ನವದೆಹಲಿ: ಕಳೆದ ನಾಲ್ಕು ದಿನಗಳಿಂದ ವಿಮಾನಯಾನ ಸಂಸ್ಥೆಗಳಿಗೆ ಹುಸಿ ಬಾಂಬ್ ಕರೆಗಳು ಬರುತ್ತಿದ್ದು, ಇದೀಗ ವಿಸ್ತಾರಾ ಏರ್ಲೈನ್ಸ್ನ ಮೂರು ವಿಮಾನಗಳಿಗೆ ಕೂಡ ಈ ಬೆದರಿಕೆ ಕರೆ ಬಂದಿದೆ. ಇದರ ಪರಿಣಾಮ ಶನಿವಾರ ಮುನ್ನೆಚ್ಚರಿಕಾ ಕ್ರಮವಾಗಿ ವಿಮಾನವೊಂದನ್ನು ಫ್ರಾಂಕ್ಫರ್ಟ್ಗೆ ಮಾರ್ಗ ಬದಲಾವಣೆ ಮಾಡಲಾಗಿದೆ.
ಈ ಕುರಿತು ಹೇಳಿಕೆ ಪ್ರಕಟಿಸಿರುವ ವಿಸ್ತಾರ ಏರ್ಲೈನ್ಸ್ ವಕ್ತಾರರು, ದೆಹಲಿಯಿಂದ ಕಾರ್ಯಾಚರಣೆ ನಡೆಸುತ್ತಿದ್ದ ಮೂರು ವಿಮಾನಗಳಿಗೆ ಶುಕ್ರವಾರ ಸಾಮಾಜಿಕ ಜಾಲತಾಣಗಳ ಮೂಲಕ ಬೆದರಿಕೆ ಕರೆ ಬಂದಿದೆ. ಶಿಷ್ಟಾಚಾರ ಅನುಸಾರ ತಕ್ಷಣಕ್ಕೆ ಅಧಿಕಾರಿಗಳು ಸಂಬಂಧಪಟ್ಟ ಅಧಿಕಾರಿಗಳಿಗೆ ಈ ಕುರಿತು ಎಚ್ಚರಿಸಿದ್ದಾರೆ.
ದೆಹಲಿಯಿಂದ ಲಂಡನ್, ಪ್ಯಾರಿಸ್ ಮತ್ತು ಹಾಂಕ್ಕಾಂಗ್ಗೆ ಹೊರಟಿದ್ದ ಮೂರು ವಿಮಾನಗಳು ಹುಸಿ ಬಾಂಬ್ ಸಂದೇಶವನ್ನು ಸ್ವೀಕರಿಸಿವೆ.
ದೆಹಲಿಯಿಂದ ಲಂಡನ್ಗೆ ಹೊರಟಿದ್ದ ವಿಸ್ತಾರ ವಿಮಾನ ಯುಕೆ 17 ವಿಮಾನವನ್ನು ಬಾಂಬ್ ಬೆದರಿಕೆ ಕರೆ ಹಿನ್ನೆಲೆ ಮುನ್ನೆಚ್ಚರಿಕಾ ಕ್ರಮವಾಗಿ ಫ್ರಾಂಕ್ಫರ್ಟ್ಗೆ ಮಾರ್ಗ ಬದಲಾಯಿಸಲಾಗಿದೆ. ವಿಮಾನವು ಫ್ರಾಂಕ್ಫರ್ಟ್ ವಿಮಾನ ನಿಲ್ದಾಣದಲ್ಲಿ ಸುರಕ್ಷಿತವಾಗಿ ಇಳಿಯುತ್ತಿದ್ದಂತೆ ಅಧಿಕಾರಿಗಳು ಅಗತ್ಯ ತಪಾಸಣೆ ನಡೆಸಿ, ಬಳಿಕ ಮುಂದಿನ ಪ್ರಯಾಣಕ್ಕೆ ಹಸಿರು ನಿಶಾನೆ ತೋರಿಸಿದರು. ಬಳಿಕ ವಿಮಾನ ಲಂಡನ್ಗೆ ಶುಕ್ರವಾರ ರಾತ್ರಿ 11.40 (ಅಲ್ಲಿನ ಕಾಲಮಾನ) ಲ್ಯಾಂಡ್ ಆಗಿದೆ ಎಂದು ತಿಳಿಸಿದರು.
ದೆಹಲಿ ಮತ್ತು ಪ್ಯಾರಿಸ್ ನಡುವಿನ ಯುಕೆ 21 ವಿಮಾನ ಕೂಡ ಸುರಕ್ಷಿತವಾಗಿ ಪ್ಯಾರಿಸ್ನ ಚಾರ್ಲ್ಸ್ ಡೆ ಗೌಲ್ ವಿಮಾನ ನಿಲ್ದಾಣಕ್ಕೆ ಇಳಿದಿದೆ. ಬಳಿಕ ವಿಮಾನವನ್ನು ಕಡ್ಡಾಯ ಸುರಕ್ಷಿತಾ ಪರೀಕ್ಷೆಗೆ ಒಳಪಡಿಸಲಾಗಿದ್ದು, ಬಳಿಕ ಕಾರ್ಯಾಚರಣೆ ಆರಂಭಿಸಿತು.
ಮತ್ತೊಂದು ವಿಮಾನ ಯುಕೆ 161 ದೆಹಲಿ - ಹಾಂಕ್ಕಾಂಗ್ ವಿಮಾನ ಕೂಡ ಹಾಂಕ್ ಕಾಂಗ್ನ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಸುರಕ್ಷಿತವಾಗಿ ಇಳಿದಿದ್ದು, ಎಲ್ಲಾ ಸುರಕ್ಷತಾ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ.
ಈ ನಡುವೆ ಅಕಾಸಾ ಏರ್ನ ಕ್ಯೂಪಿ 1366 ಬೆಂಗಳೂರು- ಮುಂಬೈ ವಿಮಾನ ಕೂಡ ಶುಕ್ರವಾರ ಇನ್ನೇನು ಹೊರಡುವ ಮುನ್ನ ಬೆದರಿಕೆ ಸಂದೇಶ ಪಡೆದಿತ್ತು. ತಪಾಸಣೆ ಬಳಿಕ ಅದು ತನ್ನ ಪ್ರಯಾಣ ನಡೆಸಿತು ಎಂದು ಸಂಸ್ಥೆ ಶನಿವಾರ ತಿಳಿಸಿದೆ.
ಸುರಕ್ಷತೆ ಮತ್ತು ಭದ್ರತೆ ಕಾರ್ಯದ ಹಿನ್ನೆಲೆ ಎಲ್ಲಾ ಪ್ರಯಾಣಿಕರನ್ನು ವಿಮಾನದಿಂದ ಕೆಳಗಿಳಿಸಬೇಕಾಗಿ ಬಂದಿತು. ಈ ವೇಳೆ ಅಗತ್ಯ ಕ್ರಮಗಳನ್ನು ಅಧಿಕಾರಿಗಳು ನಡೆಸಿದರು. ಪ್ರಯಾಣಿಕರಿಗೆ ಅನಾನೂಕುಲತೆ ತಪ್ಪಿಸಲು ಸಾಧ್ಯವಾದ ಎಲ್ಲಾ ಕ್ರಮವನ್ನು ತಂಡ ನಡೆಸಿತು. ಕಳೆದ ಕೆಲವು ದಿನಗಳಿಂದ ಭಾರತದ 40ಕ್ಕೂ ಹೆಚ್ಚು ವಿಮಾನಗಳು ಈ ರೀತಿಯ ಹುಸಿ ಬಾಂಬ್ ಕರೆಗಳನ್ನು ಪಡೆದಿವೆ ಎಂಬ ಮಾಹಿತಿಯನ್ನು ನೀಡಿದರು.
ಇದನ್ನೂ ಓದಿ: ಹೈದರಾಬಾದ್: ಮೆಟ್ರೋ ನಿಲ್ದಾಣದ ಬಳಿ ಕಾಣಿಸಿಕೊಂಡ ಚಿರತೆ, ಜನರಲ್ಲಿ ಆತಂಕ
