ನವದೆಹಲಿ: ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಬಜೆಟ್ ಭಾಷಣದಲ್ಲಿ ಹೊಸ ಪಿಂಚಣಿ ಯೋಜನೆಯನ್ನು ಘೋಷಿಸಿದ್ದಾರೆ. ಅಪ್ರಾಪ್ತ ಮಕ್ಕಳ ಹೆಸರಿನಲ್ಲೂ ಖಾತೆ ತೆರೆದು ಹಣದ ಉಳಿತಾಯ ಮಾಡಲು ಈ ಯೋಜನೆ ಅವಕಾಶ ನೀಡಲಿದೆ. ಅಂದರೆ, ಪೋಷಕರು ಮಕ್ಕಳ ಹೆಸರಿನಲ್ಲಿ ಈ ಯೋಜನೆಯನ್ನು ಆರಂಭಿಸಿ, ಹೂಡಿಕೆ ಮಾಡಬಹುದು.
ಈ ಯೋಜನೆಗೆ 'ಎನ್ಪಿಎಸ್ ವಾತ್ಸಲ್ಯ' ಎಂದು ಹೆಸರಿಸಲಾಗಿದೆ. ಹೆಸರೇ ಸೂಚಿಸುವಂತೆ ಮಕ್ಕಳ ಮೇಲಿನ ಪ್ರೀತಿ, ವಾತ್ಸಲ್ಯದಿಂದ ಅವರ ಭವಿಷ್ಯದ ದೃಷ್ಟಿಯಿಂದ ಅಪ್ರಾಪ್ತ ವಯಸ್ಸಿನಲ್ಲೇ ಅವರಿಗಾಗಿ ಹಣದ ಉಳಿತಾಯ ಮಾಡುವುದಾಗಿದೆ. ಮಕ್ಕಳು ಪ್ರಾಪ್ತರಾದ ಬಳಿಕ ಈ ಯೋಜನೆಯನ್ನು ರಾಷ್ಟ್ರೀಯ ಪಿಂಚಣಿ ಯೋಜನೆಯನ್ನಾಗಿ(ಎನ್ಪಿಎಸ್) ಮಾರ್ಪಾಡು ಮಾಡಲು ಅವಕಾಶ ನೀಡಲಾಗುತ್ತದೆ.
ಎನ್ಪಿಎಸ್ಗೆ ಅರ್ಹತೆ: ಎನ್ಪಿಎಸ್ ಯೋಜನೆ ಆರಂಭಿಸಲು ಫಲಾನುಭವಿಗಳು ಭಾರತದ ನಿವಾಸಿಯಾಗಿರಬೇಕು. ಅನಿವಾಸಿ ಅಥವಾ ವಿದೇಶಿ ಪ್ರಜೆಯಾಗಿದ್ದರೆ ಷರತ್ತುಗಳಿಗೆ ಬದ್ಧರಾಗಿರಬೇಕು. ಆನ್‌ಲೈನ್ ಅರ್ಜಿಯನ್ನು ಸಲ್ಲಿಸುವ ದಿನಾಂಕದಂದು ನಿಮ್ಮ ವಯಸ್ಸು 18 ರಿಂದ 70 ವರ್ಷಗಳ ನಡುವೆ ಇರಬೇಕು. ಚಂದಾದಾರರ ನೋಂದಣಿ ಫಾರ್ಮ್ (SRF) ಪ್ರಕಾರ, ಕೆವೈಸಿ ಮಾನದಂಡಗಳನ್ನು ಅನುಸರಿಸಬೇಕು. ಅಗತ್ಯವಿರುವ ಎಲ್ಲಾ ದಾಖಲೆಗಳನ್ನು ಕಡ್ಡಾಯವಾಗಿ ಸಲ್ಲಿಸಬೇಕು.
ಕೇಂದ್ರ ಸರ್ಕಾರವು ಸಶಸ್ತ್ರ ಪಡೆಗಳನ್ನು ಹೊರತುಪಡಿಸಿ ಎಲ್ಲಾ ಕೇಂದ್ರ ಸರ್ಕಾರಿ ನೌಕರರಿಗೆ ಎನ್ಪಿಎಸ್ ಖಾತೆ ಆರಂಭಕ್ಕೆ ಅವಕಾಶ ನೀಡಿದೆ. ಜನವರಿ 1, 2004 ರಂದು ಅಥವಾ ನಂತರ ನೇಮಕವಾದ ಎಲ್ಲಾ ಕೇಂದ್ರ ಸರ್ಕಾರಿ ನೌಕರರು ಎನ್ಪಿಎಸ್ ಯೋಜನೆಯಡಿ ಬರಬಹುದು.
ಖಾತೆ ಎಲ್ಲಿ ಆರಂಭಿಸಬಹುದು: ಮಕ್ಕಳ ಭವಿಷ್ಯವನ್ನು ಗಟ್ಟಿಗೊಳಿಸಲು ಈ ಹೊಸ ಸ್ಕೀಂ ಆರಂಭಿಸಲಾಗಿದೆ. ಇದನ್ನು ಅಂಚೆ ಕಚೇರಿಯಲ್ಲಾಗಲಿ ಅಥವಾ ರಾಷ್ಟ್ರೀಯ ಬ್ಯಾಂಕ್ನಲ್ಲಾಗಲಿ ರಾಷ್ಟ್ರೀಯ ಪಿಂಚಣಿ ಯೋಜನೆಯಡಿ(ಎನ್ಪಿಎಸ್) ವಾತ್ಸಲ್ಯ ಯೋಜನೆಯನ್ನು ಆರಂಭಿಸಬಹುದು. ಪ್ರತಿ ತಿಂಗಳು ಅಥವಾ ನಿಗದಿತ ಅಂತರದಲ್ಲಿ ಮಕ್ಕಳ ಪೋಷಕರು ಯೋಜನೆಗೆ ಹಣವನ್ನು ಪಾವತಿಸಬೇಕು.
ಎನ್ಪಿಎಸ್ ಯೋಜನೆ ಈಗಾಗಲೇ ಚಾಲ್ತಿಯಲ್ಲಿದೆ. ಆದರೆ, ಇದು 18 ವರ್ಷದ ಒಳಗಿನ ಮಕ್ಕಳಿಗೂ ಅನ್ವಯವಾಗಲಿದೆ. ಈಗಿರುವ ಎನ್ಪಿಎಸ್ ಪ್ರಾಪ್ತರಿಗೆ (18 ವರ್ಷ ಮೇಲ್ಪಟ್ಟ) ಮಾತ್ರ ಅನ್ವಯಿಸುತ್ತದೆ. ಇದು ಅಪ್ರಾಪ್ತ ವಯಸ್ಸಿನ ಮಕ್ಕಳಿಗೆ ಇರುವ ಸ್ಕೀಂ ಆಗಿರುವ ಕಾರಣ, ಬಳಿಕ ಇದನ್ನು ಸಾಮಾನ್ಯ ಎನ್ಪಿಎ ಯೋಜನೆಯನ್ನಾಗಿ ಬದಲಾಯಿಸಿಕೊಳ್ಳಬಹುದು.
ಈ ಉಳಿತಾಯಕ್ಕೆ ತೆರಿಗೆ ವಿನಾಯ್ತಿ: ಯಾವುದೇ ಸರ್ಕಾರಿ ಯೋಜನೆಗಳು ತೆರಿಗೆ ವಿನಾಯ್ತಿಯಿಂದ ಕೂಡಿರುತ್ತವೆ. ಅದರಂತೆ ಇದು ಕೂಡ ತೆರಿಗೆ ಮುಕ್ತವಾಗಿದೆ. ಕನಿಷ್ಠ ವಯಸ್ಸಿನಿಂದ ಗರಿಷ್ಠ ವಯಸ್ಸಿಗೆ ಬರುವಷ್ಟರಲ್ಲಿಗೆ ಯೋಜನೆಯ ಮೊತ್ತವು ದೊಡ್ಡದಾಗಿ ಅದು ಮಕ್ಕಳ ಭವಿಷ್ಯಕ್ಕೆ ನೆರವಾಗಲಿದೆ. ಜೊತೆಗೆ ಇದಕ್ಕೆ ಬಡ್ಡಿ ದರವೂ ಅಧಿಕ ಇರುವ ಕಾರಣ ಮೊತ್ತವು ದುಪ್ಪಟ್ಟಾಗಲಿದೆ.
