾಂಬಿಯಾದ 1ನೇ ಅಧ್ಯಕ್ಷ ಕೆನ್ನೆತ್ ಕೌಂಡಾಗೆ ಸಲಹೆಗಾರರಾಗಿದ್ದರು. 1960 ರ ದಶಕದಲ್ಲಿ ಭಾರತ ಸರ್ಕಾರದ ಜಂಟಿ ಕಾರ್ಯದರ್ಶಿಯಾಗಿಯೂ ಸೇವೆ ಸಲ್ಲಿಸಿದ್ದರು. ಗೋಪಾಲನ್ ಅವರ ಎರಡನೇ ಮಗಳಾಗಿದ್ದ ಶ್ಯಾಮಲಾ ಅವರು ಜಮೈಕಾದ ವ್ಯಕ್ತಿಯನ್ನು ವಿವಾಹವಾದರು. ಈ ದಂಪತಿಯ ಮಗಳೇ ಕಮಲಾ ಹ್ಯಾರಿಸ್.
ಇದನ್ನೂ ಓದಿ: ಅಮೆರಿಕ ಅಧ್ಯಕ್ಷೀಯ ಚುನಾವಣೆಯಿಂದ ಹಿಂದೆ ಸರಿದ ಬೈಡನ್: ಕಮಲಾ ಹ್ಯಾರಿಸ್‌ಗೆ ಬೆಂಬಲ - Joe Biden
